Т.Нийн нэхэмжлэлтэй

захиргааны хэргийн тухай

 

Захиргааны хэргийн давж заалдах шатны шүүхийн шүүх хуралдааныг шүүгч Д.Батбаатар даргалж, шүүгч Э.Зоригтбаатар, шүүгч Н.Хонинхүү нарын бүрэлдэхүүнтэй, нарийн бичгийн дарга Ц.Шагдарсүрэн, нэхэмжлэгч Т.Н, нэхэмжлэгчийн өмгөөлөгч Т.С- нарыг оролцуулан хийж, Захиргааны хэргийн анхан шатны 17 дугаар шүүхийн 2015 оны 01 дүгээр сарын 22-ны өдрийн 01 дүгээр шийдвэрийг эс зөвшөөрч гаргасан нэхэмжлэгчийн давж заалдах гомдлоор, Т.Нийн нэхэмжлэлтэй, Х- аймгийн Ж- сумын Засаг дарга, тус сумын М багийн иргэдийн Нийтийн Хуралд холбогдох захиргааны хэргийг шүүгчН.Хонинхүүгийн илтгэснээр хянан хэлэлцээд

ТОДОРХОЙЛОХ нь:

Нэхэмжлэгч Т.Н шүүхэд гаргасан нэхэмжлэлдээ болон нэхэмжлэлийн шаардлагаа нэмэгдүүлэхдээ: Х- аймгийн Ж- сумын М багийн иргэдийн Нийтийн Хурлын хуралдааныг зохион байгуулж, багийн Засаг даргыг томилуулахаар дээд шатны Засаг даргад санал болгохгүй байгаа хариуцагчийн эс үйлдэхүйг илт хууль бус болохыг тогтоолгох, Х- аймгийн Ж- сумын М багийн Засаг даргыг сонгох иргэдийн Нийтийн Хурлыг хуралдуулж, багийн Засаг даргыг томилуулахаар Ж- сумын Засаг даргад санал болгохыг даалгах, ажилгүй байсан хугацааны цалин хөлс, олговрыг хариуцагч Ж- сумын Засаг даргаас гаргуулах, нийгмийн болон эрүүл мэндийн даатгалыг нөхөн тооцуулж, бичилт хийлгэхийг хариуцагчид даалгах, ... Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийн 2 дахь заалт С.Э-т холбогдох хэсгийг хүчингүй болгож өгнө үү гэжээ.

Хариуцагч Х- аймгийн Ж- сумын Засаг дарга шүүхэд ирүүлсэн хариу тайлбартаа: ...2013 оны 01 дүгээр сарын 21-ний өдрийн М багийн иргэдийн Нийтийн Хурлаар багийн Засаг даргыг сонгох ээлжит сонгууль явагдаж хуралд нийтдээ 291 иргэд оролцож С.Э- 143, Т.Н 111 хүний саналыг тус тус авсан. Дээрх багийн Засаг даргыг сонгох иргэдийн Нийтийн Хурлын тооллогын комиссын дүгнэлт, тогтоолыг Захиргааны хэргийн шүүхийн 2013 оны 04 дүгээр сарын 26-ний өдрийн 05 дугаар шийдвэрээр хүчингүй болгосон. 2013 оны 01 дүгээр сарын 21-ний өдрийн М багийн Иргэдийн нийтийн хурлаас Сүхбаатар овогтой С.Э-ыг тус багийн Засаг даргаар томилсон тогтоолыг сумын Засаг даргад ирүүлсэн.

...Энэ хугацаанд сумын иргэдийн Төлөөлөгчдийн Хурал, Засаг даргын зүгээс М багийн иргэдийн Нийтийн Хурлыг зарлан хуралдуулах тухай удаа дараа санал, зөвлөмжийг тус багийн Иргэдийн нийтийн хурлын даргад хүргүүлсэн боловч тодорхой бус шалтгааны улмаас хуралдаагүй болно.

Монгол Улсын засаг захиргаа нутаг дэвсгэрийн нэгж, түүний удирдлагын тухай хуульд багийн Засаг даргыг томилуулахаар нэр дэвшүүлэх, чөлөөлөх, огцруулах санал болон Засаг даргын огцрох тухай хүсэлтийг хүлээж авах эсэхтэй холбогдсон саналыг хэлэлцэн сумын Засаг даргад уламжлах, иргэдийн Нийтийн Хурлыг зарлан хуралдуулах эрх нь нутгийн өөрөө удирдах байгууллага буюу багийн иргэдийн Нийтийн Хурлын бүрэн эрхэд хамаарах асуудал болно.

Иймд сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийг хүчингүй болгох үндэслэлгүй гэж үзэж байна гэжээ.

Хариуцагч Х- аймгийн Ж- сумын М багийн иргэдийн Нийтийн Хурлын дарга шүүхэд гаргасан тайлбартаа:...Энэ маргаан бол улс төрийн намуудаас үүсэлтэй маргаан байгаа юм. Ардчилсан намаас С.Э-, Монгол ардын намаас Т.Н нар М багийн Засаг даргад нэр дэвшсэн байгаа. Энэ хоёр хүн хоёулаа хуульд заасан 50-аас дээш хувийн санал авч чадаагүй байсан. Тооллогын комисс С.Э-ыг багийн Засаг даргаар сонгогдсон тогтоол гарган ирүүлэхэд би сумын Засаг даргад уламжилсан. Иргэдийн Нийтийн Хурлын дарга нь тооллогын комиссын тогтоолыг хүлээж авахгүй байх эрх байхгүй. Тооллогын комисс хууль бус тогтоол гаргасан талаар би цаг тухайд нь тайлбарлаж хэлсэн. Т.Нийн эрх зөрчигдсөн асуудлыг би хүлээн зөвшөөрдөг гэжээ.

Гуравдагч этгээд С.Э- шүүхэд гаргасан хариу тайлбартаа: ...Багийн Засаг даргын сонгуульд С.Э-, Т.Н, Ц.Ганзориг, М.Амаржаргал нарын дөрвөн нэр дэвшигч нэр дэвшиж өрсөлдсөн юм. ...Миний бие 2013 оны 02 дугаар сарын 01-ний өдрийн Ж- сумын Засаг даргын Б/05 тоот захирамжаар М багийн Засаг даргын үүрэг гүйцэтгэгчээр томилогдон өнөөдрийг хүртэл ажиллаж байна.

2013 онд шүүхийн шийдвэр гарсны дараа багийн иргэдийн Нийтийн Хурлыг нэг удаа зарлаж, иргэд сонгогчид цугларч санал авах гэсэн боловч иргэд Бид саналаа өмнө нь өгсөн, дахиж санал өгөх шаардлага байхгүй хэмээн тарсан үйл явдал болсон.

Түүнээс хойш өнөөдрийг хүртэл багийн иргэдийн Нийтийн Хурлыг дахиж хийгээгүй бөгөөд хурал хийх эрх нь багийн иргэдийн Нийтийн Хурлын даргад байгаа боловч хурал хийгдэлгүй ирлээ. Хэрэв М багийн иргэдийн Нийтийн Хурал дахиж болох шийдвэр гарвал багийн Засаг даргын үүрэг гүйцэтгэгч миний зүгээс багийн иргэдийг бүрэн хамруулж оролцуулахад бэлэн байна гэжээ.

Захиргааны хэргийн анхан шатны 17 дугаар шүүхийн 2015 оны 01 дүгээр сарын 22-ны өдрийн 01 дүгээр шийдвэрээр: Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 17 дугаар зүйлийн дэх 17.1.2, 20 дугаар зүйлийн 20.1.1, 23 дугаар зүйлийн 23.1 дэх хэсэгт заасныг тус тус баримтлан нэхэмжлэгч Т.Нийн Х- аймгийн Ж- сумын М багийн иргэдийн Нийтийн Хурлын хуралдааныг зохион байгуулж, багийн Засаг даргыг томилуулахаар дээд шатны Засаг даргад санал болгохгүй байгаа хариуцагчийн эс үйлдэхүйг илт хууль бус болохыг тогтоолгох, Ж- сумын М багийн Засаг даргыг сонгох иргэдийн Нийтийн Хурлыг хуралдуулж, багийн Засаг даргыг томилуулахаар Ж- сумын Засаг даргад санал болгохыг даалгах шаардлага бүхий нэхэмжлэлийн шаардлагыг хангаж, Х- аймгийн Ж- сумын М багийн Засаг даргыг сонгох иргэдийн Нийтийн Хурлыг хуралдуулж, багийн Засаг даргыг томилуулахаар Ж- сумын Засаг даргад санал болгохыг М багийн иргэдийн Нийтийн Хурал, Тэргүүлэгчдэд даалгаж, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 26 дугаар зүйлийн 26.2, 26.3, 29 дүгээр зүйлийн 29.3 дахь хэсэгт заасныг тус тус баримтлан нэхэмжлэгч Т.Нийн ажилгүй байсан хугацааны цалин 15508791 төгрөг гаргуулах, Нийгмийн болон эрүүл мэндийн даатгалыг нөхөн тооцуулж, бичилт хийлгэхийг хариуцагч Ж- сумын Засаг даргад даалгах, Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийн С.Э-т холбогдох хэсгийг хүчингүй болгуулах нэхэмжлэлийн шаардлагыг хэрэгсэхгүй болгож шийдвэрлэжээ.

Нэхэмжлэгч Т.Н шүүхэд гаргасан давж заалдах гомдолдоо: Нэхэмжлэгч Т.Н би Захиргааны хэрэг хянан шийдвэрлэх тухай хуулийн 90 дүгээр зүйлд заасны дагуу Захиргааны хэргийн анхан шатны 17 дугаар шүүхийн 2015 оны 01 дүгээр сарын 22-ны өдрийн 01 дүгээр шийдвэрийг эс зөвшөөрч гомдол гаргаж байна. 2013 оны 01 дүгээр сард орон нутгийн өөрөө удирдах байгууллагын ээлжит сонгууль явагдах болсон бөгөөд М багийн иргэдийн Нийтийн Хурлын хуралдаан 2013 оны 01 дүгээр сарын 21-ний өдөр Ж- сумын 12 жилийн 3 дугаар сургуулийн хурлын зааланд явагдсан. Уг хуралдаанд Т.Н би өөрийнхөө нэрийг багийн Засаг даргад нэр дэвшүүлэн өрсөлдсөн.

Гэвч тухайн иргэдийн Нийтийн Хурлын хуралдаанаар багийн Засаг даргыг сонгох санал хураалт хууль бус явагдсан тул би Х- аймгийн Захиргааны хэргийн шүүхэд нэхэмжлэл гаргасан юм. Шүүхээс миний нэхэмжлэлийг хангаж, иргэдийн Нийтийн Хурлын хуралдаанаар багийн Засаг даргыг сонгох санал хураалт хууль бус явагдсан гэдгийг тогтоосон. Х- аймгийн Захиргааны хэргийн шүүхийн 2013 оны 04 дүгээр сарын 26-ны өдрийн 05 дугаар шийдвэрээр М багийн иргэдийн Нийтийн Хурлын 2013 оны 01 дүгээр сарын 21-ний өдрийн тооллогын комиссын 2013 оны 01 дүгээр сарын 21-ний өдрийн 03 дугаар тогтоолыг хүчингүй болгосон. Уг захиргааны хэргийн шүүхийн шийдвэрт давж заалдах гомдол гаргаагүй тул шийдвэр хүчин төгөлдөр болсон.

Нэгэнт иргэдийн Нийтийн Хурлын хуралдаанаар Засаг даргыг сонгох санал хураалт хууль бус явагдсан тул дахин хуралдаан зарлаж, багийн Засаг даргыг сонгож, дээд шатны Засаг даргад санал болгох учиртай. Энэ талаар Монгол Улсын засаг захиргаа нутаг дэвсгэрийн нэгж, түүний удирдлагын тухай хуулийн 17 дугаар зүйлийн 17.1.2-т баг, хорооны Засаг даргыг чөлөөлөх, огцруулах санал болон Засаг даргын огцрох тухай хүсэлтийг хүлээж авах эсэхтэй холбогдсон саналыг хэлэлцэн сум, дүүргийн Засаг даргад уламжлах нь гэж тодорхой заажээ. Энэ нь багийн иргэдийн Нийтийн Хурлын хуулиар хүлээсэн үүрэг болно.

М багийн иргэдийн Нийтийн Хурал нь 2013 оны 04 дүгээр сараас хойш өдийг хүртэл иргэдийн Нийтийн Хурлын хуралдааныг зохион байгуулж, Засаг даргыг сонгож, томилуулах саналыг дээд шатны Засаг даргад санал болгох үүргээ биелүүлэхгүйгээр өдийг хүрлээ. М багийн Засаг даргыг сонгох иргэдийн Нийтийн хурлын хуралдаан явагдаагүй тул Ж- сумын Засаг даргаас намайг багийн Засаг даргын албан тушаалаас чөлөөлсөн захирамж гаргаагүй байгаа тул миний бүрэн эрх дуусгавар болгоогүй гэж үзэхээр байдаг. Учир нь иргэдийн Нийтийн Хурлаас сонгуулийн үр дүнд шинээр сонгогдсон Засаг даргыг дээд шатны Засаг даргад батламжилж, томилсон захирамж гаргаагүй, ажил хүлээлцүүлээгүй.

Ж- сумын Засаг дарга Д.Баасандорж нь 2013 оны 02 дугаар сарын 01-ний өдрийн Б/05 дугаар захирамжаараа тус багийн Засаг даргын үүргийг түр орлон гүйцэтгэгчээр С.Э-ыг томилон ажиллуулж байгааг хууль тогтоомжид илэрхий харшилж байна.

Ж- сумын Засаг дарга Д.Баасандоржид багийн иргэдийн Нийтийн Хурлаас санал болгосон иргэнийг багийн Засаг даргаар томилох л эрх хэмжээг хуулиар олгосон бөгөөд түүнд ямар ч түр үүрэг гүйцэтгэгч томилох эрх олгоогүй болно. Түүнчлэн түр үүрэг гүйцэтгэгч гэх албан тушаал Монгол Улсын хэмжээнд байдаггүй, хуульд ийм албан тушаал байхыг ч хориглосон байдаг.

Иймд илэрхий хууль тогтоомж зөрчиж гарсан 2013 оны 02 дугаар сарын 01-ний өдрийн Б/05 дугаар захирамжийн надад холбогдох хэсгийг хүчингүй болгож, ажилгүй байсан хугацааны цалин, нийгмийн даатгал, эрүүл мэндийн даатгалыг нөхөн олгож өгнө үү гэжээ.

ХЯНАВАЛ:

Захиргааны хэрэг хянан шийдвэрлэх тухай хуулийн 85 дугаар зүйлийн 85.3 дахь хэсэгт зааснаар хэргийг бүхэлд нь хянан үзэхэд анхан шатны шүүхийн шийдвэрт зохих өөрчлөлтийг оруулах нь зөв байна.

Нэхэмжлэгч Т.Н нь шүүхэд Х- аймгийн Ж- сумын М багийн иргэдийн Нийтийн Хурлыг хуралдуулахгүй байгаа эс үйлдэхүйг илт хууль бус болохыг тогтоолгож, хурлыг хуралдуулж, багийн Засаг даргад томилуулахаар санал болгохыг даалгах, ажилгүй байсан хугацааны цалин хөлс, олговрыг гаргуулж, нийгмийн болон эрүүл мэндийн даатгалыг нөхөн тооцуулж, бичилт хийлгэхийг хариуцагчид даалгах нэхэмжлэлийн шаардлага гаргаж, 2014 оны 11 дүгээр сарын 28-ны өдөр Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийн 2 дахь заалт С.Э-т холбогдох хэсгийг хүчингүй болгож өгнө үү гэж нэхэмжлэлийн шаардлагаа ихэсгэжээ.

Х- аймгийн Ж- сумын М багийн иргэдийн Нийтийн Хурлын 2013 оны 01 дүгээр сарын 21-ний өдрийн хуралдаанаар хэлэлцсэн тус багийн Засаг даргын сонгуультай холбоотой үйл баримтын талаар Х- аймгийн Захиргааны хэргийн шүүх 2013 оны 04 дүгээр сарын 26-ны өдөр хянан шийдвэрлэж, 05 дугаар шийдвэрээр багийн иргэдийн Нийтийн Хурлын 2013 оны 01 дүгээр сарын 21-ний өдрийн Багийн Засаг даргаар батламжлуулахаар өргөн мэдүүлэх тухай 03 дугаар тогтоолыг хүчингүй болгосон байх тул шүүхийн хүчин төгөлдөр шийдвэрээр нэгэнт тогтоогдсон үйл баримт хэрэг хянан шийдвэрлэхэд холбогдолтой байвал түүнийг дахин нотлохгүй гэсэн үндэслэлээр Ж- сумын багийн Засаг даргын сонгуультай холбоотой үйл баримтын тухайд талууд маргах эрхгүй талаар болон багийн иргэдийн Нийтийн Хурлын хуралдааныг хуралдуулж, Засаг даргыг томилуулахаар санал болгохыг даалгах нь зүйтэй талаар анхан шатны шүүх үндэслэл бүхий дүгнэлт хийж, нэхэмжлэлийн уг шаардлагыг хангасан нь зөв байна.

Төрийн албаны тухай хуулийн 6 дугаар зүйлийн 6.1, 6.1.12-т зааснаар Монгол Улсын Үндсэн хууль, бусад хуулиар тогтоосон болзол, журам, шалгуурын дагуу сонгогддог болон уг сонгуулийн үр дүнд томилогддог албан тушаалтан болох багийн Засаг даргын албан тушаалаас нэхэмжлэгч Т.Нийг Ж- сумын Засаг даргын 2013 оны 01 дүгээр сарын 28-ны өдрийн Б/03 дугаар захирамжаар чөлөөлж, багийн Засаг даргын ажлыг тус өдрөөс эхлэн хавсран гүйцэтгэхийг нийгмийн ажилтанд даалгасан байна.

Мөн хуулийн 11 дүгээр зүйлийн 11.1 дэх хэсэгт зааснаар төрийн албан хаагч гэдэгт төрийн албан тушаалыг эрхэлж, бүрэн эрхээ хэрэгжүүлсний төлөө төрөөс цалин хөлс авч, ажиллах нөхцөл, баталгаагаар хангагдан ажиллаж байгаа этгээдийг ойлгох ба Х- аймгийн Ж- сумын М багийн иргэдийн Нийтийн Хурлын 2013 оны 01 дүгээр сарын 21-ний өдрийн хурлаар тус багийн Засаг даргад нэр дэвшигчдээс хэн нь ч Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 26 дугаар зүйлийн 26.2-т заасан шаардлага хангаагүй нь шүүхийн шийдвэрээр тогтоогдсоноос гадна хэргийн оролцогчдоос шүүх хуралдаанд гаргасан тайлбарт нэхэмжлэгч нь ... М багийн Засаг даргаар 2004 оноос 2013 оны 01 дүгээр сарын 22-ны өдөр хүртэл ажилласан[1], хариуцагчаас ... багийн Засаг дарга нарыг чөлөөлсөн, томилсон талаар ажлын хэсэг гаргаж, ажлыг хүлээлцүүлсэн[2] гэж тайлбарлажээ.

Үүнээс үзвэл нэхэмжлэгчийг ажлаас чөлөөлөх үндэслэл нь сонгуулийн үр дүнтэй холбоотой гэж үзсэн шүүхийн дүгнэлт үндэслэлтэй. Тодруулбал, улс төрийн албан тушаал болох багийн Засаг даргын албан тушаалыг хүлээлцсэнээс хойш нэхэмжлэгч нь уг албан тушаалын чиг үүргийг хэрэгжүүлээгүй, иргэдийн Нийтийн Хурал хуралдаж хуульд заасан журмын дагуу Засаг даргыг томилуулахаар санал болгоогүй байх тул багийн засаг даргын бүрэн эрх нь хэрэгжиж байгаа гэж үзэхгүй, ажилгүй байсан цаг хугацааны цалин хөлс, олговрыг нэхэмжлэгчид олгох үндэслэлгүй.

Харин Х- аймгийн Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжаар С.Э-ыг М багийн Засаг даргын үүрэг гүйцэтгэгчээр томилсон байх бөгөөд хэрэг хянан шийдвэрлэх ажиллагааны явцад хариуцагчаас ... иргэдийн Нийтийн Хурлаар багийн Засаг даргыг сонгох тооллогын комиссын дүгнэлтэд гомдол гарсан, нэр дэвшигчид 50-аас дээш хувийн санал аваагүй зэрэг маргаанаас шалтгаалж С.Э-ыг Засаг даргын үүрэг гүйцэтгэгчээр томилсон гэж тайлбарлажээ.

Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 26 дугаар зүйлийн 26.2, 26.3 дахь хэсэгт зааснаар баг, хорооны Засаг даргад тухайн нэгжийн нийтийн Хурлын хуралдаанд оролцсон иргэд, төлөөлөгчдийн олонхийн буюу 50-аас дээш хувийн санал авсан нэр дэвшигчийг томилуулахаар томилох эрх бүхий албан тушаалтанд санал болгосныг үндэслэн сумын Засаг дарга нь багийн Засаг даргыг томилохоор байна. Гэтэл тус хуульд заасан журмын дагуу Засаг даргад томилуулахаар иргэдийн Нийтийн Хурлаас санал болгоогүйгээс гадна багийн Засаг даргын сонгуулийн санал хураалтын дүнгийн тухай тогтоолыг шүүхээс хүчингүй болгож шийдвэрлэсэн, түүнчлэн хуулиар эрх олгон зохицуулаагүй буюу төрийн улс төрийн албан тушаалыг түр орлон гүйцэтгэх үүрэг гүйцэтгэгч томилох талаар хуулийн зохицуулалт байхгүй байхад 2013 оны 02 дугаар сарын 01-ний өдрийн Б/05 дугаар захирамжаар Засаг даргын үүрэг гүйцэтгэгч-ийг томилсон нь хууль зүйн үндэслэлгүй байна.

Сумын Засаг дарга нь төрийн улс төрийн албан тушаалтан болохын хувьд Төрийн албаны тухай хуулийн 4 дүгээр зүйлийн 4.1-д заасны дагуу хууль дээдлэх төрийн албаны үндсэн зарчмыг баримтлах үүрэгтэй тул багийн Засаг даргыг санал болгосон сумын иргэдийн Нийтийн Хурлын тогтоол хүчингүй болоогүй гэсэн үндэслэлээр сумын Засаг даргын хууль зүйн үндэслэлгүй Б/05 дугаар шийдвэрийг зөвтгөх боломжгүй.

Иймд нэхэмжлэгчийн Х- аймгийн Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийн С.Э-т холбогдох хэсгийг хүчингүй болгуулах нэхэмжлэлийн шаардлагыг хангаж, шийдвэрт өөрчлөлт оруулав.

Захиргааны хэрэг хянан шийдвэрлэх тухай хуулийн 86 дугаар зүйлийн 86.1, 87 дугаар зүйлийн 87.3 дахь хэсгийг удирдлага болгон

ТОГТООХ нь:

1. Захиргааны хэргийн анхан шатны 17 дугаар шүүхийн 2015 оны 01 дүгээр сарын 22-ны өдрийн 01 дүгээр шийдвэрийн Тогтоох нь хэсгийн 2 дахь заалтыг Төрийн албаны тухай хуулийн 11 дүгээр зүйлийн 11.1, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 26 дугаар зүйлийн 26.2, 26.3 дахь хэсгийг баримтлан нэхэмжлэгч Т.Нийн ажилгүй байсан хугацааны цалин 15508791 төгрөг гаргуулах, Нийгмийн болон эрүүл мэндийн даатгалыг нөхөн тооцуулж, бичилт хийлгэхийг хариуцагч Ж- сумын Засаг даргад даалгах нэхэмжлэлийн шаардлагыг хэрэгсэхгүй болгож, Ж- сумын Засаг даргын 2013 оны 02 дугаар сарын 01-ний өдрийн Б/05 дугаар захирамжийн С.Э-т холбогдох хэсгийг хүчингүй болгуулах нэхэмжлэлийн шаардлагыг хангасугай гэж өөрчилж, шийдвэрийн Тогтоох хэсгийн бусад заалтыг хэвээр үлдээж, нэхэмжлэгчийн давж заалдах гомдлын зарим хэсгийг хангасугай.

2. Иргэний хэрэг шүүхэд хянан шийдвэрлэх тухай хуулийн 59 дүгээр зүйлийн 59.3 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 72000 төгрөгийг улсын төсвөөс гаргуулж, нэхэмжлэгчид олгосугай.

Захиргааны хэрэг хянан шийдвэрлэх тухай хуулийн 86 дугаар зүйлийн 86.5 дахь хэсэгт зааснаар давж заалдах шатны шүүх хэрэг хянан шийдвэрлэх ажиллагааны журам зөрчсөн, хууль буруу хэрэглэсэн гэж нэхэмжлэгч, хариуцагч, гуравдагч этгээд, тэдгээрийн төлөөлөгч нар үзвэл магадлалыг гардан авсан, эсхүл хүргүүлснээс хойш 14 хоногийн дотор Улсын Дээд шүүхийн Захиргааны хэргийн танхимд хяналтын журмаар гомдол гаргах эрхтэй.

 

 

ШҮҮХ БҮРЭЛДЭХҮҮН:

 

ШҮҮГЧ Д.БАТБААТАР

ШҮҮГЧ Э.ЗОРИГТБААТАР ШҮҮГЧ Н.ХОНИНХҮҮ