Сэлэнгэ аймаг дахь Сум дундын Иргэний хэргийн анхан шатны шүүхийн шүүгч Д.Мөнхцэцэг би “Жи-Мобайл” ХХК-ий нэхэмжлэлтэй Х.Алтанцацралд холбогдох “Зээлээр  худалдах, худалдан авах гэрээний дагуу төхөөрөмжийн үлдэгдэл төлбөр, алданги 30.000 төгрөг гаргуулах”-ыг хүссэн нэхэмжлэлийн шаардлагатай иргэний хэрэгтэй  танилцаад:

                                               Тодорхойлох нь:

   Нэхэмжлэгч “Жи-Мобайл” ХХК шүүхэд гаргасан нэхэмжлэлдээ: Хүрэл-Аюуш овогтой Алтанцацрал нь 2014 оны 07 дугаар сарын 22-ны өдөр манай компанитай 1121022 тоот төхөөрөмж зээлээр худалдах, худалдан авах гэрээг 1 жилийн хугацаатайгаар байгуулсан юм.

 Хэрэглэгч: Х.Алтанцацрал нь1121022 тоот гэрээний 7 дугаар зүйлийн 7.2.1-д заасны дагуу төлбөрөө төлөлгүй 1 болон түүнээс дээш хугацаа өнгөрсөн, гэрээнд заасан үүргээ зохих ёсоор гүйцэтгээгүй ба үндсэн төлбөр болох 20.000 /хорин мянган/ төгрөгийг төлөлгүй гэрээний үүргээс зайлсхийж байгаа болно.                                                                                     Х.Алтанцацралтай байгуулсан төхөөрөмж зээлээр худалдах, худалдан авах гэрээг цуцалж, төхөөрөмжийн үлдэгдэл төлбөр болох 20.000 төгрөг, гэрээний 5.3-т зааснаар хугацаа хэтэрсэн хоног тутамд 0.3% алданги тооцож нэхэмжлэх эрхтэй гэж заасны дагуу 412 хоногийн 10.000 төгрөгийн алдангийн хамт нийт 30.000 /гучин мянган/ төгрөгийг хэрэглэгч Х.Алтанцацралаас гаргуулж өгнө үү! гэжээ.

   Нэхэмжлэгчийн итгэмжлэгдсэн төлөөлөгч Н.Энхмаа 2016 оны 09 дүгээр сарын 27-ны өдөр шүүхэд гаргасан тайлбартаа:

       ... “Жи-Мобайл” ХХК-ий  нэхэмжлэлтэй Х.Алтанцацралд холбогдох төхөөрөмжийн  үлдэгдэл төлбөр болох 20.000 төгрөг, алданги 10.000 төгрөг нийт 30.000 төгрөгийг төлж барагдуулсан тул хэргийг хялбаржуулсан журмаар шийдвэрлэж өгнө үү!. гэжээ.

                                                                Үндэслэх нь:

                “Жи-Мобайл” ХХК-ий нь Х.Алтанцацралд холбогдуулан  “Зээлээр худалдах- худалдан авах гэрээний дагуу төхөөрөмжийн үлдэгдэл төлбөр, алданги 30.000 төгрөг гаргуулахаар шүүхэд нэхэмжлэл гаргажээ.

                Хэрэг хянан шийдвэрлэх ажиллагааны шатанд хариуцагч Х.Алтанцацрал нь нэхэмжлэлийн шаардлагыг хүлээн зөвшөөрч бүрэн хэмжээгээр төлж барагдуулсан болох нь нэхэмжлэгчийн итгэмжлэгдсэн төлөөлөгч  Н.Энхмаагийн шүүхэд гаргасан тайлбараар нотлогдож байх тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар хэргийг хялбаршуулсан журмаар шийдвэрлэх үндэслэл болж байна.

                Энэ нь гуравдагч этгээдийн хуулиар хамгаалагдсан эрх ашиг сонирхлыг хөндөөгүй. Хуулинд харшлаагүй байна.

              Иймд Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжинд урьдчилан төлсөн 4.550 төгрөгийг төсвийн орлогод хэвээр үлдээж, улсын тэмдэгтийн хураамж 4.550 төгрөгний 50 хувь болох 2275 төгрөгийг хариуцагчаас, үлдэх 50 хувь болох 2275  төгрөгийг Сүхбаатар сумын орон нутгийн орлогоос тус тус гаргуулан нэхэмжлэгчид олгох нь зүйтэй.    

Иргэний хэрэг  шүүхэд хянан шийдвэрлэх тухай хуулийн 75 дугаар зүйлийн 75.1 дэх хэсэгт  заасныг удирдлага болгон ЗАХИРАМЖЛАХ нь:

1. Иргэний хэрэг шүүүхэд хянан шийдвэрлэх тухай хуулийн 74 дүгээр зүйлийн 74.2 дахь хэсэгт зааснаар “Жи–Мобайл” ХХК-ий нэхэмжлэлтэй Х.Алтанцацралд холбогдох “Зээлээр худалдах, худалдан авах гэрээний дагуу төхөөрөмжийн үлдэгдэл төлбөр, алдангийн хамт 30.000 төгрөг гаргуулах”-ыг хүссэн иргэний хэргийн хариуцагч нэхэмжлэлийн шаардлагыг биелүүлснийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар нэхэмжлэгчийн улсын тэмдэгтийн хураамжинд урьдчилан төлсөн 4.550 төгрөгийг төсвийн орлогод хэвээр үлдээж, улсын тэмдэгтийн хураамж 4.550 төгрөгний 50 хувь болох 2275 төгрөгийг хариуцагч Х.Алтанцацралаас, үлдэх 50 хувь болох 2275  төгрөгийг Сүхбаатар сумын орон нутгийн орлогоос тус тус гаргуулан нэхэмжлэгч “Жи-Мобайл” ХХК-д олгосугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэж болохыг дурьдсугай.

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дэх хэсэгт зааснаар нэхэмжлэгч нь давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар дахин анхан шатны шүүхэд  нэхэмжлэл  гаргах  эрхгүйг болохыг дурьдсугай.

 

                                              ШҮҮГЧ                      Д.МӨНХЦЭЦЭГ