Баянгол дүүргийн Эрүүгийн хэргийн анхан шатны шүүхийн Ерөнхий шүүгч О.Жанчивнямбуу даргалж

хуралдааны тэмдэглэлийг нарийн бичгийн дарга Н.Өсөхжаргал хөтлөн

улсын яллагч А.Марал

шүүгдэгч О.Ш

шүүгдэгч Т.Э

хохирогч А.Ж нарыг оролцуулан тус шүүхийн хуралдааны танхимд нээлттэй хийсэн шүүх хуралдаанаар Баянгол дүүргийн прокурорын газраас Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж ирүүлсэн эрүүгийн 2005005110216 дугаартай хэргийг 2020 оны 3 дугаар сарын 06-ны өдөр хүлээн авч хянан хэлэлцэв.

 

1. Шүүгдэгч: Монгол Улсын иргэн, 1997 оны 2 дугаар сарын 09-нд Говь-Алтай аймагт төрсөн, ... настай, эрэгтэй, дээд боловсролтой, банкны эдийн засагч мэргэжилтэй, ...д теллер ажилтай, ам бүл 4, эхнэр, хадам эцэг, эх нарын хамт Баянгол дүүргийн 12 дугаар хороо, 6 бичил хороолол Хасбаатарын гудамж 0-0 тоотод оршин суух, ялгүй, ДЖ000000 дугаарын регистртэй, Сайхан зуслан овогт О.Ш

 

2. Шүүгдэгч: Монгол Улсын иргэн, 1991 оны 5 дугаар сарын 28-нд Хэнтий аймагт төрсөн, ... настай, эрэгтэй, дээд боловсролтой, нягтлан бодогч мэргэжилтэй, ...-д эдийн засагч ажилтай, ам бүл 4, эхнэр 2 хүүхдийн хамт Баянгол дүүргийн 12 дугаар хороо, 6 бичил хороолол Хасбаатарын гудамж 0-0 тоотод оршин суух, ялгүй, СЩ000000 дугаарын регистртэй, Орц овогт Т.Э

Прокурорын яллах дүгнэлтэд бичигдсэнээр;

Шүүгдэгч О.Ш, Т.Э нар бүлэглэж 2020 оны 1 дүгээр сарын 24-нөөс 25-нд шилжих шөнө Баянгол дүүргийн 12 дугаар хороо, 12 дугаар байрны орцонд хохирогч А.Ж-ын нүүрэн тус газар цохиж биед хамрын ясны баруун хажуу хананы далд хугарал, таславчийн мурийлт, тархи доргилт, баруун хөмсөгт няцарсан шарх, зулгаралт хамарт цус хуралт гэмтэл үүсгэж, түүний эрүүл мэндэд хөнгөн хохирол учруулсан буюу “хүний эрүүл мэндэд хөнгөн хохирол учруулсан” гэх гэмт хэрэгт холбогджээ.

 

Шүүгдэгч О.Ш шүүх хуралдаанд мэдүүлэхдээ:

Хүн зодсон гэм буруугаа хүлээн зөвшөөрч байгаа тул дахин мэдүүлэхгүй. Хохиролд гэж миний зүгээс эхний баримтаар гарсан 482.300 төгрөгийг төлсөн. Үйлдсэн хэрэгтээ гэмшиж, хохирогчоос уучлалт гуйя. Цаашид гарах эмчилгээний зардлыг төлөх болно гэв.

 

Шүүгдэгч Т.Э шүүх хуралдаанд мэдүүлэхдээ:

Миний хувьд дахин мэдүүлэг өгөх шаардлагагүй, гэм буруугаа хүлээн зөвшөөрнө. Хэрэг гарсны дараахан нь хохирогчтой уулзаад уучлалт гуйсан. Сүүлчийн баримтаар гарсан эмчилгээний зардлын 350.000 төгрөгийг би төлсөн байгаа. Эмчилгээний зардал гарсан тохиолдолд төлөх болно гэв.

 

Хохирогч А.Ж шүүх хуралдаанд мэдүүлэхдээ:

Би Японд сурдаг юм. Найз охинтойгоо үл ойлголцсоны улмаас тэр орой хадам болох ахтайгаа муудалцсан. Гэтэл энэ хоёр залуу намайг зодсон. Би эдгээр залуусыг өмнө нь таньж мэдэхгүй. Зодуулсанаас болж нүүрэндээ сорвитой үлдэж байгаад гомдолтой байна. Гэхдээ эдгээр залууст боломжит хэлбэрээр хамгийн бага ял оногдуулж өгөөч гэж шүүхээс хүсэх байна. Хохирол төлбөрийн хувьд гарсан зардлын мөнгийг авсан. Харин цаашид гарах эмчилгээний буюу хагалгаанд ороход 670.000 төгрөг болно гэсэн. Нэмээд эмнэлэгт хэвтвэл нийт 1.5 сая орчим төгрөгийг нэхэмжилнэ гэв.      

        ТОДОРХОЙЛОХ нь:

 

Баянгол дүүргийн прокурорын газраас нэр бүхий шүүгдэгч нарт холбогдуулан тэдгээрийг хүний эрүүл мэндэд хөнгөн хохирол санаатай учруулах гэмт хэргийг бүлэглэж үйлдсэн гэж Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж хэргийг шүүхэд ирүүлжээ.

 

Хавтаст хэрэгт авагдсан шийтгэх болон цагаатгах талын нотлох баримтуудыг шүүх шинжлэн судлахад мөрдөн шалгах ажиллагааны явцад энэ хэрэгт хохирогчоор тогтоогдсон

хохирогч А.Ж “… 2020 оны 1 дүгээр сарын 24-нөөс 25-нд шилжих шөнө 00 цагийн орчимд найз охин Индраатай уулзах гэж гэрт нь очсон. Гэрт нь очиход дүү ээж нар нь байсан бөгөөд манай найз охин байгаагүй. Гэтэл 10-аад минутын дараа найз охин жаахан халамцуу байхаар нь бид хоёр маргалдсан. Намайг яв гэхээр нь би гарахдаа Индрагийн гар утсыг аваад гарсан. Хажуугийн орцны үүдэнд сууж байсан. Тэр үед Индра ах Мөнх-Оргил нар ирсэн. Мөнх-Оргил над дээр ирээд яагаад хүүхдийн утас авч гараад байгаа юм бэ? яагаад хэрэлдээд байгаа юм бэ? гэсэн. Тэгэхээр нь би гар утсыг нь өгтөл миний нүүр рүү нэг удаа гараараа цохисон, би газар унасан. Миний зүүн талын гуя хэсэг рүү хөлөөрөө 2-3 удаа жийсэн. Тэр үед цаанаас хүмүүс шуугилдаад юун зодоон болоод байгаа юм бэ гэсэн. Мөнх-Оргил ах нөгөө хүмүүст хандан та нарт хамаагүй гээд тайлбарлаад хэлж байтал нөгөө хүмүүс намайг сугадаж босгоод орц руу түлхэж оруулаад унагааж байгаад дээрээс 3-5 орчим дэвссэн. Тэгэхээр нь би орилсон чинь Мөнх-Оргил ах хойноос орж ирэхэд намайг зодож байсан хоёр залуу гараад зугтаасан. Тэр үед би ухаан балартаад нүд бүрэлзээд байж байсан чинь энэ хүний хөмсөг сэтэрсэн байна та нар нааш ир гээд намайг зодож байсан хоёр залууд хандан хэлж байсан. Мөнх-Оргил ах намайг түшиж босгоод цагдаад дуудлага өгсөн. ... намайг үл таних хоёр залуу орц руу авч орж гадна, болон дотор хаалганы хэсэгт намайг зодож уг гэмтлийг учруулсан. Өөр хүн гар хүрээгүй, эмчилгээ хийлгэсэн баримт байхгүй, эм авсан нийт 561.800 төгрөгийн баримт байгаа” /хх-н 12-13, 26/ гэж,                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                             

гэрч Н.И “… Ж руу манай ах залгаад манай дүүгийн гар утсыг аваад ир гэж хэлсэн. Тэгээд бид нар байрны гадаа машин дотроо сууж байтал А.Ж манай орц руу ирж байсан. Тэгэхээр нь манай ах хараад машинаасаа буугаад А.Ж дээр очоод миний дүүг яагаад дарамтлаад байгаа юм бэ чадахгүй бол та хоёр болих хэрэгтэй гэж хэлээд мөрөн дээгүүр нь гараа давуулаад юм яриад явсан. Тэгсэн чинь А.Ж орилоод газар уначихсан. Тэр үед манай ах чи босооч ээ гээд хөл рүү нь түлхсэн. Тэгсэн чинь 3 дугаар орцны үүдэнд тамхи татаад зогсож байсан үл таних 2 залуу манай ах дээр ирээд А.Ж-ыг өргөж босгон сугадаад орц руу дагуулаад орсон. Би бодохдоо тэр хоёр залууг А.Ж-д тусалж байна гэж ойлгосон. Тэгээд удалгүй орцноос А.Ж уйлаад гар утсаар яриад байсан. Тэгээд удалгүй цагдаа нар ирсэн. Мөнх-Оргил ах А.Ж-ыг зодож цохисон зүйл байхгүй А.Ж өөрөө хүнээс айхаараа худлаа жүжиглээд орилоод газар уначихдаг зантай” /хх-н 18-19/ гэж,

гэрч Н.М “ ... би А.Ж-д хандан чи миний дүүг битгий дээрэлхээд байгаарай, өмөөрөх хүн байдаг юм шүү гэж хэлээд 2 удаа бөгс рүү нь өшиглөсөн. Тэгсэн чинь газар сөхөрч суугаад орилж эхэлсэн. Тэгээд орилох үед цаана орцны үүдэнд байсан 2 пацаан юу болов гэж гүйж ирэхээр нь би энэ залуу манай дүүг дээрэлхсэн юм гэж хэлсэн. Тэгсэн чинь нөгөө хоёр пацаан А.Ж-ыг сугадаад орц руу аваад орсон. Тэгэхээр нь би өөрийнхөө машин руу явж байтал нөгөө хоёр залуу орцноос гарч ирсэн, хойноос нь А.Ж намайг зодчихпоо эмнэлэг дуудаач ээ гээд гараад ирсэн. Тэгээд би А.Ж дээр очиход би юм харахгүй байна гэж хэлсэн. Би А.Ж-ыг орцны шалан дээрээс босгоод орцноос гаргасан. Тэгэхэд юун танихгүй хоёр залуугаар намайг зодуулаад байгаа юм бэ хэлэхээр нь би энэ хоёр залуу чамтай хамт яваагүй юм уу, би чамтай хамт явж байгаа юм байна гэж бодсон гэж хэлээд уг хоёр залууд хандан би та хоёртой хамааралгүй биз дээ гэж хэлсэн чинь уг хоёр залуу хамааралгүй гэж хэлээд зугтаагаад явсан. Энэ үед А.Ж утсаараа цагдаа дуудсан” /хх-н 21-22/ гэж,

гэрч Г.У “... 2020 оны 1 дүгээр сарын 24-нөөс 25нд шижлжих шөнө би Шыг гэр рүүгээ ирж байна гэхээр нь эгчийнхээсээ гараад өөдөөс тосоод 12 дугаар байрны байрны булан дээр таараад бид хоёр маргалдсан. Орцны үүдэнд хүрч ирээд тамхи татаад зогсож байтал цагаан өнгийн пробокс машинаас хоёр хүн бууж ирээд чи миний дүүг дээрэлхэдэг хэн бэ гээд цохиод байх шиг байсан. Тэр хүн аллаа гээд орилоод байсан. Тэгтэл машинаас дахин нэг хүн бууж ирээд нөгөө зодож байгаа хүнийг салгасан. Тэр үед цохиж байсан хүн нь зодсон хүнээ элдвээр харааж зүхээд байсан. Тэгээд Э, Ш нар нөгөө зодоон болж байгаа газар руу очоод яагаад байгаа юм бэ гээд зодож байсан залуучуудыг салгасан. Тэгээд зодуулж байсан залууг өргөөд орц руу оруулах гэтэл нөгөө залуу нь ёо ёо аллаа гээд орилоод байсан. Би Ш, Э нарт хандан та хоёр яагаад байгаа юм бэ болиоч ээ гэж орилсон. Тэгсэн чинь Э, Ш нар над дээр ирэх үед эхлээд уг залууг зодож байсан хүн нь та хоёр зодоод хөмсгийг нь сэтэлчихлээ гэж байсан” /хх-н 128-129/ тус тус мэдүүлжээ.

 

Түүнчлэн хохирогч А.Ж-ын гэмтэлтэй холбоотой Шүүхийн шинжилгээний үндэсний хүрээлэнгийн шинжээчийн “А.Ж-ын биед хамрын ясны баруун хажуу хананы далд хугарал, таславчийн мурийлт, тархи доргилт, баруун хөмсөгт няцарсан шарх, зулгаралт хамарт цус хуралт гэмтэл топгоогдпоо. Дээрх гэмтэл нь мохоо зүйлийн 1-2 удаагийн үйлчлэлээр үүсгэгдэнэ. Шинэ гэмтэл байна. Дээрх гэмтэл нь амь насанд аюултай гэмтэлд хамаарахгүй. Эрүүл мэндийг түр хугацаагаар сарниулах тул гэмтлийн зэрэг тогтоох журмын 2.4.1-т зааснаар гэмтлийн хөнгөн зэрэгт хамаарна. Гэмтэл авсны дараа биеэ даан үйлдэл хийх чадвартай байна. Цаашид ерөнхий хөдөлмөрийн чадварын тогтонги алталтанд нөлөөлөхгүй” гэсэн 1926 тоот /хх-н 44/ дүгнэлт гарсан байна.

 

Дээрх бичгийн баримтууд нь шүүгдэгч О.Ш, Т.Э нарын гэм буруутайг нотлох бөгөөд прокуророос зүйлчилж ирүүлсэн хэргийн зүйлчлэл хэргийн бодит байдалд нийцсэн, Эрүүгийн хуулийг зөв хэрэглэсэн, эрүүгийн хэрэг хянан шийдвэрлэх ажиллагааг ноцтой зөрчсөн зөрчилгүй, хавтаст хэрэгт авагдсан бичгийн нотлох баримтуудыг хуульд заасан үндэслэл, журмын дагуу цуглуулж, бэхжүүлсэн байна гэж шүүх дүгнээд

шүүгдэгч О.Ш, Т.Э нарыг “хүний эрүүл мэндэд хөнгөн хохирол санаатай учруулах гэмт хэргийг бүлэглэж үйлдсэн” буюу Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэрэгт гэм буруутайд тооцлоо.

 

Шүүхээс шүүгдэгч О.Ш, Т.Э нарт ял оногдуулахдаа “Эрүүгийн хариуцлага нь тухайн хүний ... үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байна” гэсэн Шударга ёсны зарчмыг баримтлав.

Тухайлбал шүүгдэгч нарын хувийн байдал, хохирлыг төлж барагдуулсан, үйлдсэн хэрэгтээ гэмшиж байгаа зэргийг харгалзав.

 

Хохирол төлбөрийн хувьд:

Хохирогч А.Ж-ын эмчилгээтэй холбоотой зардлыг шүүгдэгч нар төлж барагдуулсан байна. Харин шүүх хуралдааны явцад хохирогч “... цаашид гарах эмчилгээний буюу хагалгаанд ороход 670.000 төгрөг болно гэсэн. Нэмээд эмнэлэгт хэвтвэл нийт 1.5 сая орчим төгрөгийг нэхэмжилнэ” гэснийг хангаж шийдвэрлэх боломжгүй юм. Учир нь, ирээдүйд гарах зардлыг урьдчилан шийдвэрлэх хуулийн зохицуулалт байхгүйгээс гадна, эмчилгээнд чухам хэдэн төгрөг гарахыг урьдчилан дүгнэж болохгүй. Харин хохирогч А.Ж-ын нэхэмжлэл гаргах эрхийг нээлттэй үлдээх нь зүйтэй.

 

Шүүгдэгч О.Ш, Т.Э нар цагдан хоригдсон хоноггүй, энэ хэрэгт эд мөрийн баримтаар хураагдсан болон битүүмжлэгдсэн хөрөнгө үгүй болно.

 

Нэр бүхий шүүгдэгч нар шүүх хуралдаанд өмгөөлөгчгүйгээр оролцох хүсэлтийг бичгээр гаргасан нь Эрүүгийн хэрэг хянан шийдвэрлэх тухай хуулийн 34.10 дугаар зүйлийн 4 дэх хэсгийн заалтад нийцнэ.

 

Монгол Улсын Шүүхийн тухай хуулийн 31 дүгээр зүйлийн 31.3.1, Эрүүгийн хэрэг хянан шийдвэрлэх тухай хуулийн 36 дугаар бүлгийн 36.1 дүгээр зүйл, 36.2 дугаар зүйл, 36.6 дугаар зүйл, 36.8 дугаар зүйл, 36.10 дугаар зүйл, 36.13 дугаар зүйл, 37 дугаар бүлгийн 37.1 дүгээр зүйл, 37.2 дугаар зүйлд заасныг тус тус удирдлага болгон

                                                                                                                  ТОГТООХ нь:

 

1. Сайхан зуслан овогт О.Ш, Орц овогт Т.Э нарыг “хүний эрүүл мэндэд хөнгөн хохирол санаатай учруулах гэмт хэргийг бүлэглэж үйлдсэн” гэмт хэрэгт гэм буруутайд тооцсугай.

 

2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар О.Ш, Т.Э нарыг тус бүр 550 нэгжтэй тэнцэх хэмжээний буюу 550.000 төгрөгөөр торгох ялаар шийтгэсүгэй.

 

3. О.Ш, Т.Э нар торгох ялыг биелүүлээгүй бол Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар шүүх биелэгдээгүй торгох ялын 15 нэгжтэй тэнцэх хэмжээний төгрөгийг нэг хоногоор тооцож хорих ялаар солихыг тэдгээрт мэдэгдсүгэй.

 

4. Хохирогч А.Ж гомдолтой гэснийг дурдаж, түүний Иргэний хэрэг хянан шийдвэрлэх тухай хуульд заасны дагуу нэхэмжлэл гаргах эрхийг нээлттэй үлдээсүгэй.

 

5. О.Ш, Т.Э нар цагдан хоригдсон хоноггүй, энэ хэрэгт эд мөрийн баримтаар хураагдсан болон битүүмжлэгдсэн хөрөнгө үгүйг тус тус дурдсугай.

 

6. Шийтгэх тогтоол танилцуулан сонсгосноор хүчинтэй болох бөгөөд тогтоолыг эс зөвшөөрвөл шийтгэх тогтоол гардуулснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд шүүгдэгч, өмгөөлөгч, хохирогч нар давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

7. Шийтгэх тогтоолд эрх бүхий этгээд давж заалдах гомдол гаргасан, улсын яллагч эсэргүүцэл бичвэл тогтоолын биелэлтийг түдгэлзүүлж, тогтоол биелүүлэх хүртэл О.Ш, Т.Э нарт урьд авсан “хувийн баталгаа гаргах” тухай таслан сэргийлэх арга хэмжээг хэвээр үргэлжлүүлсүгэй.  

 

 

 

 

                                    ДАРГАЛАГЧ,

                         ЕРӨНХИЙ ШҮҮГЧ                          О.ЖАНЧИВНЯМБУУ