Говьсүмбэр аймаг дахь сум дундын Иргэний хэргийн анхан шатны шүүхийн шүүх хуралдааныг шүүгч П.Цогзолмаа даргалж, тус шүүхийн шүүх хуралдааны танхимд нээлттэй хийсэн шүүх хуралдаанаар

Хүсэлт гаргагч: Говьсүмбэр аймаг, Сүмбэр сум, 1 дүгээр багт байрлах “Капитал банк” ХХК /РД:2556375, улсын бүртгэлийн дугаар 9016001017, утас: 70543678/-ийн хүсэлттэй,

 Иргэний эрх зүйн маргаанд хариуцагчаар оролцвол зохих этгээд П.Батжаргалыг эрэн сурвалжлуулах тухай  хүсэлтийг 2017 оны 02 дугаар сарын 23-ны өдөр хүлээн авч хянан хэлэлцэв. 

Шүүх хуралдаанд: Хүсэлт гаргагчийн итгэмжлэгдсэн төлөөлөгч Т.Ганбаатар, шүүх хуралдааны нарийн бичгийн дарга О.Мөнхдэлгэрэх нар оролцов.

 

ТОДОРХОЙЛОХ нь: 

Хүсэлт гаргагч “Капитал банк” ХХК-ийн шүүхэд гаргасан хүсэлт болон хүсэлт гаргагчийн итгэмжлэгдсэн төлөөлөгч Т.Ганбаатар шүүх хуралдаанд гаргасан тайлбартаа:

П.Батжаргал нь “Капитал банк” ХХК-тай 2015 оны 04 дүгээр сарын 14-ний өдөр зээлийн №2054000172 тоот гэрээ байгуулан 5 500 000 төгрөгийг 24 сарын хугацаатай, сарын 1.6 хувийн хүүтэй зээл авсан байдаг.

Зээлийн барьцаанд сар бүр цалингаасаа төлөхөөр цалин барьцаалсан бөгөөд иргэн П.Батжаргал нь зээлийн гэрээний үүргээ биелүүлэхгүй, оршин суугаа хаяг нь тодорхойгүй, банкны зүгээс эрэн сурвалжилж байгаа боловч өнөөдрийг хүртэл олдохгүй “Капитал банк” ХХК-ийг хохироосоор байна.

Зээлдэгч П.Батжаргал нь “Илчит Сансар” ХХК-д галчаар ажиллаж байх үедээ банкнаас зээл авсан ба зээл авсан цагаас эхлээд зээлийн гэрээ зөрчиж, тогтмол хугацаа хэтэрдэг байсан. 2017 оны 03 дугаар сарын 20-ны өдрийн байдлаар 629 хоногийн хугацаа хэтэрсэн, муу ангилалд шилжсэн байгаа. Зээлдэгчийн хувийн хэргээс холбогдох утасны дугаарыг нь авч залгахад бүх утас холбогдохгүй байдаг. Говьсүмбэр аймгийн “Капитал банк” ХХК-ийн салбарын захирлаар ажиллаж байсан Түмэнбаяртай уулзаж, П.Батжаргал дээр ямар ажиллагаа хийгдэж байсан талаар асуухад, Дорноговь аймгийн Айраг суманд Базарсад гэдэг айлд мал маллаж байгаа гэсэн мэдээлэл өгсөн байдаг. Өөр ямар нэгэн мэдээлэл байхгүй байна.

Иймд, зээлдэгч П.Батжаргалыг холбогдох хууль тогтоомжийн дагуу эрэн сурвалжилж өгнө үү гэжээ.

 

Хэрэгт цугларсан болон шүүх хуралдаанд хэлэлцэгдсэн нотлох баримтуудыг шинжлэн судлаад

 

ҮНДЭСЛЭХ нь: 

Хүсэлт гаргагч “Капитал банк” ХХК нь гэрээний үүргийн биелэлтийг шаардах зорилгоор иргэний эрх зүйн маргаанд хариуцагчаар оролцвол зохих этгээд Боржигон овогт Пагмадуламын Батжаргалыг эрэн сурвалжлуулах тухай хүсэлтийг  шүүхэд гаргажээ.

Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.1-д “Иргэний эрх зүйн маргаанд хариуцагчаар оролцвол зохих этгээд оршин суугаа газар нь мэдэгдэхгүй бол түүнийг эрэн сурвалжлуулах тухай хүсэлтийг гаргаж болно” гэжээ. 

Иргэн П.Батжаргал нь “Капитал банк” ХХК-иас 5 500 000 төгрөгийг 24 сарын хугацаатай, сарын 1.6 хувийн хүүтэй зээлж, 2015 оны 04 дүгээр сарын 14-ний өдрийн 2054000172 тоот гэрээ байгуулсан нь Иргэний хуулийн 451 дүгээр зүйлийн 451.1-д заасан гэрээний үүргийн харилцаа үүсчээ. 

Гэвч зээлдэгч П.Батжаргал нь дээрх гэрээний үүргээ зөрчиж, зээлийн төлбөрийг гэрээнд заасан хугацаандаа төлж барагдуулалгүйгээр, албан ёсны хаягийн шилжүүлэг хийгдээгүй боловч оршин суугаа газраа өөрчлөн, хаана амьдарч буй нь тодорхойгүй байгаа болох нь 2015 оны 04 дүгээр сарын 14-ний өдрийн 2054000172 дугаартай зээлийн гэрээ, банкны зээл, хүүний төлбөрийг буцаан төлөх хуваарь, зээл хүсэгчийн анкет, 2015 оны 04 дүгээр сарын 14-ний өдрөөс 2017 оны 03 дугаар сарын 20-ны өдрийг хүртэлх хугацааны зээлийн дансны дэлгэрэнгүй хуулга, нийгмийн даатгалын шимтгэл төлөлтийн лавлагаа, зээлдэгчтэй холбоо барьсан тухай тэмдэглэл, Оюуны өмч, Улсын бүртгэлийн ерөнхий газрын Улсын бүртгэлийн хэлтсийн 2017 оны 03 дугаар сарын 20-ны өдрийн 73 тоот иргэний үнэмлэхний лавлагаа, хүсэлт гаргагчийн итгэмжлэгдсэн төлөөлөгчийн шүүхэд гаргасан тайлбар зэрэг нотлох баримтуудаар тогтоогдож байна.

Иймд, иргэний эрх зүйн маргаанд хариуцагчаар оролцвол зохих этгээд болох Боржигон овогт Пагмадуламын Батжаргалыг эрэн сурвалжилж, түүний оршин суугаа газрыг  олж  тогтоох ажиллагааг гүйцэтгэхийг Говьсүмбэр аймгийн Цагдаагийн хэлтэст даалгах нь зүйтэй байна.

П.Батжаргал нь 1982 оны 08 дугаар сарын 20-ны өдөр төрсөн, эрэгтэй, ЕА82082013 регистрийн дугаартай, зээл авах үед Говьсүмбэр аймгийн Нийтийн аж ахуйн үйлчилгээний “Ус-Ду” орон нутгийн өмчит аж ахуйн тооцоотой үйлдвэрийн газрын хашаанд оршин суух албан ёсны хаягийн бүртгэлтэй, Дорноговь аймгийн Айраг суманд байж болзошгүй гэсэн болно.

 

Монгол Улсын Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118, 133 дугаар зүйлийн 133.1.9-д заасныг удирдлага болгон

 

ТОГТООХ НЬ: 

1.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3-т зааснаар хүсэлт гаргагч “Капитал банк” ХХК-ийн хүсэлтийг хангаж, иргэний эрх зүйн маргаанд хариуцагчаар оролцвол зохих этгээд Боржигон овогт Пагмадуламын Батжаргалыг эрэн сурвалжилсугай.

 

2.Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.4-т зааснаар П.Батжаргалыг эрэн сурвалжлах, түүний оршин суугаа газрыг тогтоох ажиллагааг гүйцэтгэхийг Говьсүмбэр аймаг дахь Цагдаагийн хэлтэст даалгасугай.

 

3.Улсын тэмдэгтийн хураамжийн тухай хуулийн 7 дугаар зүйлийн 7.1.2, Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.1,  57 дугаар зүйлийн 57.1, 60 дугаар зүйлийн 60.1-д тус тус зааснаар хүсэлт гаргагчаас улсын тэмдэгтийн хураамжид урьдчилан төлсөн 70200 төгрөгийг орон нутгийн төсвийн орлогод хэвээр үлдээсүгэй.

 

4.П.Батжаргал нь 1982 оны 08 дугаар сарын 20-ны өдөр төрсөн, эрэгтэй, ЕА82082013 регистрийн дугаартай, зээл авах үед Говьсүмбэр аймгийн Нийтийн аж ахуйн үйлчилгээний “Ус-Ду” орон нутгийн өмчит аж ахуйн тооцоотой үйлдвэрийн газрын хашаанд оршин суух албан ёсны хаягийн бүртгэлтэй, одоогоор Дорноговь аймгийн Айраг суманд байж болзошгүй гэсэн болохыг дурдсугай.

 

5.Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 119.4, 119.7-д зааснаар шийдвэр танилцуулан сонсгомогц хуулийн хүчинтэй болох ба шийдвэр хүчинтэй болсон өдрөөс хойш 7 хоногийн хугацаа өнгөрмөгц хуралдаанд оролцсон тал 14 хоногийн дотор шүүхэд хүрэлцэн ирж шийдвэрийг өөрөө гардан авах үүрэгтэй бөгөөд шийдвэрийг гардан аваагүй нь гомдол гаргах хугацааг тоолоход саад болохгүйг мэдэгдсүгэй.

 

6.Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар энэ шийдвэрийг зохигч тэдгээрийн төлөөлөгч буюу өмгөөлөгч эс зөвшөөрвөл шийдвэрийг гардан авснаас хойш 14 хоногийн дотор Говьсүмбэр аймгийн Эрүү, Иргэний хэргийн давж заалдах шатны шүүхэд давж заалдах журмаар гомдол гаргах эрхтэйг дурдсугай.

 

 

ДАРГАЛАГЧ  ШҮҮГЧ                                        П.ЦОГЗОЛМАА