Ж.Х-ын нэхэмжлэлтэй

захиргааны хэргийн тухай

 

Захиргааны хэргийн давж заалдах шатны шүүхийн шүүх хуралдааныг Ерөнхий шүүгч Б.Мөнхтуяа даргалж, шүүгч Д.Баатархүү, шүүгч Н.Хонинхүү нарын бүрэлдэхүүнтэй, нарийн бичгийн дарга Ц.Шагдарсүрэн, нэхэмжлэгч Ж.Х-, нэхэмжлэгчийн итгэмжлэгдсэн төлөөлөгч Ц.Г-, нэхэмжлэгчийн өмгөөлөгч В.Б-, Б.Ц-, хариуцагчийн итгэмжлэгдсэн төлөөлөгч Р.Б-, Ц.Ш--, хариуцагчийн өмгөөлөгч А.Н- нарыг оролцуулан хийж, Захиргааны хэргийн анхан шатны 20 дугаар шүүхийн 2014 оны 12 дугаар сарын 18-ны өдрийн 620 дугаар шийдвэрийг эс зөвшөөрч гаргасан хариуцагчийн итгэмжлэгдсэн төлөөлөгчийн давж заалдах гомдлоор, Ж.Х-ын нэхэмжлэлтэй, Нийслэлийн өмчлөх хувьчлах комисст холбогдох захиргааны хэргийг шүүгч Н.Хонинхүү илтгэснээр хянан хэлэлцээд

ТОДОРХОЙЛОХ нь:

Нэхэмжлэгч Ж.Х- шүүхэд гаргасан нэхэмжлэлдээ: НӨХК-ын 2014 оны 03 дугаар сарын 10-ны өдрийн Менежментийн гэрээг хаах тухай 05 дугаар тогтоолыг хүчингүй болгож, НӨХК-ын 2012 оны 01 дүгээр сарын 17-ны өдрийн Аудитын комиссын шалгалтын дүнг батлах тухай 12 дугаартай тогтоолын 2 дахь заалт илт хууль бус болохыг тогтоож, менежментийн гэрээний үр дүнг үндэслэн Өмч хувьчлах тогтоол гаргахыг даалгах тухай шийдвэрийг гаргаж өгнө үү гэжээ.

Хариуцагч Нийслэлийн өмч хувьчлах комиссын итгэмжлэгдсэн төлөөлөгчөөс шүүхэд ирүүлсэн хариу тайлбартаа: НӨХК-ын 2008 оны 09 дүгээр сарын 08-ны өдрийн Менежментийн гэрээгээр ажиллуулах тухай 73 дугаар тогтоолоор Уламжлалт анагаах ухааны элэг судлалын клиник төвийг нэмэлт хөрөнгө оруулалт хийх нөхцөлтэйгөөр менежментийн үр дүнг харгалзан хувьчлан авах үнийг тогтоож, энэхүү үнийг зөвшөөрсөн тохиолдолд иргэн Ж.Х-, Д.Адъяахүү, С.Оюунцэцэг нарын багтай гурван талт гэрээг 3 жилийн хугацаатай байгуулахыг даалгасан байна. Дээрх тогтоолыг үндэслэн 2008 оны 09 дүгээр сарын 08-ны өдөр Нэмэлт хөрөнгө оруулалт хийх нөхцөлтэйгөөр Менежментийн үр дүнг харгалзан хувьчлах гэрээ Нийслэлийн Засаг даргын тамгын газар, Нийслэлийн өмчийн харилцааны газар, иргэн Ж.Х-тай байгуулан ажиллаж ирсэн. Энэхүү гэрээг жил бүр дүгнэж ирсэн бөгөөд Нийслэлийн Засаг даргын 2013 оны 01 дүгээр сарын 28-ны өдрийн А/65 дугаар захирамжаар Нийслэлийн Эрүүл мэндийн байгууллагуудын үйл ажиллагаанд шалгалт хийж дүгнэлт гаргах комиссыг томилон ажиллуулсан. Захирамжийн дагуу ажилласан ажлын хэсэг Уламжлалт анагаах ухааны элэг судлалын клиник төвийг менежментийн гэрээний үүргийн биелэлт, бизнес төлөвлөгөөний хэрэгжилтийг хангалтгүй гэж дүгнэсэн дүгнэлт болон Нийслэлийн Удирдлагын зөвлөлийн 2003 оны 11 дүгээр сарын 23-ны өдрийн хуралдааны дүгнэлт зэргийг үндэслэн НӨХК-ын Уламжлалт анагаах ухааны элэг судлалын клиник төвийн Нэмэлт хөрөнгө оруулалт хийх нөхцөлтэй менежментийн гэрээ-ний үүргийн биелэлтийг Хангалтгүй биелэгдсэн гэж дүгнэж, Менежментийн гэрээ-г хаах тухай 2014 оны 03 дугаар сарын 10-ны өдрийн 05 дугаар тогтоолыг гаргасан тул иргэн Ж.Х-ын нэхэмжлэлийн шаардлагыг хүлээн зөвшөөрөх боломжгүй байна. Мөн Уламжлалт анагаах ухааны элэг судлалын клиник төв бол 100% нийслэлийн өмч хэвээрээ байгаа. Гэрээний үүрэг биелсэн тохиолдолд хувьчлахаар заасан байсан. Сүүлд гарсан аудитын комисс гэрээний биелэлтийг хангалтгүй гэж дүгнэсэн учраас гэрээг хүчингүй болгосон. Иймд нэхэмжлэлийн шаардлагыг хэрэгсэхгүй болгож өгнө үү гэв.

Захиргааны хэргийн анхан шатны 20 дугаар шүүхийн 2014 оны 12 дугаар сарын 18-ны өдрийн 620 дугаар шийдвэрээр: Төрийн болон орон нутгийн өмчийн тухай хуулийн 58 дугаар зүйлийн 3, 4 дэх хэсэгт заасныг тус тус баримтлан нэхэмжлэгчийн нэхэмжлэлийн шаардлагыг бүхэлд нь хангаж, НӨХК-ын 2014 оны 03 дугаар сарын 10-ны өдрийн Менежментийн гэрээг хаах тухай 05 дугаар тогтоолыг хүчингүй болгож, Нийслэлийн Өмч хувьчлах комиссын 2012 оны 01 дүгээр сарын 17-ны өдрийн Аудитын комиссын шалгалтын дүнг батлах тухай 12 дугаар тогтоолын 2 дахь заалтыг илт хууль бус болохыг тогтоож, менежментийн гэрээний үр дүнг үндэслэн хувьчлах тогтоол гаргахыг Нийслэлийн Өмч хувьчлах комисст даалгаж шийдвэрлэжээ.

Хариуцагчийн итгэмжлэгдсэн төлөөлөгч Р.Б- давж заалдах гомдолдоо: Иргэн Ж.Х-ын нэхэмжлэлтэй НӨХК-т холбогдох менежментийн гэрээний маргааныг хянан шийдвэрлэсэн Захиргааны хэргийн анхан шатны 20 дугаар шүүхийн 2014 оны 12 дугаар сарын18-ны өдрийн 620 дугаар шийдвэрийг дараах үндэслэлээр эс зөвшөөрч гомдол гаргаж байна.

1. 2003 оны Нийслэлийн иргэдийн Төлөөлөгчдийн Хурлын 128 дугаар тогтоол, 2004 оны 61 дүгээр тогтоол, НӨХК-ын 2004 оны 60 дугаар тогтоолыг тус тус үндэслэн Уламжлалт анагаах ухааны элэг судлалын клиник төвийг нэмэлт хөрөнгө оруулалт хийх нөхцөлтэйгөөр менежментийн гэрээний үр дүнг харгалзан хувьчлан авах этгээдийг сонгон шалгаруулах тендерийг зарлаж, уг тендерт Ж.Х- ахлагчтай баг ялагч болж 2008 оны 09 дүгээр сарын 08-нд Нийслэлийн Өмчийн харилцааны газартай 3 жилийн хугацаатай гэрээ байгуулж ажилласан. Гэрээний хугацаа дууссан тул Нийслэлийн Засаг даргынзахирамжаар томилогдсон Аудитын комисс ажиллаж, дүнг хэлэлцэн хангалттай гэж дүгнээд НӨХК-ын 2012 оны 01 дүгээр сарын 17-ны өдрийн 12 дугаар тогтоолоор гэрээний хугацааг 1 жилийн хугацаагаар сунгасан. Энэхүү хугацаа нь 2013 оны 01 дүгээр сарын 17-нд дууссан болно.

2. Тухайн үед НӨХК-ын 12 дугаар тогтоолтой Ж.Х- нь танилцаж 1 жилийн хугацаанд уйл ажиллагаагаа явуулж ирсэн бөгөөд уг тогтоолын талаар ямар нэг гомдол гаргаагүй даруй 2 жил 2 сарын дараа шүүхэд нэхэмжлэл гаргаж байгаа нь Монгол Улсын Захиргааны хэрэг хянан шийдвэрлэх тухай хуулийн 6 дугаар зүйлийн 6.1-д заасан хуулийн хугацаа хэтэрсэн байхад шүүх энэ асуудлыг хууль зүйн дагуу хянан хэлэлцээгүйд гомдолтой байна.

3. Нийслэлийн Засаг даргын 2013 оны 01 дүгээр сарын 28-ны өдрийн А/65 дугаар захирамжаар томилогдсон комисс нь холбогдох дүрэм, журмын дагуу Нийслэлийн Эрүүл мэндийн зарим байгууллагын үйл ажиллагаанд шалгалт хийхэд дараах зөрчлүүд илэрсэн. Үүнд:

1. Уламжлалт анагаах ухааны элэг судлалын клиник төвийн менежментийн гэрээний хугацаа болон сунгасан хугацаа дууссан байсан

2. Менежментийн гэрээний тодорхой заалтууд хэрэгжээгүй, үйл ажиллагааны хувьд "хангалтгүй" гэсэн дүгнэлт гарсан.Тухайлбал гэрээний 9 дүгээр зүйлийн 9.5.1-д худалдан авагч нь төсвийн санхүүжилтийг үе шаттайгаар бууруулж, гэрээний хугацаа дуусахаас өмнө өөрийн үйл ажиллагааны зардлыг бие даан санхүүжүүлэх чадварыг бүрдүүлнэ гэсэн заалттай боловч төсвийн санхүүжилтийн хэмжээ 2008 оноос хойш тасралтгүй өссөн байсан.

Иймд нэгэнт гэрээний хугацаа дууссан, гэрээний үүрэг биелэгдээгүй нөхцөлд уг гэрээний 12 дугаар зүйлийн 12.1.6-д заасны дагуу НӨХК-ын 2014 оны 03 дугаар сарын 10-ны өдрийн 05 дугаар тогтоолоор Уламжлалт анагаах ухааны элэг судлалын клиник төвийн менежментийн гэрээг "хаасан" нь үндэслэлтэй шийдвэр болсон болно.

Анхан шатны шүүх эдгээр нөхцөл байдлуудыг хянаж үзэлгүйгээр, хууль зүйн үндэслэлгүй шийдвэр гаргасан гэж үзэх тул шийдвэрийг хүчингүй болгож, нэхэмжлэлийг хэрэгсэхгүй болгож шийдвэрлэхийг хүсье гэжээ.

ХЯНАВАЛ

1.    НӨХК-ын 2012 оны 01 дүгээр сарын 17-ны өдрийн 12 дугаар тогтоолын 2 дахь заалтыг илт хууль бус болохыг тогтоолгох шаардлагын тухайд:

Төрийн болон орон нутгийн өмчийн тухай хуулийн 58 дугаар зүйлийн 58.3-т Менежментийн гэрээг төсөл сонгон шалгаруулалтын үндсэн дээр хуульд өөрөөр заагаагүй бол 3 хүртэл жилийн хугацаагаар бичгээр байгуулна гэж, 58.4-т Гэрээнд үүргийн тухай болон ажил гүйцэтгэх гэрээний тухай Иргэний хуульд тодорхойлсон заалтуудыг баримтлахаас гадна дараахь болзлыг заавал тусгана: гэж, мөн зүйлийн 4 дэх заалтын 1-д ... дүгнэж үнэлэх шалгуур үзүүлэлт гэж, мөн заалтын 3-т гэрээнд заасан үүргээ бүрэн биелүүлсэн нөхцөлд төрийн өмчийн эд хөрөнгөөс хувьчлан өгөх хэмжээ, хэлбэр, үнэ гэж заасан.

Нийслэлийн Засаг даргын Тамгын газар, Нийслэлийн Өмчийн харилцааны газар болон Ж.Х- ахлагчтай багтай 2008 оны 09 дүгээр сарын 08-ны өдөр харилцан тохиролцож байгуулсан Нийслэлийн Засаг даргын дэргэдэх Уламжлалт анагаах ухааны Элэг судлалын клиник төвийг Нэмэлт хөрөнгө оруулалт хийх нөхцөлтэйгээр Менежментийн үр дүнг харгалзан хувьчлах тухай гэрээ[1]-г /цаашид менежментийн гэрээ гэх/ гэрээний 3.1-т зааснаар гэрээний хугацааг 3 хүртэл жил байхаар тогтож, тус 2.1-т Энэхүү гэрээний талууд гарын үсэг зурсан өдрөөс хүчин төгөлдөр болно гэж заасны дагуу гэрээ хүчин төгөлдөр мөрдөгдөж байжээ.

Уг гэрээнд зааснаас үзвэл гэрээний хугацаа дууссан тохиолдолд тус гэрээний 12.1.2, 12.1.3-т зааснаар аудитын комисс томилогдон гэрээний хэрэгжилтийг үнэлж дүгнэн, гэрээний үүрэг хангалттай биелэгдсэн гэж дүгнэгдсэн тохиолдолд гэрээний 12.1.4 дүгээр зүйлд зааснаар гэрээг дуусгавар болгох тухай шийдвэрийг гаргахаар байна.

Гэтэл Нийслэлийн Засаг даргын 2011 оны 715 дугаар захирамжаар байгуулагдсан Уламжлалт анагаах ухааны Элэг судлалын клиник төвийн менежментийн гэрээний хэрэгжилт, бизнес төлөвлөгөөний биелэлтийг дүгнэх Аудитын комиссын санал, дүгнэлт[2]-ийг үндэслэн НӨХК-ын хуралдааны шийдвэр болох 2012 оны 01 дүгээр сарын 17-ны өдрийн 12 дугаар тогтоолын 1 дэх заалтаар гэрээний үүрэг хангалттай биелэгдсэн гэж дүгнэсэн боловч гэрээний нэг тал болох Ж.Х- ахлагчтай багтай харилцан тохиролцоогүй, бичгийн хэлбэрээр гэрээнд өөрчлөлт оруулаагүй атлаа 2 дахь заалтаараагэрээний үлгэрчилсэн загвар-ыг үндэслэн гэрээний хугацааг нэг жилийн хугацаатайгаар сунгасан нь хууль бус болжээ.

Зүй нь, хэрэв гэрээг зайлшгүй сунгах шаардлагатай тохиолдолд гэрээний 18.2-т заасны дагуу эхлээд талууд харилцан зөвшилцөж гэрээнд сунгах талаарх өөрчлөлтийг нэмж оруулан, улмаар түүнийгээ үндэслэн гэрээг сунгах ёстой байжээ.

2. НӨХК-ын 2014 оны 03 дугаар сарын 10-ны өдрийн Менежментийн гэрээг хаах тухай 05 дугаар тогтоолыг хүчингүй болгуулах нэхэмжлэлийн шаардлагын тухайд:

Гэрээний талууд харилцан хүлээн зөвшөөрч байгуулан, хүчин төгөлдөр мөрдөгдөж байсан Нэмэлт хөрөнгө оруулалт хийх нөхцөлтэйгээр Менежментийн үр дүнг харгалзан хувьчлах тухай гэрээ-ний 12.1.2-д худалдагч энэхүү гэрээний нөхцөл болзлын дагуу хүлээсэн үүргээ худалдан авагч биелүүлсэн эсэхэд хяналт шалгалт хийлгэхээр Аудитын комиссыг томилно, 12.1.3-д Аудитын комисс нь худалдан авагч үүргээ биелүүлсэн эсэхэд энэхүү гэрээний 11.3-д заасан эрх, үүргийн дагуу хяналт, шалгалт хийж, менежментийн гэрээний үр дүнгийн аудитын нэгдсэн тайланг-г НӨХК-ын хуралдаанаар хэлэлцүүлнэ..., гэж 12.1.4-т гэрээний үүрэг хангалттай биелэгдсэн бол дуусгавар болгох шийдвэр гаргах..., 12.1.6-д ... гэрээний үүрэг хангалтгүй биелэгдсэн гэж үзвэл менежментийн гэрээг хаах шийдвэр гаргана гэж гэрээний хугацаа дууссаны дараа хэрэгжих үйл ажиллагааны талаарх зохицуулалтыг тусгажээ.

Гэтэл хариуцагч нь гэрээнд заасны дагуу Аудитын комисс-ыг томилон ажиллуулаагүй атлаа гэрээний үр дүнг шалгах бүрэн эрх олгогдоогүй Нийслэлийн эрүүл мэндийн зарим байгууллагуудын үйл ажиллагаанд шалгалт хийж, дүгнэлт гаргах комисс-ыг байгуулж, улмаар уг комиссын тайланг үндэслэн НӨХК-ын 2014 оны 03 дугаар сарын 10-ны өдрийн Менежментийн гэрээг хаах тухай 05 дугаар тогтоолыг гаргасан нь үндэслэлгүй болжээ.

Зүй нь, тус гэрээнд зааснаар худалдагчаас 5 хүний бүрэлдэхүүнтэй аудитын комиссыг томилж, уг комисс нь гэрээний 11 дүгээр зүйлийн 3-т заасан эрх, үүргийн хүрээнд худалдан авагч гэрээний нөхцөл болзлын дагуу хүлээсэн үүргээ биелүүлсэн эсэхэд хяналт шалгалт хийж нэгдсэн тайлан бичиж, НӨХК-ын хуралдаанд танилцуулах, улмаар тус хуралдаанаас гэрээний үүрэг хангалттай биелэгдсэн эсэх талаар дүгнэж, шийдвэр гаргах байжээ.

Өөрөөр хэлбэл Нийслэлийн Засаг даргын 2013 оны 01 дүгээр сарын 28-ны өдрийн А/65 дугаар захирамжаар томилогдсон Нийслэлийн эрүүл мэндийн зарим байгууллагуудын үйл ажиллагаанд шалгалт хийж, дүгнэлт гаргах комисс нь гэрээнд заасны дагуу худалдан авагч нь гэрээний нөхцөл, болзлын дагуу хүлээсэн үүргээ биелүүлсэн эсэхэд хяналт, шалгалт хийж, дүгнэлт гаргах эрхгүй этгээд байна.

Түүнчлэн гэрээнд зааснаар гэрээний үүргийн биелэлтэд шалгалт хийж аудитын нэгдсэн тайланг гаргаагүй төдийгүй тус шалгалтын комиссын тайланд тусгагдсан зөрчил нь холбогдох нотлох баримтаар нотлогдоогүй, дурдсан санал дүгнэлт нь талуудын хооронд байгуулсан гэрээг дуусгавар болгох үндэслэл болохгүй талаар дүгнэсэн анхан шатны шүүхийн дүгнэлт зөв байна.

3.    Менежментийн гэрээний үр дүнг үндэслэн Өмч хувьчлах тогтоол гаргахыг даалгах нэхэмжлэлийн шаардлагын тухайд:

Төрийн болон орон нутгийн өмчийн тухай хуулийн 34 дүгээр зүйлийн 34.1-т Төрийн өмчийн эд хөрөнгийг хувьчлахдаа дараахь аргыг дангаар буюу хослуулан хэрэглэнэ, мөн зүйлийн 1 дэх хэсгийн 6-д менежментийн үр дүнг харгалзан хувьчлах гэж, Нийслэлийн иргэдийн Төлөөлөгчдийн хурлын Тэргүүлэгчдийн 2014 оны 05 дугаар сарын 05-ны өдрийн 67 дугаар тогтоолын 2 дугаар хавсралтаар батлагдсан НӨХК-ын ажиллах журмын 3.1.4-т Нийгмийн салбарын хувьчлалын хүрээнд менежментийн болон удирдлагын гэрээний хэрэгжилтэнд хяналт тавьж биелэлтийг хэлэлцэж, үр дүнг харгалзан хувьчлах эсэх асуудлыг шийдвэрлэх гэж заасан.

Гэрээний талууд харилцан хүлээн зөвшөөрч байгуулан, дагаж мөрдөн, хүчин төгөлдөр үйлчилж байсан гэрээний хугацаа дууссан, улмаар Нийслэлийн Засаг даргын 2011 оны 715 дугаар захирамжаар байгуулагдсан гэрээний хэрэгжилт, бизнес төлөвлөгөөний биелэлтийг шалгасан Аудитын комиссын санал, дүгнэлт[3]-ийг НӨХК-ын 2012 оны 01 дүгээр сарын 17-ны өдрийн Аудитын комиссын шалгалтын дүнг батлах тухай 12 дугаар тогтоолын 1 дэх заалт хүчин төгөлдөр, тус тогтоолын гэрээг сунгасан агуулга бүхий 2 дахь заалт нь гэрээнд өөрчлөлт оруулах журам-ыг зөрчсөнөөр хууль бус байх тул тус гэрээний 12.1.4-т зааснаар гэрээг дуусгавар болгож өмч хувьчлах шийдвэр гаргахыг НӨХК-т даалгах хууль зүйн үндэслэлтэй гэж дүгнэсэн анхан шатны шүүхийн дүгнэлт зөв, хариуцагчийн итгэмжлэгдсэн төлөөлөгчийн ...гэрээний үүрэг биелэгдээгүй, гэрээний тодорхой заалтууд, тухайлбал, 9.5.1 дэх заалт биелэгдээгүй... гэх гомдол үндэслэлгүй.

 

Нэхэмжлэгчээс гэрээг дуусгавар болгох шийдвэрийг гаргуулах талаар Нийслэлийн Өмчийн харилцааны газрын даргад, Нийслэлийн иргэдийн Төлөөлөгчдийн хурлын Тэргүүлэгчдийн дарга, Нийслэлийн Засаг дарга, Хотын захирагч, Улсын их хурлын гишүүнд хүргүүлж байсан албан бичгүүд[4], Дүүргийн иргэний хэргийн анхан шатны 1 дүгээр шүүхийн шүүгчийн захирамж[5] зэрэг нотлох баримтуудаас үзвэл нэхэмжлэгч 2012 оны 12 дугаар тогтоолын талаар ямар нэгэн гомдол гаргаагүй Захиргааны хэрэг хянан шийдвэрлэх тухай хуулийн 6 дугаар зүйлийн 6.1-д заасан хугацаа хэтэрсэн байхад шүүх хүлээн авч шийдвэрлэн, энэ талаар дүгнээгүй гэх хариуцагчийн итгэмжлэгдсэн төлөөлөгчийн гомдол үндэслэлгүй.

 

Хэдийгээр 2008 оны 09 дүгээр сарын 08-ны өдөр байгуулагдсан Нийслэлийн засаг даргын дэргэдэх Уламжлалт анагаах Ухааны Элэг судлалын клиник төвийг Нэмэлт хөрөнгө оруулалт хийх нөхцөлтэйгээр Менежментийн үр дүнг харгалзан хувьчлах гэрээ-ний хугацаа дууссан боловч НӨХК-ын 2012 оны 01 дүгээр сарын 17-ны өдрийн 12 дугаар тогтоолын 2 дахь заалтаар гэрээний хугацааг 1 жилийн хугацаатай сунгаж, улмаар уг хугацаа дууссан нь НӨХК-ын 2014 оны 03 дугаар сарын 10-ны өдрийн 05 дугаар тогтоолоор гэрээг хаасныг зөвтгөх, нэхэмжлэгчийг буруутгах үндэслэл болохгүй.

Учир нь 2012 оны 01 дүгээр сарын 17-ны өдрийн 12 дугаар тогтоолын 1 дэх заалтаар тус гэрээний хэрэгжилт, бизнес төлөвлөгөөний биелэлтийг хангалттай гэж дүгнэсэн, харин хууль, гэрээнд заагаагүй үндэслэлээр тус тогтоолын 2 дахь заалтаар гэрээний хугацааг сунгасан хариуцагчийн буруутай үйлдэл хууль бус гэдэг ньтогтоогдож байх тул хариуцагчийн итгэмжлэгдсэн төлөөлөгчийн гэрээний хугацаа дууссан, гэрээний сунгасан хугацаа дууссан гэх гомдол, тайлбар үндэслэлгүй.

Иймд шүүхийн шийдвэрийг хэвээр үлдээж, хариуцагчийн давж заалдах гомдлыг хангахгүй орхиж шийдвэрлэв.

Захиргааны хэрэг хянан шийдвэрлэх тухай хуулийн 86 дугаар зүйлийн 86.1, 87 дугаар зүйлийн 87.1 дэх хэсгийг удирдлага болгон

ТОГТООХ нь:

1. Захиргааны хэргийн анхан шатны 20 дугаар шүүхийн 2014 оны 12 дугаар сарын 18-ны өдрийн 620 дугаар шийдвэрийг хэвээр үлдээж, хариуцагчийн итгэмжлэгдсэн төлөөлөгчийн давж заалдах гомдлыг хангахгүй орхисугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.3 дахь хэсэгт зааснаар хариуцагч улсын тэмдэгтийн хураамжаас чөлөөлөгдсөн болохыг дурдсугай.

Захиргааны хэрэг хянан шийдвэрлэх тухай хуулийн 86 дугаар зүйлийн 86.5 дахь хэсэгт зааснаар давж заалдах шатны шүүх хэрэг хянан шийдвэрлэх ажиллагааны журам зөрчсөн, хууль буруу хэрэглэсэн гэж нэхэмжлэгч, хариуцагч, тэдгээрийн төлөөлөгч нар үзвэл магадлалыг гардан авсан, эсхүл хүргүүлснээс хойш 14 хоногийн дотор Улсын Дээд шүүхийн Захиргааны хэргийн танхимд хяналтын журмаар гомдол гаргах эрхтэй.

 

ШҮҮХ БҮРЭЛДЭХҮҮНД:

 

ЕРӨНХИЙ ШҮҮГЧ Б.МӨНХТУЯА

ШҮҮГЧ Д.БААТАРХҮҮ

ШҮҮГЧ Н.ХОНИНХҮҮ