2016 оны 05 сарын 17 өдөр

Дугаар 142/ШШ2016/00667

Орхон аймаг

 

МОНГОЛ УЛСЫН НЭРИЙН ӨМНӨӨС

 

Орхон аймаг дахь Сум дундын иргэний хэргийн анхан шатны шүүхийн шүүгч Л.Ариунцэцэг даргалан тус шүүхийн танхимд хийсэн шүүх хуралдаанаар

Хүсэлт гаргагч: Орхон аймаг Баян-Өндөр сум Рашаант баг Уртын гол 1-5 тоотод оршин суух Боржигин овогт Шаравжамцын Санра /ФА:58090171/

М.Батчангийг эрэн сурвалжлуулах тухай хүсэлтийг 2016 оны 04 дүгээр сарын 26-ны өдөр хүлээн авч хянан хэлэлцэв.

Шүүх хуралдаанд: нэхэмжлэгч Ш.Санра, нарийн бичгийн дарга Т.Баялаг нар оролцов.

ТОДОРХОЙЛОХ нь :

Хүсэлт гаргагч Ш.Санра шүүхэд гаргасан хүсэлт болон шүүх хуралдаанд тайлбарлахдаа: Иргэн Мэндбаяр овогтой Батчанга нь бөөний үнээр барилгын материал авчирч өгнө гэж хэлж 2015 оны 04 дүгээр сарын 01-ний өдрөөс цувуулж 3 750 000 төгрөг авсан боловч барилгын материал авчирч өгөөгүй. Авсан мөнгөө ч эргүүлж өгөхгүй байсан тул цагдаад өгнө гэж хэлэхэд 2015 оны 05 дугаар сарын 04-нд нотариатч дээр очиж 4 500 000 төгрөг болгож төлнө гэж баталагаа бичиж өгсөн боловч сураггүй алга болсон. Өөрөө утсаа авахгүй болохоор ээжийнх нь утсаар залгахад ээж нь хөдөө байгаа. Удахгүй хотын төв орохоор нь уулзъя гээд хотод уулзахаар болсон. Ингээд түүнтэй уулзахаар манай эхнэр Улаанбаатар хот явсан боловч утсаа аваагүй тул уулзаж чадалгүй ирсэн. Дараа нь би өөрөө М.Батчангийн бичиж өгсөн Баянгол дүүргийн 2 дугаар хороо, 2-153 тоот гэх хаягийг хайж очиход ийм хаяг байгаагүй, залгахаар утсаа огт авдаггүй байсан. М.Батчанга нь Орхон аймгийн Баян-Өндөр сумын 7-р баг, зүүн дэнжийн 3-22 тоот хаягаар оршин суудаг гэж хэлж байсан боловч энэ хаягт байдаггүй, хаана оршин суугаа нь тодорхойгүй, утсаа огт авахгүй байсаар өнөөдрийг хүрсэн. Иймд ИХШХШТХ-ийн 155 дугаар зүйлийн 155.1 дэх хэсэгт заасныг үндэслэн М.Батчангыг эрэн сурвалжлуулах хүсэлт гаргаж байна гэв.

Шүүх хэрэгт цугларсан нотлох баримтыг судлаад

ҮНДЭСЛЭХ нь:

Ш.Санра нь М.Батчангийг эрэн сурвалжлуулах тухай хүсэлтийг шүүхэд гаргасан.        Шүүх хүсэлтийг хангаж шийдвэрлэх үндэслэлтэй байна.

       М.Батчанга нь бөөний үнээр барилгын материал авчирч өгнө гэж Ш.Санраагаас 3 750 000 төгрөг авсан боловч барилын материалыг авчирч өгөөгүй, авсан мөнгөө эргүүлэн төлөөгүй гэсэн нэхэмжлэгчийн тайлбар, М.Батчангийн 2015 оны 05 дугаар сарын 04-ний өдөр би 4 500 000 төгрөгийг Ш.Санрад энэ оны 6 дугаар сарын дотор бүрэн төлж өгнө. Хэрэв энэ хугацаанд өгч чадахгүй бол 15 хувийн хүүтэй төлнөө гэсэн баталгааны баримтын хуулбараар М.Батчангийг иргэний эрх зүйн маргаанд хариуцагчаар оролцвол зохих этгээд гэж үзэх үндэслэлтэй байх тул түүний оршин суугаа газрыг тодорхой болгох  эрэн сурвалжлуулах тухай нэхэмжлэгчийн гаргасан хүсэлтийг хангаж шийдвэрлэв.

Улсын тэмдэгтийн хураамжийг хуульд заасны дагуу төрийн сангийн орлогод хэвээр үлдээх нь зүйтэй.

 

Монгол Улсын Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлд заасныг удирдлага болгон ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.1,155.3-д заасныг баримтлан Цэцэн сартуул овогт Мэндбаярын Батчанга /ФД:87061414/-г эрэн сурвалжилсугай.
2. Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4-д заасныг баримтлан М.Батчангийг эрэн сурвалжлах, оршин суугаа газрыг тогтоох  ажиллагааг гүйцэтгэхийг Цагдаагийн байгууллага, Тахарын ерөнхий газрын харъяа 7 дугаар тойргийн Тахарын албанд үүрэг болгосугай.
3. М.Батчанга нь Орхон аймаг Баян-Өндөр сум Дэнж баг зүүн дэнжийн 3-22 тоот хаягт оршин сууж байсан болохыг дурдсугай.
4. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн  57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар хүсэлт гаргагчийн улсын тэмдэгтийн хураамжинд төлсөн 70 200 төгрөгийг төрийн санд хэвээр үлдээсүгэй.
5. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7 дахь хэсэгт зааснаар энэхүү шийдвэр нь танилцуулан сонсгомогц хуулийн хүчинтэй болох бөгөөд мөн хуулийн 119.3-д заасан хугацаа өнгөрмөгц 14 хоногийн дотор шүүхэд хүрэлцэн ирж шийдвэрийг өөрөө гардан авах ба ийнхүү аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдсугай.
6. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар зохигчид тэдгээрийн төлөөлөгч буюу өмгөөлөгч, гуравдагч этгээд шийдвэрийг эс зөвшөөрвөл шийдвэрийг гардан авсан өдрөөс хойш 14 хоногийн дотор  Булган, Орхон, Хөвсгөл аймгийн Иргэний хэргийн давж заалдах шатны шүүхэд гомдол гаргах эрхтэй.

 

 

 

 

 

                 ШҮҮГЧ                                        Л.АРИУНЦЭЦЭГ