МОНГОЛ УЛСЫН НЭРИЙН ӨМНӨӨС

 

 

Хэнтий аймгийн Бор-Өндөр сум дахь Сум дундын шүүхийн иргэний хэргийн шүүх хуралдааныг шүүгч М.Энхмандах даргалж, тус шүүхийн шүүх хуралдааны “Б” танхимд нээлттэй хийсэн шүүх хуралдаанаар:

Хүсэлт гаргагч Хэнтий аймгийн Дархан суманд 1955 оны 04 сарын 21-ний өдөр төрсөн, 61 настай, эмэгтэй, бүрэн бус дунд боловсролтой, сувилагч мэргэжилтэй, малчин, ам бүл 3, хүүхдүүдийн хамт Хэнтий аймгийн Баянмөнх сум 1-р баг “Хар-Ус” гэх газар нутаглах, СГ55042103 регистрийн дугаартай Авга овогт Цэрэндоржийн Тунгалагийн “ажиллаж байсан байдал тогтоолгох тухай” хүсэлтийг 2016 оны 12 сарын 05-ны өдөр хүлээн авч, 2016 оны 12 сарын 06-ны өдөр иргэний хэрэг үүсгэж, хянан хэлэлцэв.

Шүүх хуралдаанд шүүх хуралдааны нарийн бичгийн дарга А.Оюун-Эрдэнэ, хүсэлт гаргагч Ц.Тунгалаг нар оролцов.

                                                                                           Т О Д О Р Х О Й Л О Х нь:

          Хүсэлт гаргагч Ц.Тунгалаг шүүхэд гаргасан нэхэмжлэл болон шүүх хуралдаанд гаргасан тайлбартаа: “Миний бие Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний өдрийг дуустал малчнаар ажиллаж байсан. Би улсад 20 гаран жил ажилласан. Баянмөнх сумын Захиргааны барилга гал түймэрт шатсан тул тухайн үед олгосон хөдөлмөрийн дэвтрийг үрэгдүүлсэн. Хэнтий аймгийн Архивын тасгаас 1983 оны 08 сарын 01-ний өдрөөс малчны ажилд томилсон тушаал, 1984 онд хүүхэд асрах чөлөө олгосон тушаалыг гаргуулж авсан боловч 1987 онд ажлаас чөлөөлсөн тушаал олдохгүй байна. Иймд Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний өдрийг дуустал малчнаар ажиллаж байсныг тогтоож өгнө үү” гэжээ.            

          Шүүхийн хэлэлцүүлгээр хүсэлт гаргагчийн тайлбар болон хэрэгт цугларсан  бичгийн нотлох баримтуудыг шинжлэн судлаад           

                                                                                               Ү Н Д Э С Л Э Х нь:

           Хүсэлт гаргагч Ц.Тунгалаг нь Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний өдрийг дуустал малчнаар ажиллаж байсан байдал тогтоолгох тухай хүсэлтийг шүүхэд гаргажээ.

            Хүсэлт гаргагч Ц.Тунгалагийн Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс малчнаар ажилд томилсон тушаал нь байгаа боловч 1987 онд ажлаас чөлөөлсөн тушаал нь олдохгүй болсон, бичиг баримт нь үрэгдсэн, тухайн үед ажиллаж байсан байгууллага нь татан буугдсан, одоо үйл ажиллагаа явуулаагүй байгаа, уг байгууллагын бичиг хэргийн баримт нь Хэнтий аймгийн архивт байхгүй байгаа нь хүсэлт гаргагчийн тайлбар, Хэнтий аймгийн Архивын тасгийн 2016 оны 12 сарын 13-ны өдрийн тодорхойлолт зэрэг бичгийн нотлох баримтаар нотлогдож байх тул хүсэлт гаргагчийн ажилласан байдлыг шүүхийн журмаар тогтоон шийдвэрлэх үндэслэлтэй байна. 

Хэнтий аймгийн Баянмөнх сумын Мөнх-Оргил нэгдлийн даргын 1983 оны 10 сарын 03-ны өдрийн 72 тоот “Цэрэндоржийн Тунгалагийг 08 сарын 01-нээс Баянбулаг бригадад хоньчноор ажиллуулсугай” гэх тушаалаар хүсэлт гаргагч Ц.Тунгалаг нь 1983 оны 08 сарын 01-ний өдрөөс малчнаар ажилд томилогдсон гэдэг нь нотлогдож байна.

Мөн гэрч Д.Туяагийн “Ц.Тунгалаг нь Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оноос 1988 оны 5 сар хүртэл малчнаар ажиллаж байсан. Би 1979 оноос 1993 он хүртэл Хэнтий аймгийн Баянмөнх сумын Мөнх-Оргил нэгдэлд саниторч, малчнаар ажиллаж байсан” гэх мэдүүлэг, шүүхэд гаргасан тодорхойлолт,

-Гэрч Д.Цэдэвсүрэнгийн “Ц.Тунгалаг нь Хэнтий аймгийн Баянмөнх сумын Мөнх-Оргил нэгдлийн Баянбулаг бригадад малчнаар ажиллаж байсан. Би 1982 оноос 1993 он хүртэл Хэнтий аймгийн Баянмөнх сумын Мөнх-Оргил нэгдлийн Дулаан бригадад малчнаар ажиллаж байсан” гэх мэдүүлэг, шүүхэд гаргасан тодорхойлолт,

-Хэнтий аймгийн Баянмөнх сумын Мөнх-Оргил нэгдлийн даргын 1984 оны 04 сарын 25-ны өдрийн 47 тоот “Ц.Тунгалагт 5-р сарын 10-наас сарын цалингүй нэмэгдэл чөлөө олгосугай” гэх тушаалын хуулбар,

 -Хүсэлт гаргагч Ц.Тунгалагийн шүүхэд гаргасан хүсэлт, шүүх хуралдаанд гаргасан тайлбар зэрэг бичгийн нотлох баримтуудаар хүсэлт гаргагч Ц.Тунгалагийн Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний өдрийг дуустал малчнаар ажиллаж байсан гэдэг нь нотлогдож байна.

 Иймд хүсэлт гаргагч Ц.Тунгалагийн Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний  өдрийг дуустал малчнаар ажиллаж байсныг тогтоолгох тухай нэхэмжлэлийн шаардлагыг хангаж шийдвэрлэх нь зүйтэй байна гэж шүүх үзлээ.

  

Иргэний хэрэг шүүхэд хянан шийдвэрлэх тухай хуулийн 82 дугаар зүйлийн

   82.1.6, 115 дугаар зүйлийн 115.1, 115.2.1, 116, 118-120, 133 дугаар

зүйлийн 133.1.1-д тус тус заасныг удирдлага болгон Т О Г Т О О Х нь:

 

          1.Иргэний хэрэг шүүхэд хянан шийдвэрлэх тухай хуулийн 135 дугаар зүйлийн 135.2.6 дахь хэсэгт заасныг баримтлан СГ55042103 регистрийн дугаартай Авга овогт Цэрэндоржийн Тунгалагийг Хэнтий аймгийн Баянмөнх сумын Мөнх-Оргил нэгдлийн Баянбулаг бригадад 1983 оны 08 сарын 01-ний өдрөөс 1987 оны 12 сарын 31-ний  өдрийг дуустал малчнаар  ажиллаж байсныг тогтоосугай.

2.Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1 дэх хэсэгт зааснаар хүсэлт гаргагчаас улсын тэмдэгтийн хураамжид төлсөн 70200 /далан мянга хоёр зуун/ төгрөгийг төрийн сангийн дансанд хэвээр үлдээж, улсын орлого болгосугай.     

          3.Шийдвэр нь танилцуулан сонсгомогц хүчинтэй болохыг дурдсугай.

          4.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.3, 119.4 дэх хэсэгт зааснаар шүүх хуралдаанд оролцсон тал 7 хоног өнгөрснөөс хойш 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэй болохыг танилцуулсугай.

          5.Энэхүү шийдвэрийг эс зөвшөөрвөл хүсэлт гаргагч, түүний төлөөлөгч, өмгөөлөгч шийдвэрийг гардан авснаас хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах эрхтэй болохыг дурдсугай.

 

 

 

ДАРГАЛАГЧ                                    М.ЭНХМАНДАХ