МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

Шүүх хуралдааны нарийн бичгийн дарга М.Дөлгөөн,

Улсын яллагчаар С.Сүрэнхорол,

Хохирогч Б.Энхболд ,

Шүүгдэгчийн өмгөөлөгч И.Отгонсүрэн

   Шүүгдэгч М.Г нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т зааснаар яллах дүгнэлт үйлдэж ирүүлсэн Боржигон овогт М.Г-д холбогдох эрүүгийн 2134000000020 дугаартай хэргийг 2021 оны 02 дугаар сарын 02-ны өдөр хүлээн авч, 2021 оны 05 дугаар сарын 14-ний өдөр хянан хэлэлцэв.

 

Шүүгдэгчийн биеийн байцаалт:

Монгол Улсын иргэн, 1977 оны 11 дүгээр сарын 28-ны өдөр Төв аймгийн Зуунмод суманд төрсөн, 44 настай, эрэгтэй, яс үндэс халх, боловсролгүй, мэргэжилгүй, ам бүл 5, эхнэр, хүүхдүүдийн хамтаар ..........ажилтай, урьд Сум дундын 23 дугаар шүүхийн 2015 оны 06 дугаар сарын 22-ны өдрийн 101 дугаартай шийтгэх тогтоолоор 2002 оны Эрүүгийн хуулийн тусгай ангийн 145 дугаар зүйлийн 145.1 дэх хэсэгт заасан гэмт хэрэг үйлдсэн гэм буруутайд тооцож, хэрэгсэхгүй болгосон, Төв аймаг дахь Сум дундын Эрүүгийн хэргийн анхан шатны шүүхийн 2017 оны 08 дугаар сарын 29-ний өдрийн 241 дугаартай шийтгэх тогтоолоор 2002 оны Эрүүгийн хуулийн тусгай ангийн 147 дугаар зүйлийн 147.1 дэх хэсэгт зааснаар 3 жил, 6 сарын хугацаагаар хорих ялыг тэнсэж, 1 жилийн хугацаагаар хянан харгалзсан, хэрэг хариуцах чадвартай, улсаас авсан гавьяа шагналгүй гэх Боржигон овогт М.Г

 

Холбогдсон хэргийн талаар /яллах дүгнэлтэд дурдагдсанаар/

Шүүгдэгч М.Г нь 2021 оны 01 дүгээр сарын 08-ны өдөр Төв аймгийн Зуунмод сумын Баянхошуу 3 дугаар баг, 9-5 тоотод оршин суух Б.Энхболдын гэрийн хашаанд байрлах модон амбаарт байсан үхрийн махыг хүч хэрэглэхгүйгээр, нууцаар, хууль бусаар авсан гэмт хэргийг тусгайлан хамгаалсан байх, агуулахад нэвтэрч үйлдэн, улмаар 500.000 төгрөгийн хохирол учруулсан гэмт хэрэгт холбогджээ.

ТОДОРХОЙЛОХ нь:

 

            Шүүхийн хэлэлцүүлэгт:

            Шүүгдэгч М.Г мэдүүлэхдээ: “Гэм буруу дээрээ маргахгүй тул мэдүүлэг өгөхгүй” гэв.

            Хохирогч Б.Энхболд мэдүүлэхдээ: “Манайх 2021 оны 01 дүгээр сарын 08-ны өдөр эзэнгүй, бид нар гэртээ байгаагүй. Тэгээд дүүгээ манай гэрийн эргээд тойроорой гэж хэлсэн. Тэгтэл манай дүү над руу утсаар яриад мах алга болсон байна гэж хэлсэн. Тэгээд цагдаад дуудлага өгөөд сүүлд цагдаагаас дуудахад Г-г авсан гэдгийг мэдсэн. Манай гэрийг тухайн хашаанд нүүж очоогүй байхад Г-х түр хашаанд амьдарч байсан юм байна лээ. Одоо миний хувьд гомдол саналгүй, нэхэмжлэх зүйлгүй” гэв.

 

Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хэргийн газар үзлэг хийсэн тэмдэглэл болон үзлэгийн явцад бэхжүүлж авсан гэрэл зургийн үзүүлэлтүүд /хх-ийн 4-11 тал/, хохирогч Б.Энхболдын гэрчээр өгсөн мэдүүлэг /хх-ийн 12 тал/, хохирогч Б.Энхболдын мэдүүлэг /хх-ийн 14 тал/, гэрч Д.Өнөрбаатарын мэдүүлэг /хх-ийн 16-17 тал/, гэрч Ц.Зоригтбаатарын мэдүүлэг /хх-ийн 20 тал/, “Эй Жэй Жэй Эм” ХХК-ийн 2021 оны 01 дүгээр сарын 11-ний өдрийн 07-04/09 дугаартай үнэлгээний тайлан /хх-ийн 37-43 тал/, шүүгдэгч М.Гийн яллагдагчаар өгсөн мэдүүлэг /хх-ийн 48 тал/, болон шүүгдэгч М.Гийн хувийн байдлыг тогтоосон бусад баримтууд болно.

 

Шүүхийн хэлэлцүүлэгт шинжлэн судалсан дээрх нотлох баримтууд нь энэ хэрэгт хамааралтай, ач холбогдолтой, хууль ёсны, Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн шалгах ажиллагааны явцад оролцогчийн хуулиар хамгаалагдсан эрхийг хасаж, хязгаарласан хуульд заасан шаардлагыг зөрчсөн гэх ноцтой зөрчил тогтоогдоогүй байна гэж үзлээ.

Шүүгдэгч М.Г нь 2021 оны 01 дүгээр сарын 08-ны өдөр Төв аймгийн Зуунмод сумын Баянхошуу 3 дугаар баг, 9-5 тоотод оршин суух Б.Энхболдын гэрийн хашаанд байрлах модон амбаарт байсан үхрийн махыг хүч хэрэглэхгүйгээр, нууцаар, хууль бусаар авсан гэмт хэргийг тусгайлан хамгаалсан байх, агуулахад нэвтэрч үйлдэн, улмаар 500.000 төгрөгийн хохирол гэмт хэрэг үйлдсэн гэм буруутай болох нь:

 

• Хэргийн газар үзлэг хийсэн тэмдэглэл болон үзлэгийн явцад бэхжүүлж авсан гэрэл зургийн үзүүлэлтүүд /хх-ийн 4-11 тал/,
• Хохирогч Б.Энхболдыг мөрдөн байцаалтын шатанд гэрчээр мэдүүлсэн “...Би Төв аймаг Зуунмод сумын Баянхошуу 3-р баг 9-5 тоотод оршин суудаг бөгөөд 2021 оны 01-ны өдрийн 05-ны өглөө 07 цагт ажилдаа яваад улмаар Төв аймгийн Сэргэлэн сум Ногоон дов гэх газар зам ангийн шуурхай хэсэгт байрлаж ажиллаж байгаад 01 дүгээр сарын 10-ны орой 22 цаг 30 минутын орчим ажлаасаа буугаад гэртээ иртэл амбаарын хаалга дэлгээд хаячихсан дотор байсан нэг бярууны нэг гуягүй жижиглээд идшэнд бэлдчихсэн байсан мах алдагдсан байсан учраас цагдаагийн байгууллагад хандсан юм. Манай эхнэр хүүхэд хөдөө байгаа бөгөөд явахдаа гэрээ харж байгаарай гэж эхнэрийн дүү н.Өнөрбаатар мөн найз н.Зоригтбаатар нарт хэлж байсан юмаа. 08-ны орой н.Өнөрбаатар манайхаар ирсэн гэсэн. Тэр үед бол зүгээр байсан гэсэн. Н.Зоригтбаатар бол ирж харж амжаагүй гэж байсан. Миний хувьд хөл хорио гээд мах ирэхгүй байж байгаад 11 сарын сүүлээр мах ирсэн бөгөөд ирснээс нь хойш тухайн амбаартаа хийсэн бөгөөд тэрнээс хойш би өөрөө 12 дугаар сарын 28-ны өдөр хамгийн сүүлд амбаартаа орж үзэхэд хэвийн зүгээр байсан юмаа. Тийм учраас манай махыг тухайн газар байгаа талаар мэдэж байгаа хүн байхгүй. Энэ жил бол хүн бараг ирээгүй Баянхошууны хэлгүй гээд байдаг нөхөр хаяа архи уучихсан орж ирээд хүүхэдтэй тоглох гээд байдаг байсан юмаа. Өөрөөр бол орж гараад байх хүн байхгүй...” гэх мэдүүлэг /хх-ийн 12 тал/,
• Хохирогч Б.Энхболдын мөрдөн байцаалтын шатанд мэдүүлсэн “...2021 оны 01 дүгээр сарын 05-ны өдөр гэрээ цоожлоод хөдөө ажлаар явсан. Ингээд 2021 оны 01 дүгээр сарын 10-ны орой ажлаа дуусаад гэртээ ирэхэд манай хашаанд байдаг идэшний модон амбаарын хаалгыг эвдээд онгойлгоод орхичихсон байсан. Ингээд би цагдаад дуудлага өгсөн. Цагдаа ирж шалгасны дараа эд зүйлсээ бүртгэхэд өвлийн идшэнд хэрэглэсэн тал бярууны махыг хулгай аваад явчихсан байсан. Бүтэн үхрийн махнаас огт идээгүй ганц гуяны махыг нь хадмынд цагаан сарын бууз хийхэд хэрэглэнэ гээд үлдээсэн байсан юм. Мөн 2 ямааны арилгасан гэдэс гүзээнд нь хийгээд орхисон байсан түүнийг бас аваад явчихсан байсан тус 2 гэдэс нь хулгай хийсэн хүний гэрт нь байсан юм билээ түүнийг нь хараад цагдаа нар илрүүлж ажилласан гэж хэлж байсан. Манай үхрийн мах 100 орчим килограмм мах байсан. Би 1 килограмм махыг 5000 төгрөгөөр үнэлж 500000 төгрөг нэхэмжилж байна. 2 ямааны гэдсийг үнэлэхгүй...” гэх мэдүүлэг /хх-ийн 14 тал/
• Гэрч Д.Өнөрбаатарын мөрдөн байцаалтын шатанд мэдүүлсэн “...Манай хүргэн, ах эгч хоёр, 3 хүүхдээ аваад 2020 оны 12 дугаар сарын 30-ны өдөр Баянцагаан сум руу аав н.Дашзэвэгийнх рүү явсан. Тэгж явахдаа бид хэдийг ирэхээс 2 хоногийн өмнө гэр галлаад дулаахан байж байгаарай гээд надад гэрийнхээ түлхүүрийг үлдээсэн. Би тэрнээс хойш гэрийнх нь гадуур эргэж тойрсноос яг гэрт нь ороогүй. 2021 оны 01 дүгээр сарын 08-ны өдөр Баянцагаан сумаас эгч утсаар холбогдож гэрээс хүүхдийн суултуур аваад замын унаанд дайж явуулаач гэсэн. Тэгээд би тухайн өдрийн 18 цагийн орчимд гэрт нь гэрт нь очиж хүүхдийн суултуур авсан. Тэгэхэд гэр болон амбаар нь бүрэн цоожтой байсан. Дараа нь хүргэн ах н.Энхболд над руу 2021 оны 01 дүгээр сарын 10-ны 21 цагийн орчимд утсаар холбогдож өглөө эрт хот руу явах машинд мах дайж явуулах хэрэгтэй байна. Чи манайхаас арьсанд нь боосон 2 ямааны мах, цагаан цаасан хайрцагтай мах, 2 ямааны гэдэс аваад хот явах машинд хүргээд өгөөч гэсэн. Тэгэхээр нь би 22:30 цагийн үед ажлаа дуусгаад махыг нь авах гэж гэрт очсон. Тэгэхэд хашааны хаалга нь түгжээгүй хаалттай байсан. Би шууд гэрт нь орж амбаарын түлхүүр аваад амбаар луу гэрэл тусгаж гартал амбаарын хаалга нээлттэй байсан ба хажуугийнх нь нүүрсний амбаарын хаалга мөн нээлттэй байсан. Тэгээд би хүргэн ах руу утсаар шууд залгаж амбаарын хаалга нээлттэй байгаа талаар хэлсэн.  Утсаар ярих явцдаа амбаар луу орж доторхийг нь үзэж хүргэн ахаас юу юу байсан талаар тодруулахад үхрийн мах, гагнуурын аппарат, гар мулдок, цагаан шуудайтай мах, цаасан хайрцагтай ямааны мах, арьсанд нь боосон хоёр ямааны мах, мөн арьсанд нь боосон хоёр ямааны мах, мөн хоёр ямааны гэдэс байгаа гэж хэлсний дагуу бүртгэхэд үхрийн мах, цаасан хайрцагтай мах, цагаан шуудайтай мах, ямааны хоёр гэдэс тус тус байхгүй байсан.  Тэгээд хүргэн ах надад амбаарт байгаа махнуудыг нь гэрт зөөгөөд оруулчих, би одоо ногоон довоос гарлаа гэж хэлээд утсаа тасалсан. Би хоёр ямааны махыг нь гэрт зөөж оруулчихаад амбаарын хаалгыг нь хаагаад, хашааг нь түгжээд гэртээ харьсан. Дараа нь 00 цагийн орчимд хүргэн ах над руу залгаад би түлхүүрээ орхичихсон байна чи түлхүүр аваад гэрт хүрээд ирээч, би цагдаад дуудлага өгчихсөн гэж хэлсэн. Тэгээд би өөрийн гэрээс гарч хүргэн ахынд ирэхэд хүргэн ах хашааны баруун урд талын айлын гадаа зогсож байсан...” гэх мэдүүлэг /хх-ийн 16 тал/
• Гэрч Ц.Зоригтбаатарын мөрдөн байцаалтын шатанд мэдүүлсэн “... 2021 оны 01 дүгээр сарын 01-ний өдөр ажилдаа явна гэж байхад нь очиж аккумлятор уягч авсан. Тэгэхэд бид 2, хоёр хоёр лааз пиво уугаад 20 цагийн орчимд гэртээ харьсан. Тэрнээс хойш өнөөдрийг хүртэл очоогүй. Б.Энхболд ажилдаа явахдаа манай хашаа байшинг харж байгаарай гэж захисан. Гэхдээ би очиж эргэж тойрсон юм байхгүй. Өнгөрдөг намар Б.Энхболдтой хамт тэр амбаарыг барьж байсан юм. Барьж байхдаа дундуур нь тасалгаа хийгээд 2 тусдаа хаалга хийж байсан. Тухайн үед барьж байхдаа ойр зуурын багаж, нүүрс, идшээ хийнэ гэж ярьж байсан. Яг тухайн үед багаж мэт ойр зуурын эд зүйлс, идэш гэх мэт зүйлс байсан байх. Би 2021 оны 01 дүгээр сар 08-ны өдөр гэртээ бага хүүхдээ харж өнжсөн, дундуур нь өдрийн цагаар 2,3 удаа ажил дээрээ ирж хүний гутал янзалж өгсөн. Өөрөөр гадуур явж хөдөлгөөн хийгээгүй...” гэх мэдүүлэг /хх-ийн 18-19 тал/
• “Эй Жэй Жэй Эм” ХХК-ийн 2021 оны 01 дүгээр сарын 11-ний өдрийн 07-04/09 дугаартай үнэлгээний тайлан /хх-ийн 37-43 тал/,
• Шүүгдэгч М.Гийн мөрдөн байцаалтын шатанд яллагдагчаар мэдүүлсэн “...Би 2021 оны 01 дүгээр сарын 08-ны өдөр манай Дулааны эрчим хүчний газарт ажиллаж байгаад тэтгэвэрт гарсан н.Цогзолмаа гэх хүний очихоор яваад очтол гэр нь цоожтой байсан. Ингээд хашааны баруун урд буланд байх модон амбаарт яваад очиход цоожтой байхаар нь хаалгыг нь гараараа татаж эвдлээд дотор нь ороход төмөр поошиг дотор шуудайтай мах байсан. Ингээд тус шуудайтай махыг үүрээр гэр рүүгээ явж байгаад н.Ганбаатар гэх айлд очоод өөрт нь хэлэлгүй амбаарт нь хийж орхиод явсан. Маргааш өглөө нь амбаараас шуудайтай махаа аваад үүрээр төв рүү оруулж зарах санаатай явж байтал замаар явж байсан цагаан өнгийн машинтай хүн зогсоод тэр хүнд махаа 80.000 төгрөгөөр зарсан. Ингээд мөнгөөрөө зүс таних хүүхэнтэй архи, пиво авч 5 дугаар хороонд гэрт нь очиж хамт уугаад мөнгөө дууссан...” гэх мэдүүлэг /хх-ийн 48 тал/ зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдож тогтоогдож байна.
•  

Шүүгдэгч М.Гийн үйлдсэн хүний байнга амьдрах зориулалттай орон байранд хууль бусаар, нууцаар нэвтэрч, бусдын эд хөрөнгийг хулгайлсан үйлдэл нь Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т заасан гэмт хэргийн объектив талын шинжүүдийг бүрэн хангасан, прокуророос ирүүлсэн хэргийн зүйлчлэл тохирсон, хэрэг бүртгэлт, мөрдөн байцаалтын явцад оролцогчийн эрхийг зөрчсөн, хууль бусаар хязгаарласан нөхцөл байдал тогтоогдоогүй байна.

Эрүүгийн хуулийн 2.3 дугаар зүйлийн 1 дэх хэсэгт зааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсэж үйлдсэн, хохирол, хор уршигт зориуд хүргэснийг ойлгох бөгөөд шүүгдэгч М.Г нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байсан тул гэм буруугийн санаатай хэлбэрээр үйлдэгдсэн гэм буруутай гэж үзнэ.

Хулгайлах гэмт хэргийн зайлшгүй байх шинж нь гэм буруутанд үл хамаарах, түүнийг өөрөө захиран зарцуулах ямар ч эрхгүй бусдын эд хөрөнгийг хууль зөрчиж, нууц далд хэлбэрээр, хууль бусаар, шунахай сэдэлт зорилгоор, ямар ч үнэ төлбөргүйгээр өөрт болон бусад этгээдэд ашигтайгаар авах үйлдэл байдаг. Мөн гэм буруутай этгээд бусдын эд зүйлс, өмч хөрөнгийг хүч хэрэглэхгүйгээр, орчин тойрны хүмүүст болон өмчлөгч этгээдэд мэдэгдэхгүйгээр нууцаар авах, өөрийн үзэмжээр захиран зарцуулж буюу ашиг олох гэсэн зорилготой байдаг болно.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих асуудлыг хангалттай шалгаж тогтоосон, шүүгдэгч М.Г нь бусдын байнга амьдрах зориулалттай орон байранд нэвтэрч бусдын эд хөрөнгийг нууцаар хууль бусаар хулгайлсан үйлдэл нь шүүхийн хэлэлцүүлэгт болон мөрдөн байцаалтын шатанд мэдүүлсэн шүүгдэгчийн мэдүүлэг болон хэрэгт авагдсан бичгийн бусад нотлох баримтуудаар нотлогдон тогтоогдож байх тул Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т заасан гэмт хэргийг үйлдсэн гэм буруутайд тооцож, хуульд заасан эрүүгийн хариуцлага хүлээлгэх нь зүйтэй.

 

Гэмт хэргийн улмаас учирсан хохирол, хор уршгийн талаар:

Шүүгдэгч М.Г нь энэ гэмт хэргийн улмаас хохирогч Б.Энхболдод 500.000 төгрөгийн хохирол учруулсан бөгөөд шүүхийн шатанд шүүгдэгч М.Г нь 230.000 төгрөг төлсөн бөгөөд шүүхийн хэлэлцүүлэгт хохирогч Б.Энхболд нь “ нэхэмжлэх зүйл байхгүй, гомдол саналгүй” гэсэн тул энэ тогтоолоор гаргуулах хохирлын асуудал байхгүй байна.

 

Эрүүгийн хариуцлага хүлээлгэх талаар:

-Шүүхийн хэлэлцүүлэгт улсын яллагчаас: Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т зааснаар шүүгдэгч М.Гид 3 жилийн хугацаагар хорих ял оногдуулах, уг хорих ялыг нээлттэй хорих ангид эдлүүлэх ” ялын дүгнэлтийг,

- Шүүхийн хэлэлцүүлэгт шүүгдэгчийн өмгөөлөгч И.Отгонсүрэн нь “Эрүүгийн хуулийн ерөнхий ангийн 6.7 дугаар зүйлийн 1 дүгээр  хэсгийн 1.3-т зааснаар хорих ялыг багасгаж өгнө үү” гэх дүгнэлийг тус тус гаргасан байна.

Шүүгдэгч М.Гийн холбогдсон Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1 дэх хэсэгт заасан гэмт хэрэг нь “хүн байнга амьдрах, үйл ажиллагаа явуулах зориулалттай орон байр, тусгайлан хамгаалсан байр, агуулахад нэвтэрч үйлсэн бол хоёр жилээс найман жил хүртэл хугацаагаар хорих ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 1 дэх хэсэгт “Энэ хуулийн тусгай ангид хорих ялын доод хэмжээг хоёр жил, түүнээс дээш хугацаагаар оногдуулахаар тогтоосон гэмт хэргийг хүнд гэмт хэрэг гэнэ” гэж зааснаар хүнд гэмт хэргийн ангилалд хамаарч байна.

Шүүх шүүгдэгч М.Гид эрүүгийн хариуцлага хүлээлгэхдээ мөрдөн байцаалтын шатанд болон шүүхийн шатанд гэм буруугийн талаар маргаагүй, бусдад учруулсан хохирлоо нөхөн төлсөн, учруулсан хохирол, хор уршгийн шинж чанар, хувийн байдлыг харгалзан Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.3-т “энэ хуулийн тусгай ангид хорих ялын доод хэмжээг хоёр жилээс дээш, дээд хэмжээг найман жил хүртэл хугацаагаар тогтоосон гэмт хэрэг үйлдсэн хүн тухайн гэмт хэргийн улмаас учруулсан хохирлоо нөхөн төлсөн бол тухайн зүйл, хэсэг, заалтад заасан ялын дээд хэмжээний хоёрны нэгээс хэтрүүлэхгүйгээр, ялын доод хэмжээний хоёрны нэгээс багагүй ял оногдуулах” гэж заасныг хэрэглэх үндэслэлтэй байх тул өмгөөлөгчийн хүсэлтийг хүлээн авч шүүгдэгч М.Гийг Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т зааснаар 1 \нэг\ жилийн хугацаагаар хорих ял оногдуулж, хорих ялыг нээлттэй хорих ангид эдлүүлэхээр шийдвэрлэлээ.

 

Бусад асуудлаар:

Энэ хэрэгт эд мөрийн баримтаар хураагдан ирсэн зүйлгүй, битүүмжлэгдсэн эд хөрөнгөгүй, иргэний бичиг баримт шүүхэд ирээгүй, цагдан хоригдсон хоноггүй, эрүүгийн хэрэг хянан шийдвэрлэх ажиллагааны зардалгүй, шүүгдэгч М.Г нь бусдад төлөх төлбөргүй болохыг тус тус дурдах нь зүйтэй байна.

            Монгол Улсын Шүүхийн тухай хуулийн 22 дугаар зүйлийн 22.1, 22.4.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг тус тус удирдлага болгон

ТОГТООХ нь:

1. Шүүгдэгч Боржигон овогт М.Г-ийг хүн байнга амьдрах зориулалттай орон байранд хууль бусаар, нууцаар нэвтэрч бусдын эд хөрөнгийг хулгайлах гэмт хэргийг үйлдсэн гэм буруутайд тооцсугай.

 

2. Шүүгдэгч Боржигон овогт М.Г-г Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.3-т заасныг журамлан Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-т зааснаар 1 /нэг/ жилийн хугацаагаар хорих ялаар шийтгэсүгэй.  

 

3. Эрүүгийн хуулийн ерөнхий ангийн 5.6 дугаар зүйлийн 4 дэх хэсэгт зааснаар шүүгдэгч Боржигон овогт М.Г-д оногдуулсан 1 /нэг/ жилийн хорих ялыг нээлттэй хорих байгууллагад эдлүүлэхээр тогтоосугай.

 

4. Шийтгэх тогтоол уншиж сонсгосноор хүчинтэй болох бөгөөд шүүгдэгч М.Гид авсан хувийн баталгаа гаргах таслан сэргийлэх арга хэмжээг өөрчилж, цагдан хорих таслан сэргийлэх арга хэмжээ авч, ял эдлэх хугацааг 2021 оны 05 дугаар сарын 14-ний өдрөөс эхлэн тоолсугай.

 

5. Хэрэгт эд мөрийн баримтаар хураагдан ирсэн зүйлгүй, битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч М.Г нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

 

6. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, хохирогч, тэдгээрийн төлөөлөгч, өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах Н.Өнө-Эрдэнэд даалгасугай. 

 

7.  Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурьдсугай.

 

8. Шийтгэх тогтоол танилцуулан сонсгосноор хүчинтэй болох бөгөөд мөн хуулийн 37.1 дүгээр зүйлийн 2 дахь хэсэгт зааснаар шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

 

ДАРГАЛАГЧ, ШҮҮГЧ                                  Ю.ЭНХМАА