Хариуцагчийн зөвшөөрлийг баталж,

хэргийг хэрэгсэхгүй болгох тухай

 

Ховд аймаг дахь Сум дундын иргэний хэргийн анхан шатны шүүхийн шүүгч С.Оюунжаргал би

Нэхэмжлэгч: Ховд аймгийн ******* сумын Засаг дарга

Хариуцагч: Ховд аймгийн ******* сумын ******* багт оршин суух, ******* овогт ******* ******* /*******/-д холбогдох

Сум хөгжүүлэх сангаас олгосон үндсэн зээл 5,000,000 төгрөг, зээлийн хүү 300,000 төгрөг, алданги 350,000 төгрөг, нийт 5,650,000 /таван сая зургаан зуун тавин мянга/ төгрөг гаргуулах тухай нэхэмжлэлийг 2017 оны 6 дугаар сарын 08-ны өдөр хүлээн авч, 153/2017/00325/и дугаар индекстэй иргэний хэрэг үүсгэн хянаад

 

ТОДОРХОЙЛОХ нь:

Нэхэмжлэгч Ховд аймаг ******* сумын Засаг дарга шүүхэд гаргасан нэхэмжлэлдээ: К.******* нь 2013 оны 03 дугаар сарын 21-ний өдөр Ховд аймгийн ******* сумын Засаг даргын зөвлөл, түүнийг төлөөлж засаг дарга Д.*******тай Сум хөгжүүлэх сангийн зээлийн болон барьцааны гэрээг 36 сарын хугацаатай жилийн 3 хувийн сарын 0,25 хувийн хүүтэйгээр 5,000,000 төгрөгийг зээлсэн бөгөөд 2017 оны 06 дугаар сарын 02-ны өдөр хүртэл гэрээнд заасан үүргээ биелүүлээгүй байна. Зээлийн болон барьцааны гэрээний 2.4-д хугацаа хэтэрснээс хойш 0,5 хувийн алданги тооцно гэж заасны дагуу гэрээ дуусгавар болох хугацаа буюу 2016 оны 03 дугаар сарын 21-ний өдрөөс 2017 оны 05 дугаар сарын 21-ний өдөр хүртэл 14 сарын хугацаа хэтэрсэн байна. Иймд сум хөгжүүлэх сангаас тахианы аж ахуй ажиллуулах зорилгоор авсан үндсэн зээл 5,000,000 төгрөг, хүү 300,000 төгрөг, алданги 350,000 төгрөг нийт 5,650,000 төгрөгийг гаргуулж өгнө үү гэжээ.

Хариуцагч К.******* шүүхэд ирүүлсэн тайлбартаа: К.******* миний бие нь ******* сумын сум хөгжүүлэх сангаас 5,000,000 төгрөгийг жилийн 3 хувийн хүүтэй, 36 сарын хугацаатай тахианы аж ахуй эрхлэх зорилгоор зээлдэж Улаанбаатар хотоос туршилтын журмаар цөөн тооны тахиа тээвэрлэн ирж туршихад боломжийн ашгаа өгмөөр болохоор нь Засаг дарга Д.*******тай тахианы байр, газрын талаар амаар тохиролцоо хийгээд нэм 200 тахиа Улаанбаатар хотоос тээвэрлэж ирсэн боловч өөрийн хөрөнгө мөнгөний бололцоо хомс, сумаас аман тохиолцоондоо хүрч байрны асуудал шийдвэрлэж өгөөгүйн улмаас өвөлжихөд хүндрэлтэй болж тахианууд их хэмжээгээр хорогдож эхэлсэн. Үлдэгдэл тахиагаа нядалж борлуулах гэсэн боловч өндөгний чиглэлийн тахианы махыг авдаггүй болохоор борлуулж чадаагүй юм. Ийм шалтгааны улмаас зээл эрсдэлд орсон юм. Нэгэнт авсан зээлээ төлөх нь үнэн болохоор сар бүрийн 15-нд 200,000 төгрөгөөр төлнө. Орлого илүү орох үед илүү төлнө гэжээ.

Нэхэмжлэгчийн төлөөлөгч Ховд аймгийн Прокурорын газрын хяналтын прокурор Ш.*******шүүхэд ирүүлсэн тайлбартаа: К.******* нь 5,650,000 төгрөгөө төлөхөө илэрхийлсэн тул хэргийг хялбаршуулсан журмаар шийдвэрлэж өгнө үү гэжээ.

ҮНДЭСЛЭХ нь:

Нэхэмжлэгч Ховд аймгийн ******* сумын Засаг дарга нь К.*******д холбогдуулан Сум хөгжүүлэх сангаас олгосон үндсэн зээл 5,000,000 төгрөг, зээлийн хүү 300,000 төгрөг, алданги 350,000 төгрөг, нийт 5,650,000 /таван сая зургаан зуун тавин мянга/ төгрөг гаргуулах тухай нэхэмжлэлийн шаардлагыг шүүхэд гаргажээ.

Хэрэг хянан шийдвэрлэх ажиллагааны явцад хариуцагч К.******* нь нэхэмжлэгчийн нэхэмжлэлийн шаардлага болох Сум хөгжүүлэх сангаас олгосон үндсэн зээл 5,000,000 төгрөг, зээлийн хүү 300,000 төгрөг, алданги 350,000 төгрөг, нийт 5,650,000 /таван сая зургаан зуун тавин мянга/ төгрөг төлөхийг зөвшөөрсөн тайлбарыг шүүхэд ирүүлсэн бөгөөд энэ нь бусдын эрх, эрх чөлөө, хуулиар хамгаалагдсан ашиг сонирхлыг хөндөөгүй, хуульд харшлаагүй байх тул хариуцагчийн нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох нь зүйтэй байна.

Иргэний хэрэг шүүхэд хянан шийдвэрлэх тухай хуулийн 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч Ховд аймгийн ******* сумын Засаг дарга нь улсын тэмдэгтийн хураамж төлөхөөс чөлөөлөгддөг болохыг дурдаж, хариуцагч К.*******аас 5,650,000 /таван сая зургаан зуун тавин мянга/ төгрөгт төлөх улсын тэмдэгтийн хураамж 105,350 төгрөгийн тал хувь 52,675 төгрөгийг гаргуулж улсын орлогод оруулах нь зүйтэй гэж үзлээ.

Хариуцагч нь нэхэмжлэлийн шаардлагыг сайн дураар биелүүлэхгүй бол шийдвэр гүйцэтгэлийн журмаар албадан гүйцэтгэхийг дурдлаа.

 

Иргэний хэрэг шүүхэд хянан шийдвэрлэх тухай хуулийн 75 дугаар зүйл, 123 дугаар зүйлийн 123.1-д заасныг удирдлага болгон

ЗАХИРАМЖЛАХ нь:

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар нэхэмжлэгч Ховд аймгийн ******* сумын Засаг даргын нэхэмжлэлтэй хариуцагч К.*******д холбогдох Сум хөгжүүлэх сангаас олгосон үндсэн зээл 5,000,000 төгрөг, зээлийн хүү 300,000 төгрөг, алданги 350,000 төгрөг, нийт 5,650,000 /таван сая зургаан зуун тавин мянга/ төгрөг гаргуулах тухай нэхэмжлэлийн шаардлагыг хариуцагч К.******* төлөхийг зөвшөөрсөн хариуцагчийн зөвшөөрлийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 58 дугаар зүйлийн 58.3, Улсын тэмдэгтийн хураамжийн тухай хуулийн 41 дүгээр зүйлийн 41.1.3-т зааснаар нэхэмжлэгч Ховд аймгийн ******* сумын Засаг дарга нь улсын тэмдэгтийн хураамж төлөхөөс чөлөөлөгддөг болохыг дурдаж, Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5, Улсын тэмдэгтийн хураамжийн тухай 7 дугаар зүйлийн 7.1.1-д зааснаар хариуцагч К.*******аас 52,675 /тавин хоёр мянга зургаан зуун далан тав/ төгрөг гаргуулж улсын орлогод оруулсугай.

3.Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6-д зааснаар энэхүү захирамжийг хариуцагч К.******* нь сайн дураар биелүүлээгүй бол шүүхийн шийдвэрийн нэгэн адил албадан гүйцэтгэхийг мэдэгдсүгэй.

4.Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.4-д зааснаар зохигч энэ захирамжид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

ШҮҮГЧ С.ОЮУНЖАРГАЛ