Хариуцагч нэхэмжлэлийн шаардлагыг

 биелүүлснийг  баталж, хэргийг

 хэрэгсэхгүй болгох тухай

 

Багануур дүүргийн Иргэний хэргийн анхан шатны шүүхийн шүүгч П.Туяа би,

           Нэхэмжлэгч: Багануур дүүргийн 1 дүгээр хороо, 15 дугаар байрны 17 тоотод оршин суух, Барулас овогт Ламжавын Ганганбарсын нэхэмжлэлтэй,

Хариуцагч: Багануур дүүргийн 1 дүгээр хороо, 23 дугаар байрны 49 тоотод оршин суух Увш овогт Чулуунбаатарын Энхдолгорт холбогдох орон сууц хөлслөх гэрээний үүргийн биелэлт 600.000 төгрөг гаргуулах тухай нэхэмжлэлийг 2017 оны 02 дугаар сарын 13-ны өдөр хүлээн авч хянаад:

ТОДОРХОЙЛОХ нь :

Нэхэмжлэгч Л.Ганганбарс шүүхэд гаргасан нэхэмжлэлдээ: Миний бие Энхдолгортой 2016.08.22-ны өдөр орон сууц хөлслөх гэрээг бичгээр байгуулан 1 дүгээр хорооны 23 дугаар байрны 49 тоот байрыг 1 жилийн хугацаагаар хөлслүүлсэн. Байрны хөлсийг сарын 200.000 төгрөгөөр, сар бүрийн 10-ны өдөр төлөхөөр тохиролцсон. Энхдолгор нь 9,10 сарын төлбөрийг гэрээнд заасан хугацаанд төлсөн. 11 сарын төлбөрийг хугацаандаа төлөөгүй, 11 сарын сүүлээр 100.000 төгрөг, 2017 оны 1 сард 100.000 төгрөг төлсөн. Одоо 12, 01, 02 сарын төлбөр 600.000 төгрөгийг өнөөдрийг хүртэл төлөөгүй, гэрээгээр хүлээсэн үүргээ биелүүлэхгүй, байнга хугацаа хэтрүүлж байх тул 600.000 төгрөг гаргуулж өгнө үү. Миний зүгээс хөлслөгч гэрээгээр хүлээсэн үүргээ биелүүлэхгүй гэрээгээ удаа дараа зөрчиж байгаа тул гэрээгээ цуцлах хүсэлтэй байна гэжээ. 

Нэхэмжлэгч Л.Ганганбарс шүүхэд гаргасан нэмэгдүүлсэн нэхэмжлэлийн шаардлагадаа: Ч.Энхдолгор нь нэхэмжлэл гаргаснаас хойш байрны төлбөртэй эсэхийг шалгахад орон сууц хөлслөгч 2016.09 сараас, 2 сарын дулааны төлбөр 126.873,73 төгрөг, СӨХ-ны төлбөр 2016 оны 11 сараас, 2017 оны 2 дугаар сарын төлбөр 36.160 төгрөг нийт 163.033,73 төгрөгийн өр төлбөртэй байна. Орон сууц хөлслөх гэрээнийн 1 дэх хэсгийн 6 дахь заалтад зааснаар орон сууц хөлслөгч нь гэрээний заалтыг биелүүлээгүй төлбөрөө төлөөгүй, баримтуудыг хөлслөгчид огт өгөөгүй учраас нэхэмжлэлийн шаардлагаа нэмэгдүүлж байна гэжээ.

Хариуцагч Ч.Энхдолгор нь шүүхэд ирүүлсэн хариу тайлбартаа: Миний бие шүүхээс нэхэмжилсэн 600.000 төгрөгийг 2017 оны 02 дугаар сарын 23-ны өдрийн 18 цагийн үед төлж барагдуулсан. Мөн нэмж нэхэмжилсэн дулаан, сөх, тог, усны мөнгийг төлж барагдуулсан болно гэжээ.

Нэхэмжлэгч Л.Ганганбарс шүүхэд ирүүлсэн хариу тайлбартаа: Миний бие Ч.Энхдолгороос гэрээний үүргийн биелэлт 600.000 төгрөг, нэмэгдүүлсэн нэхэмжлэлийн шаардлагаар 163.033,73 төгрөг нийт 763.033,73 төгрөг нэхэмжилсэн бөгөөд хариуцагч Ч.Энхдолгор 2017 оны 3 дугаар сарын 7-ны өдрийн байдлаар төлөх ёстой төлбөрийг бүрэн барагдуулсан байна гэжээ.

                                                       ҮНДЭСЛЭХ нь:

Нэхэмжлэгч Л.Ганганбарс нь хариуцагч Ч.Энхдолгороос орон сууц хөлслөх гэрээний үүргийн биелэлт 763.033,73 төгрөг гаргуулах тухай нэхэмжлэлийн шаардлагыг шүүхэд гаргажээ

 Хариуцагч Ч.Энхдолгор нь орон сууц хөлслөх гэрээний үүргийн биелэлт 763.033,73 төгрөгийг нэхэмжлэгч Л.Ганганбарсад төлж барагдуулсан болох нь түүний шүүхэд ирүүлсэн тайлбараар тогтоогдож байх тул нэхэмжлэлийн шаардлагыг хариуцагч биелүүлснийг баталж хэргийг хэрэгсэхгүй болгох нь зүйтэй байна.

Хариуцагч нэхэмжлэлийн шаардлагыг биелүүлсэн нь Иргэний хуульд харшлаагүй, гуравдагч этгээдийн хуулиар хамгаалагдсан ашиг сонирхлыг хөндөөгүй байна. 

Хэргийг хялбаршуулсан журмаар шийдвэрлэсэн тул Иргэний хэрэг шүүхэд  хянан шийдвэрлэх тухай хуулийн 74 дүгээр зүйлийн 74.5-д зааснаар улсын  тэмдэгтийн хураамжийг тал хувиар бууруулж тогтоов.

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2-д заасныг тус тус удирдлага болгон  ЗАХИРАМЖЛАХ нь :

        1. Нэхэмжлэгч Барулас овогт Ламжавын Ганганбарсын нэхэмжлэлтэй хариуцагч Увш овогт Чулуунбаатарын Энхдолгорт холбогдох орон сууц хөлслөх гэрээний үүргийн биелэлт 763.033,73 төгрөг гаргуулах тухай иргэний хэрэгт хариуцагч нэхэмжлэлийн шаардлагыг биелүүлснийг баталж, хэргийг хэрэгсэхгүй болгосугай.

   2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар нэхэмжлэгчээс улсын тэмдэгтийн хураамжид төлсөн  24.200 төгрөгийг тал хувиар бууруулан тогтоож 12.100 төгрөгийг улсын төсвөөс, хариуцагч Ч.Энхдолгороос 12.100 төгрөгийг тус тус гаргуулж нэхэмжлэгчид олгосугай.

   3. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн    74.4-д зааснаар хэргийг хялбаршуулсан журмаар хянан шийдвэрлэсэн тохиолдолд зохигчид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурьдсугай.   

 

 

ШҮҮГЧ                                    П.ТУЯА