Хариуцагч нэхэмжлэлийн шаардлагыг

хүлээн зөвшөөрснийг  баталж, хэргийг

хэрэгсэхгүй болгох тухай

 

 

          Хэнтий аймгийн Бор-Өндөр сум дахь Сум дундын шүүхийн шүүгч М.Энхмандах би нэхэмжлэгч Н.Хэрлэнтуяагийн нэхэмжлэлтэй хариуцагч Б.Сайнжаргалд холбогдох зээлээр худалдах, худалдан авах гэрээний үүргийн биелэлтийг шаардаж 146500 төгрөг гаргуулах тухай нэхэмжлэлийг 2016 оны 11 сарын 29-ний өдөр хүлээн авч, 2016 оны 12 сарын 06-ны өдөр иргэний хэрэг үүсгэж, хянаад       

                                                                    Т О Д О Р Х О Й Л О Х нь:

           Нэхэмжлэгч Хэнтий аймгийн Бор-Өндөр сумын 2-р баг 44-р байрны 37 тоотод оршин суух СЩ70121500 регистрийн дугаартай Боржигон овогт Нацагдоржийн Хэрлэнтуяа шүүхэд гаргасан нэхэмжлэлдээ: “Б.Сайнжаргал нь 2015 оны 09 сарын 06-ны өдөр манай дэлгүүрээс шалны хулдаас, бэлтгэлийн хувцас зэрэг бараа болох нийт 146500 төгрөгний бараа худалдаж авсан. Уг мөнгийг 2015 оны 09 сарын 20-нд өгнө гэсэн боловч өнөөдрийг хүртэл өгөөгүй. Иймд Б.Сайнжаргалаас 146500 төгрөгийг гаргуулж өгнө үү” гэжээ.

           Хариуцагч Хэнтий аймгийн Бор-Өндөр сумын 3-р баг Бор-Өндөрийн 09-05 тоотод оршин суух СЩ83052106 регистрийн дугаартай Дэчинчимэд овогт Батжаргалын Сайнжаргал шүүхэд гаргасан хариу тайлбартаа: “Б.Сайнжаргал миний бие Н.Хэрлэнтуяагаас 146500 төгрөгний бараа авсан нь үнэн. Энэ 146500 төгрөгийг 2016 оны 12 сарын 27-ны өдрийн дотор төлж барагдуулна” гэжээ.

                                                                                               Ү Н Д Э С Л Э Х нь:

 Нэхэмжлэгч Н.Хэрлэнтуяа нь хариуцагч Б.Сайнжаргалаас зээлээр худалдах, худалдан авах гэрээний үүргийн биелэлтийг шаардаж, 146500 төгрөг гаргуулахаар нэхэмжлэлийн шаардлага гаргасан байна.

 Иргэний хуулийн 262 дугаар зүйлийн 262.1, 263 дугаар зүйлийн 263.4 дэх хэсэгт зааснаар нэхэмжлэгч Н.Хэрлэнтуяа нь хариуцагч Б.Сайнжаргалаас зээлээр худалдах, худалдан авах гэрээний үүргийн биелэлтийг шаардаж 146500 төгрөг гаргуулахаар  нэхэмжлэлийн шаардлага гаргах эрхтэй байна.

 Хэрэг хянан шийдвэрлэх ажиллагааны явцад хариуцагч Б.Сайнжаргал нь нэхэмжлэлийн бүх шаардлага болох 146500 төгрөгийг 2016 оны 12 сарын 27-ны өдрийн дотор төлөхийг зөвшөөрч, маргаагүй болно. 

 Иймд хариуцагч Б.Сайнжаргал нь нэхэмжлэлийн бүх шаардлага болох 146500 төгрөгийг 2016 оны 12 сарын 27-ны өдрийн дотор төлөхийг зөвшөөрч бичгээр тайлбараа ирүүлсэн байгаа нь хуульд нийцсэн, бусдын хуулиар хамгаалагдсан эрх, ашиг сонирхолд харшлахгүй, хууль зөрчөөгүй байх тул хариуцагч нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох нь зүйтэй байна гэж шүүх үзлээ.  

 

Иргэний хэрэг шүүхэд хянан шийдвэрлэх тухай хуулийн 74, 75,

123 дугаар зүйлийн 123.1-д заасныг удирдлага

болгон  З А Х И РА М Ж Л А Х нь:

 

          1.Нэхэмжлэгч Н.Хэрлэнтуяагийн нэхэмжилсэн 146500 /нэг зуун дөчин зургаан мянга таван зуун/ төгрөгийг 2016 оны 12 сарын 27-ны өдрийн дотор хариуцагч Б.Сайнжаргал нь төлж барагдуулахаар хариуцагч нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгосугай. 

            2.Улсын тэмдэгтийн хураамжийн тухай хуулийн 44 дүгээр зүйлийн 44.1.1 дэх хэсэгт зааснаар тогтоосон хэмжээнээс илүү хураасан улсын тэмдэгтийн хураамж 9605 төгрөгийг төрийн сангийн данснаас гаргуулж нэхэмжлэгч Н.Хэрлэнтуяад олгож, Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар нэхэмжлэгч Н.Хэрлэнтуяагийн улсын тэмдэгтийн хураамжид төлсөн 5045 төгрөгний тал хувь болох 2522 төгрөг 50 мөнгийг төрийн сангийн дансанд хэвээр үлдээж улсын орлого болгож, төрийн сангийн данснаас улсын тэмдэгтийн хураамж 2522 төгрөг 50 мөнгийг, хариуцагч Б.Сайнжаргалаас улсын тэмдэгтийн хураамж 2522 төгрөг 50 мөнгийг тус тус гаргуулж нэхэмжлэгч Н.Хэрлэнтуяад олгосугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар энэхүү шүүгчийн захирамжийг хариуцагч Б.Сайнжаргал нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг дурдсугай.

            4.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дэх хэсэгт зааснаар энэхүү шүүгчийн захирамжинд зохигч давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

ШҮҮГЧ                      М.ЭНХМАНДАХ