МОНГОЛ УЛСЫН НЭРИЙН ӨМНӨӨС

 

Хөвсгөл аймаг дахь сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж,

Шүүх хуралдааны нарийн бичгийн дарга П.Ундрах,

Улсын яллагчаар хяналтын прокурор М.Берикбол,    

Шүүгдэгч Д.Б- нарыг оролцуулан тус шүүхийн шүүх хуралдааны танхимд нээлттэй хийсэн хуралдаанаар Хөвсгөл аймгийн Прокурорын газрын хяналтын прокуророос Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар яллах дүгнэлт үйлдэж хялбаршуулсан журмаар шийдвэрлүүлэхээр шилжүүлсэн Д.Б-од холбогдох эрүүгийн 2038000000254 дугаартай хэргийг хянан хэлэлцэв.

Шүүгдэгчийн биеийн байцаалт:

Монгол Улсын иргэн, Д.Б.

Шүүгдэгч Д.Б- нь 2020 оны 05 дугаар сарын 12-ны өдөр Хөвсгөл аймаг дахь Цагдаагийн газрын Цагааннуур сум дахь хэсгийн төлөөлөгч, цагдаагийн дэслэгч Ө.Б-ийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн гэмт хэргийг үйлдсэнд холбогджээ. /Прокурорын яллах дүгнэлтэд бичигдсэнээр/

ТОДОРХОЙЛОХ нь:

1. Шүүгдэгчийн гэм буруугийн талаар:

Шүүгдэгч Д.Б- нь согтууруулах ундааны зүйл хэрэглэсэн үедээ 2020 оны 05 дугаар сарын 12-ны өдөр 20 цагийн орчим Хөвсгөл аймаг дахь Цагдаагийн газрын Цагааннуур сум дахь хэсгийн төлөөлөгч, цагдаагийн дэслэгч Ө.Б-ийг Цагааннуур хэсгийн кабоны урд байрлах дэлгүүрийн хашаанд үл таних гурван залуугийн хоёр нь дээгүүрээ нүцгэлчихсэн, хоорондоо зодолдоод байгаа юм уу гэлтэй ноцолдож байхад нь очиж “та нар юу хийгээд байгаа юм бэ” гэж гэмт үйлдлийг хориглон зогсооход чиглэсэн үг хэлэхэд заамдан авч, тавихгүй ноцолдож, өмсөж явсан дүрэмт хувцасны мөрдөс, хувийн дугаарыг урж хүч хэрэглэж, “маргааш гэхэд би чамайг ална, чамайг цагдаагийн кабонтой чинь шатааж ална” зэргээр айлган сүрдүүлж, сэтгэл санааны хүчирхийлэл үйлдэж, хүч хэрэглэхээр заналхийлж “Хууль сахиулагчийг эсэргүүцэх” гэмт хэргийг үйлдсэн байна.

Шүүгдэгчийн гэмт хэрэг үйлдсэн гэм буруутай болох нь хэрэгт авагдсан нотлох баримтууд болох:

• Гэмт хэргийн талаарх гомдол, мэдээлэл хүлээн авсан тэмдэглэл /хх-ийн 2 дугаар хуудас/,
• Эд зүйлд үзлэг хийсэн тэмдэглэл, гэрэл зургийн үзүүлэлт /хх-ийн 3-4 дүгээр хуудас/,
• Хохирогч Ө.Б-ийн мөрдөн шалгах ажиллагааны үед өгсөн: “...2020 оны 05 дугаар сарын 12-ны өдрийн 20 цагийн орчим ажпаасаа гараад явж байтал Цагаан-Нуур сумын хэсгийн кобаны урд байрлах нэрийг нь мэдэхгүй дэлгүүрийн хашаанд дотор үл таних 3 залуугийн хоёр нь дээгүүрээ нүцгэлчихсэн, хоорондоо зодолдоод байгаа юм уу гэлтэй ноцолдоод байсан. Тэгэхээр нь очоод та нар юу хийгээд байгаа юм бэ гэхэд Д.Б- гэх залуу нь “хоорондоо барилдаж байна, чамд хамаагүй, хаана яаж явахаа би өөрөө мэднэ” гэсэн утгатай юм хэлээд тавьсан шаардлага биелүүлэхгүй намайг заамдаад авсан. Тэгээд би Д.Б-од тавь гэж хэлээд тавиулах гэж нэлээн ноцолдсон. Энэ үед миний өмсөж явсан савхин куртикны энгэрийн нэрийн хэсэг оёдлоороо урагдаж унасан. Д.Б- нь намайг заамдаж байхдаа “маргааш гэхэд би чамайг ална, чи бацаан юу юм” гэх зэргээр занаж сүрдүүлж байсан. Тэгээд би арай хийж тавиулаад хамт явсан хоёр залуу нь та хоёр одоо яв гэж хэлээд Д.Б-ыг кобан дээр аваачсан. Тэр үед Д.Б- “чи ямар овоо пиздаа бэ, чамайг кобантай чинь шатааж ална, би олон удаа шоронд явсан хүн шүү, чи маргааш гэхэд үхчихсэн байна” гэх зэргээр миний болон гэр бүлийн хүмүүсийн амь насанд заналхийлж байсан. ...Надад одоо гомдол санал нэхэмжлэх зүйл байхгүй. Хуулийн дагуу арга хэмжээ авч өгнө үү гэж хүсмээр байна. Миний хувьд хуульд заасан дүрэм журмын дагуу албан үүргээ гүйцэтгэж байсан” гэх мэдүүлэг /хх-ийн 8-9 дүгээр хуудас/,
• Гэрч Т.Б-ийн мөрдөн шалгах ажиллагааны үед өгсөн: “...2020 оны 05 дугаар сарын 12-ны орой 21 цагийн үед би хэсгийн төлөөлөгч Ө.Б-той уулзахаар ирэхэд Д.Б- Б.О- тогны байцаагч Б- гурав хэсгийн төлөөлөгч Ө.Б-той маргасан зогсож байсан. Энэ Д.Б- гэх залуу нь хэсгийн төлөөлөгч Ө.Б-ийг маргааш өглөө чи үхнэ чи муу бацаан юу юм барахгүй шүү чадахгүй шүү гэж хэлж байсан” гэх мэдүүлэг /хх-ийн 16-17 дугаар хуудас/,
• Гэрч М.Ш-ын мөрдөн шалгах ажиллагааны үед өгсөн: “...цагдаагийн байрны урд талын дэлгүүрийн гадна гурван залуу зууралдаад байсан. Тэгсэн хэсгийн төлөөлөгч тэр гурван залуу руу явсан. Тэнд очоод тэр гурван залуутай хэсгийн төлөөлөгч зууралдаад байсан. Тэгээд хэсгийн төлөөлөгч манай найз С- бид хоёрыг дуудсан. Бид хоёр яваад очсон, гадаа нөхөр төлөөлөгчтэй баахан хэрэлдээд байсан. Чи намайг амжихгүй гэж хэлж байсан” гэх мэдүүлэг /хх-ийн 19-20 дугаар хуудас/,
• Гэрч Б.Б-ын мөрдөн шалгах ажиллагааны үед өгсөн: “...манай найз Д.Б- төлөөлөгчийн урдаас юу гэж хэлсэн талаар би мэдэхгүй байна. Төлөөлөгч манай найз хоёр маргаад унасан. Тэгж байтал төлөөлөгч, Д.Б- хоёр барьцалдаад авсан. Би ганц нэг удаа салгах гээд дундуур нь орсон. Төлөөлөгч намайг цаашаа байж бай гэсэн. Тэгээд манай найз Д.Б-ыг аваад өрөөндөө авчирсан” гэх мэдүүлэг /хх-ийн 25-26 дугаар хуудас/,
• Гэрч Б.Ц-ийн мөрдөн шалгах ажиллагааны үед өгсөн: “...2020 оны 05 дугаар сарын 12-ны өдөр 20 цагийн үед намайг дэлгүүр орчихоод гэр рүү явж байтал цагдаагийн кобаны урд талын дэлгүүрийн хашаанд 1 залуу манай хүнийг заамдаад авчихсан “чамайг ална, маргааш чи амьд явахгүй шүү, би олон жил шоронд явсан хүн шүү” гэж хэлж байсан. Тэгээд манай нөхөр цагдаагийн хэсэг дээр тэр залууг авчирч саатуулсан юм. Намайг гэртээ байж байхад манай нөхрийн шаардлагыг эсэргүүцсэн залуу “чамайг цагдаагийн кобантой чинь шатааж ална” гэж цагдаагийн кобаны ажлын өрөөнд байхдаа манай нөхөр рүү орилоод байсан”

гэх мэдүүлэг /хх-ийн 28-29 дүгээр хуудас/,

• Хөвсгөл аймгийн Цагдаагийн газрын: “Тус цагдаагийн газрын Эрүүгийн цагдаагийн тасгийн хэсгийн төлөөлөгч, цагдаагийн дэслэгч Ө.Б- нь цагдаагийн байгууллагад 4 жил, Хөвсгөл аймаг дахь Цагдаагийн газарт 3 сар ажиллаж байна” гэх албан тоот /хх-ийн 48 дугаар хуудас/,
• Албан тушаалын тодорхойлолт /хх-ийн 49-53 дугаар хуудас/,
• Шүүгдэгч Д.Б-ын мөрдөн шалгах ажиллагааны үед өгсөн: “...Яллагдагчаар татсан зүйл ангийг хүлээн зөвшөөрч байна. Би хэсгийн төлөөлөгч Ө.Б-оос уучлал гуйсан. Хэсгийн төлөөлөгч одоо гомдол саналгүй гэсэн. Миний хувьд хийсэн хэрэгтээ гэмшиж байгаа” гэх мэдүүлэг /хх-ийн 35 дугаар хуудас/ болон шүүхийн хэлэлцүүлэгт мэдүүлэхдээ “...үйлдсэн хэргээ хүлээн зөвшөөрч байна” гэж хариулж байсан болон бусад нотлох баримтуудаар нотлогдож байна.

Шүүгдэгчийн хувийн байдлыг тогтоосон дараах баримтуудыг шүүх шинжлэн судлав. Үүнд:

• Хөвсгөл аймгийн Рэнчинлхүмбэ сумын 6 дугаар багийн Засаг даргын тодорхойлолт /хх-ийн 38 дугаар хуудас/,
• Шүүгдэгч Д.Б-ын иргэний үнэмлэхний  /хх-ийн 43 дугаар хуудас/,
• Урьд нь ял шийтгүүлж байсан болохыг тодорхойлсон эрүүгийн хариуцлага хүлээж байсан эсэхийг шалгах хуудас /хх-ийн 41 дүгээр хуудас/,
• Хөвсгөл аймаг дахь сум дундын эрүүгийн хэргийн анхан шатны шүүхийн 2017 оны 01 дүгээр сарын 07-ны өдрийн 18 дугаартай шийтгэх тогтоолын хуулбар /хх-ийн 42-43 дугаар хуудас/,
•  Хөвсгөл аймаг дахь сум дундын эрүүгийн хэргийн анхан шатны шүүхийн 2019 оны 10 дугаар сарын 25-ны өдрийн 320 дугаартай шийтгэх тогтоолын хуулбар /хх-ийн 44-47 дугаар хуудас/ зэрэг баримт бичиг болно.

    Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, үгүйсгэх нотлох баримт хэрэгт байхгүйн дээр шүүгдэгч нь өөрийн гэм бурууг хүлээн зөвшөөрч, маргахгүй байгаагаар давхар нотлогдож байх тул энэ хэргийг хянан шийдвэрлэхэд хангалттай, үнэн зөв гэж шүүх үнэллээ.

    Энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн байцаалтын явцад оролцогчийн хуулиар хамгаалагдсан эрхийг хассан, хязгаарласан, Эрүүгийн хэрэг хянан шийдвэрлэх тухай хуульд заасан шаардлагыг зөрчсөн гэх ноцтой зөрчил тогтоогдоогүй, хуульд заасан нотолбол зохих нөхцөл байдлуудыг бүрэн гүйцэд тогтоосон гэж үзлээ.

Гэмт хэрэг гарахад шүүгдэгчийн хууль зүйн мэдлэг дутмаг, шүүгдэгч нь тухайн үед согтууруулах ундааны зүйл хэрэглэсэн байдал зэрэг нь дээрх гэмт хэргийг үйлдэх шалтгаан нөхцөл болсон байна.

     Шүүгдэгч Д.Б- нь дээрх гэмт хэргийг ганцаараа үйлдсэн болох нь гэрч, хохирогч нарын мэдүүлгээр нотлогдож байна.

Шүүгдэгч нь нийтийн хэв журам сахиулах, олон нийтийн аюулгүй байдлыг хамгаалах, гэмт хэрэг, зөрчилтэй тэмцэх, таслан зогсоох чиг үүрэг бүхий хууль сахиулах байгууллага, цагдаагийн ажилтны зүй ёсны шаардлагыг эсэргүүцэж, нийтийн албаны ашиг сонирхлын эсрэг хор уршигт зориуд хүргэж, “Хууль сахиулагчийг эсэргүүцэх” гэмт хэргийг үйлдсэн нь дээрх гэмт хэргийг гэм буруугийн санаатай хэлбэртэй, төгссөн гэмт хэрэг үйлдсэн гэж үзэх бүрэн үндэслэлтэй юм.

Хэрэгт авагдсан баримтуудыг үндэслэн прокурорын үйлдсэн яллах дүгнэлт нь үндэслэлтэй, хэргийн зүйлчлэл тохирсон байна гэж шүүх үзлээ.

Гэмт хэргийг илрүүлэх зорилгоор хийсэн гэрч, хохирогч нарын мэдүүлэг зэрэг нь гэмт хэрэг гарсан нөхцөл байдлыг бүрэн дүүрэн тогтооход чухал ач холбогдолтой болсон байна.

Шүүгдэгч Д.Б- нь согтууруулах ундааны зүйл хэрэглэсэн үедээ 2020 оны 05 дугаар сарын 12-ны өдөр 20 цагийн орчим Хөвсгөл аймаг дахь Цагдаагийн газрын Цагааннуур сум дахь хэсгийн төлөөлөгч, цагдаагийн дэслэгч Ө.Б-ийг Цагааннуур хэсгийн кабоны урд байрлах дэлгүүрийн хашаанд үл таних гурван залуугийн хоёр нь дээгүүрээ нүцгэлчихсэн, хоорондоо зодолдоод байгаа юм уу гэлтэй ноцолдож байхад нь очиж “та нар юу хийгээд байгаа юм бэ” гэж гэмт үйлдлийг хориглон зогсооход чиглэсэн үг хэлэхэд заамдан авч, тавихгүй ноцолдож, өмсөж явсан дүрэмт хувцасны мөрдөс, хувийн дугаарыг урж хүч хэрэглэж, “маргааш гэхэд би чамайг ална, чамайг цагдаагийн кабонтой чинь шатааж ална” зэргээр айлган сүрдүүлж, сэтгэл санааны хүчирхийлэл үйлдэж, хүч хэрэглэхээр заналхийлсэн нь танхайн сэдэлтээр, санаатайгаар дээрх гэмт хэргийг үйлдсэн байна.

“Хууль сахиулагчийг эсэргүүцэх” гэдэгт хууль сахиулагчийн албан үүргээ биелүүлэхтэй холбогдуулан албаны үүргийн хувьд хориглон зогсоох талаар идэвхтэй үйл ажиллагаа явуулж байгаа этгээдийн шаардлагыг үл ойшоох, биелүүлэхгүй байх, тэдгээрийн эсрэг бие махбодийн, эсхүл сэтгэл санааны аливаа хүчирхийлэл үйлдэхийг ойлгоно.

Мөн хууль сахиулагчийг эсэргүүцэх нь хүч хэрэглэх буюу хүч хэрэглэхээр

заналхийлэх хэлбэрийн алинаар нь ч илэрхийлэгдэх бөгөөд энэ үед эсэргүүцлийн ямар ч үйлдэл хийгдсэн байж болно.

Шүүгдэгч Д.Б-ын үйлдсэн энэхүү гэмт хэргийн улмаас шууд учирсан үр дагавар нь хууль сахиулах байгууллага, түүний ажилтны хэвийн үйл ажиллагаа, эд хөрөнгөнд хохирол учирсан гэж шүүх дүгнэлээ.

Хохирогч Ө.Б-ийн “гомдол санал байхгүй” гэх мэдүүлэг, хүсэлт /хх-ийн 8-9, 58/ хэрэгт авагдсан байх тул шүүгдэгчийг бусдад төлөх төлбөргүй гэж үзэв.

Хавтаст хэрэгт баримтжуулсан шүүгдэгчээс гаргуулах хэрэг хянан шийдвэрлэх ажиллагааны зардалгүй байна.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдаж, шүүхийн шийдвэрийн үндэслэл болгосон баримтуудыг үндэслэн шүүгдэгч Д.Б-од эрүүгийн хариуцлага хүлээлгэхдээ Эрүүгийн хуульд заасан шударга ёсны зарчмыг баримтлан, цээрлүүлэх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хуулийн 1.4 дүгээр зүйлийн 1 дэх хэсэгт “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ”, Эрүүгийн хуулийн 6.1 дүгээр зүйлийн 1 дэх хэсэгт “Шүүх гэмт хэрэг үйлдсэн хүнд энэ хуулийн ерөнхий ангид заасан үндэслэл, журмын дагуу тусгай ангид заасан төрөл, хэмжээний дотор эрүүгийн хариуцлага хүлээлгэнэ”, Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг тус тус баримтлан шүүгдэгчийг анх удаа гэмт хэрэг үйлдсэн, шүүгдэгчийн хувийн байдал, үйлдсэн гэмт хэрэгтээ хандах хандлага, гэмт хэрэг үйлдэхэд нөлөөлсөн шалтгаан, нөхцөл зэргийг тус тус харгалзан “Хууль сахиулагчийг албан үүргээ биелүүлэхтэй холбогдуулан хүч хэрэглэсэн, хүч хэрэглэхээр эсэргүүцсэн” үйлдэлд нь Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар эрүүгийн хариуцлага хүлээлгэх нь зүйтэй гэж үзлээ.

Шүүгдэгчийн хувийн байдалд шүүхийн хэлэлцүүлэгт дурдсан нотлох баримтаар тогтоогдсон нөхцөл байдал, гэмт хэрэг үйлдсэнээ хүлээн зөвшөөрсөн, гэм буруугийн талаар маргахгүй байгаа байдал, үйлдсэн гэмт хэрэг, хохирол, хор уршигт хандаж буй хандлага, хохирогчоос уучлалт гуйж эвлэрсэн байдал зэргийг харгалзан үзсэн болно.

Шүүгдэгч Д.Б- нь урьд нь гэмт хэрэг үйлдэж байсан болох ял шийтгэлийн лавлагаа, шийтгэх тогтоолын хуулбаруудаар тогтоогдож байна.

Шүүгдэгчийн хувьд эрүүгийн хариуцлагыг хөнгөрүүлэх, хүндрүүлэх нөхцөл байдалгүй байна.

Шүүх шүүгдэгч Д.Б-од Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар ял оногдуулахдаа шүүгдэгчээс өөрт холбогдох хэргийг хялбаршуулсан журмаар шийдвэрлүүлэх хүсэлт /хх-ийн 57/ гаргасан, улсын яллагчаас шүүгдэгчид Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.1-т заасныг журамлан Эрүүгийн хуулийн тусгай ангийн 23.1 дүгээр зүйлийн 1 дэх хэсэгт заасан хорих ялыг оногдуулахгүйгээр 1 жилийн хугацаагаар тэнсэж, мөн хуулийн 7.3 дугаар зүйлийн 2.5-д заасан “оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэх, Эрүүгийн хуулийн ерөнхий ангийн 7.3 дугаар зүйлийн 3 дахь хэсгийн 3.3-т заасан “согтууруулах ундаа, мансууруулах бодис хэрэглэхийг хориглох” үүргийг тус тус хүлээлгэх санал гаргасныг шүүгдэгч хүлээн зөвшөөрч, шүүгдэгчид холбогдох хэргийг хялбаршуулсан журмаар шийдвэрлүүлэхээр шүүхэд шилжүүлсэн байх тул улсын яллагчийн саналын хүрээнд эрүүгийн хариуцлага хүлээлгэхээр шийдвэрлэв.

Шүүгдэгч Д.Б- нь цагдан хоригдоогүй, бусдад төлөх төлбөргүй, хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгчээс гаргуулах эрүүгийн хэрэг хянан шийдвэрлэх ажиллагааны зардалгүй болохыг тус тус дурдах нь зүйтэй байна.

Монгол улсын Шүүхийн тухай хуулийн 31 дүгээр зүйлийн 31.3.1 дэх хэсэг, Эрүүгийн хэрэг хянан шийдвэрлэх тухай хуулийн 17.4, 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон 

ТОГТООХ нь:

1. Шүүгдэгч Д.Б-ыг Эрүүгийн хуулийн тусгай ангийн 23.1 дүгээр зүйлийн 1 дэх хэсэгт заасан “Хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн” гэмт хэргийг үйлдсэн гэм буруутайд тооцсугай.

2. Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.1-т заасныг журамлан Эрүүгийн хуулийн тусгай ангийн 23.1 дүгээр зүйлийн 1 дэх хэсэгт заасан хорих ял оногдуулахгүйгээр шүүгдэгч Д.Б-ыг 1 /нэг/ жилийн хугацаагаар тэнссүгэй.

3. Эрүүгийн хуулийн ерөнхий ангийн 7.1 дүгээр зүйлийн 3 дахь хэсэг, 7.2 дугаар зүйлийн 1 дэх хэсэг, 7.3 дугаар зүйлийн 2 дахь хэсгийн 2.5, 3 дахь хэсгийн 3.3-т заасныг тус тус журамлан тэнссэн хугацаанд шүүгдэгч Д.Б-од “оршин суугаа газар, ажил сургуулиа өөрчлөх, зорчин явахдаа хяналт тавьж байгаа эрх бүхий байгууллагад мэдэгдэх” үүрэг хүлээлгэх, “согтууруулах ундаа, мансууруулах бодис хэрэглэхийг хориглох” эрх хязгаарлах албадлагын арга хэмжээг авсугай.

4. Эрүүгийн хуулийн ерөнхий ангийн 7.1 дүгээр зүйлийн 4, 5 дахь хэсэгт зааснаар шүүгдэгч Д.Б- нь тэнссэн хугацаанд шүүхээс хүлээлгэсэн үүргийг биелүүлээгүй, санаатай гэмт хэрэг үйлдсэн бол шүүх тэнссэн шийдвэрийг хүчингүй болгож ял оногдуулахыг анхааруулсугай.

5. Шүүгдэгчид тэнссэн хугацаанд хяналт тавихыг Хөвсгөл аймаг дахь Шүүхийн шийдвэр гүйцэтгэх газарт даалгасугай.

6. Энэ хэрэгт эд мөрийн баримтаар хураагдсан зүйлгүй, битүүмжлэгдсэн эд хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй болохыг тус тус дурдсугай.

7. Шийтгэх тогтоол хүчин төгөлдөр болтол шүүгдэгч Д.Б-од урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч нар эс зөвшөөрвөл шийтгэх тогтоолыг гардан авсан эсхүл хүргүүлсэн өдрөөс хойш 14 хоногийн дотор Хөвсгөл аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

                ДАРГАЛАГЧ, ШҮҮГЧ                               Д.АЗЖАРГАЛ