МОНГОЛ УЛСЫН НЭРИЙН ӨМНӨӨС       

 

 

Баянзүрх дүүргийн иргэний хэргийн анхан шатны шүүхийн шүүгч Э.Энэбиш даргалж тус шүүхийн шүүх хуралдааны танхимд хийсэн хуралдаанаар,

Нэхэмжлэгч: Сүхбаатар дүүрэг, 8 дугаар хороо, батмөнхийн гудамж, 42 дугаар байр 24 тоотод оршин суух, Дугарсүрэнгийн Мөнхжаргалын /ЧБ80082277/ нэхэмжлэлтэй,

Хариуцагч: Баянзүрх дүүрэг, 8 дугаар хороо, Данзан 3 дугаар байр 33 тоотод оршин суух, Лхагвасүрэнгийн Эрдэнэцагаанд /НБ77030111/ холбогдох,

Зээлийн гэрээний үүрэгт 16,000,000 төгрөг гаргуулах нэхэмжлэлтэй иргэний хэргийг хянан хэлэлцэв.

Шүүх хуралдаанд: Нэхэмжлэгч Д.Мөнхжаргал, шүүх хуралдааны нарийн бичгийн дарга Т.Баясгалан нар оролцов.

 

ТОДОРХОЙЛОХ нь:

 

Нэхэмжлэгч Д.Мөнхжаргал шүүхэд гаргасан нэхэмжлэлдээ болон шүүх хуралдаанд гаргасан тайлбартаа: Би Л.Эрдэнэцагаантай 2015 оны 07 дугаар сарын 27-нд зээлийн гэрээ байгуулж, 9,000,000 төгрөгийг 45 хоног хүүгүй зээлдсэн бөгөөд хэрэв хугацаа хэтрүүлсэн тохиолдолд хоног тутамд үнийн дүнгийн 0,5 хувийн алданги төлөхөөр гэрээ байгуулж нотариатаар баталгаажуулсан болно. Мөн 2015 оны 10 дугаар сарын 27-ны өдөр хүртэл 3 удаагийн үйлдлээр 2,000,000 төгрөгийг ямар нэгэн болзолгүйгээр бэлнээр зээлдсэн болно. 2015 оны 09 дүгээр сарын 15-наас хойш өдрийн 0,5 хувийн алданги тооцож үзвэл 365x45,000-16,425,000 төгрөг болж байна. Гэхдээ иргэний хэргийн хуулийн дагуу алданги нэхэмжлэхдээ зээлсэн мөнгөний 50 хувиас ихгүй байхаар хуультай байдаг.

Иймд гэрээтэй зээлсэн 9,000,000 төгрөг, гэрээгүй зээлсэн 2,500,000 төгрөг, алданги 4,500,000 төгрөгийг нийт 16,000,000 төгрөгийг гаргуулж өгнө үү гэжээ.

 

ҮНДЭСЛЭХ нь:

 

Нэхэмжлэгч Д.Мөнхжаргал, хариуцагч Л.Эрдэнэцагаанд холбогдуулан зээлийн гэрээний үүрэгт 16,000,000 төгрөг гаргуулах нэхэмжлэл гаргажээ.

Хариуцагч Иргэний хэрэг шүүхэд хянан шийдвэрлэх тухай хуулийн 72 дугаар зүйлийн 72.2-т заасан хугацаанд нэхэмжлэлийн шаардлагыг зөвшөөрсөн, эсхүл татгалзсан үндэслэл бүхий тайлбараа нотлох баримтын хамт шүүхэд ирүүлээгүй байна.

Нэхэмжлэлийг бүхэлд нь хангаж шийдвэрлэв.

Зохигчийн хооронд 2015 оны 07 дугаар сарын 27-ны өдөр зээлийн гэрээ байгуулагдсан байх бөгөөд нэхэмжлэгч 9,000,000 төгрөгийг 45 хоногийн хугацаатай шилжүүлэн өгсөн байх бөгөөд гэрээний 11-т болон гэрээнд мөнгийг бэлнээр хүлээлцсэн талаар баримт үйлджээ. Мөн 2015 оны 10 дугаар сарын 27-ны өдөр хариуцагч 2,500,000 төгрөгийг бэлнээр хүлээн авсан тухай баримтыг үйлдэж зохигч гарын үсэг зуржээ.

Үүнээс үзвэл талуудын хооронд Иргэний хуулийн 281 дүгээр зүйлийн 281.1-д зааснаар зээлийн гэрээний харилцаа үүссэн байна.

Нэхэмжлэгч шүүхэд болон шүүх хуралдааны явцад хариуцагч зээл, хүүгийн төлбөр төлж байгаагүй талаар тайлбарласан нь Иргэний хэрэг шүүхэд хянан шийдвэрлэх тухай хуулийн 42 дугаар зүйлийн 42.1, 42.4-т зааснаар нэхэмжлэгчийн тайлбарыг үнэнд нийцсэн гэж үзлээ.

Талуудын хооронд байгуулсан зээлийн гэрээний 4-т зааснаар хариуцагч гэрээнд заасан хугацаанд зээлийг төлөөгүй тохиолдолд хоногт 0,5 хувийн алданги төлөхөөр заажээ. Хариуцагч гэрээний үүргээ биелүүлээгүй байх тул хариуцагчийн гүйцэтгэвэл зохих үүрэг 9,000,000 төгрөгийн 0,5 хувийн алдангийг 2015 оны 09 дүгээр сарын 15-ны өдрөөс нэхэмжлэгчийн шүүхэд нэхэмжлэл гаргах хүртэл хугацааны алдангийг Иргэний хуулийн 232 дугаар зүйийн 232.4, 232.6-д зааснаар тооцон (9,000,000/2=4,500,000) 4,500,000 төгрөгийг хариуцагчаас нэмж гаргуулахаар шийдвэрлэв.

Хариуцагч 2017 оны 01 дүгээр сарын 06-ны өдөр шүүх хуралдааны товыг хүлээн авч, товд гарын үсэг зурж баталгаажуулсан боловч шүүхэд хүндэтгэн үзэх шалтгаангүйгээр хүрэлцэн ирээгүй, нэхэмжлэгч хэргийг хариуцагчийн эзгүйд хянан шийдвэрлүүлэх хүсэлт гаргасныг үндэслэн Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3-т зааснаар нэхэмжлэгчээс гаргасан тайлбар болон бусад баримт нотолгоог үндэслэн хэргийг хянан шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118 дугаар зүйлд заасныг удирдлага болгон

 

ТОГТООХ нь:

 

1. Иргэний хуулийн 281 дүгээр зүйлийн 281.1, 232 дугаар зүйлийн 232.4, 232.6-д заасныг баримтлан хариуцагч Л.Эрдэнэцагаанаас 16,000,000 төгрөг гаргуулж нэхэмжлэгч Д.Мөнхжаргалд олгосугай.

2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчээс улсын тэмдэгтийн хураамжид төлсөн 238,000 төгрөгийг улсын орлогод үлдээж, хариуцагч Л.Эрдэнэцагаанаас 238,000 төгрөг гаргуулж нэхэмжлэгч Д.Мөнхжаргалд олгосугай.

3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, гуравдагч этгээд, тэдгээрийн төлөөлөгч, өмгөөлөгч анхан шатны шүүхийн шийдвэрийг эс зөвшөөрвөл гардан авсан өдрөөс хойш 14 хоногийн дотор Нийслэлийн иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

 

ДАРГАЛАГЧ, ШҮҮГЧ                                      Э.ЭНЭБИШ