2017 оны 03 сарын 31 өдөр

Дугаар 101/ШШ2017/01103

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

 

Баянзүрх дүүргийн иргэний хэргийн анхан шатны шүүхийн шүүгч Э.Энэбиш даргалж, тус шүүхийн танхимд хийсэн шүүх хуралдаанаар

Хүсэлт гаргагч: Баянзүрх дүүрэг, 15 дугаар хороо, 13 дугаар хороолол 4-64 тоотод оршин суух Гандийн Чунтын /ЧЕ30071411/,

Нөхөх олговрын 1,000,000 төгрөг гаргуулдахыг хүссэн иргэний хэргийг хянан хэлэлцэв.

Шүүх хуралдаанд: Хүсэлт гаргагч Г.Чунт, шүүх хуралдааны нарийн бичгийн дарга Т.Баясгалан нар оролцов.

 

ТОДОРХОЙЛОХ НЬ:

 

Хүсэлт гаргагч Г.Чунт шүүхэд гаргасан хүсэлт болон шүүх хуралдаанд гаргасан тайлбартаа: Миний төрсөн эцэг Ү.Жамбал болох нь Баянзүрх дүүргийн Иргэний хэргийн анхан шатны шүүхийн 2016 оны 11 сарын 03-ны өдрийн 6454 дугаар шийдвэрээр тогтоогдсон.

Эцэг минь Бүгд Найрамдах Монгол Ард Улсын Ерөнхий Шүүх Таслах Газрын 1932 оны 06 дугаар сарын 11-ны өдрийн 232 дугаар тогтоолоор шийтгэгдсэн нь цагаатгагдсан. Бид эцгээс хоёулаа бөгөөд ах Цэвээндорж маань 2006 онд нас барсан.

Иймд тэтгэмжийн 1,000,000 төгрөгийг олгоно уу гэв.

 

ҮНДЭСЛЭХ НЬ:

 

Хүсэлт гаргагч Г.Чунт нь нөхөх олговрын 1,000,000 төгрөгийг гаргуулах хүсэлтийг шүүхэд гаргажээ.

Үржингийн Жамбалдоржид БНМАУ-ын Ерөнхий Шүүх Таслах Газрын 1932 оны 06 дугаар сарын 11-ны өдрийн 232 дугаар тогтоолоор Шүүх Цаазын Бичгийн 47, 49 дүгээр зүйлээр 2 жил хорих ялаар шийтгэжээ.

Улсын дээд шүүхийн 2012 оны 10 дугаар сарын 12-ны өдрийн 558 дугаартай тогтоолоор Эрүүгийн байцаан шийтгэх хуулийн 24 дүгээр зүйлийн 24.1.1-д зааснаар Тайж Жамбалдоржид холбогдох хэргийг хэрэгсэхгүй болгож цагаатгасан байх бөгөөд хүсэлт гаргагч Г.Чунт нь Ү.Жамбалдоржийн төрсөн хүү болох нь Баянзүрх дүүргийн иргэний хэргийн анхан шатны шүүхийн 2016 оны 11 дүгээр сарын 03-ны өдрийн 101/ШШ2016/06454 дугаартай шийдвэрээр болон хэрэгт цугларсан бичгийн нотлох баримтуудаар тогтоогдож байна.

Иймд Г.Чунт нь Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 10 дугаар зүйлийн 10.1.3-т зааснаар хэлмэгдэгч Ү.Жамбалдоржид олгох нөхөх олговорыг нэхэмжлэх эрхтэй байна.

Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 12 дугаар зүйлийн 12.3-т нэхэмжлэл гаргах эрх нь 1998 оноос өмнө цагаатгагдсан хүний хувьд 2011 оны 12 дугаар сарын 30-ны дотор, 1998 оноос хойш цагаатгагдсан хүний тухайд цагаатгасан шийдвэрийг хүлээн авснаас хойш 3 жилийн хугацааны дотор байхаар заасан ба Ү.Жамбалдоржийг Улсын дээд шүүхийн 2012 оны 10 дугаар сарын 12-ны өдрийн 558 дугаартай тогтоолоор цагаатгасан, Г.Чунт нь Ү.Жамбалдоржийн төрсөн хүү болохоо Баянзүрх дүүргийн иргэний хэргийн анхан шатны шүүхийн 2016 оны 11 дүгээр сарын 03-ны өдрийн 101/ШШ2016/06454 дугаартай шийдвэрээр тогтоолгосон учир нэхэмжлэл гаргах эрхтэй байна.

Иймд шүүх хүсэлтийг хангаж шийдвэрлэлээ.

 

           Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.2.1, 116, 118 дугаар зүйлүүдийг удирдлага болгон

ТОГТООХ нь:

 

1. Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 13 дугаар зүйлийн 13.1 дэх хэсэгт зааснаар хэлмэгдэгч Үржингийн Жамбалдоржийн нөхөх олговорт 1,000,000 /нэг сая/ төгрөгийг Төрийн сангаас гаргуулж, Буурлууд овгийн Гандийн Чунт /РД:ЧЕ30071411/-д олгосугай. 

2. Улсын тэмдэгтийн хураамжийн тухай хуулийн 41 дүгээр зүйлийн 41.1.9 дэх хэсэгт зааснаар энэхүү нэхэмжлэл нь улсын тэмдэгтийн хураамж төлөхөөс чөлөөлөгдсөн болохыг дурдсугай.

 3. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2 дахь хэсэгт зааснаар шийдвэр танилцуулан сонсгомогц хүчинтэй болох тул Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар хүсэлт гаргагч нь энэхүү шийдвэрийг эс зөвшөөрвөл шийдвэрийг гардаж авсан өдрөөс хойш 14 хоногийн дотор Нийслэлийн иргэний хэргийн давж заалдах шатны шүүхэд гомдол гаргах эрхтэй болохыг дурьдсугай.

 

 

 

ДАРГАЛАГЧ, ШҮҮГЧ                                     Э.ЭНЭБИШ