Зохигчдын эвлэрлийг баталж, хэргийг

   хэрэгсэхгүй болгох тухай

 

Багануур дүүргийн Иргэний хэргийн анхан шатны шүүхийн шүүгч Г.Ариунаа би

Нэхэмжлэгч Багануур дүүргийн 3 дугаар хороо, Үйлдвэрийн хэсэгт байрлах “Багануур дулааны станц” ТӨХК-ийн нэхэмжлэлтэй

Хариуцагч Багануур дүүргийн 3 дугаар хороо, 46 дугаар байрны 48 тоотод оршин суух, Баяд овогт Ванганы Лхагвасүрэнд холбогдох худалдах, худалдан авах гэрээний үүргийн биелэлт 37145 төгрөг 29 мөнгө гаргуулах тухай нэхэмжлэлийг 2017 оны 1 дүгээр сарын 30-ны өдөр хүлээн авч хянаад

ТОДОРХОЙЛОХ нь

          Нэхэмжлэгч “Багануур дулааны станц” ТӨХК шүүхэд гаргасан нэхэмжлэлдээ: Дулааны эрчим хүч хэрэглэгч иргэн В.Лхагвасүрэн манай байгууллагад эрчим хүч хэрэглэсний төлбөр 37145 төгрөг 29 мөнгийг төлөөгүй болно.

          Иймээс В.Лхагвасүрэнгээс эрчим хүч хэрэглэсний төлбөр 37145 төгрөг 29 мөнгийг гаргуулж өгнө үү, гэжээ. 

          Нэхэмжлэгч “Багануур дулааны станц” ТӨХК-ийн итгэмжлэгдсэн төлөөлөгч Д.Оюунбилэг шүүхэд гаргасан тайлбартаа: Нэхэмжлэлийн шаардлага болох 37145 төгрөг 29 мөнгөнөөс алданги 4845 төгрөгийг хасаж, үндсэн төлбөр 32300 төгрөг 29 мөнгийг нэхэмжилж байна гэжээ.

           Хариуцагч В.Лхагвасүрэн шүүхэд ирүүлсэн хариу тайлбартаа: Миний бие дулаан эрчим хүчний төлбөрөө цаг тухайд нь төлж байсан. Дулааны станцын буруугаас болж 2016 оны 2 дугаар сарын төлбөр төлөгдөөгүй учир алданги төлөхгүй. Үндсэн төлбөр 32300 төгрөг 29 мөнгийг 2017 оны 3 дугаар сарын 15-ны өдрийн дотор төлж барагдуулахаар харилцан тохиролцох хүсэлтэй байна гэв.

ҮНДЭСЛЭХ нь

           Нэхэмжлэгч “Багануур дулааны станц” ТӨХК, хариуцагч В.Лхагвасүрэнгээс худалдах, худалдан авах гэрээний үүргийн биелэлт 37145 төгрөг 29 мөнгө гаргуулах нэхэмжлэлийн шаардлагыг шүүхэд гаргажээ.

          Шүүх зохигчдын эвлэрлийг баталж, хэргийг хэрэгсэхгүй болгож шийдвэрлэх үндэслэлтэй байна гэж үзлээ.

          Хэрэг хянан шийдвэрлэх ажиллагааны явцад зохигчид эвлэрэн хэлэлцэж, эвлэрлийн гэрээг бичгээр байгуулж, хоёр тал гарын үсгээ зурж баталгаажуулан, нэхэмжлэгч нэхэмжлэлийн шаардлага болох 37145 төгрөг 29 мөнгөнөөс, алданги 4845 төгрөгийг хасаж, үндсэн төлбөр 32300 төгрөг 29 мөнгө нэхэмжилснийг, хариуцагч 2017 оны 3 дугаар сарын 15-ны өдрийн дотор төлж барагдуулна гэснийг нэхэмжлэгч хүлээн зөвшөөрч, зохигчид эвлэрсэн байх тул зохигчдын эвлэрлийг батлах нь зүйтэй байна гэж үзлээ.

Зохигчид эвлэрэн хэлэлцсэн нь Иргэний хуульд харшлаагүй, гуравдагч этгээдийн хуулиар хамгаалагдсан ашиг сонирхлыг хөндөөгүй байна. 

Хэргийг хялбаршуулсан журмаар шийдвэрлэсэн тул Иргэний хэрэг шүүхэд  хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар улсын  тэмдэгтийн хураамжийг тал хувиар бууруулж тогтоов.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2 дахь  хэсэгт  заасныг  удирдлага болгон ЗАХИРАМЖЛАХ нь:

1. “Багануур дулааны станц” ТӨХК-ийн нэхэмжлэлтэй, хариуцагч Баяд овогт Ванганы Лхагвасүрэнд холбогдох худалдах, худалдан авах гэрээний үүргийн биелэлт 37145 төгрөг 29 мөнгө нэхэмжилсэн иргэний хэрэгт, нэхэмжлэгч нэхэмжлэлийн шаардлагынхаа 4845 төгрөгнөөс татгалзаж, 32300 төгрөг 29 мөнгө нэхэмжилснийг, хариуцагч 2017 оны 3 дугаар сарын 15-ны өдрийн дотор 32300 төгрөг 29 мөнгийг бүрэн төлөхөөр зохигчид харилцан тохиролцож, эвлэрснийг баталж, хэргийг хэрэгсэхгүй болгосугай.
2.  Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 4550 төгрөгийг тал хувиар бууруулан тогтоож, 2275 төгрөгийг улсын төсвөөс, хариуцагч В.Лхагвасүрэнгээс 2275 төгрөгийг гаргуулан, нэхэмжлэгчид  олгосугай. 
3. Иргэний хэрэг  шүүхэд  хянан  шийдвэрлэх  тухай хуулийн  75 дугаар  зүйлийн 75.6 дахь хэсэгт зааснаар энэхүү захирамжийг хариуцагч сайн дураар  биелүүлээгүй бол шүүхийн шийдвэрийн нэгэн адил албадан гүйцэтгэхийг  мэдэгдсүгэй.
4.  Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4 дэх хэсэгт зааснаар хэргийг хялбаршуулсан журмаар хянан шийдвэрлэсэн тохиолдолд зохигчид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.  

 

 

ШҮҮГЧ                                  Г.АРИУНАА