Баянхонгор  аймаг  дахь  Сум  дундын  Эрүүгийн  хэргийн  анхан  шатны  шүүхийн  шүүгч  Ч.Байгалмаа  даргалж, 

Улсын  яллагч:  Г.Цогтмагнай

Нарийн  бичгийн  дарга:  В.Ундрах-Оргил

Шүүгдэгч  Ц.Э  ,  түүний  өмгөөлөгч  Г.Дуламсүрэн  нарыг  оролцуулан  тус  шүүхийн  хурлын  танхимд  хялбаршуулсан  журмаар  хийсэн    шүүх  хуралдаанаар 

Аймгийн  прокурорын  газраас  Эрүүгийн  хуулийн  тусгай  ангийн  17.1  дүгээр  зүйлийн  1-т  зааснаар  шүүгдэгч  Ц.Э  д  холбогдуулан  яллах  дүгнэлт  үйлдэж  ирүүлсэн  эрүүгийн  2014000000273  дугаартай  хэргийг  2020  оны  07  дугаар  сарын  28-ны  өдөр  хүлээн  авч  хянан  хэлэлцэв.      

 

Шүүгдэгчийн  биеийн  байцаалт

                   

                  Монгол  улсын  иргэн,  1982  оны  06  дугаар  сарын  26-ны  өдөр  Баянхонгор  аймгийн  Эрдэнэцогт  суманд  төрсөн,  38  настай,  эрэгтэй,  боловсролгүй,  мэргэжилгүй,  малчин,  ам  бүл  4, овогт  Ц.Э

 

Үйлдсэн  хэргийн  талаар

                        Шүүгдэгч  Ц.Э    нь  2020  оны  06  дугаар  сарын  22-ны  өдөр  Баянхонгор  аймгийн  Эрдэнэцогт  сумын  Цагаан  дэнж  6  дугаар  багийн  209  тоот  хашааны  үүднээс  Ц.Б ын  эзэмшлийн  59-16  БНЗ  улсын  дугаартай  Мустанг-5  маркийн  мотоциклийг  хүч  хэрэглэхгүйгээр  нууцаар  хууль  бусаар  хулгайлан  авч  бусдад  1.520.000  төгрөгийн  хохирол  учруулсан   

                        Мөн  Ц.Э    нь  тус  мотоцикль  дээр  байсан  Н.ОрО ын  каск  /хамгаалалтын  малгайг/  хулгайлан  авч  бусдад  25.000  төгрөгийн  хохирол  учруулсан  гэмт  хэрэгт    холбогджээ.  /  яллах  дүгнэлтэнд  бичигдсэнээр/

 

ТОДОРХОЙЛОХ  НЬ:

 

Талуудын  хүсэлтээр  хэрэгт  авагдсан  яллах  болон  хөнгөрүүлэх,  цагаатгах  талын  нотлох  баримтуудыг  тал  бүрээс  нь  бүрэн  бодитойгоор  шинжлэн  судалж,  хэргийг  шүүх  хуралдаанаар  хянан  хэлэлцэв.  Үүнд: 

 

             

                        Шүүгдэгч  Ц.Э  гийн  мөрдөн  байцаалтад  өгсөн 

        ...  би  Баянхонгор  аймгаас  ойр  зуурын  юм  аваад  эхнэрийн  хамт  буцаад  Эрдэнэцогт  сум  руу  явсан.  Би  тухайн  өдөр  Баянхонгор  аймгаас  гараад  замд  байдаг  найз  Бүдээгийн  гэрт  ороод  0.5-тай  нэг  шил  архи  хоёулаа  хувааж  уугаад  сумын  төв  рүү  орсон  юм.  Сумын  төв  дээр  орж  ирээд  явж  байхад  цагдаа  зогсоогоод  архи  уусан  байна  гээд  миний  мотоциклийг  журмын  хашаанд  хийсэн.  Би  мотоциклио  журмын  хашаанд  хийлгэчихээд  явж  байгаад  нэг  хашааны  гадаа  мотоцикль  байхаар  асаагаад  унаад  хөдөө  гэр  лүүгээ  явсан.  Манай  эхнэр  намайг  цагдаа  зогсооход  хөдөө  гэртээ  очоод  байж  байя  гээд  түрүүлээд  гэр  лүү  явсан  байсан.  Би  ганцаараа  байсан.  Намайг  гэртээ  ирээд  удаагүй  байхад  араас  манай  сумын  цагдаа,  мөн  мотоциклийн  эзэн  2  ирсэн  өөр  зүйл  болоогүй.”  гэх  мэдүүлэг  /хх-ийн  48-49/, 

 

Хохирогч  Ц.Б ын  мөрдөн  байцаалтад  өгсөн 

            …  дүү  ОрО   миний  мотоциклийг  унаад  аймаг  яваад  ирье  гэхээр  нь  өгөөд  явуулсан.  Тэгээд  тэр  өдөртөө  ирээгүй  над  руу  утсаар  яриад  таны  мотоциклийг  сумын  төв  дээрээс  хулгайд  алдчихлаа  цагдаад  хэлсэн  байгаа  гэсэн  өөр  зүйл  яриагүй,  2019  онд  хүнээс  шинээр  нь  худалдан  авч  байсан.  Би  тэр  Ц.Доржбат  гэж  хүнээс  1950.000  төгрөгөөр  худалдан  авч  байсан.  Миний  мотоциклийг  өгсөн  бас  миний  мотоциклийн  эвдсэн  байсан  2  толины  мөнгийг  нь  өгсөн.  Миний  хохирлыг  бүрэн  барагдуулсан...  гэх  мэдүүлэг  хх-ийн  24,  26/, 

           

                    Хохирогч  О ын  мөрдөн  байцаалтад  өгсөн 

...Би  хөдөө  гэрээсээ  2020  оны  06  дугаар  сарын  22-ны  өдөр  Эрдэнэцогт  сумын  төвд  ирсэн  айлын  гадаа  мотоциклио  тавиад  орхисон  байсан  чинь  миний  мотоцикль  алга  болсон  байсан.  Оранж  шар  өнгийн    хулдаасан  бүтээлэгтэй  мустанг  5  маркийн  59-16  БНЗ  улсын  дугаартай  150  мотортой  руль  дээр  нь  хар  каск  байсан.  Өөр  содон  шинж  тэмдэг  гээд  байх  зүйлгүй.  Энэ  мотоцикль  миний  мотоцикль  биш  манай  ах  Ц.Б   гэж  хүний  мотоцикль  байгаа  юм.    Би  гомдолтой  байна...  Би  каскаа  орхиод  явсан  тэр  хүн  авсан  байх.  Тэр  миний  каск  байгаа  ,  миний  каскыг  бүрэн  бүтэн  өгсөн  ....гэх  мэдүүлэг  /  хх-ийн  28,  30,  67/,

 

Баянхонгор  аймгийн  “Энх  нахиа”  ХХК-ны  2020  оны  06  дугаар  сарын  26-ны  өдрийн    347  дугаар  шинжээчийн  ...  хулгайд  алдагдсан  эд  зүйлийн  нийт  үнэ  1.520.000  төгрөг  болохыг  тогтоосон...  гэх    дүгнэлт  /  хх-ийн  41-42/, 

Баянхонгор  аймгийн  “Энх  нахиа”  ХХК-ны  2020  оны  07  дугаар  сарын  28-ны  өдрийн    376  дугаар  шинжээчийн  ...  хулгайд  алдагдсан  эд  зүйлийн  нийт  үнэ  25.000  төгрөг  болохыг  тогтоосон  ..  гэх  дүгнэлт  /  хх-ийн  70-71/, 

-Эрүүгийн  хэрэг  үүсгэж,  яллагдагчаар  татах  тухай  тогтоол  /  хх-ийн  01-02/,  гэмт  хэргийн  талаарх  гомдол  мэдээлэл  хүлээн  авсан  тэмдэглэл  /  хх-ийн  08/,  хэргийн  газар  үзлэг  хийсэн  тэмдэглэл,  гэрэл  зургийн  үзүүлэлтүүд  /  хх-ийн  9-12/,эвлэрлийн  гэрээ  /  хх-ийн  15/,  хэргийг  хялбаршуулсан  журмаар  шийдвэрлэх  тухай  прокурорын  тогтоол  /  хх-ийн  16/,  эд  хөрөнгө  битүүмжилсэн  прокурорын  тогтоол  /  хх-ийн  18/,  эд  хөрөнгөтэй  лавлагаа  /  хх-ийн  51/,  шүүгдэгч  Ц.Э  гийн  иргэний  үнэмлэхний  лавлагаа  /хх-ийн  53/,  гэрлэлтийн  бүртгэлийн  лавлагаа  /хх-ийн  52/,  Баянхонгор  аймгийн  Хөдөлмөр  Халамж  үйлчилгээний  газрын  тодорхойлолт  /  хх-ийн  /,    шүүгдэгч  Ц.Э  гийн  эрүүгийн  хариуцлага  хүлээж  байсан  эсэхийг  шалгах  хуудас  /хх-ийн  56/,  зэрэг  нотлох  баримтуудыг  шинжлэн  судласан  болно.

 

Баянхонгор  аймгийн  Прокурорын  газраас  шүүгдэгч  Ц.Э  д  Эрүүгийн  хуулийн  тусгай  ангийн  17.1  дүгээр  зүйлийн  1-д  зааснаар  яллах  дүгнэлт  үйлдэж,  хэргийг  шүүхэд  шилжүүлсэн  байна.

 

Шүүхийн  хэлэлцүүлэгт  шинжлэн  судлагдсан  дээрх  нотлох  баримтууд  нь  энэ  хэрэгт  хамааралтай,  хуульд  заасан  үндэслэл  журмын  дагуу  хэрэгт  цугларч  бэхжүүлсэн,  шүүгдэгч  болон  арван  зургаан  насанд  хүргээгүй  хохирогч,  арван  зургаан  насанд  хүргээгүй  гэрч,  гэрч  нараас  мэдүүлэг  авахдаа  Эрүүгийн  хэрэг  хянан  шийдвэрлэх  ажиллагааны  журам,  шаардлага  зөрчөөгүй,  мөрдөн  шалгах  ажиллагааны  явцад  хэрэг  хянан  шийдвэрлэх  ажиллагааны  оролцогчийн  хуулиар  хамгаалагдсан  эрхийг  хассан  буюу  хязгаарласан  зөрчил  тогтоогдоогүй  тул  шүүх  тэдгээр  баримтыг  хэрэг  хянан  шийдвэрлэхэд  ач  холбогдолтой,  хамаарал  бүхий  талаас  нь  үнэлж  прокурорын  шүүхэд  шилжүүлсэн  хэргийн  хүрээнд  шүүгдэгчийн  гэм  буруугийн  талаар  дүгнэлт  хийж  холбогдох  хэргийг  хянан  шийдвэрлэх  боломжтой  гэж  үзлээ.

 

  Хавтаст  хэрэгт  авагдсан  баримтуудад  тулгуурлан  хэргийн  газар  болсон  гэх  үйл  баримтад  дүгнэлт  хийхэд  гэмт  хэрэг  гарсан  байдал,  гэмт  хэрэг  гарах  болсон  шалтгаан,  хэн  үйлдсэн,  гэмт  хэргийн  сэдэлт,  гэм  буруугийн  хэлбэр  зэргийг  хангалттай  тогтоож  ирүүлсэн  гэж  үзэж  хэргийг  шийдвэрлэлээ.

 

Хулгайлах  гэмт  хэрэг  нь  бусдын  өмчлөлд  байгаа  эд  хөрөнгийг  хүч  хэрэглэхгүйгээр  нууц  ,  хууль  бусаар    бүр  мөсөн  үнэ  төлбөргүйгээр  эзэшилдээ  авч,  өөрийн  болгон  захиран  зарцуулах  боломж  бүрдүүлсэнээр  төгссөнд  тооцдог.

 

                        Шүүгдэгч  Ц.Э    нь  2020  оны  06  дугаар  сарын  22-ны  өдөр  Баянхонгор  аймгийн  Эрдэнэцогт  сумын  Цагаан  дэнж  6  дугаар  багийн  209  тоот  хашааны  үүднээс  Ц.Б ын  эзэмшлийн  59-16  БНЗ  улсын  дугаартай  Мустанг-5  маркийн  мотоциклийг  хүч  хэрэглэхгүйгээр  нууцаар  хууль  бусаар  хулгайлан  авч  бусдад  1.520.000  төгрөгийн  хохирол  учруулсан,  мөн  тус  мотоцикль  дээр  байсан  Н.ОрО ын  каск  /хамгаалалтын  малгайг/  хулгайлан  авч  бусдад  25.000  төгрөгийн  хохирол  учруулсан  гэмт  хэрэг  үйлдсэн  болох  нь 

Шүүгдэгч  Ц.Э  гийн...  Бүдээгийн  гэрт  ороод  0.5-тай  нэг  шил  архи  хоёулаа  хувааж  уугаад  сумын  төв  дээр  орж  ирээд  явж  байхад  цагдаа  зогсоогоод  архи  уусан  байна  гээд  миний  мотоциклийг  журмын  хашаанд  хийсэн.  Тэгээд  би  мотоциклоо  журмын  хашаанд  хийлгэчхээд  явж  байгаад  нэг  хашааны  гадаа  мотоцикл  байхаар  асаагаад  унаад  хөдөө  гэр  лүгээ  явсан...  гэх  мэдүүлэг  /хх-ийн  48-49/,

Хохирогч  Ц.Б ын  …    дүү  ОрО   миний  мотоциклийг  унаад  аймаг  яваад  ирье  гэхээр  нь  өгөөд  явуулсан,  ..над  руу  утсаар  яриад  таны  мотоциклийг  сумын  төв  дээрээс  хулгайд  алдчихлаа  гэж  хэлсэн...гэх  мэдүүлэг  /хх-ийн  24,  26/, 

                    Хохирогч  Н.ОрО ын  ...Би  хөдөө  гэрээсээ  Эрдэнэцогт  сумын  төвд  ирсэн  айлын  гадаа  мотоциклио  тавиад  орхисон  байсан  чинь  миний  мотоцикль  алга  болсон  байсан,..  Оранж  шар  өнгийн  хулдаасан  бүтээлэгтэй  мустанг  5  маркийн  59-16  БНЗ  улсын  дугаартай  150  мотортой  руль  дээр  нь  хар  каск  байсан.  Өөр  содон  шинж  тэмдэг  гээд  байх  зүйлгүй...гэх  мэдүүлэг  /  хх-ийн  28,  30,  67/,

Баянхонгор  аймгийн  “Энх  нахиа”  ХХК-ны  2020  оны  06  дугаар  сарын  26-ны  өдрийн    347  дугаар  шинжээчийн  ...  хулгайд  алдагдсан  эд  зүйлийн  нийт  үнэ  1.520.000  төгрөг  болохыг  тогтоосон....  гэх  дүгнэлт  /  хх-ийн  41-42/, 

Баянхонгор  аймгийн  “Энх  нахиа”  ХХК-ны  2020  оны  07  дугаар  сарын  28-ны  өдрийн    376  дугаар  шинжээчийн  ...  хулгайд  алдагдсан  эд  зүйлийн  нийт  үнэ  25.000  төгрөг  болохыг  тогтоосон…  гэх    дүгнэлт  /  хх-ийн  70-71/,  зэрэг  хэрэгт  авагдсан  бичгийн  нотлох  баримтаар  нотлогдон  тогтоогдож  байна.

 

                           

                    Түүнчлэн  шүүгдэгч  Ц.Э  гийн  дээрх  үйлдэл,  эс  үйлдэхүй  нь  Эрүүгийн  хуулийн  ерөнхий  ангийн  2.3  дугаар  зүйлийн  2-т  зааснаар  ашиг  олох  санаа  зорилгоор,  бусдын  өмчлөлийн  эд  хөрөнгийг  өмчлөгч  болон  эзэмшигчид  мэдэгдэхгүйгээр  ,  нууц,  далд  аргаар,  эзэмшилдээ  авч,  өөрийн  болгон  захиран  зарцуулах  бодит  бололцоо  бий  болгох  нь  хууль  бус  шинжтэйг  мэдсээр  байж  энэ  нөхцөл  байдлыг  өөрсдөө  хүсч  үйлдсэн,  хохирогчид  учирсан  хохирол,  хор  уршгийг  зориуд  хүргэсэн  гэм  буруугийн  санаатай  үйлдэл  бөгөөд  дээрх  хууль  бус  шинжтэй  үйлдлүүд  нь  учирсан  хохирол,  хор  уршигтай  шалтгаант  холбоотой  гэж  үзэж  шүүгдэгч  Ц.Э  гийн  үйлдлийг  Эрүүгийн  хуулийн  тусгай  ангийн  17.1    дүгээр  зүйлийн    1-т    заасан  “  хулгайлах”  гэмт  хэргийн  шинжийг  бүрэн  хангасан  байна.

 

Уг  гэмт  хэргийн  хохирогч  Ц.Б   алдагдсан  эд  зүйл  болох  Мустанг-5  маркийн  мотоциклийг  1.520.000  төгрөг,  хохирогч  Н.ОрО ын  мотоциклийн  хамгаалалтын  малгайг  25.000    төгрөгөөр  үнэлсэн  эд  зүйлийн  үнэлгээ  баримт  хэрэгт  авагдсан  ба  уг  үнэлгээний  талаар  хохирогч,  шүүгдэгч  хэн  аль  нь  маргаагүй,  шүүгдэгч    Ц.Э    нь    бусдын  эд  зүйлийг  хулгайлж  авсан  өөрийн  үйлдэл  болон  авсан  эд  зүйлийн  тоо,  хэмжээ  болон    хэргийн  үйл  баримт  зэрэгт  маргаагүй  болохыг  тус  тус  тэмдэглэх  нь  зүйтэй.

 

Шүүгдэгч  Ц.Э    нь  хохирогч  Ц.Б ,  Н.ОрО     нар  хулгайд  алдагдсан  мотоцикль,  хамгаалалтын  малгай  зэргийг  буцааж  өгсөн  /  хх-ийн  67,  /,    гэмт  хэргийн  улмаас  учирсан  хохирлыг  барагдуулсан,  хохирогч  Ц.Б ,  Н.ОрО   нар  нь  нэхэмжлэх  зүйлгүй    талаар  илэрхийлсэн  байх  тул  шүүгдэгчийн  бусдад  төлөх  төлбөргүй,  гэмт  хэрэг  үйлдэж  учруулсан  хохирол,  хор  уршгийг  нөхөн  төлж  арилгасан  гэж  үзнэ.

 

Аймгийн  прокурорын  газраас  Эрүүгийн  хуулийн  тусгай  ангийн  17.1  дүгээр  зүйлийн  1-т  зааснаар  шүүгдэгч  Ц.Э  д  ял  сонсгож,  зүйлчилж  яллах  дүгнэлт  үйлдэж  ирүүлсэн  хэргийн  зүйлчлэл  түүний  үйлдэлд  нь  тохирсон,  хэргийн  бүрдэл  хангагдсан  байх  тул  шүүхээс  шүүгдэгч  Ц.Э  г  бусдын  эд  хөрөнгийг  хүч  хэрэглэхгүйгээр,  нууцаар,  хууль  бусаар  авсан  хулгайлах  гэмт  хэрэг  үйлдсэн  гэм  буруутайд  тооцож,  Эрүүгийн  хуулийн  ерөнхий  ангийн  1.2  дугаар  зүйлийг  баримтлан  мөн  хуулийн  1.4  дүгээр  зүйлийн  1-д  заасан  эрүүгийн  хариуцлага  хүлээлгэх  зарчимд  тулгуурлан,  хуулинд  заасан  хариуцлага  оногдуулах  үндэслэлтэй  гэж  үзлээ. 

 

Шүүх  Эрүүгийн  хэрэг  хянан  шийдвэрлэх  тухай  хуулийн  17.4  дүгээр  зүйлийн  2  дахь  хэсэгт  зааснаар  хэргийг  хялбаршуулсан  журмаар  хянан  шийдвэрлэх  боломжтой  гэж  үзэн  Прокуророос  яллах  дүгнэлт  үйлдэж,  ялын  төрөл  хэмжээний  талаар  гаргасан  Эрүүгийн  хуулийн  ерөнхий  ангийн  7.1  дүгээр  зүйлийн  1-т  зааснаар  шүүгдэгч  Ц.Э  д    240  цагийн  хугацаагаар  нийтэд  тустай  ажил  хийлгэх  талаар  ялын  саналыг  прокурор,  мөрдөн  байцаалтын  шатанд  илэрхийлсэн  тул  Эрүүгийн  хэрэг  хянан  шийдвэрлэх  тухай  хуулийн  17.4  дүгээр  зүйлийн  5  дахь  хэсэгт  заасны  дагуу  хэргийг  хянан  шийдвэрлэх  нь  зүйтэй  байна.

 

Шүүгдэгч  Ц.Э    нь  эрүүгийн  хариуцлага  хүлээж  байсан  эсэхийг  шалгах  хуудсанд  Цагдаагийн  Ерөнхий  газрын  МСТ-ийн  ял  шийтгэлийн  мэдээллийн  санд  бүртгэгдээгүй  байх  тул  түүнийг  анх  удаа  хөнгөн  гэмт  хэрэг  үйлдсэн  гэж  дүгнэв. 

 

Шүүгдэгч  Ц.Э    нь  анх  удаа    гэмт  хэрэг  үйлдсэн,  гэмт  хэргийн  улмаас  учирсан  хохирлыг  нөхөн  төлж  барагдуулсан  зэргийг  харгалзан  Эрүүгийн  хуулийн  ерөнхий  ангийн  6.5  дугаар  зүйлийн  1.1,  1.2-д  зааснаар  хөнгөрүүлэх  нөхцөл  байдалд  тооцож,  Эрүүгийн  хуулийн  ерөнхий  ангийн  6.6-д  заасан  хүндрүүлэх  нөхцөл  байдал  тогтоогдохгүй  байна.   

 

Аймгийн  Прокурорын  газраас  Эрүүгийн  хуулийн  тусгай  ангийн  17.1  дүгээр  зүйлийн  1-д  зааснаар  шүүгдэгч  Ц.Э  д  яллах  дүгнэлт  үйлдэж  ирүүлсэн  хэргийн  зүйлчлэл  тохирсон  байх  тул  шүүхээс  шүүгдэгч  Ц.Э  г  бусдын  эд  хөрөнгийг  хүч  хэрэглэхгүйгээр    нууцаар,  хууль  бусаар  авсан  хулгайлах  гэмт  хэрэг  үйлдсэн  гэм  бурутайд  тооцож,  хуульд  заасан  хариуцлага  хүлээлгэх  үндэслэлтэй  гэж  дүгнэв.

 

Шүүхээс  ял  оногдуулахдаа  Эрүүгийн  хуулийн  ерөнхий  ангийн  6.1  дүгээр  зүйлийн  2  дахь  хэсэгт  “Эрүүгийн  хариуцлага  хүлээлгэхэд  гэмт  хэрэг  үйлдсэн  нөхцөл  байдал,  учирсан  хохирол,  хор  уршгийн  шинж  чанар,  гэмт  хэрэг  үйлдсэн  хүний  хувийн  байдал,  эрүүгийн  хариуцлагыг  хөнгөрүүлэх,  хүндрүүлэх  нөхцөл  байдлыг  тал  бүрээс  нь  харгалзан  үзнэ”  гэж  заасныг  баримтлан  шүүгдэгч  Ц.Э    нь  анх  удаа  хөнгөн  гэмт  хэрэг  үйлдсэн,  гэм  буруугаа  сайн  дураараа  хүлээн  зөвшөөрсөн,  прокурорын  сонсгосон  ялыг  хүлээн  зөвшөөрсөн,  бусдад  төлөх  төлбөргүй,  гэмт  хэрэг  үйлдсэн  гэм  буруугаа  хүлээн  зөвшөөрсний  улмаас  үүсэх  хууль  зүйн  үр  дагаврыг  ойлгосон,түүний  хувийн  байдал  зэргийг  харгалзан  шүүгдэгч  Ц.Э  г  240  цагийн  хугацаагаар  нийтэд  тустай  ажил  хийлгэх  ялаар  шийтгэж  шийдвэрлэх  нь  зүйтэй  гэж  үзлээ.

 

Шүүгдэгч  Ц.Э  гийн  эзэмшлийн  ...Самсунг  маркийн  гар  утас...ыг  битүүмжилсэн  эд  хөрөнгө  битүүмжилсэн  прокурорын  тогтоолыг  хүчингүй  болгож  дээрх  эд  зүйлийг  хэрэгцээний  дагуу  эзэмшигч  Ц.Э  д  буцаан  олгож  шийдвэрлэлээ. 

Шүүгдэгч  Ц.Э    нь  цагдан  хоригдсон  хоноггүй,  эд  мөрийн  баримтаар  хураагдсан  зүйлгүй,  бусдад  төлөх  төлбөргүй,  түүний  бичиг  баримт  шүүхэд  шилжиж  ирээгүй,  гаргавал  зохих  хэрэг  хянан  шийдвэрлэх  ажиллагааны  зардалгүй  болохыг  дурдав.

Эрүүгийн  хэрэг  хянан  шийдвэрлэх  тухай  хуулийн  17.3  дугаар  зүйлийн  3,  17.4  дүгээр  зүйлийн  1.4,  36.2  дугаар  зүйлийн  1,2,3,4  ,  36.6,  36.7  дугаар  зүйлийн  2.1,  2.4,  36.7  дугаар  зүйлийн  3.1,    36.8,  36.10-д  заасныг  удирдлага  болгон

ТОГТООХ  нь:

1.  Шүүгдэгч овогт  Ц.Э    бусдын  эд  хөрөнгийг  хүч  хэрэглэхгүйгээр  нууцаар,  хууль  бусаар  авсан  хулгайлах  гэмт  хэрэг  үйлдсэн  гэм  буруутайд  тооцсугай. 

2.  Эрүүгийн  хуулийн  тусгай  ангийн  17.1  дүгээр  зүйлийн  1-т  зааснаар  шүүгдэгч  Ц.Э  г  240  цагийн  хугацаагаар  нийтэд  тустай  ажил  хийлгэх  ялаар  шийтгэсүгэй. 

3.  Эрүүгийн  хуулийн  ерөнхий  ангийн  5.4  дүгээр  зүйлийн  4-т  зааснаар  шүүгдэгч  Ц.Э    нь  шүүхээс  оногдуулсан    240  цагийн    хугацаагаар  нийтэд  тустай  ажил  хийлгэх  ялыг  биелүүлээгүй  бол  нийтэд  тустай  ажил  хийлгэх  ялын  найман  цагийн  ажлыг  нэг  хоногоор  тооцож  хорих  ялаар  солихыг  мэдэгдсүгэй.

4.Шүүгдэгч  Ц.Э  д  хэрэглэсэн  хувийн  баталгаа  гаргах  таслан  сэргийлэх  арга  хэмжээг  хэвээр  үлдээж,  шийтгэх  тогтоол  хүчин  төгөлдөр  болмогц  хүчингүй  болгосугай.

5.  Шүүгдэгч  Ц.Э  гийн  эзэмшлийн...  Самсунг  маркийн  гар  утас...ыг  битүүмжилсэн  эд  хөрөнгө  битүүмжилсэн  прокурорын  тогтоолыг  хүчингүй  болгож  дээрх  эд  зүйлийг  хэрэгцээний  дагуу  эзэмшигч  Ц.Э  д  буцаан  олгосугай.

6.Шүүгдэгч  Ц.Э    нь  цагдан  хоригдсон  хоноггүй,  эд  мөрийн  баримтаар  хураагдсан  зүйлгүй,  бусдад  төлөх  төлбөргүй,  түүний  бичиг  баримт  шүүхэд  шилжиж  ирээгүй,  гаргавал  зохих  хэрэг  хянан  шийдвэрлэх  ажиллагааны  зардалгүй  болохыг  тус  тус  дурдсугай.

7.    Шийтгэх  тогтоол  уншиж  сонсгосноор  хүчинтэй  болохыг  дурдаж,  шийтгэх  тогтоолыг  улсын  яллагч,  шүүгдэгч,  хохирогч,  тэдгээрийн  хууль  ёсны  төлөөлөгч,  өмгөөлөгч  өөрөө  гардан  авснаас  буюу  хүргүүлсэнээс  хойш  14  хоногийн  дотор      Баянхонгор  аймгийн  Эрүү,  Иргэний  хэргийн  давж  заалдах  шатны  шүүхэд  давж  заалдах  гомдол  гаргах,    дээд  шатны  прокурор,  эсэргүүцэл  бичих  эрхтэй  болохыг  дурдсугай. 

8.  Давж  заалдах  шатны  шүүхэд  гомдол  гаргах  буюу  эсэргүүцэл  бичигдсэн  тохиолдолд  тогтоолын  биелэлтийг  түдгэлзүүлж,  тогтоол  биелүүлэх  хүртэл  шүүгдэгч  Ц.Э  д  авсан  хувийн  баталгаа  гаргах  таслан  сэргийлэх  арга  хэмжээг  хэвээр  үргэлжлүүлсүгэй.