2016 оны 11 сарын 08 өдөр

Дугаар 102/ШШ2016/05653

Улаанбаатар хот

 

 

Хариуцагчийн зөвшөөрлийг баталж хэргийг

хэрэгсэхгүй болгох тухай

 

Баянгол дүүргийн Иргэний хэргийн анхан шатны шүүхийн шүүгч Ж.Кульдана би,

Нэхэмжлэгч: Чингэлтэй дүүрэг, 3 дугаар хороо, 40, 50 мянгат, 43 байр, 104 тоотод байрлах, Мөнгөн Глобал ББСБ ХХК /РД:5683904/

     Хариуцагч: Баянгол дүүрэг, 16 дугаар хороо, туул 20 гудамж, 423 тоотод оршин суух, Шар нуур овогт Шоовдорын Энх-Оюун /РД:ЦЗ75051120/

Зээлийн гэрээний үүрэгт 4.848.743,58 төгрөг гаргуулах тухай нэхэмжлэлийг 2016 оны 10 дугаар сарын 10-ны өдөр хүлээн авч хянаад

 

ТОДОРХОЙЛОХ нь:

 

Нэхэмжлэгч Мөнгөн Глобал ББСБ ХХК шүүхэд гаргасан нэхэмжлэлдээ: Ш.Энх-Оюун нь Мөнгөн Глобал ББСБ ХХК-тай 2014 оны 09 дүгээр сарын 26-ны өдөр ЗГ14/46 тоот зээлийн гэрээгээр 5.000.000 төгрөгийн зээлийг авсан. 2016 оны 10 дугаар сарын 06-ны өдрийн байдлаар дээрх зээлийн үлдэгдэл 4.131.468,56 төгрөг үндсэн зээлийн хүүгийн үлдэгдэл 717.275,02 төгрөг нийт зээл, зээлийн хүүгийн үлдэгдэл 4.848.743,58 төгрөгийг барагдуулаагүй байгаа бөгөөд зээлийн хугацаа хэтрэлт 120 хоног байна. Ш.Энх-Оюун нь зээл авсанаас хойш 2016 оны 10 дугаар сарын 06-ны өдөр хүртэл үндсэн зээл 868.231,44 төгрөг, үндсэн зээлийн хүүд 4.385.968,56 төгрөгийг төлсөн. Ш.Энх-Оюун нь ЗГ14/46 тоот зээлийн гэрээний үүргээ зөрчиж зээлийн графикт төлбөрийг сүүлийн 13 сар зөрчиж зээлийн төлбөрөө барагдуулаагүй нь манай байгууллагад хохирол учрах нөхцлийг үүсгээд байна. Иймд Ш.Энх-Оюунаас зээл, зээлийн хүүгийн төлбөр 4.848.743,58 төгрөгийг гаргуулж өгнө үү гэжээ.     

 

              Нэхэмжлэгч Мөнгөн Глобал ББСБ ХХК-ийн захирал Ш.Балжинням шүүхэд гаргасан хүсэлтдээ: Хариуцагч Ш.Энх-Оюун нь нэхэмжлэлийн шаардлага 4.848.743,58 төгрөгийг 2017 оны 01 дүгээр сарын 05-ны өдрийн дотор бүрэн төлж барагдуулахаар зөвшөөрсөн. Иймд хариуцагчийн зөвшөөрлийг баталж хэргийг хэрэгсэхгүй болгож өгнө үү гэжээ.

 

Хариуцагч Ш.Энх-Оюун шүүхэд гаргасан хариу тайлбартаа: Ш.Энх-Оюун миний бие Мөнгөн Глобал ББСБ ХХК-ийн нэхэжлэлийн шаардлагыг хүлээн зөвшөөрч байна. Мөнгөн Глобал ББСБ ХХК-ийн нэхэмжилсэн 4.848.743,58 төгрөгийг 2017 оны 01 дүгээр сарын 05-ны өдрийн дотор бүрэн төлж барагдуулах болно. Иймд хариуцагчийн зөвшөөрлийг баталж, хэргийг хялбаршуулсан журмаар шийдвэрлэж өгнө үү гэжээ.

 

ҮНДЭСЛЭХ нь:

 

            Нэхэмжлэгч Мөнгөн Глобал ББСБ ХХК нь хариуцагч Ш.Энх-Оюунд холбогдуулан зээлийн гэрээний үүрэгт 4.848.743,58 төгрөг гаргуулах тухай нэхэмжлэлийг гаргажээ. 

            Хариуцагч Ш.Энх-Оюун нь нэхэмжлэгч Мөнгөн Глобал ББСБ ХХК-иас 2014 оны 09 дүгээр сарын 26-ны өдөр ЗГ14/46 тоот зээлийн гэрээ, 2014 оны 09 дүгээр сарын 26-ны өдөр ФГ/14-46 тоот эд хөрөнгө өмчлөлд шилжүүлэх гэрээ /фидуци/, 2016 оны 04 дүгээр сарын 06-ны өдөр ЗГ/14/46-01 тоот Зээлийн нэмэлт гэрээг тус тус байгуулсан болох нь зохигчийн шүүхэд гаргасан тайлбар, хэрэгт авагдсан ЗГ14/46 тоот зээлийн гэрээ, ФГ/14-46 тоот эд хөрөнгө өмчлөлд шилжүүлэх гэрээ /фидуци/, ЗГ/14/46-01 тоот Зээлийн нэмэлт гэрээ зэргээр тогтоогдож байна.

            Хэрэг хянан шийдвэрлэх ажиллагааны явцад хариуцагч Ш.Энх-Оюун нь Мөнгөн Глобал ББСБ ХХК-ийн нэхэмжлэлийн шаардлага 4.848.743,58 төгрөгийг 2017 оны 01 дүгээр сарын 05-ны өдрийн дотор бүрэн төлж барагдуулахаар хүлээн зөвшөөрсөн байна.

  Хариуцагч нэхэмжлэлийн шаардлагыг хүлээн зөвшөөрсөн нь бусдын эрх, эрх чөлөө, хуулиар хамгаалагдсан ашиг сонирхолыг хөндөөгүй, хуульд харшлаагүй байх тул хариуцагч Ш.Энх-Оюуны зөвшөөрлийг баталж, хэргийг хэрэгсэхгүй болгон шийдвэрлэх нь зүйтэй.

              Хэргийг хялбаршуулсан журмаар хянан шийдвэрлэхтэй холбогдуулан Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5-д зааснаар улсын тэмдэгтийн хураамжийг тал хувиар бууруулж хариуцагч Ш.Энх-Оюунаас 46265 төгрөгийг гаргуулж нэхэмжлэгчид олгож шийдвэрлэв.

             

              Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 75 дугаар зүйлд заасныг удирдлага болгон                                                                       

 

ЗАХИРАМЖЛАХ нь:

 

1. Хариуцагч Ш.Энх-Оюун нь Мөнгөн Глобал ББСБ ХХК-ийн нэхэмжлэлийн шаардлага 4.848.743,58 төгрөгийг 2017 оны 01 дүгээр сарын 05-ны өдрийн дотор төлөхөөр хүлээн зөвшөөрсөн хариуцагчийн зөвшөөрлийг баталж, хэргийг хэрэгсэхгүй болгосугай.

 

2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчээс улсын тэмдэгтийн хураамжид 92530 төгрөг төлснийг дурдаж, Баянгол дүүргийн Татварын хэлтсийн 2602002965 тоот данснаас 46265 төгрөг, хариуцагч Ш.Энх-Оюунаас 46265 төгрөгийг тус тус гаргуулан нэхэмжлэгч Мөнгөн Глобал ББСБ ХХК-д олгосугай.

 

              3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэх болохыг дурьдсугай.

 

4. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-т зааснаар зохигчид энэ захирамжинд давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурьдсугай.

 

  

 

 

ШҮҮГЧ                                           Ж.КУЛЬДАНА