МОНГОЛ УЛСЫН НЭРИЙН ӨМНӨӨС

 

Баянгол дүүргийн эрүүгийн хэргийн анхан шатны шүүхийн шүүх хуралдааныг шүүгч Ч.Отгонбаяр даргалж,

Нарийн бичгийн дарга: Д.Өнөрцэцэг,

Улсын яллагч: Г.Намжил,

           Шүүгдэгч: Ж.Б- өөрөө өөрийгөө өмгөөлөн тус шүүхийн шүүх хуралдааны танхимд нээлттэй явуулсан шүүх хуралдаанаар Баянгол дүүргийн прокурорын газрын хяналтын прокуророос Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэгт Ж.Б-т холбогдуулж яллах дүгнэлт, ялын санал үйлдэж хэргийг хялбаршуулсан журмаар шийдвэрлүүлэхээр ирүүлсэн эрүүгийн 2105000000524 дугаартай хэргийг 2021 оны 4 дүгээр сарын 28-ны өдөр хүлээн авч хянан хэлэлцэв.

     Шүүгдэгч: Монгол Улсын иргэн, Ж.Б-, ..... тоот регистртэй,

Шүүгдэгч Ж.Б- нь согтууруулах ундааны зүйл хэрэглэсэн үедээ “2021 оны 3 дугаар сарын 24-ний шөнө 01 цагийн орчимд Баянгол дүүргийн 7 дугаар хороо 21 дүгээр байрны 01 дүгээр орцны 25 тоотод байрлах гэртээ эхнэр Н.А-тэй хувийн таарамжгүй харьцааны улмаас маргалдаж, түүний биед нь халдан, гараараа цохиж зодон “зүүн нүд дээд, доод зовхи, дээр уруул, баруун, зүүн хацар, баруун тохой, зүүн мөр, баруун хонгонд цус хуралт, зөөлөн эдийн няцрал гэмтэл” бүхий хүний эрүүл мэндэд хөнгөн хохирол санаатай учруулсан” гэмт хэрэгт холбогджээ.

ТОДОРХОЙЛОХ НЬ:

Шүүхийн хэлэлцүүлэгт яллах, өмгөөлөх талаас шинжлэн судалсан болон хэрэгт цугларсан дараах нотлох баримтуудыг тал бүрээс нь бүрэн бодитой шинжлэн судлав. Үүнд:

Шүүгдэгч Ж.Б- шүүх хуралдаанд: “...Мөрдөн байцаалтын шатанд үнэн зөв мэдүүлэг өгсөн тул нэмж мэдүүлэх зүйлгүй” гэв.

Хохирогч Н.А-ийн мөрдөн байцаалтад өгсөн: “...2021 оны 3 дугаар сарын 23-ны өглөө манай нөхөр ажилдаа яваад 00 цагийн үед гэртээ согтуу ирсэн. Тэгээд гэртээ нэг лаазтай пиво уугаад байхаар нь “хүүхдийн дэргэд болиоч” гэж хэлсэн чинь болихгүй “би хүүхэнтэй байж байгаад ирлээ” гээд элэг рүү цохиод, хана мөргүүлээд, зүүн нүд зэрэг газруудад цохиж зодсон ба би өөрийгөө хамгаалж, хүүхдийн тоглоомоор толгой руу нь нэг удаа цохисон, хүүхдийн скүүтэр авч шидэхээр нь буцаагаад шидсэн. Тэгтэл миний гарыг оноод цус гарсан” гэсэн мэдүүлэг /хх-н 11-12/,

Гэрч Н.Н-ийн мөрдөн байцаалтад өгсөн: “...2021 оны 3 дугаар сарын 23-24-нд шилжих шөнө төрсөн эгч Алтанчимэг залгаад нөхөр гэртээ согтуу орж ирээд агсам тавиад миний нүүр, толгой хавдаж хөхөртөл зодчихлоо, миний толгой тархи өвдөөд байна ...гэхээр нь эгчийнд очсон. Эгч дээр очиход нүд нүүр нь битүү хөхрөөд хавдчихсан, цамцных нь энгэр цус болчихсон 2 жаахан хүүхэдтэйгээ байж байсан. ...Батбилэг ах 2 цагдаатай хамт тамхи татаад зогсож байсан. Өмнө нь зодуулж байсан гэж хэлж байгаагүй” гэсэн мэдүүлэг /хх-н 20-21/,

Шинжээчийн 2734 тоот дүгнэлтэд: “...Н.А-ийн биед зүүн дээд, доод зовхи, дээд уруул, баруун, зүүн хацар, баруун тохой, зүүн мөр, баруун хонгонд цус хуралт, зөөлөн эдийн няцрал гэмтэл тогтоогдлоо. Дээрх гэмтэл нь мохоо зүйлийн хэд хэдэн удаагийн үйлчлэлээр үүсгэгдэнэ. Дээрх гэмтэл нь эрүүл мэндийг түр хугацаагаар сарниулах тул гэмтлийн зэрэг тогтоох журмын 2.4.1-т зааснаар гэмтлийн хөнгөн зэрэгт хамаарна. Цаашид ерөнхий хөдөлмөрийн чадварын тогтонги алдалтанд нөлөөлөхгүй. Дээрх гэмтэл нь хэрэг болсон гэх цаг хугацаанд учирсан байх боломжтой” гэсэн дүгнэлт /хх-н 24-25/,

Яллагдагчаар Ж.Б-ийн мөрдөн байцаалтад өгсөн: “...Би хүлээн зөвшөөрч байна. “...чи яах гээд байгаа юм бэ ...” гээд би эхнэрийнхээ нүүрэн тус газарт нь нэг, хоёр удаа гараараа цохисон. Тэгээд Алтанчимэг цагдаа дуудсан” гэсэн мэдүүлэг /хх-н 33-35/,

Гэмт хэргийн талаарх гомдол мэдээлэл хүлээн авсан тэмдэглэл /хх-н 1/, хэргийн газарт үзлэг хийсэн тэмдэглэл /хх-н 3-7/, шүүгдэгчийн хувийн байдалтай холбоотой баримтууд /хх-н 38-49/, хохирогчийн хүсэлт /хх-н 69/ зэрэг болно.

Шүүхийн хэлэлцүүлгийн үед шинжлэн судалсан дээрх нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай байна гэж үнэлэв.

Шүүгдэгчийн гэм буруу болон хохирол, хор уршгийн талаар:

Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн бөгөөд Эрүүгийн хэрэг хянан шийдвэрлэх тухай хуулийн 17.3 дугаар зүйлд заасны дагуу шүүгдэгч, хохирогч нар нь хэргийг хялбаршуулсан журмаар шийдвэрлүүлэх хүсэлт гаргасан байна.

Уг хүсэлтийн дагуу прокуророос хэргийг хялбаршуулсан журмаар хянан шийдвэрлэх тухай тогтоол гарган, яллах дүгнэлт, ялын санал үйлдэж хэргийг шүүхэд ирүүлснийг шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 2 дахь хэсэгт зааснаар хэргийг шууд хянан шийдвэрлэх боломжтой гэж үзэн хэргийг хялбаршуулсан журмаар ял оногдуулах шүүх хуралдаанаар шийдвэрлэсэн болно. 

Шүүгдэгч Ж.Б- нь согтууруулах ундааны зүйл хэрэглэсэн үедээ “2021 оны 3 дугаар сарын 24-ний шөнө 01 цагийн орчимд Баянгол дүүргийн 7 дугаар хороо 21 дүгээр байрны 01 дүгээр орцны 25 тоотод байрлах гэртээ эхнэр Н.А-тэй хувийн таарамжгүй харьцааны улмаас маргалдаж, түүний биед нь халдан, гараараа цохиж зодон “зүүн нүд дээд, доод зовхи, дээр уруул, баруун, зүүн хацар, баруун тохой, зүүн мөр, баруун хонгонд цус хуралт, зөөлөн эдийн няцрал гэмтэл” бүхий хүний эрүүл мэндэд хөнгөн хохирол санаатай учруулсан” гэм буруутай болох нь:

Шүүгдэгчийн мөрдөн байцаалтын шатанд болон шүүх хуралдаанд үйлдсэн хэргээ хүлээн мэдүүлсэн мэдүүлгүүд, хохирогч Н.А-ийн: “...2021 оны 3 дугаар сарын 23-ны өглөө манай нөхөр ажилдаа яваад 00 цагийн үед гэртээ согтуу ирсэн. Тэгээд гэртээ нэг лаазтай пиво уугаад байхаар нь “хүүхдийн дэргэд болиоч” гэж хэлсэн чинь болихгүй “би хүүхэнтэй байж байгаад ирлээ” гээд элэг рүү цохиод, хана мөргүүлээд, зүүн нүд зэрэг газруудад цохиж зодсон ба би өөрийгөө хамгаалж, хүүхдийн тоглоомоор толгой руу нь нэг удаа цохисон, хүүхдийн скүүтэр авч шидэхээр нь буцаагаад шидсэн. Тэгтэл миний гарыг оноод цус гарсан” гэсэн мэдүүлэг /хх-н 11-12/, гэрч Н.Н-ийн: “...2021 оны 3 дугаар сарын 23-24-нд шилжих шөнө төрсөн эгч Алтанчимэг залгаад нөхөр гэртээ согтуу орж ирээд агсам тавиад миний нүүр, толгой хавдаж хөхөртөл зодчихлоо, миний толгой тархи өвдөөд байна ...гэхээр нь эгчийнд очсон. Эгч дээр очиход нүд нүүр нь битүү хөхрөөд хавдчихсан, цамцных нь энгэр цус болчихсон 2 жаахан хүүхэдтэйгээ байж байсан” гэсэн мэдүүлэг /хх-н 20-21/, шинжээчийн 2734 тоот дүгнэлт болон шүүх хуралдаанаар хэлэлцэгдсэн Эрүүгийн хэрэг хянан шийдвэрлэх тухай хуульд заасан үндэслэл журмын дагуу цуглуулж, бэхжүүлсэн дээрх нотлох баримтуудаар нотлогдон тогтоогдлоо.

Шүүгдэгч нь эхнэр Н.А-тэй хувийн таарамжгүй асуудлаас болж маргалдан тохиолдлын шинжтэй нөхцөл байдлын улмаас түүнийг цохиж эрүүл мэндэд хөнгөн хохирол учруулсан байх ба гэрийн бүлийн харилцан хамаарал бүхий этгээдүүд хэн нэгэндээ гэмтэл учруулсан үйлдэл бүрийг гэр бүлийн хүчирхийлэл үйлдсэн гэж үзэх хууль зүйн үндэслэлгүй тул прокурорын яллах дүгнэлт үйлдэж ирүүлсэн хуулийн зүйл, заалт үндэслэлтэй байна.

Шүүгдэгч Ж.Б-ийн үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан “хүний эрүүл мэндэд хөнгөн хохирол санаатай учруулсан” гэмт хэргийн бүх шинжийг хангасан байх тул шүүгдэгчид холбогдуулж яллах дүгнэлт үйлдэж ирүүлсэн хуулийн зүйл, хэсэг тохирсон байна гэж шүүх дүгнэлээ.

Шүүгдэгч Ж.Б- нь эхнэр Н.А-тэй маргалдан, улмаар түүнийг цохиж эрүүл мэндэд нь хөнгөн хохирол санаатай учруулсан нь өөрийн үйлдлийн хууль бус шинжтэй болохыг ухамсарлаж түүнийг хүсэж үйлдсэн, хохирол, хор уршигт зориуд хүргэсэн гэм буруугийн санаатай хэлбэртэй, Эрүүгийн хуулийн тусгай ангид гэмт хэрэгт тооцохоор заасан нийгэмд аюултай үйлдэл болох нь хэрэгт авагдсан нотлох баримтуудаар нотлогдон тогтоогдсон тул гэм буруутайд тооцох нь зүйтэй байна.

Хохирогч нь мөрдөн байцаалтын шатанд гомдол саналгүй, нэхэмжлэх зүйлгүй гэж мэдүүлсэн тул шүүгдэгчийг бусдад төлөх төлбөргүй гэж үзлээ. 

Эрүүгийн хариуцлагын талаар:

Шүүгдэгч нь гэмт хэрэг үйлдсэн гэм буруугаа сайн дураараа хүлээн зөвшөөрсөн, прокурорын сонсгосон ялыг хүлээн зөвшөөрч, хүлээлгэх эрүүгийн хариуцлагыг зөвшөөрөн, гэмт хэргийн улмаас учруулсан хохирлоо нөхөн төлсөн, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаврыг ойлгосон болох нь хавтаст хэрэгт авагдсан шүүгдэгчийн үйлдсэн гэмт хэрэгтээ гэмшиж байна. Хохирол нөхөн төлж хохирогчтой эвлэрсэн. Прокурорын санал болгосон эрүүгийн хариуцлагыг бүрэн хүлээн зөвшөөрч байгаа тул хэргийг хялбаршуулсан журмаар шийдвэрлэж өгнө үү гэсэн мэдүүлэг, хүсэлтүүд, хохирогчийн хүсэлт, эрүүгийн хариуцлагын төрөл хэмжээний талаарх прокурорын саналтай танилцаж зөвшөөрсөн талаарх баримтууд болон шүүхийн хэлэлцүүлэгт шүүгдэгчийн өгсөн мэдүүлэг, шинжлэн судалсан баримтуудаар тогтоогдож байна.  

Прокуророос ялын төрөл хэмжээний талаар гаргасан “шүүгдэгч Ж.Б-ийг  Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 500 нэгж буюу 500.000 төгрөгөөр торгох ял” оногдуулах саналыг шүүгдэгчид танилцуулсан байх ба прокурорын дээрх санал нь Эрүүгийн хуулийг буруу хэрэглээгүй, Эрүүгийн хэрэг хянан шийдвэрлэх тухай хуулийг зөрчөөгүй байх тул шүүх Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5 дахь хэсэгт заасны дагуу хэргийг хянан шийдвэрлэх нь зүйтэй гэж үзлээ.

          Хэрэгт эд мөрийн баримтаар хураагдсан зүйлгүй, хэрэгт битүүмжлэгдсэн эд хөрөнгөгүй, шүүгдэгч нь цагдан хоригдсон хоноггүй болно.   

Шүүхийн тухай хуулийн 22 дугаар зүйлийн 22.1, 22.4.1, Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 5, 36.2, 36.6, 36.7, 36.8, 36.10 дугаар зүйлд тус тус заасныг удирдлага болгон ТОГТООХ нь:

  1. Шүүгдэгч Ж.Б-ийг “хүний эрүүл мэндэд хөнгөн хохирол санаатай учруулсан” гэмт хэрэг үйлдсэн гэм буруутайд тооцсугай.

  2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Ж.Б-ийг 500 нэгж буюу 500.000 төгрөгөөр торгох ялаар шийтгэсүгэй.

3. Шүүгдэгч нь хуульд заасан буюу Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт зааснаар шийтгэх тогтоол хүчин төгөлдөр болсноос хойш 90 хоногийн хугацаанд торгох ялыг биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоног хорих ялаар тооцож солихыг мэдэгдсүгэй.

   4. Энэ хэрэгт эд мөрийн баримтаар хураагдсан зүйлгүй, битүүмжилсэн эд хөрөнгөгүй, шүүгдэгч нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

  5. Эрүүгийн хэрэг хянан шийдвэрлэх тухай хуулийн 36.8 дугаар зүйлийн 4 дэх хэсэгт зааснаар шийтгэх тогтоолыг улсын яллагч, дээд шатны прокурор, шүүгдэгч, хохирогч, тэдгээрийн хууль ёсны төлөөлөгч, өмгөөлөгч өөрөө гардаж авснаас хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол гаргах, эсэргүүцэл бичих эрхтэй болохыг дурдсугай.

  6. Шийтгэх тогтоол нь уншиж сонсгосноор хүчинтэй болох ба давж заалдах гомдол, эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол хүчин төгөлдөр болтол шүүгдэгч Ж.Б-т хувийн баталгаа гаргах таслан сэргийлэх арга хэмжээ авсугай.

 

 

                  ДАРГАЛАГЧ, ШҮҮГЧ                                    Ч.ОТГОНБАЯР