2021       03             09                                     2021/ШЦТ/147

 

 

 

МОНГОЛ УЛСЫН НЭРИЙН ӨМНӨӨС   

 

 

Хан-Уул дүүргийн Эрүүгийн хэргийн анхан шатны шүүхийн шүүх хуралдааныг Ерөнхий шүүгч Б.Батболор даргалж,

шүүх хуралдааны нарийн бичгийн дарга Б.Энхжин,   

улсын яллагч Б.Энхбат,

шүүгдэгч А.Унарыг оролцуулан тус шүүхийн танхимд нээлттэй хийсэн хуралдаанаар Нийслэлийн прокурорын газраас Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар яллах дүгнэлт үйлдэж, хялбаршуулсан журмаар шийдвэрлүүлэхээр ирүүлсэн А.Уд холбогдох эрүүгийн 2002005470342 дугаартай хэргийг 2021 оны 03 дугаар сарын 03-ны өдөр хүлээн авч, хянан хэлэлцэв.

 

            Шүүгдэгчийн биеийн байцаалт: 

            Монгол Улсын иргэн, 1994 оны 9 дүгээр сарын 14-ний өдөр Дархан-Уул аймгийн Дархан суманд төрсөн, 26 настай, эмэгтэй, дээд боловсролтой, Англи хэлний багш, орчуулагч мэргэжилтэй, хувиараа хөдөлмөр эрхэлдэг, ам бүл 5, эцэг, эх, ах нарын хамт 0000 тоотод оршин суух хаягтай, 00 тоотод оршин суудаг, урьд ял шийтгэлгүй, А.У /РД:аа0000/.

 

  Холбогдсон хэргийн талаар: /яллах дүгнэлтэд дурдсанаар/

Шүүгдэгч А.Унь 2020 оны 9 дүгээр сарын 19-ний өдөр “Истанбул-Улаанбаатар” чиглэлийн ОМ-7162 дугаартай тусгай үүргийн нислэгийн онгоцоор Бүгд Найрамдах Турк улсаас зорчин ирэхдээ Монгол Улсад орох, гарах, хил нэвтрэх эрхийн баримт бичиггүй, зохих зөвшөөрөлгүйгээр буюу Е1960663 серийн дугаартай, О.Огэх хүний гадаад энгийн паспортыг ашиглан Хан-Уул дүүргийн 21 дүгээр хорооны нутаг дэвсгэрт байрлах “Буянт-Ухаа” боомтоор Монгол Улсын хилийг хууль бусаар нэвтэрсэн гэмт хэрэгт холбогджээ.

 

Талуудын хүсэлтээр хэрэгт цугларсан нотлох баримтуудыг тал бүрээс нь бүрэн, бодитойгоор шинжлэн судалж, хэргийг шүүх хуралдаанаар хэлэлцэхэд: Шүүгдэгч А.Унь 2020 оны 9 дүгээр сарын 19-ний өдөр “Истанбул-Улаанбаатар” чиглэлийн ОМ-7162 дугаартай тусгай үүргийн нислэгийн онгоцоор Бүгд Найрамдах Турк улсаас зорчин ирэхдээ Монгол Улсад орох, гарах, хил нэвтрэх эрхийн баримт бичиггүй, зохих зөвшөөрөлгүйгээр буюу Е1960663 серийн дугаартай, О.Огэх хүний гадаад энгийн паспортыг ашиглан Хан-Уул дүүргийн 21 дүгээр хорооны нутаг дэвсгэрт байрлах “Буянт-Ухаа” боомтоор Монгол Улсын хилийг хууль бусаар нэвтэрсэн болох нь:

1. Шүүгдэгч А.А.Угийн шүүхийн хэлэлцүүлэгт өгсөн:

“Мөрдөн шалгах ажиллагааны явцад үнэн зөв мэдүүлсэн тул мэдүүлэг өгөхгүй.” гэсэн мэдүүлэг /шүүх хуралдааны тэмдэглэл/

2. Тагнуулын ерөнхий газрын Хилийн тагнуулын газрын 0218 дугаар ангийн дэргэдэх тагнуулын тасгаас 2020 оны 9 дүгээр сарын 29-ний өдөр ирүүлсэн гэмт хэргийн талаарх мэдээллийг шалгуулах тухай 34/31 дугаартай албан бичиг /хх-ийн 5/
3. Хилийн 0342 дугаар салбарын баримт бичгийн шалгагч, дэслэгч

Б.О-н “...2020 оны 9 дүгээр сарын 19-ний өдрийн “Станбул-Улаанбаатар” чиглэлийн ОМ7182 дугаар аяллын онгоцонд зорчигчийн баримт баримт бичиг шалгах манаанд үүрэг гүйцэтгэх хугацаанд Одхүү овогтой Отгонтөгс /РД:ТА98080101/, Е1960663 тоот паспорттой/ нь 2017 оны 8 дугаар сарын 31-ний өдрийн “Буянт-Ухаа 020” тоот штампыг хуурамчаар үйлдсэн байж болзошгүй байсан тул ахлагч С.Дөлгөөнд мэдэгдэж шийдвэрлүүлсэн...” тухай албан тушаалтны тодорхойлолт /хх-ийн 11/

4. Хилийн 0342 дугаар салбарын захирагч хошууч Д.Гэрэл-Од нь “...Улсын онцгой комиссын шийдвэрээр Гадаад улсаас Монгол Улсын иргэдийг татан авах “Истанбул-Улаанбаатар” чиглэлийн 2020 оны 9 дүгээр сарын 19-ний өдрийн ОМ-7162 дугаар тусгай үүргийн нислэгийн зорчигчийн баримт бичгийг хялбаршуулсан журмаар шалган шийдвэрлүүлэхэд Монгол Улсын иргэн Одхүү овогтой Б.О /ТА98080101 регистрийн дугаартай, Е1960663 дугаарын паспорттай, эмэгтэй, 000 тоотод оршин суугч/ нь 2017 оны 8 дугаар сарын 31-ний өдрийн гарах чиглэлийн “Буян-Ухаа 020” тоот штампын дардсыг хуурамчаар үйлдэж, улсын хил зөрчсөнийг баримт бичгийн шалгагч, дэслэгч Б.Оилрүүлсэн, хилийн зөрчлийн материал бүрдүүлж, Е1960663 тоо баримт бичгийн хамт хилийн тагнуулын тасгийн ажилтан ахмад Б.Золбаярт 2020 оны 9 дүгээр сарын 23-ны өдөр 08.15 цагт актаар хүлээлгэн өгөв.” тухай баримтыг Хилийн тагнуулын тасгийн ажилтан ахмад Б.Золбаярт хүлээлгэн өгсөн тухай Акт №19 дугаартай баримт /хх-ийн 12/
5. Монгол Улсын иргэн О.О-н эзэмшлийн Е1960663 серийн дугаартай Монгол Улсын үндэсний энгийн гадаад паспортод үзлэг хийсэн мөрдөгчийн тэмдэглэл, гэрэл зургийн үзүүлэлтүүд /хх-13-18/
6. О.О-н энгийн гадаад паспорт хүссэн мэдүүлэг болон холбогдох бусад материалын хуулбарууд /хх-ийн 21-22/
7. О.О-н Монгол Улсын хилээр нэвтэрсэн тухай лавлагаа /хх-ийн 24-25/
8. А.Унь “...Е1579218 серийн дугаартай гадаад энгийн паспортоор 2017 оны 8 дугаар сарын 31-ний өдөр “Буянт-Ухаа” боомтоор Монгол Улсын хилээр нэвтэрч гарсан...” болохыг нотолсон Монгол Улсын хилээр нэвтэрсэн тухай лавлагаа /хх-ийн 34-35/
9. А.А.Угийн энгийн гадаад паспорт хүссэн мэдүүлэг болон холбогдох бусад материалын хуулбарууд /хх-ийн 37-39/
10. Эд мөрийн баримтаар тооцох мөрдөгчийн тогтоол /хх-ийн 47/
11. Гэрч Б.О-н мөрдөн шалгах ажиллагаанд өгсөн: “...Тухайн өдрийн 08 цаг 10 минутад “Истанбул-Улаанбаатар” чиглэлийн тусгай захиалгат ОМ71-62 дугаартай нислэгээр зорчигчдын бичиг баримтыг онгоцноос тээврийн хэрэгсэл шалгах манаа, ариутгал хийлгэж баримт бичгийг шалгагч нарт тарааж өгсөн. Коронавирусын халдварын үед Хил хамгаалах ерөнхий газрын даргын тушаалаар улсын хил нэвтрэх хялбаршуулсан журмыг баталсан. Уг журмын хүрээнд хилээр нэвтэрч байгаа зорчигчдын баримт бичгийг бүртгэлд авч байгаа. Надад хуваарилагдсан хил нэвтрэх эрхийн баримт бичгүүдийг шалгаж байхад Одхүүгийн Б.Оийн Е1960663 дугаартай үндэсний гадаад паспорт байсан. Тухайн паспортын паспорт уншигч /ICM/ программаар уншуулахад уг паспортыг ашиглаж Монгол Улсаас гарсан бүртгэл байхгүй байсан. Тэгээд тухайн өдрийн манааны ахлах ахмад Дөлгөөнд уг асуудлыг мэдэгдэж, түүний компьютерээр уг паспортыг дахин шалгахад Монгол Улсаас гарсан бүртгэл байхгүй байсан. Гүнзгийрүүлсэн шалгалтаар тухайн паспортын 32 дахь хуудсанд байх “AUG 2017 BUYNT-UHAA” гэсэн дардсыг нарийвчлан шалгахад уг дардасны соёмбо, хүрээний дугаарлалт зэрэг нь алдаатай байсан. Мөн уг штамп дарагдсан хуудасны нөгөө талаас харахад тухайн штампны тос нь жинхэнэ штампны тосноос өөр байсан. Ийм зөрчлүүд байсан тул хилийн зөрчлийн материал бүрдүүлж тагнуулын тасагт шилжүүлсэн. ...” гэсэн мэдүүлэг /хх-ийн 48-49/
12. Гэрч О.О-н мөрдөн шалгах ажиллагаанд өгсөн: “...2017 оны 8 дугаар сарын эхээр А.У эгч манайд Дарханд ирсэн юм. Тухайн үед бид хоёр ярилцаж байгаад Улаанбаатар хот руу хамт явсан юм. Тэгээд ирээд Улсын бүртгэлд гадаад паспорт авахаар материал бүрдүүлж өгсөн юм. Ингээд яаралтайгаар захиалсан учраас 3-5 хоногийн дотор гаран санагдаж байна. Буцаад Дархан руу А.У эгч бид хоёр таксигаар явсан. Би тухайн үед А.У эгчид бичиг баримтаа өгчихсөн байсан. Ингээд Дарханд очоод гэр гэртээ очсон. Тэрнээс хойш А.У эгчтэй уулзаагүй. Удалгүй хэд хоногийн дараа А.У эгчийг Турк улс руу явчихсан гэдгийг мэдсэн. Е1960663 дугаартай гадаад паспорт нь миний гаргуулж авсан паспорт мөн юм. ...” гэсэн мэдүүлэг /хх-ийн 62-64/
13. Монгол Улсын иргэн Алтангэрэл овогтой А.Угийн эзэмшлийн Е1579218 серийн дугаартай Монгол Улсын үндэсний энгийн гадаад паспортод үзлэг хийсэн мөрдөгчийн тэмдэглэл, гэрэл зургийн үзүүлэлтүүд /хх-ийн 57-59/
14. Шүүхийн шинжилгээний үндэсний хүрээлэнгийн 2020 оны 10 дугаар сарын 20-ны өдрийн №4136 дугаартай:

“-Шинжилгээнд ирүүлсэн Е1960663 гэсэн сери, дугаартай О.О-ийн Монгол Улсын үндэсний энгийн гадаад паспорт нь жинхэнэ.

-Шинжилгээнд ирүүлсэн шинжилж буй Е1960663 гэсэн сери, дугаартай О.О-ийн Монгол Улсын үндэсний энгийн гадаад паспортын 32 дугаар хуудсанд байх шинжилж буй тэмдгийн дардас болон шинжилгээнд харьцуулах загвараар ирүүлсэн тэмдгийн дардсууд нь нэг бараар дарагдаагүй. ...” гэсэн дүгнэлт /хх-ийн 73-81/

15. Шүүхийн шинжилгээний үндэсний хүрээлэнгийн 2020 оны 10 дугаар сарын 20-ны өдрийн №4137 дугаартай:

“-Шинжилгээнд ирүүлсэн Е1960663 гэсэн сери, дугаартай үндэсний энгийн гадаад паспортын зураг А.А.Угийн гэх зурагтай тохирохгүй.” Гэсэн шинжээчийн дүгнэлт /хх-ийн 85-91/

16. Шүүгдэгч А.А.Угийн мөрдөн шалгах ажиллагаанд яллагдагчаар өгсөн: “...Би 2015 оны 11 дүгээр сард хамгийн анх Турк улсад ажил хийх зорилгоор явсан юм. Тэндээ оёдлын үйлдвэрт ажиллаж байгаад 2017 оны 7 дугаар сард буцаж Монголд ирсэн юм. Ирэхдээ би Туркээс гарахдаа гадаад паспорт дээр хар даруулсан юм. хар даруулахаар 5 жилийн хугацаанд Турк улсад нэвтрэх эрхгүй болдог юм. тухайн үед манай найз залуу Дөлгөөн Турк улсад гэр бүлийн хамт амьдарч байсан юм. Намайг Монголд ирэхэд араас ирнэ гэсэн юм. Миний араас ирэхгүй болохоор нь Турк руу явахаар шийдсэн. Би гадаад паспорт дээр хар даруулсан болохоор буцаж болохгүй байсан юм. Тэгээд буцаж явах арга хайсан чинь хүний гадаад паспортоор явж болдог гэж сонсоод манай үеэл дүү болох Б.Отэй 2017 оны 8 дугаар сарын үед Дарханд уулзаад гадаад паспорт авах талаар ярилцсан юм. Б.О тухайн үед гадаад паспорт гаргуулж аваагүй байсан болохоор хамт Улаанбаатар хот руу явж гадаад паспорт авъя гэж ятгаад дагуулаад таксигаар хот руу явсан юм. Тэгээд Улсын бүртгэлээс гадаад паспорт гаргуулаад бид хоёр 3-4 хоноод буцаад таксигаар Дарханд ирсэн. Би Б.Оөд “бичиг баримтаа алга болгочихно” гэж хэлээд өөрийнхөө цүнхэнд хийлгүүлсэн. Ингээд Дарханд ирээд салаад явцгаахдаа Б.О гадаад паспортоо мартаад надад үлдээгээд явчихсан юм. Тэр үед Турк улс руу явах бодолтой байсан болохоор гадаад паспортыг ашиглахаар шийдсэн. 2017 оны 8 дугаар сарын 31-ний өдөр Турк руу шууд нислэгээр явсан бөгөөд Монголын хилийг нэвтрэхдээ өөрийн гадаад паспортыг үзүүлээд, Туркийн хил дээр очоод Б.Оийн гадаад паспортыг үзүүлээд Туркийн хилийг нэвтэрсэн юм. Тэндээ оёдлын үйлдвэрт ажиллаж байгаад 2020 оны 9 дүгээр сарын 19-ний өдөр “Истанбул-Улаанбаатар” чиглэлийн тусгай үүргийн нислэгээр ирсэн. Би Турк улс руу нэвтрэхдээ Б.Оийн нэрээр нэвтэрсэн учраас тийз болон тусгаарлагдах байраа Б.Оийн гадаад паспорт нэрээр бүртгүүлсэн юм. Монгол Улсад газардах үед бүтгэж, бичиг баримт хурааж авахад би Б.Оийн гадаад паспортыг хураалгаж, бүртгүүлсэн. Тэгээд Монголд “Боржигон” нэртэй зочид буудалд 21 хоног тусгаарлагдаад гарахад хил зөрчсөн байна гэсэн. Бусдын баримт бичгээр Монгол Улсын хил нэвтрэх хориотой гэдгийг мэднэ. Өөр арга байхгүй гэж бодсон болохоор ийм үйлдэл хийсэн. Их харамсаж байна ... “ гэсэн мэдүүлэг /хх-ийн 114-116/ гэх зэрэг нотлох баримтуудаар хөдөлбөргүй нотлогдон тогтоогдож байна.  

  Шүүгдэгч нь урьд ял шийтгүүлж байгаагүй болох нь хавтаст хэрэгт авагдсан Эрүүгийн хариуцлага хүлээж байсан эсэхийг шалгах хуудас /хх-ийн 120/-аар тогтоогдож байх тул түүнийг анх удаа гэмт хэрэг үйлдсэн гэж үзнэ.

            Шүүгдэгчийг сэжигтэн, яллагдагчаар, хохирогчийг байцаахдаа Эрүүгийн хэрэг хянан шийдвэрлэх тухай хуулийн 22.1, 25.1 дүгээр зүйлд заасан хуулийн шаардлага хангасан, нотлох баримтууд нь тухайн хэрэгт хамааралтай, агуулгын хувьд зөрүүгүй, үйл баримтыг хангалттай тогтоож чадсан буюу Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдал хангалттай хийгдсэн, шүүх эмнэлгийн шинжилгээ /№4136, №4137/-ний дүгнэлтийг хэрэгт хувийн сонирхолгүй, зохих мэдлэг, дадлага, туршлагатай, гаргасан дүгнэлтийнхээ хариуцлагыг хүлээх чадвар бүхий шинжээч гаргасан байх тул хууль ёсны үнэн зөв баримтууд гэж үнэлэв.

            Эрүүгийн хуулийн тусгай ангид заасан нийгэмд аюултай гэм буруутай үйлдэл, эс үйлдэхүйг гэмт хэрэгт тооцно.

Прокуророос Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар яллах дүгнэлт үйлдэж ирүүлсэн нь шүүгдэгчийн үйлдэлд тохирсон байна.  

Учир нь “Монгол Улсад орох, гарах хил нэвтрэх эрхийн баримт бичиггүйгээр, эсхүл хуурамч баримт бичгээр, эсхүл зохих зөвшөөрөлгүйгээр Монгол Улсын хилийг нэвтэрсэн” үйлдлийг Монгол Улсын хилийг хууль бусаар нэвтэрсэн гэмт хэрэгт тооцохоор Эрүүгийн хуулийн тусгай ангийн 19.14 дүгээр зүйлийн 1 дэх хэсэгт заасан.

Монгол Улсын Хилийн тухай хуулийн 4 дүгээр зүйлийн 4.1 дэх хэсэгт “Монгол Улсын нутаг дэвсгэрийн зах хязгаарыг газрын гадаргуу, усны мандал дээр хил залгаа улсын нутаг дэвсгэрийн хязгаараас зааглаж, Монгол Улсын олон улсын гэрээгээр тодорхойлж, тогтоосон шугамыг Монгол Улсын хил гэнэ” гэж заасан ба улсын хил нь халдашгүй дархан байх бөгөөд бусдын бичиг баримт ашиглан Монгол Улсын хилээр орох, гарах үйлдэл нь Монгол Улсын хилээр хууль бусаар нэвтэрсэн гэмт үйлдэл юм.

Түүнчлэн Үндэсний гадаад паспорт нь Монгол Улсын төрийн өмч бөгөөд Монгол Улсын иргэнийг гадаад улсад зорчин явааг батлан гэрчлэх, эрх олгосон баримт бичиг болох утгаар түүнийг зөвхөн тухайн бичиг баримтын эзэмшигч өөрөө ашиглах үүрэгтэй тул бусад этгээд өөр хүний бичиг баримт ашиглах, ашигласан үйлдэл нь хууль бусд тооцогдоно.

Хэргийн үйл баримтаас дүгнэвэл шүүгдэгч А.Унь гэм буруугийн шууд санаатай үйлдлээр буюу Монгол Улсын хилээр орох, гарах, хил нэвтрэхдээ бусдын бичиг баримтыг ашиглаж болохгүй гэдгийг мэдсээр байж 2020 оны 9 дүгээр сарын 19-ний өдөр “Истанбул-Улаанбаатар” чиглэлийн ОМ-7162 дугаартай тусгай үүргийн нислэгийн онгоцоор Бүгд Найрамдах Турк улсаас зорчин ирэхдээ Монгол Улсад орох, гарах, хил нэвтрэх эрхийн баримт бичиггүй, зохих зөвшөөрөлгүйгээр буюу Е1960663 серийн дугаартай, өөрийн садан төрлийн хамаарал бүхий хүн болох О.Огэх хүний гадаад энгийн паспортыг ашиглан Хан-Уул дүүргийн 21 дүгээр хорооны нутаг дэвсгэрт байрлах “Буянт-Ухаа” боомтоор Монгол Улсын хилийг хууль бусаар нэвтэрсэн нь дээрх гэмт хэргийг үйлдсэн гэж үзэх бүрэн үндэслэлтэй.       

Иймд шүүгдэгч А.Уг Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар Монгол Улсад орох, гарах хил нэвтрэх эрхийн баримт бичиггүйгээр, зохих зөвшөөрөлгүйгээр Монгол Улсын хилийг нэвтэрсэн гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 19.14 дүгээр зүйлийн 1 дэх хэсэгт заасан ял оногдуулах үндэслэлтэй гэж шүүхээс дүгнэв. 

Хавтаст хэрэгт авагдсан баримтуудад тулгуурлан хэргийн газар болсон гэх үйл баримтад дүгнэлт хийхэд гэмт хэрэг гарсан байдал, гэмт хэрэг гарах болсон шалтгаан, хэн үйлдсэн, гэмт хэргийн сэдэлт, гэм буруугийн хэлбэр зэргийг хангалттай тогтоож ирүүлсэн гэж үзэж хэргийг шийдвэрлэлээ.

Шүүхээс ял оногдуулахдаа Эрүүгийн хуулийн ерөнхий ангийн 6.1 дүгээр зүйлийн 2 дахь хэсэгт “Эрүүгийн хариуцлага хүлээлгэхэд гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал, эрүүгийн хариуцлагыг хөнгөрүүлэх, хүндрүүлэх нөхцөл байдлыг тал бүрээс нь харгалзан үзнэ” гэж заасныг баримтлан шүүгдэгч анх удаа гэмт хэрэг үйлдсэн, гэм буруугаа сайн дураараа хүлээн зөвшөөрсөн, прокурорын сонсгосон ялыг хүлээн зөвшөөрсөн, хүлээлгэх эрүүгийн хариуцлага буюу 1.500.000 /нэг сая таван зуун мянга/ төгрөгөөр торгох ялыг хүлээн зөвшөөрсөн, бусдад төлөх төлбөргүй, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаврыг ойлгосон, түүний хувийн байдал /...26 настай, эмэгтэй, дээд боловсролтой, Англи хэлний багш, орчуулагч мэргэжилтэй, хувиараа хөдөлмөр эрхэлдэг, ам бүл 5, эцэг, эх, ах нарын хамт амьдардаг.../ зэргийг харгалзан А.Уг Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар 1500 /нэг мянга таван зуу/ нэгжтэй тэнцэх хэмжээний буюу 1.500.000 /нэг сая таван зуун мянга/ төгрөгөөр торгох ял оногдуулж, уг торгох ялыг 6 /зургаа/ сарын хугацаанд хэсэгчлэн төлүүлэхээр шийдвэрлэх нь зохимжтой гэж үзлээ.         

Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт зааснаар А.А.Уд оногдуулсан 1.500.000 /нэг сая таван зуун мянга/ төгрөгөөр торгох ялыг 5 /тав/ сарын хугацаанд хэсэгчлэн төлүүлэхээр тогтоож шийдвэрлэлээ. 

Шүүгдэгч А.Уд холбогдох иргэний бичиг баримт шүүхэд шилжиж ирээгүй, бусдад төлөх төлбөргүй, гаргуулвал зохих хэрэг хянан шийдвэрлэх ажиллагааны зардал төлбөргүй, битүүмжлэгдсэн хөрөнгөгүй болохыг дурдъя. 

            Мөн шүүгдэгч А.Угийн үйлдэлд Эрүүгийн хуулийн ерөнхий ангийн 6.6 дугаар зүйлд заасан эрүүгийн хариуцлагыг хүндрүүлэх нөхцөл байдал тогтоогдоогүй болно.

Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 1, 4, 5, 36.2 дугаар зүйлийн 1, 4 дэх хэсэг, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон ТОГТООХ нь:  

 

            1. Шүүгдэгч А.Уг Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар Монгол Улсад орох, гарах хил нэвтрэх эрхийн баримт бичиггүйгээр, зохих зөвшөөрөлгүйгээр Монгол Улсын хилийг нэвтэрсэн гэмт хэрэг үйлдсэн гэм буруутайд тооцсугай.

2. Эрүүгийн хуулийн тусгай ангийн 19.14 дүгээр зүйлийн 1 дэх хэсэгт зааснаар А.Уг 1500 /нэг мянга таван зуу/ нэгжтэй тэнцэх хэмжээний буюу 1.500.000 /нэг сая таван зуун мянга/ төгрөгөөр торгох ял шийтгэсүгэй.

            3. Эрүүгийн хуулийн ерөнхий ангийн 5.3 дугаар зүйлийн 4 дэх хэсэгт зааснаар А.А.Уд оногдуулсан 1.500.000 /нэг сая таван зуун мянга/ төгрөгөөр торгох ялыг 6 /зургаа/ сарын хугацаанд хэсэгчлэн төлүүлэхээр тогтоосугай.  

            4. Шүүгдэгч А.Уд холбогдох иргэний бичиг баримт шүүхэд шилжиж ирээгүй, бусдад төлөх төлбөргүй, гаргуулвал зохих хэрэг хянан шийдвэрлэх ажиллагааны зардал төлбөргүй, битүүмжлэгдсэн хөрөнгөгүй болохыг дурдсугай.

            5. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 6 дахь хэсэгт зааснаар энэ хэрэгт эд мөрийн баримтаар хураагдаж ирсэн Е1960663 серийн дугаартай Монгол Улсын иргэн Б.О, Е1579218 серийн дугаартай Монгол Улсын иргэн А.У нарын гадаад энгийн 2 ширхэг гадаад паспортыг шийтгэх тогтоол хүчин төгөлдөр болмогц устгуулахаар Улсын бүртгэлийн Ерөнхий газарт шилжүүлсүгэй.

            6. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар ялтан торгох ялыг шүүхээс тогтоосон хугацаанд биелүүлээгүй бол хорих ялаар сольж эдлүүлдэг болохыг А.Уд сануулсугай.       

            7. Шийтгэх тогтоол нь уншин сонсгосноор хүчинтэй болохыг мэдэгдсүгэй.

            8. Шүүгдэгч, хохирогч, тэдгээрийн төлөөлөгч, өмгөөлөгч шийтгэх тогтоолыг эс зөвшөөрвөл өөрөө гардан авсан өдрөөс хойш 14 хоногийн дотор давж заалдах журмаар Нийслэлийн Эрүүгийн хэргийн давж заалдах шатны шүүхэд гомдол гаргах, улсын яллагч, түүний дээд шатны прокурор мөн хугацаанд эсэргүүцэл бичих эрхтэйг танилцуулсугай.

            9. Эрх бүхий этгээд давж заалдах журмаар гомдол гаргасан, эсэргүүцэл бичсэн тохиолдолд шийтгэх тогтоолын биелэлтийг түдгэлзүүлж, тогтоол хүчин төгөлдөр болох хүртэлх хугацаанд А.Уд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.  

   

 

 

 

    ДАРГАЛАГЧ

                            ЕРӨНХИЙ ШҮҮГЧ                               Б.БАТБОЛОР