МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

-шүүх хуралдааны нарийн бичгийн дарга Ж.Эрдэнэсувд

-улсын яллагчаар Э.Билгүүн

-шүүгдэгчийн мөгөөлөгч Э.Алтан-Уяа

     -шүүгдэгч Б.Б нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Б.Бд холбогдох эрүүгийн 2034000250123 дугаартай хэргийг 2020 оны 04 дүгээр сарын 02-ны өдөр хүлээн авч, 2020 оны 04 дүгээр сарын 27-ны өдөр хянан хэлэлцэв.

 

Шүүгдэгчийн биеийн байцаалт:

Холбогдсон хэргийн талаар /яллах дүгнэлтэд дурдагдсанаар/

Яллагдагч Б.Б нь 2019 оны 12 дугаар сарын 25-26-нд шилжих шөнө Төв аймгийн Баянцагаан сум Баян айрагт 2 дугаар багийн нутгаас иргэн Б.Алтанбаатарын 4 тооны үхэрийг бэлчээрээс нь хулгайлж, 6.500.000 төгрөгийн хохирол учруулсан гэмт хэрэгт холбогджээ.

 

ТОДОРХОЙЛОХ нь:

Шүүхийн хэлэлцүүлэгт:

Шүүгдэгч Б.Б: “Мөрдөн байцаалтын шатанд үнэн зөв мэдүүлэг өгсөн тул дахин мэдүүлэг өгөхгүй” гэв.

 

Шүүхийн хэлэлцүүлэгт яллах болон цагаатгах талуудаас дараах нотлох баримтыг шинжлэн судлав.

Үүнд:

Хэргийн газарт үзлэг хийсэн тэмдэглэл, дүрс бичлэгт үзлэг хийсэн тэмдэглэл, гэрэл зургийн үзүүлэлтүүд /хх-ийн 5-15 тал/, хохирогч Т.Алтанбаатарын мэдүүлэг /хх-ийн 19-20 тал/, гэрч Б.Батхуягийн мэдүүлэг /хх-ийн 24-25 тал/, гэрч Б.Саруултөгсийн мэдүүлэг /хх-ийн 34-35 тал/, гэрч Б.Наранцэцэгийн мэдүүлэг /хх-ийн 37 тал/, эд зүйлийг үнэлсэн үнэлгээ /хх-ийн 55 тал/, шүүгдэгч Б.Бын яллагдагчаар мэдүүлсэн мэдүүлэг /хх-ийн 70-71 тал/, иргэний нэхэмжлэгч Н.Володьяагийн мэдүүлэг /хх-ийн 107-108 тал/, хохирол 6.500.000 төгрөгийн үнэлгээ /хх-ийн 55-58 тал/, шүүгдэгч Б.Бын ял шийтгэлийн хуудас /хх-ийн 99 тал/, хохирогчийн гаргасан тодорхойлолт /хх-ийн 63 тал/, цагдаагийн тэмдэглэл /хх-ийн 129 тал/ зэрэг болно.

Шүүгдэгч Б.Б нь 2019 оны 12 дугаар сарын 25-26-нд шилжих шөнө Төв аймгийн Баянцагаан сум Баян айрагт 2 дугаар багийн нутгаас иргэн Б.Алтанбаатарын 4 тооны үхэрийг бэлчээрээс нь хулгайлж, 6.500.000 төгрөгийн хохирол учруулсан гэмт хэрэг үйлдсэн гэм буруутай болох нь:

• Гэмт хэргийн талаарх гомдол мэдээлэл хүлээн авсан тэмдэглэл /хх-ийн 4 тал/
• Хэргийн газар үзлэг хийсэн тэмдэглэл, гэрэл зургийн үзүүлэлтүүд /хх-ийн 5-13 тал/
• Дүрс бичлэгт үзлэг хийсэн тэмдэглэл /хх-ийн 14-15 тал/
• Эй Жэй Жэй Эм ХХК-ийн алдагдсан эд зүйлийг үнэлсэн үнэлгээ /хх-ийн 52-61, 116-128 тал/
• Хохирогч Б.Алтанбаганы хохиролд 7.000.000 төгрөг авсан, гомдол саналгүй гэх бичгээр гаргасан хүсэлт /хх-ийн 63 тал/
• Эрүүгийн хэрэг үүсгэж яллагдагчаар татах тухай Прокурорын тогтоол /хх-ийн 71 тал/
• Эд хөрөнгө битүүмжлэх тухай мөрдөгчийн тогтоол /хх-ийн 105-108 тал/
• Хохирогч Б.Алтанбаатарын мөрдөн байцаалтын шатанд мэдүүлсэн: “...2019 оны 12 дугаар сарын 24-25-нд шилжих шөнө Төв аймгийн Зуунмод сум руу машин ачиж явахдаа аав, ээжид малаа харуулаад үлдээгээд явсан...2019 оны 12 дугаар сарын 27-ны өдөр 12 цагийн үед Энхболд гэх саахалт айлын хүн гэрт ирж манай ээжид танай үхрийг шулсан байна гэж хэлсэн...манайх үхрээ эмнэдэггүй юм. Алдагдсан үхрүүд эвэргүй мухар хар гуна, улаан үнээ, улаан сарман үхэр, хар халзан шүдлэн гуна...гурван үхрээ тус бүрийг сая таван зуун мянган төгрөг, бүдүүн гуныг хоёр сая төгрөгөөр үнэлнэ...” гэх мэдүүлэг /хх-ийн 22 тал/,
• Гэрч Д.Цэнд-Очирын мөрдөн байцаалтын шатанд мэдүүлсэн: “...2019 оны 12 дугаар сарын 26-ны өдөр...өвөлжөөний баруун талаас хөх өнгийн портер ачаан дээрээ бараан өнгийн зүйлээр бүтээсэн байсан, хар хөх өнгийн приус маркийн автомашин ирээд гэрийн хойд талаар ертөнцийн зүгээр зүүн тийш ширүүхэн чиглээд явсан...” гэх мэдүүлэг /хх-ийн 23 тал/
• Гэрч Ц.Жадамбийн мөрдөн байцаалтын шатанд мэдүүлсэн: “...2019 оны 12 дугаар сарын 26-ны орой 15 цагийн үед халзан овооны хажууд жижиг цагаан, бараан өнгийн хоёр машин зогсож байхыг харсан. Тэгээд төд удалгүй овооноос чанх урагш замаараа гараад явсан...” гэх мэдүүлэг /хх-ийн 24 тал/
• Гэрч Д.Одончимэгийн мөрдөн байцаалтын шатанд мэдүүлсэн: “Надад бол үхрийн мах зараагүй, манай хүү Сумъяабазарт 2019 оны 12 дугаар сард 2 тооны үхрийн мах зарсан байсан. Тухайн үед манай хүүхэд гарал үүслийн гэрчилгээний бичигтэй өгсөн гэж байсан, 2 мах нь нийлээд 2,000,000 гаран төгрөг болсон гэж байсан, тухайн мөнгө нь миний эзэмшлийн 5749415952 тоот дансаар гарсан байсан...” гэх мэдүүлэг /хх-ийн 35 тал/,
• Гэрч Х.Сумъяабазарын мөрдөн байцаалтын шатанд мэдүүлсэн: “ 2019 оны 12 дугаар сарын 25-ны өдөр намхан хар царайтай ахаас үхрийн мах худалдаж авсан тэр хүн эхлээд 2 үхрийн мах аччихсан цагаан өнгийн машинтай ирсэн. Тэгээд тэр буцаад явчихсан. Тэгээд хэд хоногийн дараа дахиад нөгөө цагаан машинтайгаа 2 үхрийн мах аччихсан малын бичигтэй ирсэн байсан. Тэгээд би малын бичгийг нь нягтлаад харахад Налайх дүүргийн малын эмч бичсэн байсан. Тэгээд тэр мах зарсан хүн нь Налайх дүүргийн харъяалалтай байсан тэгээд би тэр 2 үхрийн махыг 2,000,000 төгрөгөөр худалдаж авсан тухайн 2,000,0000 төгрөгөө ээжийн 5749415952 тоот данснаас явуулсан...” гэх мэдүүлэг /хх-ийн 32 тал/
• Гэрч Г.Наранцэцэгийн мөрдөн байцаалтын шатанд мэдүүлсэн: “...2019 оны 12 дугаар сарын сүүлээр намайг Налайх дүүргийн Ингэр шандын 10-03 тоотод ажил дээрээ байхад Батжаргал гэх залуу ирээд надад үхрийн мах авах уу гээд өгсөн. Би нийт 120 кг мах байсан, би түүнд 630.000 төгрөг өгсөн, арьс шир нь байгаагүй, дан мах байсан, цагаан өнгийн машин байсан. Надад өмнө нь 2019 оны зун надад арьс шир, түүхий эд өгдөг байсан...би өмнө нь мах авч байгаагүй, түүхий эд л өгдөг байсан. Би тухайн үед хулгайн мах гэж мэдээгүй байсан, надад Батжаргал хэлэхдээ энэ манай малын мах би үхрээ гаргаад явж байна гэж байсан, би мөнгөө өгөхдөө өөрийн 5749201847 гэх Хаан банкны данснаас Батжаргалд өгч байсан...” гэх мэдүүлэг /хх-ийн 39 тал/
• Иргэний нэхэмжлэгч Н.Володъяагийн мөрдөн байцаалтын шатанд мэдүүлсэн: “2019 оны 11 дүгээр сарын 15-ны өдөр Батжаргал гэх хүнтэй манай байгууллага гэрээ байгуулж 36-08 УБӨ улсын дугаартай тээврийн хэрэгслийг 1.500.000 төгрөгөөр барьцаанд тавьсан. Тэгээд мөнгөө төлж чадахгүй байсан тул өөрийх нь зөвшөөрлөөр 36-08 УБӨ улсын дугаартай пробокс маркийн тээврийн хэрэгслийг хурааж авсан...” гэх мэдүүлэг /хх-ийн 113-114 тал/
• Шүүгдэгч Б.Бын мөрдөн байцаалтын шатанд яллагдагчаар мэдүүлсэн: “Би 2019 оны 12 дугаар сарын 25-ны өдрөөс 29-нд шилжих шөнө Улаанбаатар хот Налайх дүүргээс өөрийн эзэмшлийн пробокс маркийн 36-08 УНЭ улсын дугаартай УБӨ улсын дугаартай тээврийн хэрэгсэлтэй замын хүн аваад Төв аймаг Баянцагаан сум руу таксинд явсан тэгээд тэр хүнээ Баянцагаан сумын хөдөө буулгаад буцаад Налайх дүүрэг явсан явах замдаа бэлчээрт 20 үхэр байсан тэгээд тэр дундаас мухар зүсмийн гуна, сарман нүүртэй улаан шүдлэн гуна, улаан үнээ, хар халзан үхэрнүүдийг бугуйлаар бугуйлдаж бариад сүхээр дух руу нь цохиод тэнд өвчилж махалсан тэгээд арьс махыг нь унаж явсан тээврийн хэрэгсэлдээ ачсан толгой шийрийг нь тэнд үлдээсэн, тэгээд явж байгаад Хоолтын давааны тэнд махалсан үхэрнүүдийнхээ арьсыг нь засмал замын хажуу талын жалга руу хаясан, тэгээд маргааш өглөө нь Налайх дүүрэгт арьс шир авдаг Хүрлээ гэх ченжийн хүүхдэд 2,000,000 төгрөгөөр 2 үхрийн мах зарсан мөнгийг өөрийн эзэмшлийн дансаар авсан. Тэгээд үлдсэн 2 махыг нь Нараа гээд ченжид 1,600,000 төгрөгөөр өгсөн, 1,600,000 төгрөг бэлнээр худалдан авсан, би тээврийн хэрэгсэлийн өртэй байсан болохоор энэ гэмт хэргийг үйлдсэн...” гэх мэдүүлэг /хх-ийн 73-74 тал/ зэрэг хэрэгт авагдсан бичгийн нотлох баримтуудаар нотлогдож байна. 

 

Шүүгдэгч Б.Бын ял шийтгэлийн тэмдэглэл, иргэний үнэмлэхийн лавлагаа болон бусад хувийн байдлыг тогтоосон баримтуудыг шүүхийн хэлэлцүүлэгт судласан болно.

 

Шүүхээс шүүгдэгчид холбогдох хэргийн нотлох баримтуудыг үнэлж мэтгэлцэгч талуудын дүгнэлтийг сонсоод дараах дүгнэлтийг хийв.

Бусдын малыг хулгайлах гэмт хэргийн нөхцөл байдалд хийсэн хууль зүйн дүгнэлтийн талаар: 

Шүүгдэгч Б.Б 2019 оны 12 дугаар сарын 25-26-нд шилжих шөнө Төв аймгийн Баянцагаан сум Баян айрагт 2 дугаар багийн нутгаас иргэн Б.Алтанбаатарын 4 тооны үхэрийг бэлчээрээс нь хулгайлж, 6.500.000 төгрөгийн хохирол учруулсан үйлдэл нь Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн объектив талын шинжүүдийг бүрэн хангасан.

Уг гэмт хэрэг нь гэм буруугийн санаатай хэлбэрээр үйлдэгдсэн.

Эрүүгийн хуулийн 2.3 дугаар зүйлийн 1 дэх хэсэгт зааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгоно.

Шүүгдэгч Б.Б нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байжээ гэж үзэх үндэслэлтэй.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, шүүгдэгч Б.Бын үйлдэл нь  Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн шинжийг бүрэн хангасан, прокуророос ирүүлсэн хэргийн зүйлчлэл тохирсон байх тул шүүгдэгч Б.Быг бусдын малыг хулгайлах гэмт хэргийг үйлдсэн гэм буруутайд тооцож, хуульд заасан эрүүгийн хариуцлага оногдуулах нь зүйтэй байна.  

Шүүхээс хохирогч Б.Алтанбаатарт шүүх хуралдааны товыг мэдэгдэхэд “би хохирлоо барагдуулсан, нэхэмжлэх зүйлгүй тул шүүх хуралдаанд оролцохгүй” гэж, иргэний нэхэмжлэгч Г.Наранцэцэг, Х.Сумъяабаатар нарт шүүх хуралданы товыг мэдэгдэхэд “иргэний нэхэмжлэгчийн хувьд нэхэмжлэх зүйл байхгүй, тухайн үед хулгайн мал гэдгийг мэдэлгүй худалдаж авсан, шүүх хуралдаанд оролцохгүй” гэсэн байх тул энэ шүүх хуралдаанаар хэлэлцэх хохирлын асуудал байхгүй байна.

 

Эрүүгийн хариуцлага хүлээлгэх талаар:

-улсын яллагчаас “Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар бусдын малыг хулгайлсан гэмт хэрэг үйлдсэн гэм буруутайд шүүхээс тооцсон тул шүүгдэгч Б.Бд эрүүгийн хариуцлага хүлээлгэх үндэслэлтэй байна. Шүүгдэгч Б.Бд Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар 2 жилийн хугацаагаар хорих ял оногдуулж, оногдуулсан хорих ялыг Эрүүгийн хуулийн ерөнхий ангийн 5.6 дугаар зүйлийн 3 дахь хэсэгт зааснаар нээлттэй хорих байгууллагад эдлүүлэх” ялын дүгнэлтийг,

-шүүгдэгчийн өмгөөлөгч Э.Алтануяа “Миний үйлчлүүлэгчийн хувьд анх удаа хөнгөн гэмт хэрэг үйлдэж, хохирол төлбөрөө төлсөн байх тул хөнгөрүүлэх нөхцөл байдал харагдаж байна гэж үзэж байна. Өөрөө энэ хүн хулгай хийдэггүй. Энэ хэрэгтээ маш их гэмшиж байгаа байдлаа надаар дамжуулан илэрхийлж, энэ хэрэгтээ маш сайн дүгнэлт хийж байгааг тодруулж хэлмээр байна. Эрүүгийн хуулийн ерөнхий ангийн 6.7 дугаар зүйлийн 1 дэх хэсгийн 1.2-т зааснаар 1 жил тэнсэж, амьдрах дадал зуршил олгох албадлагын арга хэмжээ хэрэглэж өгнө үү. Төрөөс энэ хүнд нэг удаа боломж гаргаж өгнө үү. Тээврийн хэрэгслийн хувьд маргах зүйл байхгүй” гэх саналыг тус тус гаргасан байна.

 

Шүүгдэгч Б.Бын холбогдсон Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэрэг нь “Бусдын малыг хулгайлсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ” гэж заасан нь Эрүүгийн хуулийн ерөнхий ангийн 2.6 дугаар зүйлийн 2-т “Энэ хуулийн тусгай ангид хорих ялын дээд хэмжээг таван жил, түүнээс доош хугацаагаар оногдуулахаар тогтоосон, эсхүл хорих ял оногдуулахаар заагаагүй гэмт хэргийг хөнгөн гэмт хэрэг гэнэ” гэж зааснаар хөнгөн гэмт хэргийн ангилалд хамаарч байна.

Шүүгдэгч Б.Быг гэмт хэрэг үйлдсэн гэм буруутай болохыг шүүх тогтоосон учир Эрүүгийн хариуцлага гарцаагүй байх, хариуцлага нь гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байх гэм буруугийн болон шударга ёсны зарчимд нийцүүлж, гэмт хэрэг үйлдсэн нөхцөл байдал, учирсан хохирол, хор уршгийн шинж чанар, мөрдөн байцаалтын шатанд болон шүүхийн шатанд гэм буруугийн талаар маргаагүй, гэм буруугаа хүлээн зөвшөөрсөн, гэмт хэргийн улмаас учруулсан хохирлыг нөхөн төлсөн зэрэг хүний хувийн байдалыг харгалзан шүүгдэгч Б.Бд Эрүүгийн хуулийн ерөнхий ангийн 7.1 дүгээр зүйлд заасныг хэрэглэх боломжтой гэж шүүх үзсэн болно.  

 

            Бусад асуудлаар:

            Улсын дээд шүүхийн Ерөнхий шүүгч, Улсын Ерөнхий Прокурорын 2017 оны 6 сарын 30-ны өдрийн 36,А/68 дугаартай Эрүүгийн хэрэгт хураан авсан хөрөнгө, орлого, барьцааны мөнгө, эд мөрийн баримтыг шийдвэрлэх журмын 5.3-т “Шүүхийн шийдвэрт устгахаар заасан эд мөрийн баримтыг тухайн шүүхийн эд мөрийн баримт шийдвэрлэх комисс шийдвэрлэнэ.” гэж зааснаар шийтгэх тогтоол хүчин төгөлдөр болмогц эд мөрийн баримтаар хураагдан ирсэн сүх 1 ширхэг, олс 1 ширхэгийг устгахыг тус шүүхийн Тамгын газарт даалгаж,

            Шүүгдэгч Б.Бын гэмт хэрэг үйлдэхдээ ашигласан 36-80 УБӨ улсын дугаартай Пропокс маркийн тээврийн хэрэгсэл нь Б.Бын эзэмшлийх хэдий боловч шүүгдэгч Б.Б нь Хан Агьт ХХК-д зээлийн барьцаанд тавьж эзэмших эрх нь Хан Агьт ХХК-ны нэр дээр шилжсэн, шүүгдэгч Б.Б нь зээлийн төлбөрөө төлөөгүй, 2020 оны 03 дугаар сарын 05-ны өдрийн эд хөрөнгө битүүмжлэх тогтоолоор битүүмжилсэн дээрх тээврийн хэрэгслийг хадгалах, хамгаалах үүргийг Хан Агьт ХХК-д хүлээлгэсэн байх тул  Эрүүгийн хуулийн 7.5 дугаар зүйлийн 2 дахь хэсэгт “гэмт хэрэг үйлдэж олсон хөрөнгө, орлого гэж Монгол Улсад бол энэ хуулийн тусгай ангид заасан, гадаад улсад бол тухайн улсын хуулиар нэг жилээс дээш хугацаагаар хорих ял оногдуулахаар заасан гэмт хэрэг үйлдэж шууд, шууд бусаар олсон эдийн, эдийн бус хөрөнгө, түүний үнэ, түүнээс олсон ашиг, орлого, гэмт хэрэг үйлдэхэд ашигласан, ашиглахаар завдсан техник, хэрэгслийг ойлгоно” гэж, мөн хуулийн 7.5 дугаар зүйлийн 5 дахь хэсэгт “гэмт хэрэг үйлдэж олсон хөрөнгө, орлого хууль ёсны дагуу хийгдсэн хэлцлийн үндсэн дээр бусдын өмчлөлд шилжсэн бол шүүх тухайн эд зүйлийг үнэлж гэмт хэрэг үйлдсэн хүн, хуулийн этгээдийн хувьд ногдох, хураан авахыг хуулиар хориглоогүй хөрөнгө, орлогоос албадан гаргуулж хохирлыг төлүүлнэ. Тухайн хөрөнгө, орлогыг гэмт хэрэг үйлдэж олсон болохыг мэдсээр байж авсан болох нь тогтоогдвол шүүх уг эд зүйл, хөрөнгө, орлогыг бусдын өмчлөлд шилжүүлсэн хэлцлийг хүчингүйд тооцож, хөрөнгө, орлогыг хураан авч хохирлыг нөхөн төлүүлнэ” гэж тус тус зааснаар шийтгэх тогтоол хүчин төгөлдөр болмогц 2020 оны 03 дугаар сарын 05-ны өдрийн №06 дугаартай эд хөрөнгө битүүмжлэх тухай прокурорын тогтоолыг хүчингүй болгож 36-80 УБӨ улсын дугаартай Пропокс маркийн тээврийн хэрэгсэлийн үнэлгээ болох 1.402.500 төгрөгийг шүүгдэгч Б.Баас гаргуулж, улсын орлого болгож шийдвэрлэлээ. 

           

            Хэрэгт иргэний бичиг баримт шүүхэд ирээгүй, шүүгдэгч Б.Б нь цагдан хоригдсон хоноггүй, бусдад төлөх төлбөргүй болохыг тус тус дурдах нь зүйтэй байна.  

           

            Монгол Улсын Шүүхийн тухай хуулийн 31 дүгээр зүйлийн 31.1, 31.3, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт тус тус заасныг удирдлага болгон

ТОГТООХ нь:

1. Шүүгдэгч Б.Быг бусдын малыг хулгайлах гэмт хэргийг үйлдсэн гэм буруутайд тооцсугай.

 

2. Шүүгдэгч Б.Быг Эрүүгйин хуулийн ерөнхий ангийн 7.1 дүгээр зүйлд заасныг журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар хорих ял оногдуулахгүйгээр 2 /хоёр/ жилийн хугацаагаар тэнссүгэй.  

 

3. Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч Б.Бд үүрэг болгосугай.

 

4. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1.1, 1.3 дахь хэсэгт тус тус зааснаар шийтгэх тогтоол хүчин төгөлдөр болмогц 2020 оны 03 дугаар сарын 05-ны өдрийн №06 дугаартай эд хөрөнгө битүүмжлэх тухай прокурорын тогтоолыг хүчингүй болгож шүүгдэгч Б.Бын гэмт хэрэг үйлдэхдээ ашигласан 36-80 УБӨ улсын дугаартай Пропокс маркийн тээврийн хэрэгсэлийн үнэ болох 1.402.500 төгрөгийн үнэлгээтэй шүүгдэгч Б.Баас гаргуулж, улсын орлого болгосугай.

 

5. Эрүүгийн хэрэг хяан шийдвэрлэх тухай хуулийн 21.5 дугаар зүйлийн 1 дэх хэсгийн 1.4 дэх хэсэгт зааснаар эд мөрийн баримтаар хураагдан ирсэн сүх 1 ширхэг, олс 1 ширхэгийг устгахыг тус шүүхийн Тамгын газарт даалгасугай.

 

6. Хэрэгт иргэний бичиг баримт шүүхэд ирээгүй, шүүгдэгч Б.Б нь цагдан хоригдсон хоноггүй, бусдад төлөх төлбөргүй болохыг тус тус дурдсугай.
7. Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

8. Шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

 

ДАРГАЛАГЧ,  ШҮҮГЧ                             Ю.ЭНХМААЭ17