Шүүх | Баянгол дүүргийн Эрүүгийн хэргийн анхан шатны шүүх |
---|---|
Шүүгч | Чулуунбаатарын Отгонбаяр |
Хэргийн индекс | 106/2020/0816/Э |
Дугаар | 832 |
Огноо | 2020-09-23 |
Зүйл хэсэг | |
Улсын яллагч | Г.Намжил |
Баянгол дүүргийн Эрүүгийн хэргийн анхан шатны шүүхийн Шийтгэх тогтоол
2020 оны 09 сарын 23 өдөр
Дугаар 832
МОНГОЛ УЛСЫН НЭРИЙН ӨМНӨӨС
Баянгол дүүргийн эрүүгийн хэргийн анхан шатны шүүхийн шүүх хуралдааныг шүүгч Ч.Отгонбаяр даргалж,
Нарийн бичгийн дарга: С.Цэрэндулам,
Улсын яллагч: Г.Намжил,
Шүүгдэгч: Э.О- өөрөө өөрийгөө өмгөөлөн тус шүүхийн шүүх хуралдааны танхимд нээлттэй явуулсан шүүх хуралдаанаар Баянгол дүүргийн прокурорын газрын хяналтын прокуророос Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт Э.О-д холбогдуулж яллах дүгнэлт, ялын санал үйлдэж хэргийг хялбаршуулсан журмаар шийдвэрлүүлэхээр ирүүлсэн эрүүгийн 2005026111377 дугаартай хэргийг 2020 оны 9 дүгээр сарын 21-ний өдөр хүлээн авч хянан хэлэлцэв.
Шүүгдэгч: Монгол Улсын иргэн, Э.О-, .... тоот регистртэй,
Шүүгдэгч Э.О- нь согтуугаар 2020 оны 8 дугаар сарын 27-оос 28-нд шилжих шөнө Баянгол дүүргийн 6 дугаар хорооны нутаг дэвсгэрт 10 дугаар хорооллын автобусны буудлын орчимд иргэн Г.У-ыг “хаа явна гэж асуухад хариулсангүй” гэх шалтгаанаар түүний нүүрэн тус газарт гараараа цохиж зодон, эрүүл мэндэд нь “хамар ясны хугарал, хамарт шарх” гэмтэл бүхий хөнгөн хохирол санаатай учруулсан гэмт хэрэгт холбогджээ.
ТОДОРХОЙЛОХ НЬ:
Шүүхийн хэлэлцүүлэгт яллах, өмгөөлөх талаас шинжлэн судалсан болон хэрэгт цугларсан дараах нотлох баримтуудыг тал бүрээс нь бүрэн бодитой шинжлэн судлав. Үүнд:
Шүүгдэгч Э.О- шүүх хуралдаанд: “...Мөрдөн байцаалтын шатанд үнэн зөв мэдүүлэг өгсөн тул нэмж мэдүүлэх зүйлгүй” гэв.
Хохирогч Г.У-ын мөрдөн байцаалтад өгсөн: “...2020 оны 8 дугаар сарын 27-ны орой хувиараа таксинд явж байсан. Тэр шөнө 01 цаг өнгөрч байхад Алтай хотхоны баруун талаар замаар явж байтал 2 эрэгтэй хүн гар өргөсөн. 10 дугаар хороолол орно гэж хэлсэн. ...ард сууж явсан 2 залуугийн нэг нь хаана явж байгаа юм бэ гэхээр нь 3 дугаар эмнэлэг дээр явж байна гэтэл дахиад асуухаар нь хариултал чи одоо яагаад дугарч ядаад байгаа юм бэ гээд маргалдсан. Гэтэл куртикны юүдэнгээс татаад урчихсан. Тэгээд би машинаа зогсоогоод буугаад иртэл О- ч бас буугаад ирсэн. Бид 2 барилцаж аваад заамдалцсан. Тэгээд гарыг нь тавиултал миний нүүр хэсэгт 1 удаа гараараа цохисон. Тэр залуу бөгжтэй байсан бөгөөд хамрын нуруун дээр шалбарсан” гэсэн мэдүүлэг /хх-н 12-16/,
Гэрч Э.Т-ын мөрдөн байцаалтад өгсөн: “...2020 оны 8 дугаар сарын 27-ны орой ...Алтай хотхоны хажуу зам дээрээс такси авсан. Замд явж байтал О- жолоочоос хаа явна гэж асуутал жолооч дуугараагүй. Би техник импорт дээр явж байна гэсэн. О- жолоочоос хаа явна гэж дахиад асуусан. Тэгтэл жолооч машинаа зогсоогоод чи яасан том юм бэ гээд маргалдаж эхэлсэн. Хэн хэнээ цохиж авсан. Би дундуур нь ороод салгасан. Жолоочийн хамрын дээд хэсэгт шалбараад цус гарч байсан” гэсэн мэдүүлэг /хх-н 8-9/,
Шинжээчийн 9980 тоот дүгнэлтэд: “...Г.У-ын биед хамар ясны хугарал, хамарт шарх гэмтэл тогтоогдлоо. Дээрх гэмтэл нь мохоо зүйлийн үйлчлэлээр үүсгэгдсэн шинэ гэмтэл байна. Гэмтлийн зэрэг тогтоох журмын 2.4.1-т зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна. Цаашид ерөнхий хөдөлмөрийн чадварын тогтонги алдалтанд нөлөөлөхгүй” гэсэн дүгнэлт /хх-н 19-20/,
Яллагдагчаар Э.О-гийн мөрдөн байцаалтад өгсөн: “...Би сонсгосон ялыг хүлээн зөвшөөрч байна. ...Би машинаас буугаад зогстол намайг заамдаад авсан. Тэгэхээр нь би тэр ахын нүүр рүү нь 1-2 удаа цохисон” гэсэн мэдүүлэг /хх-н 25-26/,
Гомдол мэдээлэл хүлээн авсан тэмдэглэл /хх-н 3/, шүүгдэгчийн хувийн байдалтай холбоотой баримтууд /хх-н 29, 32-424/, хохирогчийн хүсэлт /хх-н 47/ зэрэг болно.
Шүүхийн хэлэлцүүлгийн үед шинжлэн судалсан дээрх нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай байна гэж үнэлэв.
Шүүгдэгчийн гэм буруу болон хохирол, хор уршигийн талаар:
Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн бөгөөд Эрүүгийн хэрэг хянан шийдвэрлэх тухай хуулийн 17.3 дугаар зүйлд заасны дагуу шүүгдэгч, хохирогч нар нь хэргийг хялбаршуулсан журмаар шийдвэрлүүлэх хүсэлт гаргасан байна.
Уг хүсэлтийн дагуу прокуророос хэргийг хялбаршуулсан журмаар хянан шийдвэрлэх тухай тогтоол гарган, яллах дүгнэлт, ялын санал үйлдэж хэргийг шүүхэд ирүүлснийг шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 2 дахь хэсэгт зааснаар хэргийг шууд хянан шийдвэрлэх боломжтой гэж үзэн хэргийг хялбаршуулсан журмаар ял оногдуулах шүүх хуралдаанаар шийдвэрлэсэн болно.
Шүүгдэгч Э.О- нь согтуугаар 2020 оны 8 дугаар сарын 27-28-нд шилжих шөнө Баянгол дүүргийн 6 дугаар хорооны нутаг дэвсгэрт 10 дугаар хорооллын автобусны буудлын орчимд иргэн Г.У-ыг “хаа явна гэж асуухад хариулсангүй” гэх шалтгаанаар түүний нүүрэн тус газарт гараараа цохиж зодон, эрүүл мэндэд нь “хамар ясны хугарал, хамарт шарх” гэмтэл бүхий хөнгөн хохирол санаатай учруулсан гэм буруутай болох нь:
Шүүгдэгчийн мөрдөн байцаалтын шатанд болон шүүх хуралдаанд үйлдсэн хэргээ хүлээн мэдүүлсэн мэдүүлгүүд, хохирогч Г.У-ын: “...би машинаа зогсоогоод буугаад иртэл О- ч бас буугаад ирсэн. Бид 2 барилцаж аваад заамдалцсан. Тэгээд гарыг нь тавиултал миний нүүр хэсэгт 1 удаа гараараа цохисон. Тэр залуу бөгжтэй байсан бөгөөд хамрын нуруун дээр шалбарсан” гэсэн мэдүүлэг /хх-н 12-16/, гэрч Э.Т-ын: “...жолооч машинаа зогсоогоод чи яасан том юм бэ гээд маргалдаж эхэлсэн. Хэн хэнээ цохиж авсан. Би дундуур нь ороод салгасан. Жолоочийн хамрын дээд хэсэгт шалбараад цус гарч байсан” гэсэн мэдүүлэг /хх-н 8-9/, шинжээчийн 9980 тоот дүгнэлт болон шүүх хуралдаанаар хэлэлцэгдсэн Эрүүгийн хэрэг хянан шийдвэрлэх тухай хуульд заасан үндэслэл журмын дагуу цуглуулж, бэхжүүлсэн дээрх нотлох баримтуудаар нотлогдон тогтоогдлоо.
Шүүгдэгч Э.О-гийн үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан “хүний эрүүл мэндэд хөнгөн хохирол санаатай учруулсан” гэмт хэргийн бүх шинжийг хангасан байх тул шүүгдэгчид холбогдуулж яллах дүгнэлт үйлдэж ирүүлсэн хуулийн зүйл, хэсэг тохирсон байна гэж шүүх дүгнэлээ.
Шүүгдэгч Э.О- нь согтуурсан үедээ хохирогчтой маргалдаж улмаар түүний нүүр рүү нь гараараа цохиж эрүүл мэндэд нь хөнгөн хохирол санаатай учруулсан нь өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэсэн гэм буруугийн санаатай хэлбэртэй, Эрүүгийн хуулийн тусгай ангид гэмт хэрэгт тооцохоор заасан нийгэмд аюултай үйлдэл болох нь хэрэгт авагдсан нотлох баримтуудаар нотлогдон тогтоогдсон тул гэм буруутайд тооцох нь зүйтэй байна.
Хохирогч нь мөрдөн байцаалтын шатанд гомдол саналгүй, нэхэмжлэх зүйлгүй гэж мэдүүлсэн, бичгээр хүсэлт гаргасан /хх-н 47/ байх тул шүүгдэгчийг бусдад төлөх төлбөргүй гэж үзлээ.
Эрүүгийн хариуцлагын талаар:
Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн, прокурорын сонсгосон ялыг хүлээн зөвшөөрч, хүлээлгэх эрүүгийн хариуцлагыг зөвшөөрөн, гэмт хэргийн улмаас учруулсан хохирлоо нөхөн төлсөн, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаврыг ойлгосон болох нь хавтаст хэрэгт авагдсан шүүгдэгчийн үйлдсэн гэмт хэрэгтээ гэмшиж байна. Хохирол нөхөн төлж хохирогчтой эвлэрсэн. Прокурорын санал болгосон эрүүгийн хариуцлагыг бүрэн хүлээн зөвшөөрч байгаа тул хэргийг хялбаршуулсан журмаар шийдвэрлэж өгнө үү гэсэн мэдүүлэг, хүсэлтүүд, хохирогчийн хүсэлт, эрүүгийн хариуцлагын төрөл хэмжээний талаарх прокурорын саналтай танилцаж зөвшөөрсөн талаарх баримтууд болон шүүхийн хэлэлцүүлэгт шүүгдэгчийн өгсөн мэдүүлэг, шинжлэн судалсан баримтуудаар тогтоогдож байна.
Прокуророос ялын төрөл хэмжээний талаар гаргасан “шүүгдэгч Э.О-г Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 450 нэгж буюу 450.000 төгрөгөөр торгох ял” оногдуулах саналыг шүүгдэгчид танилцуулсан байх ба прокурорын дээрх санал нь Эрүүгийн хуулийг буруу хэрэглээгүй, Эрүүгийн хэрэг хянан шийдвэрлэх тухай хуулийг зөрчөөгүй байх тул шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэгт заасны дагуу хэргийг хянан шийдвэрлэх нь зүйтэй гэж үзлээ.
Хэрэгт эд мөрийн баримтаар хураагдсан зүйлгүй, хэрэгт битүүмжлэгдсэн эд хөрөнгөгүй, шүүгдэгч нь цагдан хоригдсон хоноггүй болно.
Шүүхийн тухай хуулийн 31 дүгээр зүйлийн 31.3.1, Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5, 36.2, 36.6, 36.7, 36.8, 36.10 дугаар зүйлд тус тус заасныг удирдлага болгон ТОГТООХ нь:
ДАРГАЛАГЧ, ШҮҮГЧ Ч.ОТГОНБАЯР