МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,

Шүүх хуралдааны нарийн бичгийн дарга Б.Болд-Эрдэнэ,

Улсын яллагчаар ахлах прокурор Л.Отгончимэг,

Шүүгдэгч Г.П- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн Прокурорын газрын хяналтын прокуророос Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж ирүүлсэн Г.П-д холбогдох эрүүгийн 2038000510181 дугаартай хэргийг хянан хэлэлцэв.

Шүүгдэгчийн биеийн байцаалт:

Монгол Улсын иргэн, Г.П.

Шүүгдэгч Г.П- нь 2019 оны 05 дугаар сарын 25-ны өдөр Хөвсгөл аймгийн Галт сумын төвд байх өөрийн гэртээ насанд хүрээгүй хохирогч Т.Б-ийг зодож, баруун 3 дугаар үүдэн шүдэнд булгаралт, зүүн хөмсгөнд сорви, дух ясанд цууралт бүхий гэмтэл учруулж хүний эрүүл мэндэд хөнгөн хохирол санаатай учруулах гэмт хэргийг хүндрүүлэх нөхцөл байдалтайгаар буюу хохирогчийг бага насны хүүхэд гэдгийг мэдсээр байж үйлдсэнд холбогджээ.

/Прокурорын яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгчийн гэм буруугийн талаар:

Шүүгдэгч Г.П- нь 2019 оны 05 дугаар сарын 25-ны өдөр согтууруулах ундааны зүйл хэрэглэсэн үедээ Хөвсгөл аймгийн Галт сумын төвд байх өөрийн гэртээ арван дөрвөн насанд хүрээгүй хохирогч Т.Б-ийг “гадуур тэнэлээ” гэдгээр шалтаглан нүүр рүү нь 4-5 удаа цохиж, элэг рүү нь өшиглөн зодож эрүүл мэндэд нь “баруун 3 дугаар үүдэн шүдэнд булгаралт, зүүн хөмсгөнд сорви, дух ясанд цууралт” бүхий гэмтэл учруулж, “Хүний эрүүл мэндэд хөнгөн хохирол санаатай учруулах” гэмт хэргийг хохирогчийг бага насны хүүхэд гэдгийг мэдсээр байж хүндрүүлэх нөхцөл байдалтайгаар үйлдсэн байна.

Шүүгдэгчийн гэмт хэрэг үйлдсэн гэм буруутай болох нь хэрэгт авагдсан нотлох баримтууд болох:

• Гэмт хэргийн талаарх гомдол, мэдээллийг хүлээн авсан тэмдэглэл /хх-ийн 5 дугаар хуудас/,
• Арван дөрвөн насанд хүрээгүй хохирогч Т.Б-ий мөрдөн шалгах ажиллагааны үед өгсөн: “...Би тухайн үед үйл явдал болсон талаар өдрийг нь сайн санахгүй байна. 2019 оны хавар байсан. Манай аав, ээж хоёр хотод болон урагшаа Говь-Алтай аймагт байдаг. Би Галт суманд сурдаг. Би анх Г.П- ахынд байдаг байсан юм. Тэдний гэрт байнга хэрүүл маргаантай байдаг болохоор намайг М- ахынд байлгах болсон юм. Тэгээд нэг өдөр М- ахынхаас Г.П- ахын бага хүүхэд болох М-ыг гэрт нь хүргэж өгөхөөр ороход Г.П- ах эхнэр Т- эгчтэй утсаар яриад хэрэлдэж байсан. Утсаар ярьж дуусчихаад “чи хаагуур яваад байгаа юм бэ” гээд миний нүүр рүү дөрөв таван удаа цохисон. Тэр үед би уйлаад гэрээс гараад зугтах гэтэл үүдний таамбар дотор миний нүүр рүү цохиж унагаагаад элэг рүү өшиглөсөн. Тэр үед М- ахын эхнэр Д- эгч орж ирээд намайг салгаад аваад гарсан. Д- эгч орж ирээгүй бол намайг алах байсан гэж би бодож байна. ...урьд өмнө нь намайг утасны цэнэглэгчээр ороолгож байсан” гэх мэдүүлэг /хх-ийн 8-11 дүгээр хуудас/,
• Гэрч Д.Н-ийн мөрдөн шалгах ажиллагааны үед өгсөн: “...Би Хөвсгөл аймгийн Галт суманд тогтмол байдаггүй юм. Урагшаа аймаг руу ажилтай байдаг. Галт сумын ерөнхий боловсролын сургуульд манай бага хүү Т.Б- сурдаг. Миний бага дүү Т-ынд байдаг юм. Т-ын нөхөр Г.П- согтууруулах ундааны зүйл хэрэглэх болгондоо гэртээ хэрүүл маргаан хийгээд байдаг болохоор нь би хүү Т.Б-ийг хамаатан болох М-ийнд байлгах болсон. М-ийнх Г.П-гийнхтэй ойролцоо байдаг. Тэгтэл 2019 оны 5 дугаар сард манай хүү Т.Б- М-ийнхоос Г.П-гийн 5 настай хүүхдийг гэрт нь хүргэж өгөхөд Г.П- гэртээ согтуу байж байгаад манай хүүг балмад хэрцгийгээр зодсон байсан. ...Манай хүүгийн баруун, зүүн нүдний дээд талд хавдаж яс нь овойсон байсан. Мөн зүүн нүд тухайн үед юм харахааргүй хавдсан байсан бөгөөд баруун талын хоёр шүд нь юм идэж болохооргүй хөдөлгөөнтэй болсон байсан. Тэгээд уг хоёр шүд нь хөдөлж байгаад байруун талын шүд нь унасан. Тухайн үед би хүүгээ хот руу авч яваад эмнэлэгт үзүүлээд бичиг баримтыг нь бүрдүүлээд ирсэн” гэх мэдүүлэг /хх-ийн 13 дугаар хуудас/,
• Гэрч М.Д-ын мөрдөн шалгах ажиллагааны үед өгсөн: “...Манай нөхөр М-ын аавынх нь дүүгийн хүүхэд Т.Б- манайд байдаг байсан. ...2019 оны хавар 5 сард намайг гэрийнхээ гадаа түлээ хагалж байхад Т.Б- манай хашаан дотор явж байтал манай хөрш Г.П- ах Т.Б-ийг дуудаад ороод ир гэж ууртай хэлж байсан. Тэгээд Г.П- ахынх руу тэр хоёр орсон. Удалгүй Г.П- ах чанга дуугаар орилоод байхаар нь хойноос нь яваад ортол Г.П- ах гэрийнхээ хаалганы ойролцоо Т.Б- гэрийн хойморт буйдангийн цаана зогсож байсан. Тэр үед Т.Б- уйлчихсан зогсож байсан. Тэгэхээр нь би Т.Б-ийг гэрээс нь аваад хадам аавынх руу орсон. ...намайг гэрт ороход дух нь хавдсан байсан” гэх мэдүүлэг /хх-ийн 15 дугаар хуудас/,
• Гэрч Б.Д-гийн мөрдөн шалгах ажиллагааны үед өгсөн: “...Миний хүү Д.Н-ийн бага хүү Т.Б- нь Г.П-гийнд байж байгаад өөр айлд байх болсон. Тэгээд нэг өдөр намайг гадуур явж байгаад орой гэртээ ирэхэд Т.Б-ийг Г.П- зодсон гэж хэлсэн. Тухайн үед нүүр нь хавдсан байдалтай байсан. ...гадуур тэнээд гэж зодсон гэж ярьж байсан. Гадуур тэнэлээ гээд зодож цохих шаардлага байхгүй гэж би бодож байна” гэх мэдүүлэг /хх-ийн 23 дугаар хуудас/,
• Гэрч О.П-ын мөрдөн шалгах ажиллагааны үед өгсөн: “...2019 оны 05 дугаар сарын 31-ний өдөр намайг ажил дээрээ байхад Галт сумын иргэн Д.Н- гэх хүн хүүхэдтэйгээ ирээд надад үзүүлсэн юм. Тухайн үед үзлэг хийхэд зүүн дээд талын буйл овойж хавдан шүд нь хөдөлсөн, нүдний хавдар нь буураад зүүн нүд нь хөхөрсөн, толгой доргисон байсан. Т.Б- зодуулснаасаа хойш 5 хоногийн дараа ирж байна гэж ярьж байсан. ...би тухайн үед гэмтлийн эмнэлэгт үзүүл, гэмтлийн зэргийг шүүх эмнэлгийн эмч тодорхойлдог юм аймаг явж үзүүл гэж хэлсэн” гэх мэдүүлэг /хх-ийн 25 дугаар хуудас/,
• Шүүхийн шинжилгээний албаны шинжээчийн 2020 оны 01 дүгээр сарын 08-

ны өдрийн 34 дугаартай: “1. Т.Б-ий биед гэмтэл учирсан байна. 2. Т.Б-ий биед баруун 3 дугаар үүдэн шүдэнд булгаралт, зүүн хөмсгөнд сорви, дух ясанд цууралт бүхий гэмтэл тогтоогдлоо. 3. Дээрх гэмтэл нь мохоо зүйлийн үйлчлэлээр хэрэг болсон гэх цаг хугацаанд үүсгэгджээ. 4. Т.Б-ий биед учирсан гэмтэл нь гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах, ...гэмтлийн хөнгөн зэрэгт хамаарна. 5. Цаашид ерөнхий хөдөлмөрийн чадвар 5 хувь тогтонги байдлаар алдагдана” гэх дүгнэлт /хх-ийн 27 дугаар хуудас/,

• Шинжээчээс мэдүүлэг авсан: “...Дээрх гэмтлүүд нэг удаагийн үйлчлэлээр үүсгэгдэх боломжгүй юм. Мохоо зүйлийн хоёроос гурван удаагийн цохих үйлчлэлээр үүсгэгдсэн байна. ...Уг гэмтлүүд нь нийлбэр дүнгээрээ болон дангаараа гэмтлийн зэрэг тогтоох журмын хүнд болон хүндэвтэр гэмтлийн шалгуурыг хангахгүй тул хөнгөн зэрэгт хамаарах юм” гэх тэмдэглэл /хх-ийн 31 дүгээр хуудас/,
• 2009 оны 04 дүгээр сарын 27-ны өдөр төрсөн Хариад овогт Түвшинжаргалын Т.Б-ий төрсний гэрчилгээний хуулбар /хх-ийн 56 дугаар хуудас/,
• Шүүгдэгч Г.П-гийн мөрдөн шалгах ажиллагааны үед өгсөн: “...Т.Б- нь манай эхнэр Д.Т-ын төрсөн ах Д.Н-ийн хүүхэд байгаа юм. Манайд ерөнхий боловсролын сургуульд суралцаж байгаад 2019 оны 05 дугаар сарын үед манай хөрш М-ийнд байдаг болсон. Тэгтэл Т.Б- нь тэр айлдаа тогтохгүй тэнээд байна гэж надад М-ийн эхнэр Д- хэлсэн. Нэг өдөр эхнэр бид хоёр Т.Б-ийг байгаа айлдаа ирэхгүй болохоор нь хайж олж авчирч байсан. Түүнээс хойш мөн л алга болчихлоо гэж Д- манайд шөнө хайгаад орж ирсэн. Маргааш хонхны баяртай хувцасыг нь бэлдэх гэсэн юм гэж хэлж байсан. Маргааш нь хонхны баярын өдөр сургууль дээрээ очоогүй байсан. ...орой нь намайг гэртээ түлээ оруулах гээд байж байтал Т.Б- манайд орж ирэхээр нь би хаагуур яваад байгаа юм гээд нэг удаа хацар руу нь алгадсан. Тэгтэл Т.Б- гэрээс гараад зугтаахад урдаас нь М-ийн эхнэр Д- орж ирээд Т.Б-ийг аваад гарсан. ...би уг хэргийг үйлдсэнээ хүлээн зөвшөөрч байна. ...яллагдагчаар татсан зүйл ангийг хүлээн зөвшөөрч байна” гэх мэдүүлэг /хх-ийн 40, 59 дүгээр хуудас/ болон шүүхийн хэлэлцүүлэгт мэдүүлэхдээ “...үйлдсэн хэргээ хүлээн зөвшөөрч байна” гэж хариулж байсан болон бусад нотлох баримтуудаар нотлогдож байна.

Шүүгдэгчийн хувийн байдлыг тогтоосон дараах баримтуудыг шүүх шинжлэн

судлав. Үүнд:

• Шүүгдэгч Г.П-гийн иргэний үнэмлэхний лавлагааны хуулбар /хх-ийн 42 дугаар хуудас/,
• Хөвсгөл аймгийн Галт сумын Галт багийн Засаг даргын тодорхойлолт /хх-ийн 43 дугаар хуудас/,
• Урьд нь ял шийтгүүлж байсан болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 44 дүгээр хуудас/,
• Сум дундын 27 дугаар шүүхийн 2014 оны 04 дүгээр сарын 14-ний өдрийн 89 дугаартай шийтгэх тогтоолын хуулбар /хх-ийн 60-64 дүгээр хуудас/ зэрэг баримт бичиг болно.

    Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

    Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл байдлуудыг бүрэн гүйцэд тогтоосон гэж үзлээ.

Гэмт хэрэг гарахад шүүгдэгчийн хууль зүйн мэдлэг дутмаг, согтууруулах ундааны зүйл хэрэглэсэн, уур бухимдлаа тэвчиж чаддаггүй байдал зэрэг нь дээрх гэмт хэргийг үйлдэх шалтгаан нөхцөл болсон байна.

     Шүүгдэгч Г.П- нь дээрх гэмт хэргийг ганцаараа үйлдсэн болох нь гэрч, хохирогч нарын мэдүүлгээр нотлогдож байна.

Шүүгдэгч нь Монгол Улсын Үндсэн хууль, Эрүүгийн хуулиар хамгаалагдсан хүний эрүүл мэндийн халдашгүй байдлын эсрэг гэмт хэргийг арван найман насанд хүрээгүй үйлдэж хүний эрүүл мэндэд хөнгөн гэмтэл учруулсан хор уршигт зориуд хүргэж, “Хүний эрүүл мэндэд хөнгөн хохирол учруулах” гэмт хэргийг хүндрүүлэх нөхцөл байдалтайгаар буюу бага насны хүүхдийн эсрэг үйлдсэн нь дээрх гэмт хэргийг гэм буруугийн санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Хэрэгт авагдсан баримтуудыг үндэслэн прокурорын үйлдсэн яллах дүгнэлт

нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн гэрч, хохирогч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Шүүгдэгч Г.П- нь хохирогчийг биеэ хамгаалж чадахгүй бага насны хүүхэд гэдгийг мэдсээр байж түүний эрүүл мэндэд хөнгөн хохирол учруулсан нь танхайн сэдэлтээр, санаатайгаар дээрх гэмт хэргийг үйлдсэн байна.

Шүүгдэгч Г.П-гийн үйлдсэн энэхүү гэмт хэргийн улмаас шууд учирсан үр дагавар нь бусдын эрүүл мэндийн халдашгүй байдалд хөнгөн хохирол учирсан гэж шүүх дүгнэлээ.

Шүүгдэгч нь гэмт хэргийн улмаас учирсан хохирол төлөөгүй, арван дөрвөн насанд хүрээгүй хохирогч Т.Б-ий хууль ёсны төлөөлөгч Д.Н- мөрдөн шалгах ажиллагааны үед “..нэхэмжлэх зүйл байхгүй” /хх-ийн 21/ гэх мэдүүлгийг өгсөн байх боловч хавтаст хэргийн 53 дугаар хуудсанд авагдсан “Дуб” ХХК-ийн 2019 оны 06 дугаар сарын 08-ны өдрийн Т.Б- нэрээр бичигдсэн 110.000 төгрөгийн ПОС системийн баримт, “Манал-Оточ” эмнэлгийн 2019 оны 06 дугаар сарын 08-ны өдрийн Т.Б- нэрээр бичигдсэн үзлэгийн 10.000 төгрөгийн кассын орлогын ордер, “Дуб” ХХК-ийн “Med Trauma” эмнэлгийн 2019 оны 06 дугаар сарын 08-ны өдрийн Т.Б- нэрээр бичигдсэн үзлэгийн хуудсыг нотлох баримтаар үнэлж, шүүгдэгчээс 120.000 төгрөгийг гаргуулж хохирогчийн хууль ёсны төлөөлөгч Д.Н-ид олгох нь зүйтэй гэж үзэв.

Хавтаст хэрэгт баримтжуулсан шүүгдэгчээс гаргуулах хэрэг хянан шийдвэрлэх ажиллагааны зардалгүй байна.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Г.П-д эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгчийг анх удаа гэмт хэрэг үйлдсэн, шүүгдэгчийн хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан хохирогчийг биеэ хамгаалж чадахгүй бага насны хүүхэд гэдгийг мэдсээр байж хүний эрүүл мэндэд хөнгөн хохирол учруулсан үйлдэлд нь Эрүүгийн хуулийн тусгай ангийн 11.6 дугаар зүйлийн 2 дэх хэсэгт зааснаар буюу хохирогчийг биеэ хамгаалж чадахгүй бага насны хүүхэд гэдгийг мэдсээр байж “Хүний эрүүл мэндэд хөнгөн хохирол учруулах” гэмт хэргийг үйлдсэн гэмт хэрэгт гэм буруутайд тооцож эрүүгийн хариуцлага хүлээлгэх нь зүйтэй гэж үзлээ.

Шүүгдэгчийн хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, гэмт хэрэг үйлдсэнээ хүлээн зөвшөөрсөн, гэм буруугийн талаар маргахгүй байгаа байдал, үйлдсэн гэмт хэрэг, хохирол, хор уршигт хандаж буй хандлага зэргийг харгалзан үзсэн болно.

Шүүгдэгч Г.П- нь урьд нь гэмт хэрэг үйлдэж байсан болох ял шийтгэлийн лавлагаа, шийтгэх тогтоолын хуулбараар тогтоогдож байна.

Шүүгдэгчийн хувьд эрүүгийн хариуцлагыг хөнгөрүүлэх нөхцөл байдалгүй байна.

Шүүхээс шүүгдэгч Г.П-д Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар ял оногдуулахдаа улсын яллагчаас түүнд “Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар 800 нэгжтэй тэнцэх хэмжээний төгрөгөөр торгох ял” оногдуулах санал гаргасныг харгалзан шүүгдэгчид торгох ял оногдуулж шийдвэрлэв.

Шүүгдэгч Г.П- нь цагдан хоригдоогүй, хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон 

ТОГТООХ нь:

1. Шүүгдэгч Г.П-г Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан “Хүний эрүүл мэндэд хөнгөн хохирол учруулах гэмт хэргийг бага насны хүүхэд гэдгийг мэдсээр байж үйлдсэн” гэм буруутайд тооцсугай.
2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Г.П-г 800 /найман зуу/ нэгжтэй тэнцэх хэмжээний буюу 800.000 /найман зуун мянга/ төгрөгөөр торгох ялаар шийтгэсүгэй.

3. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар шүүгдэгч Г.П- нь торгох ялыг биелүүлээгүй бол хорих ялаар солихыг анхааруулсугай.

4. Иргэний хуулийн 497 дугаар зүйлийн 497.1, 505 дугаар зүйлийн 505.1-т зааснаар шүүгдэгч Г.П-гээс 120.000 /нэг зуун хорин мянга/ төгрөгийг гаргуулж хохирогчийн хууль ёсны төлөөлөгч Д.Н-д олгосугай. 

5. Энэ хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нь цагдан хоригдоогүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдсугай.      

6. Шүүгдэгч Г.П-д оногдуулсан торгох ялыг гүйцэтгэхийг Хөвсгөл аймаг дахь Шүүхийн шийдвэр гүйцэтгэх газарт даалгасугай.

7. Шийтгэх тогтоол хүчин төгөлдөр болтол шүүгдэгч Г.П-д урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч нар эс зөвшөөрвөл тогтоол гардан авсан өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

                 ДАРГАЛАГЧ, ШҮҮГЧ                                Д.АЗЖАРГАЛ