“Б” ХХК-ийн

 нэхэмжлэлтэй захиргааны хэргийн тухай

 

 

            Захиргааны хэргийн давж заалдах шатны шүүхийн давж заалдах журмаар хэргийг шийдвэрлэсэн

Шүүх бүрэлдэхүүн:

Шүүх хуралдаан даргалагч Ерөнхий шүүгч Д.Баатархүү

Бүрэлдэхүүнд оролцсон шүүгч Б.Тунгалагсайхан

Илтгэсэн шүүгч Н.Хонинхүү

Давж заалдах гомдол гаргасан хэргийн оролцогч:

Хариуцагчийн итгэмжлэгдсэн төлөөлөгч Т.Э,

Нэхэмжлэлийн шаардлага: Байгаль орчин, аялал жуулчлалын сайдын 2022 оны 09 дүгээр сарын 01-ний өдрийн “Газар ашиглах эрхийг хүчингүй болгох” тухай А/354 дүгээр тушаалыг хүчингүй болгуулах

Давж заалдах гомдол гаргасан шүүхийн шийдвэр: Нийслэл дэх Захиргааны хэргийн анхан шатны шүүхийн 2023 оны 04 дүгээр сарын 21-ний өдрийн 385 дугаар

Давж заалдах шатны шүүх хуралдааны оролцогчид:

Нэхэмжлэгчийн итгэмжлэгдсэн төлөөлөгч О.Д

Хариуцагчийн итгэмжлэгдсэн төлөөлөгч Д.Н

Шүүх хуралдааны нарийн бичгийн дарга Ц.Баасанцэрэн

Хэргийн индекс: 128/2022/1032/3

ТОДОРХОЙЛОХ нь:

1. Нэхэмжлэгч ““Б” ХХК-аас Байгаль орчин, аялал жуулчлалын сайдад холбогдуулан “Байгаль орчин, аялал жуулчлалын сайдын 2022 оны 09 дүгээр сарын 01-ний өдрийн “Газар ашиглах эрхийг хүчингүй болгох” тухай А/354 дүгээр тушаалыг хүчингүй болгуулах”-аар маргасан байна.

2. Нийслэл дэх Захиргааны хэргийн анхан шатны шүүхийн 2023 оны 04 дүгээр сарын 21-ний өдрийн 385 дугаар шийдвэрээр: “Газрын тухай хуулийн 40 дүгээр зүйлийн 40.1.5, 40.1.6, 61 дүгээр зүйлийн 61.1, Захиргааны ерөнхий хуулийн 4 дүгээр зүйлийн 4.2.5, 4.2.6 дахь хэсэгт заасныг тус тус баримтлан нэхэмжлэгч “Б” ХХК-ийн нэхэмжлэлийн шаардлагыг бүхэлд нь хангаж, Байгаль орчин, аялал жуулчлалын сайдын 2022 оны 09 дүгээр сарын 01-ний өдрийн “Газар ашиглах эрхийг хүчингүй болгох тухай” А/354 дүгээр тушаалыг хүчингүй болгож” шийдвэрлэжээ.

3. Давж заалдах гомдлын агуулга: Хариуцагчийн итгэмжлэгдсэн төлөөлөгчөөс давж заалдах гомдолдоо “... Нэхэмжлэгч “Б” ХХК-д байгаль орчны яамны Тусгай хамгаалалттай нутгийн удирдлагын газрын даргын 2008 оны 08 дугаар сарын 08-ны өдрийн 741 дугаар тушаалаар Богдхан уулын дархан цаазат газрын Энхтайваны аманд 20 га талбай бүхий газрыг анх олгосон. Монгол Улсын Дээд шүүхийн...15 дугаар тогтоолын 1.10-д “Хуулийн 40 дүгээр зүйлийн 40.1.6-д заасан "... хүндэтгэн үзэх шалтгаангүйгээр ...” гэдгийг гэнэтийн давагдашгүй хүчний эсхүл байгалийн тогтолцооны өөрчлөлтөөс тухайн газарт нь эвдрэл, элэгдэл, цөлжилт бий болсон, бусдын хууль бус үйлдэл зэрэг газар эзэмшигчээс хамаарах шалтгаан байхгүй байсныг ойлгоно”, “Мөн зүйл, хэсэгт заасан “... зориулалтын дагуу газраа 2 жил дараалан ашиглаагүй” гэдгийг газар эзэмшүүлэх тухай гэрээ хийгдсэнээс хойш хуанлийн бүтэн 2 жилийн дотор газар эзэмшигч нь тухайн газар дээрээ гэрээнд заасан нөхцөл, болзол, зориулалтын дагуу тодорхой үйлдвэрлэл, үйлчилгээ эрхлээгүй /барилга, байгууламж, зам талбай бариагүй, тариалан эрхлээгүй г.м/ байхыг ойлгоно” гэж тайлбарласан.

3.1. Хэдийгээр анхан шатны шүүхээс газрын үзлэг хийхэд үйл ажиллагаа явуулсан нөхцөл байдал тогтоогдсон боловч тухайн газар ашиглах эрхийг хүчингүй болгох цаг хугацаанд буюу Байгаль орчин, аялал жуулчлалын сайдын 2022 оны 09 дүгээр сарын 01-ний өдрийн Газар ашиглах эрхийг хүчингүй болгох тухай А/354 дугаартай тушаал гарах үед тухайн газрыг анх ашиглах эрх олж авсан зориулалтын дагуу ашиглаагүй байсан нь тогтоогдсон. Өөрөөр хэлбэл нэхэмжлэгчээс газар ашиглах эрх олгох тухай хүсэлт гаргахдаа тухайн газарт хэрэгжүүлэхээр зорьсон төсөл, хөтөлбөр нь одоогийн нөхцөлд хэрэгжиж байгаа эсэх, үл хөдлөх эрхийн гэрчилгээ авсан гэх обьект нь тус төслийн дагуу баригдсан эсэхэд үнэлгээ дүгнэлт хийлгүйгээр зориулалтын дагуу ашигласан гэж дүгнэсэн нь үндэслэлгүй.

3.2. Нэхэмжлэгч нь 2008 онд анх газар ашиглах эрх авсан бөгөөд үүнээс хойш 14 жилийн хугацаа өнгөрсөн ч газрыг ашиглах эрхийн зориулалтаар ашиглаагүй байх тул Газрын тухай хуулийн 40 дүгээр зүйлийн 40.1.6-д”...хүндэтгэн үзэх шалтгаангүйгээр гэрээнд заасан зориулалтын дагуу тухайн газраа 2 жил дараалан ашиглаагүй...” гэх үндэслэлд хамаарч байна. Иймд анхан шатны шүүхийн шийдвэрийг хүчингүй болгож, нэхэмжлэлийг хэрэгсэхгүй                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                         болгож өгнө үү ” гэжээ.  

ХЯНАВАЛ:

1. Захиргааны хэрэг шүүхэд хянан шийдвэрлэх тухай хуулийн 118 дугаар зүйлийн 118.3-д зааснаар гомдол гаргагчийн давж заалдах гомдлын хүрээнд анхан шатны шүүхийн шийдвэрийг хянаад, шийдвэрийг хэвээр үлдээж шийдвэрлэлээ.

2. Шүүх хариуцагчийн итгэмжлэгдсэн төлөөлөгчийн давж заалдах гомдлыг дараах үндэслэлээр хангах үндэслэлгүй гэж үзлээ. Үүнд:

2.1. Маргаан бүхий актын Газрын тухай хуулийн 40 дүгээр зүйлийн 40.1.5-д заасныг зөрчсөн гэх үндэслэлтэй холбогдуулан анхан шатны шүүх “... маргаан бүхий сайдын А/354 дүгээр тушаалд “... Богдхан уулын дархан цаазат газрын хамгаалалтын захиргааны 2022 оны 08 дугаар сарын 04-ний өдрийн 835 дугаар албан бичгээр ирүүлсэн саналын дагуу газрын төлбөрөө хугацаанд нь бүрэн төлөөгүй ... үндэслэлээр ...” нэхэмжлэгчийн газар ашиглах эрхийг хүчингүй болгосон гэх боловч Богдхан уулын дархан цаазат газрын хамгаалалтын захиргааны 2022 оны 08 дугаар сарын 04-ний өдрийн 835 дугаар албан бичгээр ирүүлсэн саналд Газрын тухай хуулийн 40 дүгээр зүйлийн 40.1.5-д заасан “газрын төлбөрөө хугацаанд нь төлөөгүй” үндэслэл огт дурдагдаагүй, хэрэгт авагдсан нотлох баримаас үзэхэд нэхэмжлэгч хуулийн этгээд нь газрын төлбөрөө хугацаанд нь бүрэн төлж байсан, газар эзэмших эрхийг цуцалсан сайдын тушаал гарах үед 110.000.000 төгрөгийн илүү төлөлттэй байсан ... нь тогтоогдож байх тул хариуцагчийн энэ үндэслэлээр газар эзэмших эрхийг хүчингүй болгосон шийдвэр хуульд нийцээгүй ...” гэсэн агуулга бүхий дүгнэлт хийсэн нь үндэслэлтэй.

 2.2. Хариуцагчийн итгэмжлэгдсэн төлөөлөгчөөс шүүхийн шийдвэрийн энэ талаарх дүгнэлт үндэслэлтэй холбогдуулан давж заалдах гомдол гаргаагүй, мөн шүүх хуралдаанд хариуцагчийн итгэмжлэгдсэн төлөөлөгчөөс “... 40.1.5 дахь заалтын тухайд магадгүй бичиглэлийн шинжтэй алдаа гаргасан байхыг үгүйсгэхгүй. Сайд үүнийг залруулах боломжтой гэж үзэж байна ...” гэж тайлбарласнаас үзвэл хэргийн оролцогчид энэ талаар маргаагүй байна.

3. Нэхэмжлэгчийн газар ашиглах эрхийг хүчингүй болгож шийдвэрлэсэн маргаан бүхий актын “... газраа 2 жил дараалан ашиглаагүй буюу Газрын тухай хуулийн 40 дүгээр зүйлийн 40.1.6-д заасныг зөрчсөн ...” гэх үндэслэлийн тухайд, анхан шатны шүүх хэрэгт авагдсан баримтад үндэслэлтэй зөв дүгнэлт хийж, хуулийг зөв тайлбарласан байна.  

3.1. Тусгай хамгаалалттай газар нутгийн тухай хуулийн 40 дүгээр зүйлийн 4 дэх хэсэгт “Тусгай хамгаалалттай газар нутагт газар ашиглах эрхийг дараах тохиолдолд хүчингүй болно:”, мөн хэсгийн 1 дэх заалтад “Газрын тухай хуулийн 40 дүгээр зүйлийн ..., 40.1.6, ...-д заасан үндэслэлээр” гэжээ.

3.2. Газрын тухай хуулийн 40 дүгээр зүйлийн 40.1.6-д “...хүндэтгэн үзэх шалтгаангүйгээр гэрээнд заасан зориулалтын дагуу тухайн газраа 2 жил дараалан ашиглаагүй.... “ гэж зааснаас үзвэл газар эзэмшигч, ашиглагч нь газраа 2 жил дараалан ашиглаагүй байх, ийнхүү ашиглаагүй нь хүндэтгэн үзэх шалтгаангүй байх гэсэн нөхцлүүд зэрэг бүрдсэн тохиолдолд эрх бүхий төрийн захиргааны албан тушаалтан өөрийн газар эзэмшүүлж, ашиглуулсан шийдвэрээ хүчингүй болгох хууль зүйн үндэслэл бүрдсэн гэж үзэх үндэслэлтэй.

3.3. Дээрх хуульд заасан “Зориулалтын дагуу газраа 2 жил дараалан ашиглаагүй" гэдгийг газар эзэмшүүлэх тухай гэрээ хийгдсэнээс хойш хуанлийн бүтэн 2 жилийн дотор газар эзэмшигч нь тухайн газар дээрээ гэрээнд заасан нөхцөл, болзол, зориулалтын дагуу тодорхой үйлдвэрлэл, үйлчилгээ эрхлээгүй, барилга, байгууламж, зам талбай бариагүй ... байхыг ойлгохоор байх бөгөөд хариуцагч нь аливаа этгээд олгосон газар ашиглах эрхийг цааш сунгахдаа газар ашиглагч газраа хуульд заасан журмын дагуу ашиглаж байгаа эсэхэд хяналт тавих боломжтой.

3.4. Хэрэгт авагдсан нотлох баримтуудаас үзэхэд Байгаль орчны сайдын 2008 оны 08 дугаар сарын 01-ний өдрийн 258 дугаар тушаалаар нэхэмжлэгч “Б” ХХК-д “Богдхан уулын дархан цаазтай газрын хязгаарлалтын бүс,  Энхтайваны аманд аялал жуулчлалын зориулалтаар 20 га газрын ашиглах эрх”-ийг олгохоор шийдвэрлэж, Байгаль орчны яамны тусгай хамгаалалттай нутгийн удирдлагын газрын даргаас 2008 оны 08 дугаар сарын 08-ны өдөр 741 дугаартай “Газар ашиглах гэрчилгээ”-г 5 жилийн хугацаагаар олгосон, үүний дараа Байгаль орчин, аялал жуулчлалын сайдын 2019 оны 06 дугаар сарын 07-ны өдрийн А/270 тоот тушаалыг үндэслэн 2018 оны 08 дугаар сарын 09-ний өдрөөс 2023 оны 08 дугаар сарын 09-ний өдрийг хүртэл 5 жилийн хугацаагаар тус газар ашиглах эрхийг сунгасан болох  нь тус 741 дугаартай гэрчилгээний хавсралтад тэмдэглэгджээ.

3.5. Улмаар “Б” ХХК” нь Богдхан уулын дархан цаазат газрын Хамгаалалтын захиргааны даргатай 2019 оны 07 дугаар сарын 19-ний өдөр Богдхан уулын дархан цаазат газрын хязгаарлалын бүсэд газар ашиглах гэрээ”[1]-г байгуулжээ.

3.6. Хариуцагч нь ийнхүү нэхэмжлэгчийн газар ашиглах эрхийг дээр дурдсанчлан удаа дараа сунгаж шийдвэрлэсэн байх бөгөөд хамгийн сүүлд 2019 оны 06 дугаар сарын 07-ны өдрийн А/270 тоот тушаалаар нэхэмжлэгчийн газар ашиглах эрхийг 2018 оны 08 дугаар сарын 09-ний өдрөөс 2023 оны 08 дугаар сарын 09-ний өдрийг хүртэл 5 жилийн хугацаагаар сунгаж шийдвэрлэсэн атлаа “зориулалтын дагуу 2 жил дараалан ашиглаагүй” гэсэн үндэслэлээр хүчингүй болгосон нь үндэслэлгүй байна.

 

3.7. Учир нь, хэрэгт авагдсан баримт болох шүүхийн үзлэгээр “Б” ХХК нь өөрийн ашиглах эрх бүхий газраа бүхэлд нь тойруулж хашаалсан, мөн уг газар дээр Улсын бүртгэлийн Ү-*** дугаар бүртгэл бүхий 54 м.кв талбайтай аялал жуулчлалын зориулалттай үл хөдлөх хөрөнгийн өмчлөх эрхийн улсын бүртгэлийн *** дугаар гэрчилгээ бүхий нэг давхар сууцны барилга, 2 ширхэг чингэлэг, ЦТП зэрэг барилга зэрэг баригдсан байхад газрыг огт ашиглаагүй гэж үзэх үндэслэлгүй, энэ талаарх анхан шатны шүүхийн дүгнэлт үндэслэлтэй.

 3.8. Түүнчлэн 2019 оны төгсгөл, 2020-2021 онд Монгол Улс даяар корона вирусын цар тахлын улмаас бүх нийтийн бэлэн байдлын зэрэгт удаа дараа шилжиж, хөл хорио тогтоож байсан нь нийтэд илэрхий үйл баримт байх тул шүүх энэ үйл баримтыг үгүйсгэх үндэслэлгүй, энэ үйл баримтыг нотлох Монголын худалдаа аж үйлдвэрийн  танхимын 2023 оны 04 дүгээр сарын 10-ны өдрийн 02/129 дугаар “Гэнэтийн буюу давагдашгүй хүчийн зүйлийн /FORCE MAJURE/ гэрчилгээ” нэхэмжлэгч “Б” ХХК-д олгогдсон байх тул газар ашиглах эрхийг нь хамгийн сүүлд сунгасан 2019 оноос хойш маргаан бүхий акт гарсан 2022 оны 09 дүгээр сарын 01-ний өдрийг хүртэлх хугацааны 2020, 2021 онууд уг хорио цээрийн дэглэм бүхий цаг хугацаанд хамаарч байгаа нь нийтэд илэрхий үйл баримт байх тул нэхэмжлэгчийг “2 жил дараалан газраа ашиглаагүй” гэж буруутгах үндэслэлгүй.

 3.9. Хариуцагчийн итгэмжлэгдсэн төлөөлөгчөөс давж заалдах шатны шүүх хуралдаанд “анхан шатны шүүх үзлэг хийх үед нэхэмжлэгчийн газар дээрх 54 м.кв талбай бүхий барилга, ЦТП, хашаа зэрэг нь үүссэн, өмнө нь байгаагүй” гэж тайлбарласан байх боловч хариуцагч нь Захиргааны ерөнхий хуулийн 24 дүгээр зүйлийн 24.1-т “Захиргааны байгууллага захиргааны шийдвэр гаргах ажиллагаанд хамаарах бодит нөхцөл байдлыг тогтооно”, 24.2-т “Энэ хуулийн 24.1-д заасан бодит нөхцөл байдлыг тогтооход ач холбогдол бүхий шаардлагатай ажиллагаа хийх, нотлох баримтыг цуглуулах, үнэлэх үүргийг захиргааны байгууллага хүлээнэ”, 24.4-т “Тухайн захиргааны шийдвэр гаргах ажиллагаанд хамааралтай тохиолдол бүрийн үндэслэлийг захиргааны байгууллага нарийвчлан шинжлэн судлах үүрэгтэй бөгөөд оролцогчийн хувьд ач холбогдол бүхий нөхцөл байдлыг тогтооно” гэж зааснаар өөрийн шийдвэрийн үндэслэлийн талаар нарийвчлан шинжлэн судлах хуулиар хүлээсэн үүргийн хүрээнд нэхэмжлэгч “Б” ХХК-д ач холбогдол бүхий нөхцөл байдал болох газраа гэрээнд заасан зориулалтын дагуу ашигласан эсэх талаарх үйл баримтыг нотлох баримт цуглуулж, үнэлэх замаар тогтоох ажиллагааг хийгээгүй нь, мөн нэхэмжлэгчид түүний эрхийг хөндсөн шийдвэр гаргах гэж байгаа талаар танилцуулж, сонсох ажиллагаа хийгээгүй нь мөн хуулийн 4 дүгээр зүйлийн 4.2.5-д “зорилгодоо нийцсэн, бодит нөхцөлд тохирсон, шийдвэр нь үндэслэл бүхий байх”, 4.2.6-д “бусдын эрх, хууль ёсны ашиг сонирхлыг хөндсөн захиргааны шийдвэр гаргах тохиолдолд тэдгээрт урьдчилан мэдэгдэх, оролцоог нь хангах” гэж заасан захиргааны үйл ажиллагааны тусгай зарчимд нийцээгүйг дурдах нь зүйтэй байна.

 3.10. Мөн нэхэмжлэгч нь “газрыг ашиглахын тулд эрх бүхий байгууллагаас холбогдох зөвшөөрөл, баримтуудыг гаргуулах шаардлагатай тул энэ талаар ажиллагаа хийсэн, уг ажиллагаанд тодорхой цаг хугацаа шаардагддаг, холбогдох зөвшөөрөл, техникийн нөхцлүүд хүлээгдэж бүтээн байгуулалт эхлэх боломж хязгаарлагдмал байсан ...” гэж тайлбарласан байх бөгөөд хэрэгт авагдсан баримтаас үзвэл, тэрээр ашиглах эрх бүхий уг газартаа аялал жуулчлалын цогцолбор бариулахаар холбогдох Архитектур төлөвлөлтийн даалгавар[2], ерөнхий төлөвлөгөө, зураг төслийг Нийслэлийн ерөнхий архитектор бөгөөд хот байгуулалт, хөгжлийн газрын даргаар тус тус батлуулж, улмаар дулааны болон холбогдох техникийн нөхцөлүүдийг авахаар эрх бүхий байгууллагуудад удаа дараа хандаж байсныг илтгэх баримт нотолгоо авагдсан, эдгээр үйл баримт нь нэхэмжлэгч хуулийн этгээдийг ашиглах эрх бүхий газартаа барилга байшин барьж,  ашиглаж байсныг нотлохгүй ч газрыг ашиглахаар ямарч үйл ажиллагаа явуулаагүй, эрмэлзээгүй гэж үзэх үндэслэлгүй байна.

 3.11. Тусгай хамгаалалттай газар нутгийн тухай хуулийн 11 дүгээр зүйлд “Хязгаарлалтын бүсэд байгаль орчинд нь сөрөг нөлөөгүй арга хэлбэрээр зохих зөвшөөрөлтэйгээр дараахь үйл ажиллагаа явуулж болно:”, 7/-д “аялагч, зөвшөөрөл бүхий бусад хүн түр буудаллах, отоглох, ажиглалт, судалгаа шинжилгээ хийх зориулалттай орон байр барих, ашиглах” гэж заасан.

 3.12. Гэтэл хэрэг хянан шийдвэрлэх ажиллагааны явцад хариуцагч, түүний итгэмжлэгдсэн төлөөлөгчөөс гаргасан тайлбар, гомдлоос үзэхэд нэхэмжлэгчийг “газраа 2 жил дараалан ашиглаагүй, ... Улсын Дээд шүүхийн 2008 оны Газрын тухай хуулийн заримт заалтыг тайлбарлах тухай 15 дугаар тогтоолын “... тухайн газар дээрээ гэрээнд заасан нөхцөл, болзол, зориулалтын дагуу тодорхой үйлдвэрлэл, үйлчилгээ, эрхлээгүй, барилга, байгууламж, зам талбай бариагүй ... байхыг ойлгоно” гэж тайлбарласан ... нэхэмжлэгчээс ... үл хөдлөх хөрөнгийн гэрчилгээ авсан гэх обьект нь төслийн дагуу баригдсан эсэхэд үнэлгээ дүгнэлт хийгээгүй ...” гэж буруутгасан нь тусгай хамгаалалттай газар нутгийн хязгаарлалтын бүсэд газар ашиглах талаар заасан дээрх хуулийн зохицуулалтаас зөрсөн, ойлгомжгүй байгааг дурдах нь зүйтэй байна.

  Иймд дээрх үндэслэлүүдээр анхан шатны шүүхийн шийдвэрийг хэвээр үлдээж, хариуцагчийн итгэмжлэгдсэн төлөөлөгчийн давж заалдах гомдлыг хангахгүй орхих нь зүйтэй гэж шүүх бүрэлдэхүүн үзлээ.

  Захиргааны хэрэг шүүхэд хянан шийдвэрлэх тухай хуулийн 119 дүгээр зүйлийн 119.2, 120 дугаар зүйлийн 120.1-д заасныг удирдлага болгон ТОГТООХ нь:

1. Нийслэл дэх Захиргааны хэргийн анхан шатны шүүхийн 2023 оны 04 дүгээр сарын 21-ний өдрийн 385 дугаар шийдвэрийг хэвээр үлдээж, хариуцагчийн итгэмжлэгдсэн төлөөлөгчийн давж заалдах гомдлыг хангахгүй орхисугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3-д зааснаар хариуцагч давж заалдах гомдол гаргахдаа улсын тэмдэгтийн хураамжаас чөлөөлөгдсөн болохыг дурдсугай

Захиргааны хэрэг шүүхэд хянан шийдвэрлэх тухай хуулийн 119 дүгээр зүйлийн 119.5 дахь хэсэгт зааснаар давж заалдах шатны шүүх хуулийг зөрүүтэй хэрэглэсэн, хэрэг хянан шийдвэрлэх ажиллагааны ноцтой зөрчил гаргасан нь шүүхийн шийдвэрт нөлөөлсөн, шүүх хуулийг Улсын дээд шүүхийн албан ёсны тайлбараас өөрөөр тайлбарлаж хэрэглэсэн гэж хэргийн оролцогчид, тэдгээрийн төлөөлөгч, өмгөөлөгч үзвэл магадлалыг гардан авсан эсхүл хүргүүлсэн өдрөөс хойш 14 хоногийн дотор Улсын Дээд шүүхийн Захиргааны хэргийн танхимд хяналтын журмаар гомдол гаргах эрхтэй.

 

 

 

 

                     ЕРӨНХИЙ ШҮҮГЧ                              Д.БААТАРХҮҮ

 

                     ШҮҮГЧ                                                 Б.ТУНГАЛАГСАЙХАН

 

                     ШҮҮГЧ                                                 Н.ХОНИНХҮҮ