2017 оны 04 сарын 03 өдөр

Дугаар 101/ШШ2017/01135

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

 

Баянзүрх дүүргийн Иргэний хэргийн анхан шатны шүүхийн шүүгч Б.Ундраа даргалж, тус шүүхийн хуралдааны танхимд хийсэн шүүх хуралдаанаар

 

Хүсэлт гаргагч: Улаанбаатар хот, Баянзүрх дүүрэг, 10 дугаар хороо, 2А хэсэг, 15-2 тоот хаягт оршин суух, Цэнгэлт овогт Алтанхуягийн Мөнх-Эрдэнэ /регистрийн дугаар УП89090579/-ийн нэхэмжлэлтэй,

 

Цэнд-Аюушийн Гүрбазар /регистрийн дугаар ПЭ86123119/-ыг эрэн сурвалжлуулах тухай хүсэлттэй иргэний хэргийг хянан хэлэлцэв.

 

Шүүх хуралдаанд: нэхэмжлэгч А.Мөнх-Эрдэнэ, шүүх хуралдааны нарийн бичгийн дарга М.Золзаяа нар оролцов.

 

ТОДОРХОЙЛОХ нь:

 

Нэхэмжлэгч А.Мөнх-Эрдэнэ шүүхэд гаргасан нэхэмжлэл болон шүүх хуралдаанд гаргасан тайлбартаа: Миний бие 2016 оны 3 дугаар сард өрхийн хэрэглээний газар худалдаж авах зорилгоор Баянзүрх дүүргийн газрын албаны хажууд “Red line of land” ХХК-ийн нэр дээр кадастрын зураг гаргадаг Цэнд-Аюуш овогтой Гүрбазартай холбогдож, Баянзүрх дүүргийн 11 дүгээр хороо, Баянзүрхийн товчоо Ургах наран хорооллын баруун талд хоосон газар байгаа, ямар ч асуудалгүй, бичиг баримт нь бүрэн, бүгд хэвийн гарна гэж надад хэлсний үндсэн дээр эхнэр болох А.Оюунтүлхүүрийн хамт 2 айлын өрхийн хэрэглээний 0,007 га газрыг тус бүрийн үнийг 2 сая төгрөг хэмээн тохиролцон 4 сая төгрөг өгөхөөр тохиролцсон. Тухайн үед тохирсон газрын худалдаж авахын тулд нийт мөнгөн дүнгийн 2,5 сая төгрөг урьдчилгаа болгон худалдах, худалдан авах гэрээ байгуулаагүй, миний эхнэрийн найзын нөхөр нь гэсэн үндэслэлээр итгэж би “нэт капитал” ББСБ-д өндөр хүүтэй зээл, өөрийн машинаа барьцаалан авч, Ц.Гүрбазарт 4 дүгээр сарын хоёр дахь 7 хоногт өөрийн болон эхнэрийн иргэний үнэмлэхийн хамт “Hummer H2” маркийн өөрийнх нь унадаг машин дотор нь өгсөн. Үүнээс хойш 8 сард газар бүтэхээргүй болсон шүү гэж надад хэлэхэд за тэгвэл мөнгөө авъя гэхэд удахгүй өгнө гэж хэлчихээд өдийг хүртэл зугатаж, барьж байсан дугаараа сольж, ажилдаа ирэхгүй болсон. Уг газрыг анхнаасаа бүтэхгүй гэдгийг мэдсээр байж намайг залилж сураггүй болсон.  Үүнд гомдолтой байсан тул Баянзүрх дүүргийн Цагдаагийн хэлтэст гомдол гаргахад хөөн хэлэлцэх хугацаа дууссан гэж 2017 оны 02 дугаар сарын 13-ны өдөр эрүүгийн хэрэг үүсгэхээс татгалзсан. Баянзүрх дүүргийн Иргэний хэргийн анхан шатны шүүхэд нэхэмжлэл гаргасан боловч хариуцагчийн оршин суух газар тодорхой бус гэх үндэслэлээр хэргийг 2017 оны 3 дугаар сарын 06-ны өдөр хэрэгсэхгүй болгосон. Иймд Ц.Гүрбазарыг эрэн сурвалжилж өгнө үү гэв.

 

Шүүх хуралдаанаар нэхэмжлэгчийн нэхэмжлэл, хэрэгт авагдсан бичгийн нотлох баримтуудыг шинжлэн судлаад

  

ҮНДЭСЛЭХ нь:

 

Нэхэмжлэгч А.Мөнх-Эрдэнэ нь 3,000,000  төгрөг гаргуулах тухай иргэний хэрэгт хариуцагчаар оролцвол зохих этгээд болох Цэнд-Аюушийн Гүрбазар /регистрийн дугаар ПЭ86123119/-ыг эрэн сурвалжлуулах тухай хүсэлтийг гаргажээ.

 

Нэхэмжлэгчийн шүүхэд гаргасан нэхэмжлэл болон Эрүүгийн хэрэг үүсгэхээс татгалзах тухай Баянзрүх дүүргийн прокурорын газрын прокурорын 2017 оны 02 дугаар сарын 13-ны өдрийн 1140 дүгээр тогтоол, хэргийг хэрэгсэхгүй болгох тухай Баянзүрх дүүргийн Иргэний хэргийн анхан шатны шүүхийн шүүгчийн 2017 оны 3 дугаар сарын 06-ны өдрийн 4246 дугаар захирамж зэргээс үзэхэд Ц.Гүрбазарыг иргэний эрх зүйн маргаанд хариуцагчаар оролцвол зохих этгээд гэж үзнэ.

 

Ц.Гүрбазарын оршин суугаа хаяг нь тодорхойгүй байгаа болох нь Баянзүрх дүүргийн Иргэний хэргийн анхан шатны шүүхийн шүүгчийн 2017 оны 3 дугаар сарын 06-ны өдрийн 4246 дугаар захирамжаар тодорхойлогдож байна.

 

Иймд Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.1, 155.4-т заасны дагуу Цэнд-Аюушийн Гүрбазар /регистрийн дугаар ПЭ86123119, эрэгтэй/-ыг эрэн сурвалжилж, оршин суугаа хаягийг нь тогтоох ажиллагааг Цагдаагийн байгууллагаар гүйцэтгүүлэх нь зүйтэй гэж үзэв.

 

Иргэний хэрэг шүүхэд хянан шийдвэрлэх тухай хуулийн 155 дугаар зүйлийн 155.3, 115 дугаар зүйлийн 115.2.1, 116, 118 дугаар зүйлүүдийг удирдлага болгон

 

 

ТОГТООХ нь:

 

1. Иргэний хэрэг шүүхэд хянан шийдвэрлэх тухай хуулийн 133 дугаар зүйлийн 133.1.9 дэх хэсэгт заасныг баримтлан, Цэнд-Аюушийн Гүрбазар /регистрийн дугаар ПЭ86123119, эрэгтэй/-ыг эрэн сурвалжилсугай.

 

1. Цэнд-Аюушийн Гүрбазарыг эрэн сурвалжилж, оршин байрлах газрын хаягийг тогтоох ажиллагааг хийж гүйцэтгэхийг Баянзүрх дүүргийн Цагдаагийн 1, 2, 3 дугаар хэлтэст даалгасугай.

 

1. Иргэний хэрэг шүүхэд хянан шийдвэрлэх тухай хуулийн 59 дугаар зүйлийн 59.1, Улсын тэмдэгтийн хураамжийн тухай хуулийн 7 дугаар зүйлийн 7.1.2-т зааснаар нэхэмжлэгчээс улсын тэмдэгтийн хураамжид 2017 оны 3 дугаар сарын 17-ны өдөр урьдчилан төлсөн 70,200 төгрөгийг улсын орлогод хэвээр үлдээсүгэй  .

 

1. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2 дахь хэсэгт зааснаар шийдвэр танилцуулан сонсгомогц хүчинтэй болох тул Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2 дахь хэсэгт зааснаар зохигч энэхүү шийдвэрийг эс зөвшөөрвөл шийдвэрийг гардаж авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны дугаар шүүхэд давж заалдах гомдол гаргах эрхтэйг дурдсугай.

 

 

 

 

ДАРГАЛАГЧ, ШҮҮГЧ                                Б.УНДРАА