Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Ховд аймаг дахь Сум дундын иргэний хэргийн анхан шатны шүүхийн шүүгч С.Оюунжаргал би

Нэхэмжлэгч: Ховд аймгийн ******* сумын Засаг дарга

Хариуцагч: Ховд аймгийн ******* сумын ******* багт оршин суух, ******* ******* /*******/-д холбогдох

Сум хөгжүүлэх сангаас олгосон үндсэн зээл 8,000,000 төгрөг, зээлийн хүү 369,000 төгрөг, алданги 560,000 төгрөг, нийт 8,929,000 /найман сая есэн зуун хорин есэн мянга/ төгрөг гаргуулах тухайнэхэмжлэлийг 2017 оны 6 дугаар сарын 19-ний өдөр хүлээн авч, 153/2017/00360/и дугаар индекстэй иргэний хэрэг үүсгэн хянаад

 

ТОДОРХОЙЛОХ нь:

Нэхэмжлэгч Ховд аймаг ******* сумын Засаг дарга шүүхэд гаргасан нэхэмжлэлдээ: Ц.******* нь 2013 оны 3 дугаар сарын 21-ний өдөр Ховд аймгийн ******* сумын Засаг даргын зөвлөл, түүнийг төлөөлж засаг дарга Д.*******тай Сум хөгжүүлэх сангийн зээлийн болон барьцааны гэрээг 36 сарын хугацаатай жилийн хувийн сарын 3 хувийн сарын 0,25 хувийн хүүтэйгээр 10,000,000 төгрөгийг зээлсэн бөгөөд зээлийн болон барьцааны эргэн төлөлтийн хуваарийн дагуу үндсэн зээл 2,000,000 төгрөг, хүү 306,000 төгрөг, нийт 2,306,000 төгрөгийг төлсөн. 2017 оны 06 дугаар сарын 02-ны өдөр хүртэл гэрээнд заасан үүргээ бүрэн гүйцэт биелүүлээгүй байна. Зээлийн болон барьцааны гэрээний 2.4-д хугацаа хэтэрснээс хойш 0,5 хувийн алданги тооцно гэж засны дагуу гэрээ дуусгавар болох хугацаа буюу 2016 оны 3 дугаар сарын 21-ний өдрөөс 2017 оны 5 дугаар сарын 21-ний өдөр хүртэл 14 сарын хугацаа хэтэрсэн байна. Иймд сум хөгжүүлэх сангаас Эсгий үйлдвэрлэл ажиллуулах зорилгоор авсан үндсэн зээл 8,000,000 төгрөг, хүү 369,000 төгрөг, алданги 560,000 төгрөг, нийт 8,929,000 төгрөгийг Ц.*******аас гаргуулж өгнө үү гэжээ.

Хариуцагч Ц.******* шүүхэд ирүүлсэн тайлбартаа: Ховд аймгийн ******* сумын Сум хөгжүүлэх сангаас зээл авсан. Сум хөгжүүлэх сангаас авсан үндсэн зээл 8,000,000 төгрөг, хүү 369,000 төгрөг, алданги 560,000 төгрөг, бүгд 8,929,000 төгрөгийг төлнө. Татгалзах зүйлгүй зөвшөөрч байна гэжээ.

Нэхэмжлэгчийн төлөөлөгч Ховд аймгийн Прокурорын газрын хяналтын прокурор А.******* шүүхэд ирүүлсэн тайлбартаа: Ц.******* нь 8,929,000 төгрөгөө төлхөө илэрхийлсэн тул хэргийг хялбаршуулсан журмаар шийдвэрлэж өгнө үү гэжээ.

 

ҮНДЭСЛЭХ нь:

Нэхэмжлэгч Ховд аймгийн ******* сумын Засаг дарга нь Ц.*******д холбогдуулан Сум хөгжүүлэх сангаас олгосон үндсэн зээл 8,000,000 төгрөг, зээлийн хүү 369,000 төгрөг, алданги 560,000 төгрөг, нийт 8,929,000 /найман сая есэн зуун хорин есэн мянга/ төгрөг гаргуулах тухай нэхэмжлэлийн шаардлагыг шүүхэд гаргажээ.

Хэрэг хянан шийдвэрлэх ажиллагааны явцад хариуцагч Ц.******* нь нэхэмжлэгчийн нэхэмжлэлийн шаардлага болох Сум хөгжүүлэх сангаас олгосон үндсэн зээл 8,000,000 төгрөг, зээлийн хүү 369,000 төгрөг, алданги 560,000 төгрөг, нийт 8,929,000 /найман сая есэн зуун хорин есэн мянга/ төгрөг төлөхийг зөвшөөрсөн тайлбарыг шүүхэд ирүүлсэн бөгөөд энэ нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул хариуцагчийн нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох нь зүйтэй байна.

Иргэний хэрэг шүүхэд хянан шийдвэрлэх тухай хуулийн 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч Ховд аймгийн ******* сумын Засаг дарга нь улсын тэмдэгтийн хураамж төлөхөөс чөлөөлөгддөг болохыг дурдаж, хариуцагч Ц.*******аас 8,929,000 /найман сая есэн зуун хорин есэн мянга/ төгрөгт төлөх улсын тэмдэгтийн хураамж 157,814 төгрөгийн тал хувь 78,907 төгрөгийг гаргуулж улсын орлогод оруулах нь зүйтэй гэж үзлээ.

Хариуцагч нь нэхэмжлэлийн шаардлагыг сайн дураар биелүүлэхгүй бол шийдвэр гүйцэтгэлийн журмаар албадан гүйцэтгэхийг дурдлаа.

 

Иргэний хэрэг шүүхэд хянан шийдвэрлэх тухай хуулийн 75 дугаар зүйл, 123 дугаар зүйлийн 123.1-д заасныг удирдлага болгон

ЗАХИРАМЖЛАХ нь:

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар нэхэмжлэгч Ховд аймгийн ******* сумын Засаг даргын нэхэмжлэлтэй хариуцагч Ц.*******д холбогдох Сум хөгжүүлэх сангаас олгосон үндсэн зээл 8,000,000 төгрөг, зээлийн хүү 369,000 төгрөг, алданги 560,000 төгрөг, нийт 8,929,000 /найман сая есэн зуун хорин есэн мянга/ төгрөг гаргуулах тухай нэхэмжлэлийн шаардлагыг хариуцагч Ц.******* төлөхийг зөвшөөрсөн хариуцагчийн зөвшөөрлийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч Ховд аймгийн ******* сумын Засаг дарга нь улсын тэмдэгтийн хураамж төлөхөөс чөлөөлөгддөг болохыг дурдаж, Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, Улсын тэмдэгтийн хураамжийн тухай 7 дугаар зүйлийн 7.1.1-д зааснаар хариуцагч Ц.*******аас 78,907 /далан найман мянга есэн зуун долоо/ төгрөг гаргуулж улсын орлогод оруулсугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч Ц.******* нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар зохигч энэ захирамжид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

ШҮҮГЧ С.ОЮУНЖАРГАЛ