Т.О-ын нэхэмжлэлтэй

захиргааны хэргийн тухай

 

 

Захиргааны хэргийн давж заалдах шатны шүүхийн шүүх хуралдааныг шүүгч Э.Зоригтбаатар даргалж, шүүгч С.Мөнхжаргал, шүүгч Н.Хонинхүү нарын бүрэлдэхүүнтэй, нарийн бичгийн дарга Ц.Шагдарсүрэн, нэхэмжлэгч Т.О-, нэхэмжлэгчийн итгэмжлэгдсэн төлөөлөгч Г.С-, хариуцагчийн итгэмжлэгдсэн төлөөлөгч Б.О- нарыг оролцуулан хийж, Захиргааны хэргийн анхан шатны 20 дугаар шүүхийн 2015 оны 02 дугаар сарын 05-ны өдрийн 68 дугаар шийдвэрийг эс зөвшөөрч гаргасан хариуцагчийн итгэмжлэгдсэн төлөөлөгчийн давж заалдах гомдлоор, Т.О-ын нэхэмжлэлтэй, ЦЕГДд холбогдох захиргааны хэргийг шүүгч Н.Хонинхүүгийн илтгэснээр хянан хэлэлцээд

ТОДОРХОЙЛОХ нь:

Нэхэмжлэгч Т.О-аас шүүхэд гаргасан нэхэмжлэлдээ: Д- аймгийн Цагдаагийн газрын дарга, хурандаа Т.О-ыг үндэслэлгүйгээр ажлаас чөлөөлөн албан тушаалыг нь бууруулж, цагдаагийн хурандаа цолыг хураасан Цагдаагийн ерөнхий газрын даргын 2014 оны 11 дүгээр сарын 05-ны өдрийн 736 тоот тушаалыг хүчингүй болгож, урьд эдэлж байсан албан тушаалд эгүүлэн тогтоолгож, цагдаагийн хурандаа цолыг сэргээхийг даалгаж өгнө үү гэжээ.

Хариуцагчаас шүүхэд ирүүлсэн хариу тайлбартаа: ...Д- аймаг дахь цагдаагийн газрын 2012-2013 оны санхүү, аж ахуйн үйл ажиллагаанд Цагдаагийн ерөнхий газрын даргын баталсан удирдамжийн дагуу Дотоод хяналт-аюулгүй байдлын газрын Хяналт шалгалт, дотоод аудитын хэлтсээс 2014 оны 02-р сарын 26-наас 03 дугаар сарын 07-ны өдрүүдэд санхүүгийн шалгалт явуулсан. Шалгалтын явцад 4.047.622 төгрөгийн төлбөр, 3.316.386 төгрөгийн зөрчил илэрсэн нь тус цагдаагийн газар Хувь хүний орлогын албан татварын тухай Монгол Улсын хуулийн 23 дугаар зүйлийн 23.1 дэх хэсэг, Монгол Улсын Засгийн газрын 1999 оны 211, 2012 оны 78 дугаар тогтоол, Монгол Улсын Сангийн сайдын Зардлын хэмжээг шинэчлэн тогтоох тухай 2011 оны 132 дугаар тушаал, Хууль зүйн сайдын 1999 оны 73 дугаар тушаалаар баталсан Тээврийн хэрэгсэл түр саатуулах журам, Цагдаагийн ерөнхий газрын даргын 2011 оны 38 дугаар тушаалаар баталсан Цагдаагийн байгууллагын үйл ажиллагааны журам-ын тээврийн хэрэгсэл хадгалах /код 411/, Нэмэгдэл, нэмэгдэл хөлс болон цалин тогтоох /код 923/, дүрэмт хувцас өмсөж хэрэглэх тухай /код 916/-ын 916.8.4 дэх заалтуудыг үйл ажиллагаандаа бүрэн хэрэгжүүлж ажиллаагүйтэй холбоотой гэж дүгнэсэн. Мөн шалгалтын ажлын хэсгээс явуулсан шалгалтын явцад илэрсэн зөрчилтэй холбогдуулан 9 заалт бүхий зөвлөмжийг өгч, Цагдаагийн ерөнхий газрын даргын 2014 оны 179 дүгээр тушаалаар 4.047.622 төгрөгийн төлбөр, 3.316.386 төгрөгийн зөрчлийн акт тогтоосон байна.

2014 оны 09 дүгээр сарын 18-ны өдөр мөн газрын үйл ажиллагаанд төлөвлөгөөт бус шалгалтыг явуулсан бөгөөд шалгалтаар гэмт хэрэгтэй тэмцэх, нийтийн хэв журам хамгаалах, үндсэн үүргээ хэвийн гүйцэтгэж байгаа боловч зарим үйл ажиллагаа дутагдалтай байна гэж үзэж, 15 төрлийн зөрчил, дутагдал заагдсан.

...Цагдаагийн ерөнхий газрын даргын 2014 оны 10 дугаар сарын 23-ны өдрийн 702 дугаар тушаалаар Т.О-т Төрийн албаны тухай хуулийн 13 дугаар зүйлийн 13.1.1-т заасан үүргийг биелүүлээгүй үндэслэлээр Төрийн албаны тухай хуулийн 26 дугаар зүйлийн 26.1.2-т заасныг үндэслэн сарын үндсэн цалинг 6 сарын хугацаагаар 20 хувь бууруулах сахилгын шийтгэл ногдуулсан.

...Т.О- 2 удаа хийсэн санхүүгийн болон төлөвлөгөөт бус шалгалтаар Ажлын байр /албан тушаал/-ны тодорхойлолт-д заасан зорилго зорилтыг хангалтгүй биелүүлсэн гэж үзсэн тул Төрийн албаны тухай хуулийн 23 дугаар зүйлд зааснаар түүний албан тушаалыг бууруулсан.

Иймд Захиргааны хэрэг хянан шийдвэрлэх тухай хуулийн 70 дугаар зүйлийн 70,2.9-д зааснаар Т.О-ын нэхэмжлэлийг бүхэлд нь хэрэгсэхгүй болгож өгнө үү гэжээ.

Захиргааны хэргийн анхан шатны 20 дугаар шүүхийн 2015 оны 02 дугаар сарын 05-ны өдрийн 68 дугаар шийдвэрээр: Төрийн албаны тухай хуулийн 23 дугаар зүйлийн 23.1, 23.1.1, 23.1.2-д заасныг баримтлан нэхэмжлэгчийн нэхэмжлэлийн шаардлагыг бүхэлд нь хангаж, Цагдаагийн ерөнхий газрын даргын 2014 оны 11 дүгээр сарын 05-ны өдрийн 736 дугаар тушаалыг хүчингүй болгож, Т.О-ыг Д- аймгийн Цагдаагийн газрын даргын албан тушаалд эгүүлэн тогтоож, түүний цагдаагийн хурандаа цолыгсэргээн олгохыг ЦЕГДд даалгаж шийдвэрлэжээ.

Хариуцагчийн итгэмжлэгдсэн төлөөлөгчөөс шүүхэд гаргасан давж заалдах гомдолдоо: Захиргааны хэргийн анхан шатны 20 дугаар шүүхийн 2015 оны 02 дугаар сарын 05-ны өдрийн 68 дугаар шийдвэрийг эс зөвшөөрч, Захиргааны хэрэг хянан шийдвэрлэх тухай хуулийн 81 дүгээр зүйлд зааснаар дор дурдсан үндэслэлээр давж заалдах гомдол гаргаж байна. Үүнд:

Засгийн газрын агентлагийн эрх зүйн байдлын тухай хуулийн 8.3.5-д агентлагийн дарга хууль тогтоомжид заасны дагуу албан тушаалд томилох, чөлөөлөх, албан тушаалаас бууруулах, өөр албан тушаалд шилжүүлэх, ... бүрэн эрхийг хэрэгжүүлэхээр заасан.

Архивын ерөнхий газрын даргын 2009 оны 68 дугаар тушаалаар баталсан Албан хэрэг хөтлөлтийн үндсэн заавар-ын 2.4.1.5-д Тушаалын бичвэр нь тэмдэглэх ба захирамжлах гэсэн 2 хэсгээс бүрдэнэ., мөн 2.4.1.6-д тушаалын тэмдэглэх хэсэгт уг баримт бичгийг зохиож бүрдүүлсэн үндэслэлийн тухай бичихээр заасан байна.

Маргаан бүхий Цагдаагийн ерөнхий газрын даргын 2014 оны 736 дугаар тушаалын тэмдэглэх хэсэгт агентлагийн даргын бүрэн эрхийн хүрээнд тушаал гаргах, үндэслэлийг заасан тул албан тушаал бууруулсан үндэслэлийг тухайн актад заавал бичих шаардлагагүй бөгөөд энэ талаар хуульд заагаагүй.

Анхан шатны шүүх нэхэмжлэгч Т.О-ыг ...албан тушаал /Ажлын байр/-ын тодорхойлолтод заасан зорилго, зорилтоо хангалтгүй биелүүлсэн гэж үзэхээргүй байна. гэж дүгнэсэн нь учир дутагдалтай байна.

Төсвийн тухай хуулийн 5-р зүйлд төсвийг хэрэгжүүлэхэд хариуцлагатай байх зарчмыг баримталдаг бөгөөд мөн хуулийн 6-р зүйлд энэхүү зарчмыг төсвийн захирагч нь түүнийг томилсон байгууллага, албан тушаалтны өмнө, эсхүл дээд шатныхаа төсвийн захирагчийн өмнө төсвийн талаар хариуцлага хүлээдэг байх байдлаар хэрэгжүүлнэ гэж заасан.

Төсвийн тухай хуулийн 16-р зүйлийн 5 дахь хэсэгт төсвийн шууд захирагч нь батлагдсан төсөв, хөтөлбөрийг хэрэгжүүлэх талаар төсвийн ерөнхийлөн захирагчтай байгуулсан гэрээний хүрээнд төсвийн хөрөнгийг удирдах, зарцуулалтад нь хяналт тавих, батлагдсан төсвийг зориулалтын дагуу зарцуулах үүргийг хүлээсэн байна.

Гэтэл Д- аймаг дахь цагдаагийн газрын 2012-2013 оны санхүү, аж ахуйн үйл ажиллагаанд 2014 оны 02-р сарын 26-наас 03 дугаар сарын 07-ны өдрүүдэд хийсэн санхүүгийн шалгалтаар 4.047.622 төгрөгийн төлбөр, 3.316.386 төгрөгийн зөрчил илэрсэн нь тус цагдаагийн газар Хувь хүний орлогын албан татварын тухай Монгол Улсын хуулийн 23 дугаар зүйлийн 23.1 дэх хэсэг, Монгол Улсын Засгийн газрын 1999 оны 211, 2012 оны 78 дугаар тогтоол, Монгол Улсын Сангийн сайдын Зардлын хэмжээг шинэчлэн тогтоох тухай 2011 оны 132 дугаар тушаал, Хууль зүйн сайдын 1999 оны 73 дугаар тушаалаар баталсан Тээврийн хэрэгсэл түр саатуулах журам, Цагдаагийн байгууллагын үйл ажиллагааны журам-ын тээврийн хэрэгсэл хадгалах /код 411/, Нэмэгдэл, нэмэгдэл хөлс болон цалин тогтоох /код 923/, дүрэмт хувцас өмсөж хэрэглэх тухай /код 916/-ын 916.8.4 дэх заалтуудыг үйл ажиллагаандаа бүрэн хэрэгжүүлж ажиллаагүйтэй холбоотой гэж дүгнэсэн.

Шалгалтын ажлын хэсгээс шалгалтын явцад илэрсэн зөрчилтэй холбогдуулан тогтоосон 4.047.622 төгрөгийн төлбөр, 3.316.386 төгрөгийн зөрчлийн актыг Т.О- хүлээн зөвшөөрсөн.

2014 оны 09 дүгээр сарын 18-ны өдөр мөн газрын үйл ажиллагаанд хийсэн төлөвлөгөөт бус шалгалтаар 15 төрлийн зөрчил дутагдал заагдсан нь алба хаагч нараа мэргэжлийн удирдлагаар хангаж ажиллах чиглэлээр өгсөн даалгавар, зааварчилгын биелэлт, үр дүнг тооцох тал дээр дутагдалтай, Цагдаагийн байгууллагын үйл ажиллагааны журмыг хэрэгжүүлж ажиллаагүйтэй холбоотой гэж тус тус дүгнэсэн байна.

Энэ нь Т.О-ыг албан тушаал /Ажлын байр/-ын тодорхойлолтод заасан үүргээ хэвийн гүйцэтгэж байна гэж үзэх боломжгүй юм.

Мөн Шүүхийн шийдвэрт ...Хууль зүйн сайдын 2014 оны 11 дүгээр сарын 04-ний өдрийн А/194 тушаалаар Цагдаагийн албан тушаалын цол олгох журам-ыг хавсралт ёсоор баталж, энэ тушаал гарсантай холбогдуулан Хууль зүйн сайдын 2014 оны А/03 дугаар тушаалыг хүчингүй болсонд тооцсон байх тул хариуцагч нь 2014 оны 11 дүгээр сарын 04-ний өдөр хүчингүй болсон тушаалын заалт баримтлан 2014 оны 11 дүгээр сарын 05-ны өдөр захиргааны акт гаргасан нь үндэслэлгүй болжээ. гэсэн байна.

Хууль зүйн сайдын 2014 оны 11 дүгээр сарын 04-ний өдрийн Цагдаагийн албан тушаалын цол олгох журам-ыг баталсан тушаалын 2 дахь хэсэгт тушаалыг 2014 оны 11 дүгээр сарын 20-ны өдрөөс эхлэн мөрдөхийг ЦЕГДд даалгасан байна.

Цагдаагийн албаны тухай хуулийн 34 дүгээр зүйлд зааснаар цагдаагийн цол нь албан тушаалынх байхаар заасан бөгөөд цагдаагийн дэд хурандаа цолыг харьяа, алба нэгжийн дарга, тодорхой нутаг дэвсгэр хариуцсан цагдаагийн хэлтсийн дарга, тэдгээртэй адилтгах удирдах албан тушаалтанд, Цагдаагийн ахлах цол болон түүнтэй адилтгах албан тушаалын ангилал, зэрэглэл батлах тухай Хууль зүйн сайдын 2014 оны А/24 дүгээр тушаалаар цагдаагийн дэд хурандаа цол-ыг харьяа нэгж буюу газрын хэлтсийн дарга, хэлтсийн дэд дарга, тасгийн дарга, төвийн дэд дарга, хэлтсийн дарга зэрэг албан тушаалтанд олгохоор заасан.

Засгийн газрын 2014 оны 99 дүгээр тогтоолоор баталсан Цагдаагийн албан тушаалын цолны нэмэгдлийн хувь хэмжээ-нд зааснаар цагдаагийн албан тушаалын цолны ангиллын бага, дунд, ахлах, дээд болох цагдаагийн дэслэгчээс тэргүүн комиссар хүртэл ямар нэгэн ялгаваргүйгээр сар бүр олгох нэмэгдлийн хувь хэмжээг үндсэн цалингийн 30 хувиар олгохоор заасан бөгөөд цолны ялгах тэмдэг нь зөвхөн албан тушаалын илэрхийлэл юм.

Иймд Захиргааны хэрэг хянан шийдвэрлэх тухай хуулийн 88 дугаар зүйлд зааснаар Захиргааны хэргийн анхан шатны 20 дугаар шүүхийн 2015 оны 02 дугаар сарын 05-ны өдрийн 68 дугаар шийдвэрийг хүчингүй болгож өгнө үү гэжээ.

ХЯНАВАЛ:

Анхан шатны шүүх хэрэгт цугларсан нотлох баримтад тулгуурлан маргааны үйл баримтад үндэслэлтэй зөв дүгнэлт хийж хэргийг шийдвэрлэсэн байна.

Цагдаагийн ерөнхий газрын даргын 2014 оны 11 дүгээр сарын 05-ны өдрийн маргаан бүхий 736 дугаар тушаалд Засгийн газрын агентлагийн эрх зүйн байдлын тухай хуулийн 8 дугаар зүйлийн 8.3.5-д заасныг баримтлан нэхэмжлэгч Т.О-ыг захиргааны санаачилгаар албан тушаал бууруулахдаа төрийн жинхэнэ албан хаагчийн эрх зүйн байдлын талаар хууль, хууль тогтоомжийн бусад актаар тогтоосон зохицуулалтыг зөрчсөн буюу хуульд заасан үндэслэл бий болоогүй байхад албан тушаал бууруулсныг хууль бус гэж үзсэн анхан шатны шүүхийн дүгнэлт зөв болжээ.

Хариуцагчийн итгэмжлэгдсэн төлөөлөгч нь давж заалдах гомдолдоо ...736 дугаар тушаалын тэмдэглэх хэсэгт ...албан тушаал бууруулсан үндэслэлийг тухайн актад заавал бичих шаардлагагүй бөгөөд энэ талаар хуульд заагаагүй гэсэн нь үндэслэлгүй.

Учир нь Төрийн албаны тухай хуулийн 11 дүгээр зүйлийн 11.4 дэх хэсэгт зааснаар төрийн жинхэнэ албан хаагч болох нэхэмжлэгчийн хөдөлмөрлөхтэй холбоотой эрх зүйн байдал нь хууль болон хууль тогтоомжийн бусад актад зааснаар журамлагдан зохицуулагдана. Тодруулбал, төрийн жинхэнэ албан хаагчийн хөдөлмөрийн харилцааг гагцхүү хуульд заасан үндэслэл, журмын дагуу дуусгавар болгоно.

Засгийн газрын агентлагийн эрх зүйн байдлын тухай хуулийн 8 дугаар зүйлийн 8.3.5-д зааснаар агентлагийн удирдлага нь ...албан тушаалд томилох, чөлөөлөх, ... өөр албан тушаалд шилжүүлэх бүрэн эрхээ хууль тогтоомжид заасны дагуу хэрэгжүүлнэ. Өөрөөр хэлбэл тодорхой асуудал тэр дундаа төрийн жинхэнэ албан хаагчийн хөдөлмөрлөх эрхтэй холбоотой асуудлаар шийдвэр гаргах тохиолдолд тус харилцааг зохицуулсан хууль, тогтоомжид зааж журамласныг мөрдлөг болгон баримтлах учиртай.

Хариуцагч нь төрийн жинхэнэ албан хаагч болох нэхэмжлэгчийг ямар үндэслэлээр албан тушаал бууруулж байгаа талаар тусгаагүй, тухайн харилцааг зохицуулж журамласан хууль, тогтоомжийн зохицуулалтыг баримтлаагүй байх тул маргаан бүхий актыг хууль бус гэж үзэх үндэслэлтэй талаарх анхан шатны шүүхийн дүгнэлт зөв байх тул хариуцагчийн итгэмжлэгдсэн төлөөлөгчийн давж заалдах гомдлын тус үндэслэлийг хүлээж авах боломжгүй.

Хэдийгээр маргаан бүхий захиргааны актад нэхэмжлэгчийн албан тушаалыг бууруулах болсон үндэслэлийг тусгаагүй ч хариуцагчийн тайлбар буюу хэрэгт цугларсан нотлох баримтаар албан тушаал бууруулсан үндэслэлийг зааж тайлбарлаж байгаатай холбогдуулан анхан шатны шүүх Төрийн албаны тухай хуулийн 23 дугаар зүйлийн 23.1 дэх хэсэгт заасан төрийн жинхэнэ албан хаагчийг захиргааны санаачилгаар албан тушаал бууруулах үндэслэл тогтоогдсон эсэхэд дүгнэлт хийсэн нь буруу биш байна.

Хариуцагчаас давж заалдах гомдолдоо ... Д- аймаг дахь Цагдаагийн газрын 2012-2013 оны санхүү, аж ахуйн үйл ажиллагаанд 2014 оны 02 дугаар сарын 26-аас 03 дугаар сарын 07-ны өдрүүдэд хийсэн санхүүгийн шалгалтаар... мөн 2014 оны 09 дүгээр сарын 18-ны өдөр хийсэн төлөвлөгөөт бус шалгалтаар зөрчил дутагдал заагдсан нь Т.О-ыг албан тушаалын тодорхойлолтод заасан үүргээ хэвийн гүйцэтгэж байна гэж үзэх боломжгүй гэжээ.

Төрийн албаны тухай хуулийн 23 дугаар зүйлийн 23.1.1-д зааснаар албан тушаал /ажлын байр/-ын тодорхойлолтод заасан зорилго, зорилтоо хангалтгүй биелүүлсэн нь төрийн жинхэнэ албан хаагчийн албан тушаал бууруулах үндэслэл болох боловч 2014 оны 09 дүгээр сарын 03-ны өдрөөс эхлэн явуулсан шалгалтын дүнг Цагдаагийн ерөнхий газрын даргын 2014 оны 10 дугаар сарын 14-ний өдрийн хуралдаанаар хэлэлцэж, нэхэмжлэгч Т.О-т хариуцсан ажилдаа тэнцэхгүй байгааг анхааруулж, Төрийн албаны тухай хуулийн 26 дугаар зүйлийн 26.1.2-т заасныг үндэслэн сахилгын шийтгэл ногдуулж, ажил сайжруулах тухай хүргүүлсэн хугацаатай үүрэг, ажлын чиглэлийг дүгнээгүй атлаа тус шалгалтын үр дүнг үндэслэн албан тушаал бууруулсан мэтээр тайлбарлаж байгааг хүлээж авах боломжгүй байна.

Түүнчлэн мөн хуулийн 23 дугаар зүйлийн 23.1.2-т заасан үйл ажиллагааны үр дүн, мэргэшлийн түвшин нь төрийн тухайн албан тушаал эрхлэх шаардлага хангахгүй болсон гэдгийг төрийн жинхэнэ албан хаагчийн үйл ажиллагааны үр дүн, мэргэшлийн түвшинг үнэлэх журамд заасны дагуу дүгнэсэн үнэлгээгээр хангалтгүй дүн авсныг ойлгох бөгөөд нэхэмжлэгч Т.О-ыг дээрх шалгалтын дүнтэй холбогдуулан буруутгаж байгааг түүний үйл ажиллагааны үр дүн, мэргэшлийн түвшинг үнэлж дүгнэсэн дүгнэлт гэж үзэхгүй. Өөрөөр хэлбэл, шалгалтын дүнтэй холбогдуулан нэхэмжлэгчийг албан тушаал бууруулах үндэслэлгүй байна.

Монгол Улсын Хууль зүйн сайдын 2014 оны 11 дүгээр сарын 04-ний өдрийн А/194 дүгээр тушаалын 2 дахь хэсэгт тус тушаалыг 2014 оны 11 дүгээр сарын 20-ны өдрөөс эхлэн мөрдөхөөр заасан байхад анхан шатны шүүх ...2014 оны 11 дүгээр сарын 04-ний өдөр хүчингүй болсон тушаалын заалтыг баримтлан 2014 оны 11 дүгээр сарын 05-ны өдөр захиргааны акт гаргасан гэж дүгнэсэн нь үндэслэлгүй, хариуцагчийн давж заалдах гомдлын тус хэсэг үндэслэлтэй байх хэдий ч энэ нь шүүхийн шийдвэрийг хүчингүй болгох үндэслэл болохгүй.

Учир нь нэхэмжлэгч Т.О-ыг захиргааны санаачилгаар албан тушаал бууруулж томилсноос үүдэн Цагдаагийн албаны тухай хуулийн 34 дүгээр зүйлд заасны дагуу албан тушаалын цол олгосон байх бөгөөд нэгэнт нэхэмжлэгчийг албан тушаал бууруулсан нь хууль зүйн үндэслэлгүй болох нь тогтоогдож байх тул Цагдаагийн ерөнхий газрын даргын 2014 оны 11 дүгээр сарын 05-ны өдрийн 736 дугаар тушаалыг хүчингүй болгож, нэхэмжлэгч Т.О-ыг урьд эрхэлж байсан Д- аймгийн Цагдаагийн газрын даргын албан тушаалд эгүүлэн тогтоож, цагдаагийн хурандаа цолыг сэргээхийг хариуцагч ЦЕГДд даалгаж шийдвэрлэсэн нь үндэслэлтэй байна.

Иймд шүүхийн шийдвэрийг хэвээр үлдээж, хариуцагчийн итгэмжлэгдсэн төлөөлөгчийн давж заалдах гомдлыг хангахгүй орхив.

Захиргааны хэрэг хянан шийдвэрлэх тухай хуулийн 86 дугаар зүйлийн 86.1, 87 дугаар зүйлийн 87.1 дэх хэсгийг удирдлага болгон

ТОГТООХ нь:

1. Захиргааны хэргийн анхан шатны 20 дугаар шүүхийн 2015 оны 02 дугаар сарын 05-ны өдрийн 68 дугаар шийдвэрийг хэвээр үлдээж, хариуцагчийн итгэмжлэгдсэн төлөөлөгчийн давж заалдах гомдлыг хангахгүй орхисугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3 дахь хэсэгт зааснаар хариуцагч улсын тэмдэгтийн хураамжаас чөлөөлөгдсөн болохыг дурдсугай.

Захиргааны хэрэг хянан шийдвэрлэх тухай хуулийн 86 дугаар зүйлийн 86.5 дахь хэсэгт зааснаар давж заалдах шатны шүүх хэрэг хянан шийдвэрлэх ажиллагааны журам зөрчсөн, хууль буруу хэрэглэсэн гэж нэхэмжлэгч, хариуцагч, тэдгээрийн төлөөлөгч нар үзвэл магадлалыг гардан авсан, эсхүл хүргүүлснээс хойш 14 хоногийн дотор Улсын Дээд шүүхийн Захиргааны хэргийн танхимд хяналтын журмаар гомдол гаргах эрхтэй.

 

 

 

ШҮҮХ БҮРЭЛДЭХҮҮН:

 

ШҮҮГЧ Э.ЗОРИГТБААТАР

ШҮҮГЧ С.МӨНХЖАРГАЛ

ШҮҮГЧ Н.ХОНИНХҮҮ