2020 оны 03 сарын 20 өдөр                                 2020/ШЦТ/97                                        Зуунмод сум

       

                             

 

МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

Шүүх хуралдааны нарийн бичгийн дарга Ж.Эрдэнэсувд

Улсын яллагчаар Б.Сувд-Эрдэнэ

Шүүгдэгчийн өмгөөлөгч Ю.Сэвлэгмаа

   Шүүгдэгч Г.******* нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар яллах дүгнэлт үйлдэж ирүүлсэн Боржигон овогт Гомбодоржийн *******д холбогдох эрүүгийн 1934011670013 дугаартай хэргийг 2020 оны 02 дугаар сарын 14-ний өдөр хүлээн авч, 2020 оны 03 дугаар сарын 20-ны өдөр хянан хэлэлцэв.

 

Шүүгдэгчийн биеийн байцаалт:

Монгол улсын иргэн, 1995 оны 04 дүгээр сарын 22-ны өдөр Улаанбаатар хотод төрсөн, 24 настай, эрэгтэй, дээд боловсролтой, хүний их эмч мэргэжилтэй, ам бүл 3, эхнэр, хүүхдийн хамтаар Улаанбаатар хот Чингэлтэй дүүрэг, 13 дугаар хороо 34-685 тоотод оршин суух хаягтай, улсаас авсан гавьяа шагналгүй, урьд нь 2018 оны 12 дугаар сарын 24-ний өдрийн Баянзүрх дүүргийн шүүхийн 20 дугаартай шийтгэх тогтоолоор Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 450,000 төгрөгөөр торгох ялаар шийтгүүлж байсан, бие эрүүл, хэрэг хариуцах чадвартай гэх, Боржигон овогт Гомбодоржийн ******* /РД:ШУ95042292/

 

Холбогдсон хэргийн талаар /яллах дүгнэлтэд дурдагдсанаар/

Яллагдагч Г.******* нь Төв аймгийн Зуунмод сумын 6 дугаар багийн нутагт үйл ажиллагаа явуулдаг “Edelwess” сувилалын газарт эмчээр ажиллаж байхдаа 2019 оны 12 дугаар сарын 16-ны өдөр сувилалын газрын кассын өрөөнөөс хууль бусаар нууцаар 1.000.000 төгрөг хулгайлсан гэмт хэрэгт холбогджээ.

ТОДОРХОЙЛОХ нь:

 

            Шүүхийн хэлэлцүүлэгт:

            Шүүгдэгч Г.******* нь мэдүүлэхдээ: “Мөрдөн байцаалтын шатанд үнэн зөв мэдүүлэг өгсөн тул дахин мэдүүлэг өгөхгүй” гэв.

Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хэргийн газарт үзлэг хийсэн тэмдэглэл, гэрэл зургийн үзүүлэлтүүд /хх-ийн 4-6 тал/, хохирогч Г.Наранцэцэгийн мэдүүлэг /хх-ийн 7-11 тал/, гэрч С.Ариунаагийн мэдүүлэг /хх-ийн 13-15 тал/, гэрч Г.Цэдэндоржийн мэдүүлэг /хх-ийн 16-17 тал/, шүүгдэгч Г.*******ын яллагдагчаар мэдүүлсэн мэдүүлэг /хх-ийн 22-24 тал/, хохирогч Г.Наранцэцэгийн мэдүүлэг /хх-ийн 10 тал/, хохирол барагдуулсан тэмдэглэл /хх-ийн 28 тал/, Төв аймгийн прокурорын газарт өгсөн тодорхойлолт /хх-ийн 55 тал/, иргэний үнэмлэхний лавлагаа, оршин суугаа газрын Засаг даргын тодорхойлолт, гэрлэлтийн баталгаа болон шүүгдэгч Г.*******ын хувийн байдлыг тогтоосон бусад баримтууд болно.

 

Шүүхийн хэлэлцүүлэгт шинжлэн судалсан дээрх нотлох баримтууд нь энэ хэрэгт хамааралтай, ач холбогдолтой, хууль ёсны, Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн шалгах ажиллагааны явцад оролцогчийн хуулиар хамгаалагдсан эрхийг хасаж, хязгаарласан хуульд заасан шаардлагыг зөрчсөн гэх ноцтой зөрчил тогтоогдоогүй байна гэж үзлээ.

 

Шүүгдэгч Г.******* нь Төв аймгийн Зуунмод сумын 6 дугаар багийн нутагт үйл ажиллагаа явуулдаг “Edelwess” сувилалын газарт эмчээр ажиллаж байхдаа 2019 оны 12 дугаар сарын 16-ны өдөр сувилалын газрын кассын өрөөнөөс хууль бусаар нууцаар 1.000.000 төгрөг хулгайлсан болох нь:

• Хэргийн газарт үзлэг хийсэн тэмдэглэл, гэрэл зургийн үзүүлэлтүүд \хх-ийн 4-5 тал\
• Эрүүгийн хэрэг үүсгэж яллагдагчаар татах тухай Прокурорын тогтоол \хх-ийн 22 тал\
• Шүүгдэгч Г.******* нь хохирол олгосон тухай тэмдэглэл \хх-ийн 28 тал\
• Шүүгдэгч Г.*******ын урьд ял шийтгүүлж байсан гэх шийтгэх тогтоолын хуулбар \хх-ийн 40-45 тал\
• Яллагдагчаар татах тогтоолд нэмэлт, өөрчлөлт оруулах тухай Прокурорын тогтоол \хх-ийн 49 тал\
• Хохирогч Г.Наранцэцэгийн гомдол саналгүй, хохирол хүлээн авсан талаарх бичгээр гаргасан хүсэлт \хх-ийн 55 тал\
• Хохирогч Г.Наранцэцэгийн мөрдөн байцаалтын шатанд мэдүүлсэн: “2019 оны 12 дугаар сарын 17-ны өдөр манай ажлын газрын хүн Ариунаа миний утас руу залгаад миний өрөөнд хулгай орсон юм шиг байна, 1000000 төгрөг дутчихсан байна гэсэн, ... сүүлд сонсохнээ манай ажлын газрын ******* авсан байсан, ...2019 оны 12 дугаар сарын 17-ны өдөр ******* над дээр ирээд манай эхнэрийн сургалтын төлбөр нэхэгдээд байна 1200000 төгрөг өгөх хэрэгтэй байна надад 200000 төгрөг нь байна та надад 1000000 төгрөг зээлж өгөөч гэж хэлсэн. Тэгэхээр нь би 1000000 төгрөг бэлнээр өгсөн. Тэр үед манай ажлын газар хулгай орсныг мэдээгүй тэгээд надаас авсан 1000000 төгрөгөө хулгайлсан мөнгө гээд манай ажлын газрын нягтлан Цэдэндоржид авчирч өгсөн байх “ гэх мэдүүлэг, 2 дахь удаагаа өгсөн ... “******* нь манай байгууллагын ажилтан болохоор тухайн мөнгө алдагдсан эмийн сангийн өрөөнд орох эрхтэй гэх мэдүүлэг \хх-ийн 8-9 тал\
•  Гэрч Г.Цэдэндоржийн мөрдөн байцаалтын шатанд мэдүүлсэн: “ ...2019 оны 12 дугаар сарын 15-ны өдөр 14 цагийн үед ажил дээрээ ирсэн, ...орой 17 цагийн орчим манай ажлын эмч Санчир хотоос ирсэн. Санчир надтай хамт 505 тоотод амьдардаг юм. Орой 19 цагийн үед Санчир бид хоёр хамтдаа хажуу байрны урд талд байдаг машины граш орсон юм. Тэгж байхдаа надад кассны өрөөнөөс 1000000 төгрөг авчихсан гэж надад хэлсэн. ... Тэгээд өглөө зохион байгуулагч мөнгөө хайж байхаар нь Санчир авчихсан гэдгийг нь хэлсэн, ...14 цагийн үед Санчир надруу залгаад аймгийн МСҮТ-ийн хажууд гараад ирээч гэсэн намайг гараад очтол бэлнээр 1000000 төгрөг өгчихөөд явсан “ гэх мэдүүлэг \хх-ийн 10 тал\,
• Гэрч С.Ариунаагийн мөрдөн байцаалтын шатанд мэдүүлсэн: “ 2019 оны 12 дугаар сарын 16-ны өдөр би 09 цагт ажилдаа ирээд 101 тоот ажлын өрөөндөө орж үзэхэд ширээний нүдэнд байсан ажлын мөнгөнөөс боодолтой байсан 1,000,000 төгрөг дутчихсан байсан. Тухайн үедээ алга болчихсон байхаар нь ажлынхаа хүмүүсээс мөнгөний талаар асуусан. Тухайн үед миний хажууд манай ажплн манай эмч Санчир, тогооч Пүрэвжав, Туяа, эмч Жавхлан үйлчлэгч Бямбаа, Отгончимэг нар байсан. Миний өрөө коридорт нэмэлтээр хийсэн шилэн хаалтанд байрладаг юм, дээд хэсэг нь задгай хаалт байхгүй, тэгээд сайн харахад миний өрөөнд гутлын мөр их байсан би өрөөндөө хамгийн сүүлд 2019 оны 12 дугаар сарын 13-ны өдөр буюу баасан гаригт байсан. Үйлчлэгч нар өдөр болгон өрөөг цэвэрлэдэг болохоор тухайн гутлын мөр байх ёсгүй байсан. Гутлын мөрийг харахад эрэгтэй хүний том хэмжээтэй гутлын мөр байсан, минийхаар 40-41 размерийн гутлын мөр байсан. Би баасан гаригийн орой өрөөгөө түгжээд гарсан. Миний өрөөний түлхүүр надад болон манай захирал Наранцэцэгт байдаг юм, хагас бүтэн сайнд ажилчид амардаг гэх мэдүүлэг \хх-ийн 14-15 тал\,...түүний 2 дахь удаагаа өгсөн ... “Манай байгууллагын эмч нар тухайн алдагдсан өрөөнд орох эрхтэй гэх мэдүүлэг \хх-ийн 16 тал\
• Гэрч Г.Цэдэндоржийн мөрдөн байцаалтын шатанд мэдүүлсэн: “2019 оны 12 дугаар сарын 13-ны өдөр орой 18 цаг болж байхад би Улаанбаатар хот руу явсан. Тэгээд эргээд 2019 оны 12 дугаар сарын 15-ны өдөр 14 цагийн үед ажил дээр ирсэн. Намайг ирэхэд манай ажлын Бямбаа сувилагч жижүүрт гарч байсан. Тухайн үед хоёр амрагчтай байсан. Тэгээд би 5 давхарт 505 тоотод байрлах ажлаас олгосон байрандаа орж амарсан. 17 цагийн орчим манай ажлын эмч Санчир хотоос ирсэн. Санчир надтай хамт 505 тоотод амьдардаг юм. Орой 19 цагийн үед Санчир бид хоёр хамтдаа хажуу байрны урд талд сайдаг машины гараш орсон юм. Тэгж явж байхдаа надад би кассны өрөөнөөс 1.000.000 төгрөг авчихсан гэж надад хэлсэн. Би тухайн үед наад мөнгөөрөө юу хийх гэж байгаа юм. Яах гэж авч байгаа юм гэж хэлсэн. Надад ямарч хариулт хэлээгүй. Тэгээд би өглөө зохион байгуулагч мөнгөө хайж байхаар нь Санчир авчихсан гэдгийг нь хэлсэн. Тэгээд би эмч Санчирын 89585991 утасны дугаарлуу залгаж авсан мөнгөө авчирч өг гэж хэлсэн. Тэгхэд надруу дансаа явуул гэж Санчир хэлсэн. Тэгээд дансны дугаар явуултал мөнгө хийгээгүй байж байгаад 14 цагийн үед Санчир миний 88599133 дугаар руу залгаад аймгийн МСҮТ-ийн хажууд гараад ирээч гэсэн. Намайг гараад очтол бэлнээр 1.000.000 төгрөг өгчихөөд явсан Тэгхэд нь би чи өөрөө аваад ор гэж хэлэхэд надад чи өгчих гэж хэлээд явчихсан...Би тэр үедээ битгий хэлээрэй гээд байсан. Би яг авсан үгүйг нь тодорхой бол мэдээгүй байсан юм. Тэр үедээ орой хот явна гээд байхаар нь би хот явуулаагүй өглөө яв гэж хэлээд хамт хоносон...” гэх мэдүүлэг \хх-ийн 18 тал\
• Шүүгдэгч Г.*******ын мөрдөн байцаалтын шатанд яллагдагчаар мэдүүлсэн: ”Би 2019 оны 12 дугаар сарын 15-ны өдрөөс 16-нд шилжих шөнө 02 цагийн үед өөрийн ажиллаж байсан Эдельвэйс сувилалын газрын мөнгө хийдэг кассны өрөөний хаалгыг татахад онгойсон. Тэгээд шүүгээн дотор байсан боодолтой 1 сая төгрөгийг авсан. Тэгээд маргааш өглөө нь Улаанбаатар хотод очоод хэрэглэх гэснээ болиод шууд тэр дор нь буюу 12 цагийн үед авчирч нягтландаа авсан мөнгөө хүлээлгэж өгсөн. ... буруу зүйл хийсэн хэрэгтээ их гэмшиж байна“ гэх мэдүүлэг \хх-ийн 25 тал\ зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдон тогтоогдож байна.

Шүүгдэгч Г.*******ын үйлдсэн бусдын эд хөрөнгийг хүч хэрэглэхгүйгээр, нууцаар, хууль бусаар хулгайлсан үйлдэл нь Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэргийн объектив талын шинжүүдийг бүрэн хангасан, прокуророос ирүүлсэн хэргийн зүйлчлэл тохирсон, хэрэг бүртгэлт, мөрдөн байцаалтын явцад оролцогчийн эрхийг зөрчсөн, хууль бусаар хязгаарласан нөхцөл байдал тогтоогдоогүй байна.

Эрүүгийн хуулийн 2.3 дугаар зүйлийн 1 дэх хэсэгт зааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгох бөгөөд шүүгдэгч Г.******* нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаварыг урьдчилан мэдсэн байх хангалттай нөхцөлд байсан тул гэм буруугийн санаатай хэлбэрээр үйлдэгдсэн гэм буруутай гэж үзнэ.

Хулгайлах гэмт хэргийн зайлшгүй байх шинж нь гэм буруутанд үл хамаарах, түүнийг өөрөө захиран зарцуулах ямар ч эрхгүй бусдын эд хөрөнгийг хууль зөрчиж, нууц далд хэлбэрээр, хууль бусаар, шунахай сэдэлт зорилгоор, ямар ч үнэ төлбөргүйгээр өөрт болон бусад этгээдэд ашигтайгаар авах үйлдэл байдаг. Мөн гэм буруутай этгээд бусдын эд зүйлс, өмч хөрөнгийг хүч хэрэглэхгүйгээр, орчин тойрны хүмүүст болон өмчлөгч этгээдэд мэдэгдэхгүйгээр нууцаар авах, өөрийн үзэмжээр захиран зарцуулж буюу ашиг олох гэсэн зорилготой байдаг болно.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, шүүгдэгч Г.******* нь бусдын эд хөрөнгийг хүч хэрэглэхгүйгээр, нууцаар, хууль бусаар авсан үйлдэл нь шүүхийн хэлэлцүүлэгт болон мөрдөн байцаалтын шатанд мэдүүлсэн шүүгдэгчийн мэдүүлэг болон хэрэгт авагдсан бичгийн бусад нотлох баримтуудаар нотлогдон тогтоогдож байх тул Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэргийг үйлдсэн гэм буруутайд тооцож, хуульд заасан эрүүгийн хариуцлага хүлээлгэх нь зүйтэй.

 

Гэмт хэргийн улмаас учирсан хохирол, хор уршгийн талаар:

Шүүхээс хохирогч Г.Наранцэцэгт шүүх хуралдааны товыг мэдэгдэхэд “гомдол саналгүй, хохирлоо барагдуулсан тул шүүх хуралдаанд оролцохгүй” гэсэн байх тул энэ шүүх хуралдаанаар хэлэлцэх хохирлын асуудал байхгүй бөгөөд шүүгдэгч Г.******* нь бусдад төлөх төлбөргүй болно.

 

Эрүүгийн хариуцлага хүлээлгэх талаар:

-Шүүхийн хэлэлцүүлэгт оролцсон улсын яллагчаас “Шүүгдэгч Г.*******ыг Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар 1 жилийн хугацаагаа хорих ял оногдуулж, оногдуулсан хорих ялыг нээлттэй хорих байгууллагад эдлүүлэх” ялын дүгнэлтийг,

- Шүүхийн хэлэлцүүлэгт оролцсон шүүгдэгчийн өмгөөлөгч Ю.Сэвлэгмаа нь “Бусдын эд зүйлийг нууцаар, хууль бусаар авсан гэм буруу дээр маргадаггүй, хохирлоо барагдуулсан. Тэгээд гэм буруугаа хүлээн зөвшөөрч байгааг нь харгалзан үзээд Эрүүгийн хуулийн тусгай ангийн 7.1 дүгээр зүйлийн 1 дэх хэсэгт зааснаар тэнсэн харгалзаж өгнө үү ” гэх саналыг тус тус гаргасан байна.

Шүүгдэгч Г.*******ын холбогдсон Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэрэг нь “бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт “Энэ хуулийн тусгай ангид хорих ялын дээд хэмжээг таван жил, түүнээс доош хугацаагаар оногдуулахаар тогтоосон, эсхүл хорих ял оногдуулахаар заагаагүй гэмт хэргийг хөнгөн гэмт хэрэг гэнэ” гэж зааснаар хөнгөн гэмт хэргийн ангилалд хамаарч байна.

Шүүх шүүгдэгч Г.*******д эрүүгийн хариуцлага хүлээлгэхдээ мөрдөн байцаалтын шатанд болон шүүхийн шатанд гэм буруугийн талаар маргаагүй, бусдад учруулсан хохирлоо нөхөн төлсөн, нийгмийн аюулын хэр хэмжээ, хор уршиг зэргийг харгалзан  Эрүүгийн хуулийн 1.3 дугаар зүйлийн 1-д “Эрүүгийн хариуцлага нь тухайн хүн, хуулийн этгээдийн үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байна” гэсэн зарчимд нийцүүлэн шүүгдэгч Г.*******ыг Эрүүгийн хуулийн ерөнхий ангийн 7.1 дүгээр зүйлд заасныг журамлан Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар хорих ял оногдуулахгүйгээр 1 жилийн хугацаагаар тэнсэх нь зүйтэй гэж үзлээ.  

 

Бусад асуудлаар:

Энэ хэрэгт эд мөрийн баримтаар хураагдан ирсэн зүйлгүй, битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч Г.******* нь бусдад төлөх төлбөргүй, цагдан хоригдсон хоноггүй болохыг тус тус дурдах нь зүйтэй байна.  

            Монгол Улсын Шүүхийн тухай хуулийн 31 дүгээр зүйлийн 31.1, 31.3 дугаар зүйлийн 31.3.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг тус тус удирдлага болгон

 

ТОГТООХ нь:

1. Шүүгдэгч Боржигон овогт Гомбодоржийн *******ыг бусдын эд хөрөнгийг хүч хэрэглэхгүйгээр, нууцаар, хууль бусаар авсан гэмт хэргийг үйлдсэн гэм буруутайд тооцсугай.

 

2. Шүүгдэгч Боржигон овогт Гомбодоржийн *******ыг Эрүүгийн хуулийн ерөнхий ангийн 7.1 дүгээр зүйлийн 1 дэх хэсгт заасныг журамлан Эрүүгийн хуулийн тусгай ангийн 17.1 дүгээр зүйлийн 1 дэх хэсэгт зааснаар хорих ял оногдуулахгүйгээр 1 /нэг/ жилийн хугацаагаар тэнссүгэй.  

 

3. Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч Г.*******д үүрэг болгосугай.

 

4. Эрүүгийн хуулийн ерөнхий ангийн 7.3 дугаар зүйлийн 4, 5-т зааснаар шүүгдэгч Г.******* нь шүүхээс хүлээлгэсэн үүргийг биелүүлээгүй, тэнссэн хугацаанд санаатай гэмт хэрэг үйлдсэн бол шүүх тэнссэн шийдвэрийг хүчингүй болгож ял оногдуулахыг сануулсугай.

 

5. Хэрэгт эд мөрийн баримтаар хураагдан ирсэн зүйлгүй, битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч Г.******* нь бусдад төлөх төлбөргүй, цагдан хоригдсон хоноггүй болохыг тус тус дурдсугай.

 

6. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, түүний өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах М.Оюунсүрэнд даалгасугай. 

 

7.  Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурьдсугай.

 

8. Шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

 

ДАРГАЛАГЧ,  ШҮҮГЧ                            Ю.ЭНХМАА