МОНГОЛ УЛСЫН НЭРИЙН ӨМНӨӨС

 

 

            Хэнтий аймгийн Бор-Өндөр сум дахь Сум дундын шүүхийн эрүүгийн шүүх хуралдааныг шүүгч С.Байгальмаа даргалж тус шүүх хуралдааны “А” танхимд  хийсэн шүүх хуралдаанд:

            Улсын яллагч П.Эрдэнэбаатар

            Шүүгдэгч М.Эрдэнэбаатар

            Шүүгдэгчийн өмгөөлөгч Г.Ганбадрах

            Шүүх хуралдааны нарийн бичгийн дарга Б.Туяа нарыг оролцуулан нээлттэй хийсэн шүүх хуралдаанаар:

            Хэнтий аймгийн Бор-Өндөр дэх сум, Сум дундын Прокурорын газраас Эрүүгийн хуулийн тусгай ангийн 98 дугаар зүйлийн 98.1 дэх хэсэгт зааснаар яллах дүгнэлт үйлдэж ирүүлсэн Олхонууд овогт Мягмарын Эрдэнэбаатарт холбогдох эрүүгийн 201623010016 тоот хэргийг 2016 оны 07 сарын 01-ний өдөр хүлээн авч хянан хэлэлцэв.

             Шүүгдэгч: Монгол улсын иргэн, 1977 оны 09 сарын 03-ны өдөр Дархан-Уул аймгийн Дархан суманд төрсөн, 39 настай, эрэгтэй, халх, тусгай дунд боловсролтой, цахилгаанчин, хийн гагнуурчин мэргэжилтэй, “Баян тэгш” ХХК-ийн Хажуу улааны уурхайд ковшийн операторчин ажилтай, ам бүл 3, эхнэр охины хамт Улаанбаатар  хот Налайх дүүрэг 4-р хороо Дэнжийн 4-296 тоотод оршин суух, улсаас авсан гавьяа шагналгүй, ял шийтгэлгүй, хэрэг хариуцах чадвартай, Олхонууд овогт Мягмарын Эрдэнэбаатар /РД:ТЗ77090310/

Шүүгдэгч М.Эрдэнэбаатар нь 2016 оны 02 сарын 08-ны өдөр Хэнтий аймгийн Дархан сумын 3-р багийн нутаг дэвсгэрт үйл ажиллагаа явуулдаг “Баян тэгш” ХХК-ийн Хажуу улааны уурхайн байшин дотор согтуугаар иргэн Д.Цэнд-Очирыг зодож биед нь хүндэвтэр гэмтэл санаатай учруулсан гэмт хэрэгт холбогджээ.     

                                                                     ТОДОРХОЙЛОХ нь:

Шүүгдэгч М.Эрдэнэбаатарын мөрдөн байцаалтын шатанд болон шүүхийн хэлэлцүүлэгт өгсөн “...Би Хэнтий аймгийн Дархан сумын 3 дугаар багийн нутаг дэвсгэрт үйл ажиллагаа явуулдаг “Баян тэгш” ХХК-ийн хажуу улааны уурхайд ковшийн операторчин хийдэг. Цагаан сар болох гээд манай уурхайн ажилчид ийш, тийшээ яваад би ганцаараа уурхайгаа сахиад үлдсэн. 2016 оны 02 сарын 08-ны өдөр намайг уурхай дээрээ ганцаараа байхад манай уурхайд ажилладаг Лхагва-Эрдэнэ, Анхбаяр нар нь үдийн өмнө уурхай дээр ирсэн. Лхагва-Эрдэнэ, Анхбаяр нар уурхай дээр ирээд унтаж амарсан. Лхагва-Эрдэнэ, Анхбаяр нарыг унтаж амраад байж байхад манай уурхай дээр манай уурхайн ойролцоо байдаг уурхайд ажилладаг Ганбаяр, Мурат, Цэнд-Очир гурав 1 шил 0.75-н ерөөл нэртэй архитай ирсэн. Тэгээд бид дөрөв архиа ууж дуусгаад Ганбаяр, Мурат, Цэнд-Очир гурав манай уурхайгаас явсан, тэгээд намайг уурхай дээрээ байж байхад Ганбаяр манай уурхай дээр дахиад ирсэн. Тэгээд Ганбаяр бид хоёр манай уурхайн ойр хавиар нилээн явж байгаад би буцаад уурхай дээрээ ирээд уурхайн байшин руугаа ороход Лхагва-Эрдэнэ, Анхбаяр нар зурагт үзээд байж байсан. Харин Цэнд-Очир манай уурхайн байшин дотор үүдний угаалтуур налаад хөлөө жийгээд сууж байсан. Тэгээд би Цэнд-Очирын шээсийг нь анзааралгүй хажуугаар нь яваад л байсан. Цэнд-Очирын хажуугаар нэг явж байхад Цэнд-Очир өмдөндөө шээчихсэн байхыг нь анзаараад би хөлөөрөө Цэнд-Очирын хөл рүү нь 2-3 удаа өшиглөсөн. Тэгэхэд Цэнд-Очир сэрээд ирэхээр нь би бүүр сэргээх гээд шанаганд ус хутгаад нүүр лүү нь цацсан. Цэнд-Очир сэргээд босож ирээд над руу агсраад байхаар нь би Цэнд-Очирын мөр лүү нь гараараа нэг удаа цохисон. Тэгэхэд Цэнд-Очир хойшоогоо гараараа угаалтуур цохиод  уначихсан. Тэгээд Цэнд-Очир уначингуутаа надруу дайрч давшилаад байхаар нь би Цэнд-Очирыг 2-3 удаа түлхэж унагаасан. Цэнд-Очир надад түлхүүлж 2-3 унахдаа угаалтуур цохиод унаад байсан. Би бодохдоо надад түлхүүлж угаалтуур цохиж унахдаа л гараа хугалчихсан байх гэж бодож байгаа юм. Тэгээд Цэнд-Очир надад агсам согтуу тавьж байгаад манай уурхайн байшингаас гараад явсан. Тухайн үед Цэнд-Очир маш их согтолттой байсан. Харин биеэ аваад явчих чадвар байсан үгүйг нь сайн хэлж мэдэхгүй байна. Миний бодлоор Цэнд-Очир тасарчихсан байсан байх гэж бодож байна....Цэнд-Очир гар хөл нь хөлдсөн гээд байсан нь миний бодлоор манай уурхайн байшингаас гарч байгаад өөрөө гадаа унтаж байгаад л гар, хөлөө хөлдөөсөн байх гэж бодож байна. Би үйлдсэн гэмт хэрэгтээ маш их гэмшиж байна. Ахиж ийм алдаа дутагдал хэзээ ч гаргахгүй гэдгээ амлаж байна. Би хохирол төлбөрөө барагдуулсан” гэсэн мэдүүлэг /хх 34-35-р хуудас/.

Хохирогч Д.Цэнд-Очирын мөрдөн байцаалтын шатанд өгсөн “Би 2016 оны 02 сарын 08-ны өдөр Хэнтий аймгийн Дархан сумын 3 дугаар багийн нутаг дэвсгэрт байрлах “Хажуу улаан” гэх газарт Тогоо гэх хүний жоншны нөхөрлөл дээр ажиллахаар Бор-Өндөр сумаас Жагдаг гэх хүний хамт явсан....Тэгээд би Тогоо гэх хүний жоншны нөхөрлөл дээр ажиллаж байгаад Бор-Өндөр сумаас авч ирсэн 1 шил 0.75-н ерөөл нэртэй архиа аваад зүүн урд талд ойрхон байдаг “Баян тэгш” ХХК-ийн жоншны уурхай дээр очиход Эрдэнэбаатар гэх залуу ганцаараа уурхайн байшин дотроо байж байсан. Гаднаас Мурат, Ганбаяр хоёр  ороод ирсэн. Тэгэхээр нь би ч гэсэн авч явж байсан 1 шил 0.75-н ерөөл нэртэй архиа гаргаад Эрдэнэбаатар, Мурат, Ганбаяр бид дөрөв хувааж уусан. Архиа ууж дуусахад Мурат, Ганбаяр хоёр яваад өгсөн. Би нээх удалгүй Мурат, Ганбаяр хоёрын араас гадагшаа гараад уурхайн байшингийнх нь хаалганы урд талд байсан падны урд бие засаад байж байхад Эрдэнэбаатар байшингаасаа гарч ирээд шууд надруу хувинтай ус цацсан. Тэгэхээр нь би Эрдэнэбаатарт хандан чи сар шинэ болж байхад хүн рүү яагаад хувинтай ус цацаж байгаа юм бэ, муу ёрын хэрэг шдээ гэхэд Эрдэнэбаатар надад хандан битгий хуцаад бай, чамайг алнаа гээд шууд гараараа миний нүүр лүү цохиж намайг газар унагаагаад дээрээс өшиглөж, цохиж зодоод байсан. Тэгээд байшингийнхаа үүдний хэсэгний орчмоос 1 мод авчраад намайг цохих гэхээр нь би модыг нь баруун гарын шууны хэсгээр хаасан. Тэгээд Эрдэнэбаатар намайг цохиж байгаад байшин руугаа ороод явчихсан. Би Эрдэнэбаатарт зодуулчихаад босоод явах гэсэн чинь толгой эргээд болохгүй байхаар нь уг газраа жоохон сууж байгаад явъя гэж бодож байгаад уг газраа унтаад өгсөн байна лээ. Тэгээд би ойролцоогоор 22-23 цагийн үед байх гэж бодож байна. Цагийг нь яг тодорхой санахгүй байна. Сэрээд уг газраасаа босож шууд Жагдагийн нөхөрлөл дээр очиход Жагдаг нөхөрлөл дээрээ байхгүй, ажилчид нь буюу Мурат, Ганбаяр хоёр л байж байсан. Тэгээд би Мурат, Ганбаяр хоёрт Эрдэнэбаатарт зодуулчихаад явж байгаа талаараа хэлэхэд Мурат, Ганбаяр хоёр надад хандан чамайг зоддог нь яаж байгаа юм бол доо гэж хэлж байсан.....Эрдэнэбаатар намайг уурхайн байшингийнхаа урд талд бие заслаа гээд л зодож цохисон байх гэж бодоод байгаа юм. Тэрнээс Эрдэнэбаатар бид хоёр архи ууж байхдаа хоорондоо маргалдаж муудалцсан зүйл байхгүй. Тухайн үед би бага зэргийн согтолттой байсан. 1 шил 0.75-ын ерөөл нэртэй архийг дөрвүүлээ хувааж уусан. Эрдэнэбаатар бага зэргийн согтолттой байсан. М.Эрдэнэбаатар миний биед учруулсан шүүх эмнэлгийн дүгнэлт дээр байгаа баруун шуу ясны дунд хэсгийн зөрүүтэй далд хугарал бүхий гэмтлийг учруулсан. Харин шүүх эмнэлгийн дүгнэлт дээр байгаа хөл, гар, хуруунуудын өнгөц хөлдөлт бүхий гэмтэл нь би Эрдэнэбаатарт зодуулж цохиулсны улмаас  зодуулсан газраасаа босож явж чадахгүй байж байгаа уг газраа унтаад өгсөний улмаас миний биед учирсан. Иймд миний биед учруулсан гэмтлийг Эрдэнэбаатар учруулсан, өөр ямар нэгэн хүн миний биед гэмтэл учруулсан асуудал байхгүй” /хх 12-13/.

...Эрдэнэбаатар намайг 2-3 удаа хойшоо түлхэж цохисон. Би тэр тоолонд нь арын угаалтуурыг гар, нүүрээрээ цохиж унасан. Цаашаа юу болсон талаар сайн санахгүй байна. Маргааш өглөө нь үүрээр даарч сэрсэн чинь Эрдэнэбаатарын гэрийнх нь амбаарт унтчихсан байсан. Эрдэнэбаатар миний хохирлыг барагдуулж 150000 төгрөг өгсөн. Гомдол санал байхгүй /хх 15-16-р хуудас/.

Гэрч П.Анхбаярын мөрдөн байцаалтын шатанд өгсөн: “...2016 оны 02 сарын 05-ны өдөр уурхай дээрээсээ сум орохоор найз Лхагва-Эрдэнийн хамт явсан юм, тэгээд бид хоёр Бор-Өндөр суман дээр байж байгаад 2016 оны 02 сарын 07-ны өдөр уурхай дээрээ ирэхэд манай уурхай дээр Эрдэнэбаатар ах ганцаараа байж байсан. Бид хоёр 1 шил 0.75-ийн архитай очоод Эрдэнэбаатар ахад архи өгсөн. Тэгээд 2016 оны 02 сарын 08-ны өдөр Эрдэнэбаатар, Лхагва-Эрдэнэ бид гурвыг уурхайн байрандаа байж байхад гаднаас Цэнд-Очир, Мурат, Ганбаяр нар ороод ирсэн. Тэд нар орж ирэхдээ согтуу байсан. Тэгээд Эрдэнэбаатар, Цэнд-Очир, Ганбаяр, Мурат нар бид хоёрын авчирч өгсөн архийг хувааж уусан. Тэгээд архиа дуусгаад Цэнд-Очир, Мурат, Ганбаяр нар 17 цаг өнгөрч байх үед хойшоо Тогоо гэдэг хүний ажиллуулдаг жоншны газар очиж архи шаналгаж уунаа гэж ярилцаад явсан. Гэрт Эрдэнэбаатар ах бид гурав үлдсэн. Араас нь Эрдэнэбаатар ах гадагшаа гарсан юм шиг байна лээ, нэг харахад Эрдэнбаатар ах гадагшаа гарчихсан байсан, би Эрдэнэбаатар ахыг гадагшаа гарсаныг анзаараагүй байсан юм, тэгээд Лхагва-Эрдэнэ бид хоёрыг уурхайн байран дээрээ байж байхад ойролцоогоор 20 цагийн үед байх гэж бодож байна, гаднаас Цэнд-Очир орж ирээд Лхагва-Эрдэнэ бид хоёрыг харж байгаад угаалтуурыг налаад газар сууж байгаад унтаад өгсөн байсан. Цэнд-Очирыг орж ирсэний дараа нээх удаагүй байх гэж бодож байна, араас нь гаднаас Эрдэнэбаатар ах ороод ирсэн, тэгээд Эрдэнэбаатар ах гаднаас орж ирээд Цэнд-Очирын хөл рүү нь 2-3 удаа өшиглөж, шанагатай ус Цэнд-Очирын нүүрлүү нь цацаж сэрээсэн. Тэгээд Цэнд-Очирыг сэрэхээр нь Эрдэнэбаатар ах Цэнд-Очирт хандан чи яагаад шээж байгаа юм бэ, энэ чинь муучгүй гал голомт юм байгаа биз дээ пизда минь гэж хэлсэн. Тэгэхэд Цэнд-Очир нь би яахаараа айлд шээдэг юм, шээгээгүй гэж хэлж байсан. Тэгээд Цэнд-Очир босож ирээд Эрдэнэбаатар, Цэнд-Очир хоорондоо маргалдаж муудалцсан. Тэгэхэд Эрдэнэбаатар ах Цэнд-Очирыг 2-3 түлхсэн. Тэгэхэд Цэнд-Очир нь угаалтуур налаад хойшоо унаад байсан. Тэгээд Эрдэнэбаатар ах Цэнд-Очирт хандан гарч зайл муу пизда минь гээд байрнаасаа хөөгөөд гаргасан. Тэгэхэд Цэнд-Очир нь Эрдэнэбаатарт хандан чамайг буцаж ирж байгаад алнаа гэж хэлж байсан...Тухайн үед Лхагва-Эрдэнэ бид хоёр Эрдэнэбаатар ахыг гаднаас орж ирэхээс өмнө Цэнд-Очирыг шээснийг мэдээгүй байсан юм. Тэгээд Эрдэнэбаатар ахыг орж ирсэний дараа Цэнд-Очирыг харахад Цэнд-Очирын өмднийх нь хоёр цавьны хэсэг, бөгсний хэсэг зэрэг нь шээс болчихсон, суугаад унтаж байсан. Газар шээс нь туначихсан байдалтай байсан” гэсэн мэдүүлэг /хх 17-р хуудас/

Гэрч К.Муратын мөрдөн байцаалтын шатанд өгсөн: “...2016 оны 02 сарын 08-ны өдөр шиг санагдаж байна, би тухайн үед хамт ажиллаж байсан П.Ганбаяр гэх залуугийн хамт нөхөрлөлийнхөө ойр орчмоор явж байгаад Цэнд-Очиртой таарсан юм, тэгээд бид гурав 1 шил 0.75-н ерөөл нэртэй архийг хувааж уусан бөгөөд уг архиа ууж дуусгачихаад Эрдэнэбаатар гэх залуугийн ажилладаг уурхай дээр очиж 1 шил 0.75-н ерөөл нэртэй архи хувааж уусан. Тэгээд архиа ууж дуусаад Ганбаяр, Цэнд-Очир бид гурав ойролцоогоор 17 цагийн үе байсан байх гэж бодож байна, харин Эрдэнэбаатар нь уурхай дээрээ үлдсэн юм. Тэгээд Ганбаяр, Цэнд-Очир бид гурав Эрдэнэбаатарын ажилладаг уурхайгаас нь гарч яваад ойролцоо байдаг Тогоо гэх хүний нөхөрлөл дээр очиж архи уусан юм. Тэгээд би цааш нь юу болсон талаар санахгүй байна” гэсэн мэдүүлэг /хх-ийн 22-р хуудас/.

Хэнтий аймгийн Шүүхийн шинжилгээний албаны 2016 оны 03 сарын 23-ны өдрийн № 90 тоот дүгнэлтэнд:

1.Д.Цэнд-Очирын биед баруун шуу ясны дунд хэсгийн зөрүүтэй далд хугарал, хөл, гарын хуруунуудын өнгөц хөлдөлт бүхий гэмтэл тогтоогдлоо.

2.Дээрх гэмтэл нь мохоо хүчин зүйлийн 1 удаагийн үйлчлэлээр үүсгэгдэх боломжтой.

3.Дээрх гэмтэл нь шүүх эмнэлгийн гэмтлийн зэрэг тогтоох журмын 2.3.1-д зааснаар эрүүл мэндийг удаан хугацаагаар сарниулах тул гэмтлийн хүндэвтэр зэрэгт хамаарна.

4.Дээрх гэмтэл нь ерөнхий хөдөлмөрийн чадвар үлэмж хэмжээгээр буюу 15% алдагдана гэжээ.

Шүүгдэгч М.Эрдэнэбаатар нь дээрх гэмт хэргийг үйлдсэн болох нь Монгол Улсын Эрүүгийн байцаан шийтгэх хуулийн 79 дүгээр зүйлийн 79.1 дэх хэсэгт зааснаар гэмт хэргийн нөхцөл байдлын талаар хуульд заасан үндэслэл журмын дагуу буюу мөн хуулийн 92, 93 дугаар зүйлд заасан нотлох баримтыг цуглуулах, бэхжүүлэх журмын дагуу олж авсан, шүүхээс хэргийг шийдвэрлэхэд хамааралтай гэж бүхэлд нь үнэлсэн нотлох баримтууд болох шүүгдэгч М.Эрдэнэбаатарын мөрдөн байцаалтын шатанд болон шүүхийн хэлэлцүүлэгт өгсөн “...Би Хэнтий аймгийн Дархан сумын 3 дугаар багийн нутаг дэвсгэрт үйл ажиллагаа явуулдаг “Баян тэгш” ХХК-ийн хажуу улааны уурхайд ковшийн операторчин хийдэг. Цагаан сар болох гээд манай уурхайн ажилчид ийш, тийшээ яваад би ганцаараа уурхайгаа сахиад үлдсэн. 2016 оны 02 сарын 08-ны өдөр намайг уурхай дээрээ ганцаараа байхад манай уурхайд ажилладаг Лхагва-Эрдэнэ, Анхбаяр нар нь үдийн өмнө уурхай дээр ирсэн. Лхагва-Эрдэнэ, Анхбаяр нар уурхай дээр ирээд унтаж амарсан. Лхагва-Эрдэнэ, Анхбаяр нарыг унтаж амраад байж байхад манай уурхай дээр манай уурхайн ойролцоо байдаг уурхайд ажилладаг Ганбаяр, Мурат, Цэнд-Очир гурав 1 шил 0.75-н ерөөл нэртэй архитай ирсэн. Тэгээд бид дөрөв архиа ууж дуусгаад Ганбаяр, Мурат, Цэнд-Очир гурав манай уурхайгаас явсан, тэгээд намайг уурхай дээрээ байж байхад Ганбаяр манай уурхай дээр дахиад ирсэн. Тэгээд Ганбаяр бид хоёр манай уурхайн ойр хавиар нилээн явж байгаад би буцаад уурхай дээрээ ирээд уурхайн байшин руугаа ороход Лхагва-Эрдэнэ, Анхбаяр нар зурагт үзээд байж байсан. Харин Цэнд-Очир манай уурхайн байшин дотор үүдний угаалтуур налаад хөлөө жийгээд сууж байсан. Тэгээд би Цэнд-Очирын шээсийг нь анзааралгүй хажуугаар нь яваад л байсан. Цэнд-Очирын хажуугаар нэг явж байхад Цэнд-Очир өмдөндөө шээчихсэн байхыг нь анзаараад би хөлөөрөө Цэнд-Очирын хөл рүү нь 2-3 удаа өшиглөсөн. Тэгэхэд Цэнд-Очир сэрээд ирэхээр нь би бүүр сэргээх гээд шанаганд ус хутгаад нүүр лүү нь цацсан. Цэнд-Очир сэргээд босож ирээд над руу агсраад байхаар нь би Цэнд-Очирын мөр лүү нь гараараа нэг удаа цохисон. Тэгэхэд Цэнд-Очир хойшоогоо гараараа угаалтуур цохиод  уначихсан. Тэгээд Цэнд-Очир уначингуутаа надруу дайрч давшилаад байхаар нь би Цэнд-Очирыг 2-3 удаа түлхэж унагаасан. Цэнд-Очир надад түлхүүлж 2-3 унахдаа угаалтуур цохиод унаад байсан. Би бодохдоо надад цохиулж угаалтуур мөргөж унаж байхдаа гараа хулгалсан байх гэж бодож байна. Үйлдсэн хэрэгтээ гэмшиж байна” гэсэн мэдүүлэг, гэрч П.Анхбаярын мөрдөн байцаалтанд өгсөн “...Тэгээд Цэнд-Очирыг сэрэхээр нь Эрдэнэбаатар ах Цэнд-Очирт хандан чи яагаад шээж байгаа юм бэ, энэ чинь муучгүй гал голомт юм байгаа биз дээ пизда минь гэж хэлсэн. Тэгэхэд Цэнд-Очир нь би яахаараа айлд шээдэг юм, шээгээгүй гэж хэлж байсан. Тэгээд Цэнд-Очир босож ирээд Эрдэнэбаатар, Цэнд-Очир хоорондоо маргалдаж муудалцсан. Тэгэхэд Эрдэнэбаатар ах Цэнд-Очирыг 2-3 түлхсэн. Тэгэхэд Цэнд-Очир нь угаалтуур налаад хойшоо унаад байсан. Тэгээд Эрдэнэбаатар ах Цэнд-Очирт хандан гарч зайл муу пизда минь гээд байрнаасаа хөөгөөд гаргасан. Тэгэхэд Цэнд-Очир нь Эрдэнэбаатарт хандан чамайг буцаж ирж байгаад алнаа гэж хэлж байсан...Тухайн үед Лхагва-Эрдэнэ бид хоёр Эрдэнэбаатар ахыг гаднаас орж ирэхээс өмнө Цэнд-Очирыг шээснийг мэдээгүй байсан юм. Тэгээд Эрдэнэбаатар ахыг орж ирсэний дараа Цэнд-Очирыг харахад Цэнд-Очирын өмднийх нь хоёр цавьны хэсэг, бөгсний хэсэг зэрэг нь шээс болчихсон, суугаад унтаж байсан. Газар шээс нь туначихсан байдалтай байсан” гэсэн мэдүүлэг /хх 17-р хуудас/, Хэнтий аймгийн Шүүхийн шинжилгээний албаны 2016 оны 03 сарын 23-ны өдрийн № 90 тоот дүгнэлтэнд:  

1.Д.Цэнд-Очирын биед баруун шуу ясны дунд хэсгийн зөрүүтэй далд хугарал, хөл, гарын хуруунуудын өнгөц хөлдөлт бүхий гэмтэл тогтоогдлоо.

2.Дээрх гэмтэл нь мохоо хүчин зүйлийн 1 удаагийн үйлчлэлээр үүсгэгдэх боломжтой.

3.Дээрх гэмтэл нь шүүх эмнэлгийн гэмтлийн зэрэг тогтоох журмын 2.3.1-д зааснаар эрүүл мэндийг удаан хугацаагаар сарниулах тул гэмтлийн хүндэвтэр зэрэгт хамаарна.

4.Дээрх гэмтэл нь ерөнхий хөдөлмөрийн чадвар үлэмж хэмжээгээр буюу 15% алдагдана гэсэн дүгнэлт зэрэг хэрэгт цугларсан нотлох баримуудаар шүүгдэгч М.Эрдэнэбаатарын үйлдсэн хэрэг нь тогтоогдож байна гэж үзлээ.

Шүүгдэгч М.Эрдэнэбаатар нь анх удаа хүндэвтэр гэмт хэрэг үйлдсэн, үйлдсэн хэрэгтээ гэмшиж байгаа хохирол төлбөрөө сайн дураараа нөхөн төлсөн зэрэг байдлууд нь түүнд хүлээлгэх хариуцлагыг хөнгөрүүлэн үзэх үндэслэл болно.

 

Монгол улсын Эрүүгийн байцаан шийтгэх хуулийн

283, 284, 286, 290 дүгээр зүйлийн 290.3, 294-298 дугаар зүйлүүдэд

заасныг удирдлага болгон ТОГТООХ НЬ:

 

1. Шүүгдэгч Олхонууд овогт Мягмарын Эрдэнэбаатарыг Эрүүгийн хуулийн 98 дугаар зүйлийн 98.1 дэх хэсэгт зааснаар бусдын бие махбодид хүндэвтэр гэмтэл санаатай учруулсан гэмт хэргийг үйлдсэн гэм буруутайд тооцсугай.
2. Монгол Улсын Эрүүгийн хуулийн 98 дугаар зүйлийн 98.1 дэх хэсэгт зааснаар Мягмарын Эрдэнэбаатарыг 1 жил 6 сарын хугацаагаар хорьж шийтгэсүгэй.
3. Монгол Улсын Эрүүгийн хуулийн 52 дугаар зүйлийн 52.5 дахь хэсэгт зааснаар шүүгдэгч Мягмарын Эрдэнэбаатарт оногдуулсан 1 жил 6 сарын хорих ялыг жирийн дэглэмтэй эрэгтэйчүүдийн хорих ангид эдлүүлсүгэй.
4. Эрүүгийн байцаан шийтгэх хуулийн 88 дугаар зүйлийн 88.1.7 дахь хэсэгт зааснаар шийтгэх тогтоол хүчин төгөлдөр болмогц эд мөрийн баримтаар хураагдаж ирсэн хохирогч Д.Цэнд-Очирын баруун гарын рентген зургийг Д.Цэнд-Очирт буцаан олгосугай.
5. Шүүгдэгч М.Эрдэнэбаатар нь энэ хэргийн улмаас цагдан хоригдоогүй, бусдад төлөх төлбөргүй, түүний иргэний бичиг баримт нь шүүхэд ирээгүй, хэрэгт битүүмжлэгдсэн эд хөрөнгө байхгүй болохыг дурдсугай. 
6. Монгол улсын Эрүүгийн хуулийн 61 дүгээр зүйлийн 61.1 дэх хэсэгт зааснаар шүүгдэгч М.Эрдэнэбаатар оногдуулсан 1 жил 6 сарын хорих ялыг биечлэн эдлүүлэх шаардлагагүй гэж үзэж тэнсэж хянан харгалзах хугацааг 1 жилээр тогтоож, хууль тогтоомжийн дагуу хяналт тавьж ажиллахыг Улаанбаатар хот Налайх дүүргийн Цагдаагийн хэлтэст даалгасугай.
7. Монгол Улсын Эрүүгийн байцаан шийтгэх тухай хуулийн 70 дугаар зүйлийн 70.1 дэх хэсэгт зааснаар шийтгэх тогтоол хүчин төгөлдөр болтол шүүгдэгч М.Эрдэнэбаатарт урьд авсан батлан даалтанд байлгах таслан сэргийлэх арга хэмжээг хэвээр үргэлжлүүлсүгэй.

      8.Шүүхийн шийтгэх тогтоол танилцуулан сонсгосноор хүчинтэй болох бөгөөд тогтоолыг эс зөвшөөрвөл тогтоол гардуулснаас хойш 14 хоногийн дотор Хэнтий аймгийн Эрүү, Иргэний давж заалдах шатны шүүхэд ялтан, хохирогч, тэдний өмгөөлөгч нар давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

 

 

       ДАРГАЛАГЧ                                     С.БАЙГАЛЬМАА