МОНГОЛ УЛСЫН НЭРИЙН ӨМНӨӨС

 

            Багануур Дүүргийн Иргэний хэргийн анхан шатны шүүхийн иргэний шүүх хуралдааныг Ерөнхий шүүгч П.Цэцэгдулам даргалж, тус шүүхийн шүүх хуралдааны танхимд нээлттэй хийсэн хуралдаанаар:

           Хүсэлт гаргагч: 1965 оны 09 сарын 30-ны өдөр Ховд аймгийн Цэцэг суманд  төрсөн, 52 настай, эмэгтэй, Улаанбаатар хот, Багануур дүүргийн 5 дугаар  хороо, Бага гүний 08 дугаар гудамжны 03 тоотод  оршин суух,  Уваша  овогт  Орсоогийн Мөнхжаргалын  улсад ажиллаж байсан байдлаа тогтоолгох тухай нэхэмжлэлийг 2017 оны  01 дүгээр  сарын  17-ны өдөр хүлээн авч хянан хэлэлцэв.

            Шүүх хуралдаанд нэхэмжлэгч О.Мөнхжаргал, шүүх хуралдааны нарийн бичгийн дарга З.Ганцоож нар оролцов.

ТОДОРХОЙЛОХ нь :

            Нэхэмжлэгч О.Мөнхжаргал шүүхэд гаргасан нэхэмжлэл болон шүүх хуралдаанд гаргасан тайлбартаа: Мөнхжаргал миний бие Улаанбаатар хотын Ажилчины районы   46 дугаар цэцэрлэгт 1983.01.01-ний өдрөөс асрагчийн ажилд орж 1986.04.01-ний өдрийг хүртэл ажилласан юм. 1986 оны 4 сараас хөдөө орон нутагт шилжин ажиллахаар болсон. Одоо миний бие 52 настай, 4 хүүхэдтэй өндөр насны тэтгэвэр тогтоолгох гэтэл тухайн үед ажиллаж байсан үеийн хөдөлмөрийн дэвтэр  устаж үгүй болсон, ажилд орсон тушаал архиваас гарч ирээгүй тул  ажиллаж байсан байдлаа шүүхээр тогтоолгох шаардлагатай байгаа юм. Иймд намайг 1983.01.01-ний өдрөөс 1986.04.01-ний өдрийг хүртэл Улаанбаатар хотын Ажилчины районы  46 дугаар цэцэрлэгт асрагчаар ажиллаж байсныг тогтоож өгнө үү гэв.

Шүүхээс хэрэгт авагдсан Улаанбаатар хотын Ажилчины районы 46-р цэцэрлэгийн 1983.10.17-ны өдрийн 29 дугаартай улирч ажилласан багш, ажилчдад илүү цагийн мөнгө олгох тухай, 1986.03.15-ны өдрийн 09 дугаартай илүү цагийн хөлс олгох тухай, 1986.04.16-ны өдрийн 13 дугаартай түр асрагч, угаагч авч ажиллуулах тухай тушаалууд, хамт олонтойгоо авахуулсан фото зураг, гэрч нарын шүүхэд өгсөн тайлбар зэрэг бичгийн нотлох баримтуудыг шинжлэн судлаад:

ҮНДЭСЛЭХ нь :

Нэхэмжлэгч О.Мөнхжаргал нь 1983.01.01-ний өдрөөс 1986.04.01-ний өдрийг хүртэл Улаанбаатар хотын Ажилчины районы 46 дугаар цэцэрлэгт асрагчаар ажиллаж байснаа тогтоолгохыг  шаардаж байна.

 Шүүх нэхэмжлэлийн шаардлагын зарим хэсгийг хангаж  шийдвэрлэх үндэслэлтэй гэж үзлээ. Учир нь:

Хүсэлт гаргагч О.Мөнхжаргалын ажилд орсон, ажлаас халагдсан тушаал архиваас гарч ирээгүй, хөдөлмөрийн дэвтрээ үрэгдүүлсэн байх тул түүний ажиллаж байсан үйл явдлыг шүүхээс өөр журмаар сэргээн тогтоох боломжгүй болсон байна.

О.Мөнхжаргал нь ажиллаж байсан байдлаа тогтоолгох зорилгоо заахдаа  “Олон хүүхэд төрүүлсэн үндэслэлээр өндөр насны тэтгэврээ тогтоолгох гэсэн юм“ гэжээ.

О.Мөнхжаргал нь Улаанбаатар хотын Ажилчины районы 46 дугаар цэцэрлэгт 1983.10.01-ний өдрөөс 1986.04.01-ний өдрийг хүртэл асрагчаар ажиллаж байсан  болох нь:

Улаанбаатар хотын Ажилчины районы 46-р цэцэрлэгийн эрхлэгчийн 1983.10.17-ны өдрийн 29 дугаартай “Улирч ажилласан багш, ажилчдад илүү цагийн мөнгө олгох тухай” тушаалаар Мөнхжаргалд 48 цаг  илүү  ажилласны хөлс олгосон,

1986.03.15-ны өдрийн 09 дугаартай “Илүү цагийн хөлс олгох тухай” тушаалаар 32 цаг шөнийн ээлжинд улиран ажилласан  илүү цагийн хөлс олгосон,

1986.04.16-ны өдрийн 13 дугаартай “Түр асрагч, угаагч авч ажиллуулах тухай” тушаалаар шилжин ажиллах болсон тул 1986.04.01 ний өдрөөс ажлаас чөлөөлсөн,

1983 онд ажиллаж байх хугацаандаа хамт олонтойгоо авахуулсан гэрэл зураг,

Гэрч Г.Мөнгөнхуягийн шүүхэд өгсөн “Миний бие 1985-1987 он хүртэл Улаанбаатар хотын Ажилчины районы 46 дугаар цэцэрлэгт үйлчлэгчээр ажилд ороход Мөнхжаргал нь туслах багшаар ажиллаж байсан. Үйлчлэгч нь  өрөө тасалгаа цэвэрлэдэг учир  тэр үед Мөнхжаргал цэцэрлэгийн туслах багшаар ажиллаж байсныг сайн мэдэж байна” гэсэн мэдүүлэг,

  Гэрч Ц.Хорлоогийн шүүхэд өгсөн: “Миний бие 1985 онд тус цэцэрлэгт  тогоочоор  хүний оронд ажилд ороход Мөнхжаргал нь асрагч, туслах багшаар ажиллаж байсан. Тогооч нь   хүүхдүүдийн хоолыг хийдэг  ажилтай байсан. Анх хэзээ ажилд орсныг нь мэдэхгүй байна”  гэсэн мэдүүлэг зэрэг баримтуудаар тогтоогдож байна.

Нэхэмжлэгч О.Мөнхжаргал нь 1983 оны 01 сарын 01 нээс эхлэн 46 дугаар цэцэрлэгт  ажилд орсон гэж тайлбарлаж байгаа боловч энэ талаарх баримт хэрэгт авагдаагүй, баримтаар нотолж чадахгүй байх тул Ажилчины районы 46-р цэцэрлэгийн 1983.10.17-ны өдрийн 29 дугаартай улирч ажилласан багш, ажилчдад илүү цагийн мөнгө олгох тухай тушаалыг үндэслэн 1983.10.01 ний өдрөөс ажилд томилогдсон байна гэж дүгнэлээ.

Нотлох баримтуудыг үнэлэхэд: Нэхэмжлэгчээс шүүхэд гаргаж өгсөн баримтууд нь тухайн тогтоолгох гэж буй жилүүдэд холбоотой баримтууд байх бөгөөд хуульд заасан нотлох баримтыг гаргах, цуглуулах журмын дагуу гаргаж өгсөн эргэлзээгүй, үнэн зөв баримтууд байна.

Монгол Улсын Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.2, 116, 118 дугаар зүйлүүдэд заасныг удирдлага болгон ТОГТООХ нь:

1.Монгол Улсын Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6 дахь хэсэгт заасныг үндэслэж Уваша  овогт  Орсоогийн Мөнхжаргалыг Улаанбаатар хотын Ажилчины районы 46 дугаар цэцэрлэгт 1983.10.01-ний өдрөөс 1986.04.01-ний өдрийг хүртэл асрагчаар ажиллаж байсан болохыг тогтоож, 1983.01.01 нээс 1983.10.01 хүртэл ажиллаж байсан гэх үйл баримтыг тогтоолгох шаардлагыг хэрэгсэхгүй болгосугай.

 2. Улсын тэмдэгтийн хураамжийн хуулийн 7 дугаар зүйлийн 7.1-д  Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1-д зааснаар хүсэлт гаргагчийн урьдчилан төлсөн тэмдэгтийн хураамж 70200 төгрөгийг улсын төсөвт хэвээр үлдээсүгэй.

3.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч нь шийдвэрийг  эс зөвшөөрвөл гардан авснаас хойш 14 хоногийн дотор Нийслэлийн Иргэний хэргийн Давж заалдах шатны шүүхэд гомдол гаргах эрхтэй болохыг дурьдсугай.

4.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4-т зааснаар шийдвэр нь танилцуулан сонсгомогц хүчинтэй болох бөгөөд зохигч 7 хоног өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэй ба 119 дүгээр зүйлийн 119.7-д зааснаар дээрх хугацаанд шүүхийн шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдсугай.

 

ДАРГАЛАГЧ ШҮҮГЧ                            П.ЦЭЦЭГДУЛАМ.