МОНГОЛ УЛСЫН НЭРИЙН ӨМНӨӨС

 

            Хэнтий аймгийн Бор-Өндөр сум дахь Сум дундын шүүхийн иргэний хэргийн шүүх хуралдааныг шүүгч Р.Батбаяр даргалж, тус шүүхийн шүүх хуралдааны “Б” танхимд хийсэн хуралдаанаар:

           Нэхэмжлэгч: Хэнтий аймгийн Бор-Өндөр сумын 4 дүгээр баг 52 дугаар байрны 5 тоотод оршин суух, Боржигон овогт Дондовын Дэлгэрмаагийн нэхэмжлэлтэй,    

Хариуцагч: Улаанбаатар хот Баянгол дүүрэг 10 дугаар хороо Зүүн нарангийн 9а гудамжны 2 тоотод оршин суух, Саманд овогт Давгацэрэнгийн Мэндбаярт холбогдох хүүхдийн тэтгэлэг гаргуулах тухай иргэний хэргийг хянан хэлэлцэв.

            Шүүх хуралдаанд: Нэхэмжлэгч Д.Дэлгэрмаа, хариуцагч Д.Мэндбаяр, шүүх хуралдааны нарийн бичгийн дарга А.Оюун-Эрдэнэ нар оролцов.

                                                                                           Т О Д О Р Х О Й Л О Х нь:

           Нэхэмжлэгч Д.Дэлгэрмаа шүүхэд гаргасан нэхэмжлэл болон шүүх хуралдаанд гаргасан тайлбартаа: “Миний бие Д.Мэндбаяртай 2007 онд танилцаж, хамтран амьдарч байгаад бидний дундаас 2008 оны 07 дугаар сарын 28-ны өдөр охин М.Оюумаа мэндэлсэн. Тухайн үед бид хоёр гэрлэлтээ батлуулаагүй ч хүүхдээ эцгээр нь овоглож гэрчилгээг нь авсан. Бид гурав 2009 оны 8 дугаар сар хүртэл хамтдаа амьдарч байгаад Мэндбаяр нь гэр бүлтэй болж охин бид хоёрыг орхин явсан. Үүнээс хойш би ганцаараа охиноо өсгөн хүмүүжүүлж байна. Энэ хугацаанд Мэндбаяр ажил хөдөлмөр эрхэлдэг, боломжийн амьдралтай мөртлөө охин бид хоёрт нэг удаа ч дэмжлэг үзүүлж байгаагүй. Тиймээс би эцгээс нь хүүхдийн тэтгэлэг гаргуулахаар шүүхэд хандаж байна” гэжээ.

Хариуцагч Д.Мэндбаяр шүүхэд гаргасан тайлбар болон шүүх хуралдаан дээр гаргасан тайлбартаа: “Дэлгэрмаагийн хүүхдийн тэтгэвэр тогтоолгох асуудлыг хуулийн дагуу шийдвэрлүүлье. Оюумаа нь миний охин үүнд маргах зүйл байхгүй, нэхэмжлэлийн шаардлагыг хүлээн зөвшөөрч байна” гэв.

 

                             Ү Н Д Э С Л Э Х нь:

          Нэхэмжлэгч Д.Дэлгэрмаа нь хариуцагч Д.Мэндбаярт холбогдуулан 2008 оны 07 дугаар сарын 28-ны өдөр төрсөн охин М.Оюумаад хүүхдийн тэтгэлэг гаргуулахаар нэхэмжлэлийн шаардлага гаргажээ. Д.Мэндбаяр нь М.Оюумааг өөрийн хүүхэд мөн гэдгийг хүлээн зөвшөөрч, тэтгэлэг төлөхөөс татгалзаагүй болно.

Шүүх хэрэгт цугларсан нотлох баримт болон зохигчийн тайлбарыг үндэслэн нэхэмжлэлийн шаардлагыг хангаж шийдвэрлэлээ. 

           Д.Дэлгэрмаа, Д.Мэндбаяр нар нь 2007 оноос 2009 оны 8 дугаар сарыг хүртэл хамтран амьдарсан байх ба  энэ хугацаанд тэдний дундаас 2008 оны 07 дугаар сарын 28-ны өдөр охин М.Оюумаа төрж эцэг Д.Мэндбаяраар овоглосон болох нь №0104297/30 дугаартай төрсний гэрчилгээний нотариатаар батлуулсан хуулбар болон зохигчийн өөрсдийнх нь тайлбараар тогтоогдож байна.

           Гэр бүлийн тухай хуулийн 38 дугаар зүйлийн 38.1-т заасан эцэг эх нь тэжээн тэтгэх үүргийнхээ дагуу хариуцагч Д.Мэндбаяр нь хуульд заасан хэмжээгээр охин М.Оюумааг тэжээн тэтгэх үндэслэлтэй болно.

          Улсын бүртгэл, статистикийн ерөнхий газрын даргын 2016 оны 02 дугаар сарын 08-ны өдрийн А/106 тоот тушаалаар Хүн амын амьжиргааны доод түвшингийн хэмжээг тогтоосон бөгөөд Хэнтий аймагт  хүн амын амьжиргааны доод түвшинг 163.700 төгрөгөөр тогтоожээ. Иймд энэ нэхэмжлэлийн үнийн дүн нь Д.Мэндбаяраас охин М.Оюумаад төлөх тэтгэлэгийн нэг жилийн хугацаанд төлбөл зохих дүнгээр тодорхойлогдох тул (163.700:2х12=982.200 төгрөг) улсын тэмдэгтийн хураамжид 28.122 төгрөг гаргуулан улсын орлогод оруулах нь зүйтэй байна.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, дугаар зүйлд заасныг удирдлага болгон Т О Г Т ОО Х нь:

 

1. Гэр бүлийн тухай хуулийн 40 дүгээр зүйлийн 40.1.1, 40.1.2-т зааснаар 2008 оны 07 дугаар сарын 28-ны өдөр төрсөн охин М.Оюумааг 11 нас хүртэл тухайн бүс нутагт тогтоогдсон амьжиргааны доод түвшингийн 50 хувиар, 11-16 нас /суралцаж байгаа бол 18 нас/ хүртэл тухайн бүс нутагт тогтоогдсон амьжиргааны доод түвшингийн хэмжээгээр сар бүр тэтгэлэг гаргуулан эцэг Д.Мэндбаяраар тэжээн тэтгүүлсүгэй.
2. Гэр бүлийн тухай хуулийн 40 дүгээр зүйлийн 40.2-т зааснаар зөвхөн цалин хөлснөөс өөр орлогогүй хариуцагчаас гаргуулах хүүхдийн тэтгэлгийн хэмжээ нь түүний цалин хөлс түүнтэй адилтгах орлогын тавин хувиас хэтрэхгүй болохыг дурдсугай.
3. Гэр бүлийн тухай хуулийн 38 дугаар зүйлийн 38.4-т зааснаар энэхүү шийдвэрийн хувийг иргэний гэр бүлийн бүртгэлийн төв байгууллагад явуулахыг шүүгчийн туслах Ш.Отгонцэцэгт даалгасугай.
4. Улсын тэмдэгтийн хураамжийн тухай хуулийн 41 дүгээр зүйлийн 41.1.1-т зааснаар нэхэмжлэгч Д.Дэлгэрмаа нь улсын тэмдэгтийн хураамж төлөхөөс чөлөөлөгдсөн болохыг дурдсугай.
5. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 63 дугаар зүйлийн 63.1.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-т зааснаар хариуцагч Д.Мэндбаяраас улсын тэмдэгтийн хураамж 28.122  төгрөг гаргуулж улсын орлого болгосугай.   

       6. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4-т зааснаар шийдвэрийг танилцуулан сонсгомогц хүчинтэй болох бөгөөд зохигч 7 хоног өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэйг мэдэгдсүгэй.

        7. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.7-д зааснаар дээрх хугацаанд шүүхийн шийдвэрийг гардан аваагүй нь гомдол гаргах хугацааг хуульд заасан журмын дагуу тоолоход саад болохгүйг дурдсугай.

         8.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч шийдвэрийг гардан авсан өдрөөс хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах  гомдол гаргах эрхтэйг тайлбарласугай.

 

 

 

            ДАРГАЛАГЧ                                                Р.БАТБАЯР