2020       01          07                                      2020/ШЦТ/09

                                            МОНГОЛ УЛСЫН НЭРИЙН ӨМНӨӨС

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

-шүүх хуралдааны нарийн бичгийн дарга Г.Ган-Эрдэнэ

-улсын яллагчаар Д.Нэргүй

-хохирогч М.Өлзийцэцэг

-шүүгдэгчийн өмгөөлөгч М.Мэндсүрэн

-шүүгдэгч П.Л нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Х овогт П.Л-д холбогдох эрүүгийн 1934010630533 дугаартай хэргийг 2019 оны 12 дугаар сарын 27-ны өдөр хүлээн авч хянан хэлэлцэв.

Шүүгдэгчийн биеийн байцаалт:

Монгол Улсын иргэн, 1958 оны 12 дугаар сарын 15-ны өдөр Төв аймгийн Эрдэнэ суманд төрсөн, 61 настай, эрэгтэй, бүрэн бус дунд боловсролтой, мэргэжилгүй, малчин, ам бүл 7, эхнэр хүүхдүүдийн хамт Төв аймгийн Эрдэнэ сумын Чулуут 2 дугаар багийн нутаг Зүүнбаян гэх газар оршин суух, улсаас авсан авъяа шагналгүй, ял шийтгэл эдэлж байгаагүй гэх Х овогт П.Л /РД:__________/

Холбогдсон хэргийн талаар /яллах дүгнэлтэд дурдагдсанаар/

Яллагдагч П.Л  нь 2019 оны 11 дүгээр сарын 06-ны өдөр Төв аймгийн Эрдэнэ сумын Чулуут 2 дугаар багийн нутагт өөрийн гэртээ “хувийн таарамжгүй харьцааны” улмаас М.Өлзийцэцэгтэй маргалдаж, улмаар нүүрэн тус газар нь гараараа цохиж эрүүл мэндэд нь хөнгөн хохирол учруулсан гэмт хэрэгт холбогджээ.

ТОДОРХОЙЛОХ нь:

Шүүхийн хэлэлцүүлэгт:

Шүүгдэгч П.Л  мэдүүлэхдээ: “Мөрдөн байцаалтын шатанд үнэн зөв мэдүүлэг өгсөн тул дахин мэдүүлэг өгөхгүй” гэв.

Хохирогч М.Өлзийцэцэг мэдүүлэхдээ: “Л  ахыг би жаахан хүүхэд байхаасаа өмнө мэддэг. Би сүүний мөнгө өгөх гээд гэрт байж байсан. Хүүхэд нь орж ирээд Өөдсөө үхрийнхээ баасыг овоолоорой гэж хэлсэн. Би  танай үхрийн баасыг овоолох завгүй гэтэл харин хүү нь чадахгүй пизда минь гэж хэлсэн. Юу гэсэн үг юм танай үхэр манай гадаа сар гаруй боллоо чи өөрөө надтай  хамт ачвал ач гэж хэлээд танай өвөлжөө рүү үхрээ  аваачвал чи уурлана биз дээ гэхэд хүү нь уурлаад босож  ирсэн. Би танай өвөлжөө рүү хонио гаргана гэж хэлсэн чинь Л ах миний толгой руу цохиж, дахин намайг дарж унагаагаад 2 цохиж, элэг рүү өвдгөөрөө элэгдээд эхнэр нь хориход эхнэрийнхээ 2 талаар намайг дахин 2 удаа цохисон. Чам шиг муу гичийг би ална гээд дайраад мөн хүү нь чамайг нөхөртэй чинь хамт ална гэж хашгирч байсан. Би гарах гэтэл Л эхнэрийнхээ араас миний нүд хэсэгт хүчтэй  цохисон. Эхнэр нь намайг биеэрээ хааж байж  гэрээсээ  гаргасан. Би гэрээс нь гараад ирсэн чинь Л  хүүтэйгээ танай нөхрийг чинь чамтай хамт ална гээд аав хүү 2 мотоцикль дээрээ сундлаад явсан. Энэ хүнийг цохисноор би нүдэндээ их хүнд гэмтэл авсан хагалгаанд ороод 1 сар гаруй болж байна. Энэ хугацаанд надаас уучлалт гуйгаагүй” гэв.

Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хохирогч М.Өлзийцэцэгийн мэдүүлэг /хх-ийн 17-19 тал/, шүүх эмнэлгийн 2019 оны 11 дүгээр сарын 11-ний өдрийн №777 дугаартай шинжээчийн дүгнэлт /хх-ийн 28-29 тал/, гэрч С.Гансүхийн мэдүүлэг /хх-ийн 20-21 тал/, шүүгдэгч П.Л-ийн мэдүүлэг /хх-ийн 20-24 тал/, гэрч Л.Нямбаярын мэдүүлэг /хх-ийн 25 тал/, ял шалгах хуудас /хх-ийн 43 тал/, оршин суугаа хаягийн тодорхойлолт /хх-ийн 49 тал/, Төв аймгийн Эрдэнэ сумын 2 дугаар багийн Засаг даргын тодорхойлолт /хх-ийн 51 тал/, хохирогч М.Өлзийцэцэгийн хохирлын баримтууд /хх-ийн 73-88 тал/ зэрэг болно.

Шүүгдэгч П.Л нь 2019 оны 11 дүгээр сарын 06-ны өдөр Төв аймгийн Эрдэнэ сумын Чулуут 2 дугаар багийн нутагт өөрийн гэртээ “хувийн таарамжгүй харьцааны” улмаас М.Өлзийцэцэгтэй маргалдаж, улмаар нүүрэн тус газар нь гараараа цохиж эрүүл мэндэд нь хөнгөн хохирол учруулсан болох нь:

• Хохирогч М.Өлзийцэцэгийн компьютер томографийн шинжилгээ /хх-ийн 30-32 тал/
• Эрүүгийн хэрэг үүсгэж яллагдагчаар татах тухай прокурорын тогтоол /хх-ийн 38 тал/
• Хохирогч М.Өлзийцэцэгийн мөрдөн байцаалтын шатанд болон шүүхийн шатанд гаргаж өгсөн хохирлын баримтууд /хх-ийн 73-88 тал/
• Шүүх эмнэлгийн 2019 оны 11 дүгээр сарын 11-ний өдрийн №777 дугаартай “М.Өлзийцэцэгийн биед зүүн нүдний ухархайн ясны хугарал, зүүн нүдний зовхинд цус хуралт, зүүн нүдний дээд, доод зовхи, зүүн чамархайд зөөлөн эдийн няцралт гэмтэл тогтоогдлоо. Дээрх гэмтэл нь шинэ гэмтэл байна. Шүүх эмнэлгийн гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар алдагдуулах тул гэмтлийн хөнгөн зэрэгт хамаарна...” гэх дүгнэлт /хх-ийн 28-29 тал/
• Хохирогч М.Өлзийцэцэгийн мөрдөн байцаалтын шатанд мэдүүлсэн: “Би 2019 оны 11 дүгээр сарын 06-нд 14 цагийн үед саахалт айлын Л-д алга болсон ямаагаа сураглах гээд бас 2 литр сүүний мөнгө өгөх гээд очсон...би очоод алга болсон ямаагаа асуутал Холынчимэг надад цай хийж өгсөн, тэгээд хүү Нямбаяр нь үхрийн баасаа овоолчих би очоод машинаар очоод ачаад өгье гэж хэлсэн, тэгэхээр нь би баас овоолох зав алга байна, чи очоод хамчихаад авъя гэж хэлэхэд тэгсэн чинь надруу пизда минь хүрз бариад танай гадаа очоод баасыг чинь арилгаад байж байх уу гэж хэлсэн, тэгэхээр нь би “энэ чинь танай үхрийн баас шүү дээ гээд хэлэхэд Нямбаяр би арилгаж чадахгүй гэж хэлсэн, тэгээд бид хоёр хэрэлдсэн. Тэгээд би танай өвөлжөөрүү хонио гаргавал чи уурлна биз дээ гээд хэлтэл аав Л  нь баруун гараараа миний толгой руу гэнэт цохисон, тэгэхээр нь би аягатай цайгаа алдаад унагаасан, тэгсэн чинь миний толгойруу дахиж цохиод намайг элэгдсэн, тэгсэн эхнэр хүүе чи хүний хүүхэд аллаа гээд орон дээр дарж хэвтсэн, тэгсэн нөхөр нь эхнэрийнхээ хоёр талаар миний толгойруу удаа дараа цохисон, тэгээд би хөдөлж босч чадаагүй... тэгээд би П.Л ахыг та яагаад намайг цохиод байгаа юм бэ гээд асуутал яадаг юм, чамайг ална гээд надруу орилоод байсан, тэгээд би эхнэрийг нь та босоочээ би харьмаар байна гээд арай гэж гэрээс гарч зугтаасан...миний зүүн талын нүд гэмтсэн, нүдний цус хуралт ихтэй эмч ухархайн яс хугарсан, нүдний хагалгаанд орно гэж хэлсэн. Би гомдолтой, толгой бас их өвлөж байна...миний нүдний ухархайн яс хугарсан, нүдэнд суулт өгсөн эмчилгээний зардалд 5.900.000 төгрөг гарсан байгаа, зүүн тайлын нүдэндээ имплиант тавиулсан байгаа. П.Л гэдэг хүн 4 удаа толгойруу цохисон, зүүн талын нүдрүү 1 удаа, цээжрүү 2 удаа өвдгөөрөө цохьсон байгаа, нүднээс байнга нулимс гоожиж байна...” гэх мэдүүлэг /хх-ийн 17-19 тал/
• Гэрч С.Гансүхийн мөрдөн байцаалтын шатанд мэдүүлсэн: “2019 ны 11 дүгээр сарын 06-нд гэртээ байтал Өөдөс манайд ирсэн. Манай хүүхэд цай хийж өгсөн чинь үхрийн баас их боллоо. Дандаа манай өвөлжөөн дээр танай үхэр ирдэг гээд хэрүүл хийсэн. Тэгсэн аягатай цай Лхагвасүрэнгийн нүүрлүү цацахаар нь Өөдөсийн нүүрэн тус газар нь нэг удаа цохиод авсан юм. Тэгээд Өөдөс гараад явсан...манай хөрш айлын Өлзийцэцэг гэдэг хүн байгаа юм Өөдөс гэж дууддаг. Манай нөхөр уурлаад нүүрлүү 1 удаа алгадсан...” гэх мэдүүлэг /хх-ийн 20-21 тал/
• Гэрч Л.Нямбаярын мөрдөн байцаалтын шатанд мэдүүлсэн: “Би 2019 оны 11 дүгээр сарын 06-ны өдөр Төв аймаг Эрдэнэ сум 2 дугаар баг Зүүнбаянд ээж Гансүх, аав М.Лхагвасүрэн хоёртой байж байтал Өөдөс буюу Өлзийцэцэг ирээд танай үхэр манай гэрийн гадаа баачихсан байна энийгээ янзалж арилга гэж хэлсэн. Тэгэхээр нь би та бөөгнүүлээд байж бай би арилгаад ачаад өгье гэж хэлсэн. Тэгсэн чинь чиний үхрийн баасыг би арилгаж чадахгүй гэж хэлсэн. Тэгээд бид хоёр маргалдаж хэрэлдсэн, тэгсэн чинь Өлзийцэцэг тэгвэл танай өвөлжөөн дээр очиж хонио хариулна гэж хэлэхэд манай аав Л  уурлаад нүүрлүү нь нэг алгадсан, тэгсэн чинь Өлзийцэцэг ууж байсан цайгаа аавын нүүрлүү цацсан, тэгээд манай ээж бид хоёр салгасан...” гэх мэдүүлэг /хх-ийн 25 тал/
• Шүүгдэгч П.Л-ийн мөрдөн байцаалтын шатанд яллагдагчаар мэдүүлсэн: “Би 2019 оын 11 дүгээр сарын 06-ны өглөө гэртээ цайгаа уугаад сууж байхад манайд Өлзийцэцэг орж ирсэн....би гараад морио эмээллээд байж байхад манай гэрт үхрийн баас арилгах талаар маргалдаад байсан. Тэгэхээр нь би гэртээ ортол Өлзийцэцэг хэлэхдээ танай малын өвөлжөөн дээр малаа хариулна гээд байхаар нь тэгж болохгүй гэтэл яадгийн хариулна гэж хэлээд ууж байсан аягатай цайгаа над руу цацсан. Тэгэхээр нь би баруун гараараа Өлзийцэцэгийн зүүн талын хацар хэсэгт алгадсан. Тэгсэн намайг эхнэр хүүхдүүд маань салгасан. Тэгтэл Өлзийцэцэг гэр лүүгээ явхаар нь би араас нь явж Өлзийцэцэгийн гэрт очоод нөхөр Ганбат гэх хүнтэй уулзаад танай эхнэр чинь манай гэрт очиж хэрүүл хийгээд байхаар нь би нэг удаа алгадсан шүү гэж хэлээд тэднийхээс гараад малдаа явсан...манай гэрт байхдаа танай өвөлжөөн дээр малаа хариулна гээд байсан энэнээс болж маргаан үүсч алгадсан...Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт холбогдсоноо хүлээн зөвшөөрч байна...Өлзийцэцэг аягатай цайгаа надруу цацсан, тэгэхээр нь би баруун гараараа Өлзийцэцэгийн зүүн талын хацар хэсэгт нь алгадсан, тэгсэн надыг эхнэр хүүхдүүд маань салгасан...Өлзийцэцэгийг Өөдөс гэж дууддаг юм байна лээ...” гэх мэдүүлэг /хх-ийн 40-42 тал/ гэх мэдүүлэг зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдон тогтоогдож байна.

Шүүгдэгч П.Л-ийн ял шийтгэлийн тэмдэглэл, иргэний үнэмлэхийн лавлагаа болон бусад хувийн байдлыг тогтоосон баримтуудыг шүүхийн хэлэлцүүлэгт судласан болно.

Шүүхээс шүүгдэгчид холбогдох хэргийн нотлох баримтуудыг үнэлж мэтгэлцэгч талуудын дүгнэлтийг сонсоод дараах дүгнэлтийг хийв.

Бусдын эрүүл мэндэд хөнгөн хохирол учруулах гэмт хэргийн нөхцөл байдалд хийсэн хууль зүйн дүгнэлтийн талаар:

Хохирогч М.Өлзийцэцэгийн биед “зүүн нүдний ухархайн ясны хугарал, зүүн нүдний зовхинд цус хуралт, зүүн нүдний дээд, доод зовхи, зүүн чамархайд зөөлөн эдийн няцралт” гэмтэл учруулсан П.Л-ийн үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэргийн объектив талын шинжүүдийг хангасан.

Хууль зүй, дотоод хэргийн сайд, Эрүүл мэндийн сайдын хамтарсан 2010 оны 10 дугаар сарын 29-ний өдрийн 189/385 дугаартай тушаалаар баталсан “Гэмтлийн зэрэг тогтоох журам”-ын 2.4.1-д” гэмтэл түүнээс үүссэн эд эрхтний үйл ажиллагааны хямрал нь нь эрүүл мэндийг дөрвөн долоо хоногоос доош хугацаагаар сарниулсан /түр/” мөн журмын 2.4.2-т “хөдөлмөрийн ерөнхий чадвар бага хэмжээгээр /5-15%/ тогтонги байдлаар алдагдсан” бол гэмтлийн хөнгөн зэрэгт хамааруулахаар шалгуур шинжийг тодорхойлсон байх тул хохирогч М.Өлзийцэцэгийн биед учирсан гэмтлийг хөнгөн хохирол учирсан гэж үзнэ.

Уг гэмт хэрэг нь гэм буруугийн санаатай хэлбэрээр үйлдэгдсэн.

Эрүүгийн хуулийн 2.3 дугаар зүйлийн 1 дэх хэсэгт ззааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгоно.

Шүүгдэгч П.Л нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байжээ гэж үзэх үндэслэлтэй.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, П.Л-ийн бусдын эрүүл мэндэд хөнгөн хохирол учруулсан үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт гэмт хэргийн шинжийг бүрэн хангасан, Төв аймгийн Прокурорын газраас ирүүлсэн хэргийн зүйл, хэсэг, заалт тохирсон байна.

 

Гэмт хэргийн улмаас учирсан хохирол, хор уршгийн талаар:

Хохирогч М.Өлзийцэцэг нь мөрдөн байцаалтын шатанд 3.098.487 төгрөгийн, шүүхийн хэлэлцүүлэгт шинээр 20.000 төгрөгийн, зээлийн гэрээний төлбөр 2.300.000 төгрөгийн нийт 5.418.487 төгрөгийн нэхэмжлэлийн шаардлага гаргасан байна.

Шүүх хэрэгт нотлох баримттай эмчилгээний зардал болох 3.118.487 төгрөгийн нэхэмжлэлийн шаардлагыг хангаж, нотлох баримтгүй зээлийн гэрээний төлбөр болох 2.300.000 төгрөгийн нэхэмжлэлийн шаардлага болон цаашид гарах эмчилгээний зардалаа нотлох баримтаа бүрдүүлэн Иргэний хэрэг шүүхэд хянан шийдвэрлэх журмаар жич нэхэмжлэх эрхийг нээлттэй үлдээж шийдвэрлэлээ.

Учир нь 2019 оны 12 дугаар сарын 03-ны өдрийн №ЗГ0807190185 дугаарын барьцааны гэрээ нь Г.Ганбат гэх хүний нэр дээр хийгдсэн, Г.Ганбат гэх хүн хэн болох, зээлийн хүү төлсөн гэх боловч энэ талаар хэрэгт нотлох баримт авагдаагүй байна.

 

Эрүүгийн хариуцлага хүлээлгэх талаар:

-улсын яллагчаас шүүгдэгч П.Л-г Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 500 нэгжтэй тэнцэх хэмжээний буюу 500.000 төгрөгөөр торгох ял оногдуулах” ялын дүгнэлтийг,

-шүүгдэгчийн өмгөөлөгч М.Мэндсүрэн нь “Шүүгдэгч нь гэм буруугаа хүлээн зөвшөөрч байна. Анх удаа гэмт хэрэг үйлдсэн мөн насны байдал зэргийг харгалзан 450 000 төгрөгөөр торгож өгнө үү” гэх дүгнэлтийг тус тус гаргасан байна.  

Шүүгдэгч П.Л-ийн холбогдсон Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг нь “Хүний эрүүл мэндэд хөнгөн хохирол учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт “Энэ хуулийн тусгай ангид хорих ялын дээд хэмжээг таван жил, түүнээс доош хугацаагаар оногдуулахаар тогтоосон, эсхүл хорих ял оногдуулахаар заагаагүй гэмт хэргийг хөнгөн гэмт хэрэг гэнэ” гэж зааснаар хөнгөн гэмт хэргийн ангилалд хамаарч байна.

Шүүгдэгч П.Л-ийг гэмт хэрэг үйлдсэн гэм буруутай болохыг шүүх тогтоосон учир Эрүүгийн хариуцлага гарцаагүй байх, хариуцлага нь гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байх гэм буруугийн болон шударга ёсны зарчимд нийцүүлж, гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал зэргийг харгалзан үзэв.

             Бусад асуудлаар:

Хэрэгт эд мөрийн баримтаар хураагдан ирсэн зүйлгүй, битүүмжлэгдсэн болон иргэний бичиг баримт шүүхэд ирээгүй, шүүгдэгч П.Л нь цагдан хоригдсон хоноггүй болохыг тус тус дурдах нь зүйтэй байна.

Монгол Улсын Шүүхийн тухай хуулийн 31 дүгээр зүйлийн 31.1, 31.3, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт тус тус заасныг удирдлага болгон

ТОГТООХ нь:

1. Шүүгдэгч Х  овогт П.Л-г хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцсугай.

 

1. Шүүгдэгч Х  овогт П.Л-г Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар дөрвөн зуун тавин нэгжтэй тэнцэх хэмжээний буюу 450.000 /дөрвөн зуун тавин мянга/ төгрөгөөр торгох ялаар шийтгэсүгэй.

 

1. Эрүүгийн хуулийн 5.3 дугаар зүйлийн 5 дахь хэсэгт заасныг баримтлан шүүгдэгч П.Л-г торгох ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт заасан хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож хорих ялаар солихыг сануулсугай.

1. Шийтгэх тогтоол хүчин төгөлдөр болтол шүүгдэгч П.Л-д авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй. 

1. Иргэний хуулийн ерөнхий ангийн 497 дугаар зүйлийн 497.1 , 505 дугаар зүйлийн 505.1 дэх хэсэгт тус тус зааснаар шүүгдэгч П.Л-ээс 3.118.487 төгрөг гаргуулж хохирогч М.Өлзийцэцэгт олгож, хохирогч М.Өлзийцэцэг нь 2.300.000 төгрөгийн нэхэмжлэлийн шаардлага болон цаашид гарах эмчилгээний зардалаа нотлох баримтаа бүрдүүлэн Иргэний хэрэг шүүхэд хянан шийдвэрлэх журмаар жич нэхэмжлэх эрхийг нээлттэй үлдээсүгэй.

1. Хэрэгт эд мөрийн баримтаар хураагдаж ирсэн зүйлгүй, хэрэгт битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч П.Л нь цагдан хоригдсон хоноггүй болохыг тус тус дурдсугай.

 

1. Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

1. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийтгэх тогтоол танилцуулан сонсгосноор хүчинтэй болох бөгөөд мөн хуулийн 37.1 дүгээр зүйлийн 2 дахь хэсэгт зааснаар шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлж шүүгдэгч П.Л-д авсан хувийн баталгаа гаргах таслан сэргийлэх арга хэмжээг тус тус хэвээр үргэлжлүүлсүгэй.

 

 

 

 

 

•