МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

Шүүх хуралдааны нарийн бичгийн дарга Н.Өнө-Эрдэнэ

Улсын яллагчаар Б.Сувд-Эрдэнэ

Шүүгдэгчийн өмгөөлөгч Н.Баяр

   Шүүгдэгч Б.П нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн ерөнхий ангийн 1.9, 3.7 дугаар зүйлийг тус тус журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Б.Пад холбогдох эрүүгийн 2034000000194 дугаартай хэргийг 2020 оны 05 дугаар сарын 04-ний өдөр хүлээн авч, 2020 оны 06 дугаар сарын 02-ны өдөр хянан хэлэлцэв.

 

Холбогдсон хэргийн талаар /яллах дүгнэлтэд дурдагдсанаар/

Яллагдагч Б.П Л.Найданпэлжээтэй бүлэглэн 2018 оны 12 дугаар сарын 11-ний өдрөөс 12-нд шилжих шөнө Төв аймгийн Алтанбулаг сумын 4 дүгээр багийн нутаг “Тост” гэх газраас Д.Энхжаргалын эзэмшлийн 3 тооны үхрийг бэлчээрээс хулгайлж бусдад 1,875,000 мянган төгрөгний хохирол учруулсан гэмт хэрэгт холбогджээ.

ТОДОРХОЙЛОХ нь:

 

            Шүүхийн хэлэлцүүлэгт:

            Шүүгдэгч Б.П мэдүүлэхдээ: “н.Найданпэлжээ нь манайд очсон. Тэр үед миний машин эвдэрсэн байсан. Машинаа асуух санаатай гэрээс гарсан юм. Хропийг нь үсрээд л 200.000 төгрөгөөр зарах байх, чи тэр үхрээ заагаад өгчих, тэгээд би чамд 200.000 төгрөг өгнө гэж хэлсэн. Тэгээд зааж өгсөн. Тэгээд ийм зүйл болсон. Хийсэн хэрэгтээ гэмшиж байна” гэв.

Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хэргийн газарт үзлэг хийсэн тэмдэглэл, гэрэл зургийн үзүүлэлтүүд /хх-ийн 8-10 тал/, хохирогч Д.Энхжаргалын мэдүүлэг /хх-ийн 18-19 тал/, 3 тооны үхрийг үнэлсэн үнэлгээний тайлан /хх-ийн 36-41 тал/, шүүгдэгч Б.Пүрэжамцын дансны хуулга /хх-ийн 86 тал/, яллагдагч Л.Найданпэлжээгийн хаан банкны дансны хуулга, /хх-ийн 85 тал/, гэрч О.Түвшинзаяагийн мэдүүлэг /хх-ийн 32 тал/, гэрч Ц.Алтанхуягийн мэдүүлэг /хх-ийн 33 тал/, гэрч З.Сандагийн мэдүүлэг /хх-ийн 34-35 тал/, шүүгдэгч Б.Пын мөрдөн байцаалтын шатанд яллагдагчаар мэдүүлсэн мэдүүлэг /хх-ийн 76 тал/ зэрэг баримтууд болно.

 

Шүүхийн хэлэлцүүлэгт шинжлэн судалсан дээрх нотлох баримтууд нь энэ хэрэгт хамааралтай, ач холбогдолтой, хууль ёсны, Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлуудыг хангалттай шалгаж тодруулсан, мөрдөн шалгах ажиллагааны явцад оролцогчийн хуулиар хамгаалагдсан эрхийг хасаж, хязгаарласан хуульд заасан шаардлагыг зөрчсөн гэх ноцтой зөрчил тогтоогдоогүй байна гэж үзлээ.

 

Шүүгдэгч Б.П Л.Найданпэлжээтэй бүлэглэн 2018 оны 12 дугаар сарын 11-ний өдрөөс 12-нд шилжих шөнө Төв аймгийн Алтанбулаг сумын 4 дүгээр багийн нутаг “Тост” гэх газраас Д.Энхжаргалын эзэмшлийн 3 тооны үхрийг бэлчээрээс хулгайлж бусдад 1,875,000 мянган төгрөгний хохирол учруулсан болох нь:

• Гэмт хэргийн талаарх гомдол мэдээлэл хүлээн авсан тэмдэглэл /хх-ийн 8 тал/
• Эд хөрөнгө битүүмжлэх тухай Прокурорын тогтоол /хх-ийн 13 тал/
• Хохирогч Д.Энхжаргалын 2018 оны мал тооллогын баримт /хх-ийн 23-25 тал/
• Алдагдсан 3 тооны үхрийг “ЭЙ ЖЭЙ ЖЭЙ ЭМ” ХХК-ны 1,875,000 төгрөгөөр үнэлсэн үнэлгээ /хх-ийн 39-44 тал/
• Эрүүгийн хэрэг үүсгэж яллагдагчаар  татах тухай Прокурорын тогтоол /хх-ийн 69 тал/
• Л.Найданпилжээгийн Хаан банкны дансны хуулга /хх-ийн 87 тал/
• Б.Пын Хаан банкны дансны хуулга /хх-ийн 88 тал/
• Эрүүгийн хэргийг тусгаарлах тухай Прокурорын 2020 оны 03 дугаар сарын 26-ны өдрийн тогтоол /хх-ийн 124 тал/
• Хэрэг учралын газарт үзлэг хийсэн “ Хэрэг учрал болсон гэх газрыг оролцогч Найданпилжээ, Б.П нар Төв аймгийн Алтанбулаг сумын 4 дүгээр багийн нутаг Тост гэх газарт ирж уулын урд хажуу дээр хохирогч Д.Энхжаргалын үхэр бэлчиж байсныг Найданпилжээгийн ногоон өнгийн мотоцикльтой сундалж ирж Найданпилжээд зааж өгсөн гэв. Найданпилжээ тус газраас ертөнцийн зүгээр баруун хойд зүг рүү зааж би дараа нь ганцаараа ирж мотоциклиороо үхрийг нь тууж өөрийнхөө өвөлжөө рүү туусан гэж заав, .... тус газарт үхрээ тууж ирээд 3 үхэр барьж аваад өөрийнхөө 79-35 ТӨА улсын дугаартай тээврийн хэрэгсэлд ачиж зарсан” гэх тэмдэглэл, үзлэгийг бэхжүүлж авсан гэрэл зургийн үзүүлэлтүүд /хх-ийн 08-10 тал/
• Хохирогч Д.Энхжаргалын мөрдөн байцаалтын шатанд мэдүүлсэн: “ Би 2018 оны 12 дугаар сард Улаанбаатар хот яваад 20-ны үеэр иртэл манай 3 тооны үхэр алга болсон байсан тэгээд би тэр хавиараа хайгаад олоогүй нас бие гүйцсэн улаан зүсмийн сувай үнээ буруу чих ганзага зөв чих онь имтэй, хар зүсмийн шүдлэн насны эр үхэр зөв чих онь буруу чих ганзага имтэй, улаан зүсмийн шүдлэн насны гунжин үхэр зөв чих онь буруу чих ганзага имтэй 3 тооны үхэр байсан...” гэх мэдүүлэг /хх-ийн 18-19 тал/
• 2 дахь удаагаа өгсөн ... “ Би Төв аймгийн Алтанбулаг сумын 4 дүгээр баг Тост гэх газраас 2018 оны 12 дугаар сарын 11-ний өдрөөс 12-нд шилжих шөнө өөрийн үхэрнээсээ бэлчээрт байхад нь 5 настай хээлтэй улаан үнээ, хар зүсмийн 3 настай шүдлэн эр үхэр, 3 настай улаан зүсмийн хээлтэй шүдлэн гунж нийт 3 толгой үхрээ алдсан...” гэх мэдүүлэг /хх-ийн 21 тал/
• Гэрч О.Түвшинзаяагийн мөрдөн байцаалтын шатанд мэдүүлсэн: “ Би Хаан банкны 5734046626 дугаарын данс эзэмшдэг, ... Би 2018 оны 12 дугаар сарын 13-ны өдөр Эмээлтийн малын амьд зах дээр өвлийн идэш авахаар очиход зарж байгаа малын хашаан дотор 3 үхэр байсан тэр 3 толгой үхрийг нэг хөдөөний залуу байгаа гээд зогсож байсан ингээд би тэр 3 толгой үхэрнээс улаан халзан зүсмийн хязаалан гэмээр насны үнээ 700.000 төгрөгөөр худалдан авч тус хүний данс руу мөнгөө шилжүүлсэн, тэр хүн хөх цэнхэр өнгийн дээгүүрээ бүхээгтэй портер машинтай байсан би улсын дугаарыг нь санахгүй байна, ... 2 уулаа улаан зүсмийн нэг нь шүдлэн эр охиныг нь сайн анзаараагүй багашаар үхэр байсан нөгөө нь улаан зүсмийн үнээ байсан” гэх мэдүүлэг, /хх-ийн 31 тал/
• Гэрч Ц.Алтанхуягийн мөрдөн байцаалтын шатанд мэдүүлсэн: “... Мах гэсэн утгатай шилжүүлсэн бол энэ хүн надад мах зарсан юм байна гэхдээ би энэ хүнийг ямар малын хэдэн малын мах зарсаныг одоо санахгүй байна. Гэхдээ би бодохдоо шилжүүлсэн мөнгөө тооцоолж үзэхэд үхрийн мах тухайн үед 6000 төгрөгийн ханштай байсан гэхээр дунджаар эр үхэр 160-210 кг татдаг байгаа 176 кг мах авлаа гэхэд 1,056,000 төгрөг болж байна” гэх мэдүүлэг /хх-ийн 32 тал/
• Гэрч З.Сандагийн мөрдөн байцаалтын шатанд мэдүүлсэн: “ Өглөө зах 06 цагт онгойгоод ченж нар зах дээр очиж хөдөөнөөс ирсэн хүмүүсээс махыг нь үзээд үнээ тохироод авдаг юм, би энэ байдлаар тус хүнтэй үнэ тохирч 3 үхрийн мах авсан болов уу гэж бодож байна 3 үхрийн мах хэд болсныг мэдэхгүй байна миний багцаагаар 3 сая төгрөг шилжүүлээд өөр зөрүү мөнгийг нь бэлнээр нь өгсөн болов уу гэж бодож байна, Хүчит шонхор зах руу амьд мал ордоггүй зөвхөн мах л ордог тийм учраас ямар насны үхэр байсныг нь мэдэхгүй байна нэг нь үнээ байсан нөгөө хоёр нь багавтар жинтэй үхэр байсан санагдаж байна” гэх мэдүүлэг /хх-ийн 33 тал/
• Яллагдагч Л.Найданпэлжээгийн мөрдөн байцаалтын шатанд мэдүүлсэн: “... Пүрэвжамцтай хамт гэрийн гадаа нь гарч ирээд хамтарч мал хулгайлахаар ярилцаад Пүрэвжамц надад хандаж манай Энхжаргал ахын үхэр энд эзэнгүй байгаад байгаа хоёулаа очиж сувай үхэр байна уу харъя гэхээр нь би мотоциклио асааж унаад Пүрэвжамцыг сундлаад тост гэх газарт бэлчээрлэж байсан үхэр дээр очоод 3 толгой үхэр хулгай хийж зарахаар тохиролцоод ... би өөрөө буцаж очиж нөгөө үхэрнээс хар үхэр, улаан үхэр, улаан үнээ нийт 3 толгой үхэр мотоцикльтой тууж яваад өвөлжөөн дээр аваачаад ганцаараа өөрийн эзэмшлийн 79-35 ТӨА улсын дугаартай портер маркын тээврийн хэрэгсэлд ачаад ганцаараа шөнөдөө Улаанбаатар хотын Эмээлт зах дээр очоод тэндхийн амьд малын зах дээр үхрээ буулгаад үхэрнүүдээ зарсан байгаа...” гэх мэдүүлэг /хх-ийн 79-80 тал/
•  Шүүгдэгч Б.Пын мөрдөн байцаалтын шатанд яллагдагчаар мэдүүлсэн: “...Би энэ зүйл ангийг хүлээн зөвшөөрч байна. би Найданпэлжээд миний машины кроп эвдэрчихсэн гэж ярьж байхад Найданпэлжээ надад хандаж наадах чинь үсрээд л 200,000 төгрөг байдаг шүү дээ чи надад Энхжаргал ахынхаа үхрийг заагаад бгчих хоёулаа тэдний үхрээс үхэр хулгай хийж зараад би кропны чинь 200,000 төгрөгийг өгье гэж хэлээд намайг мотоцикльтой сундлаад Энхжаргал ахын үхэр бэлчиж байгаа газарт очиж би зааж өгсөн. Би нөгөө үхэрнээс 3 үхэр туугаад гэрнийхээ гадаа аваачсан гэж хэлэхээр нь би айгаад байна чи тэр 3 үхрийг тавиад явуулчих гэж хэлэхэд айх хэрэггүй хөгшин чинь цэвэрхэн хийнэ гэж хэлээд яваад өгсөн ингээд маргааш өдөр нь надтай ярьж дансны дугаар аваад 200,000 төгрөг шилжүүлсэн...”гэх мэдүүлэг /хх-ийн 74-75 тал/ зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдон тогтоогдож байна.

Шүүхээс шүүгдэгчид холбогдох хэргийн нотлох баримтуудыг үнэлж мэтгэлцэгч талуудын дүгнэлтийг сонсоод дараах дүгнэлтийг хийв.

Бусдын малыг хулгайлах гэмт хэргийн нөхцөл байдалд хийсэн хууль зүйн дүгнэлтийн талаар: 

Шүүгдэгч Б.П нь Л.Найданпэлжээтэй бүлэглэн 2018 оны 12 дугаар сарын 11-ний өдрөөс 12-нд шилжих шөнө Төв аймгийн Аптанбулаг сумын 4 дүгээр багийн нутаг “Тост” гэх газраас Д.Энхжаргалын эзэмшлийн 3 тооны үхрийг бэлчээрээс хулгайлж бусдад 1,875,000 төгрөгний хохирол учруулсан үйлдэл нь Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн объектив талын шинжүүдийг бүрэн хангасан.

Уг гэмт хэрэг нь гэм буруугийн санаатай хэлбэрээр үйлдэгдсэн.

Эрүүгийн хуулийн 2.3 дугаар зүйлийн 1 дэх хэсэгт зааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгоно.

Шүүгдэгч Б.П нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байжээ гэж үзэх үндэслэлтэй.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, шүүгдэгч Б.Пийн үйлдэл нь  Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэргийн шинжийг бүрэн хангасан, прокуророос ирүүлсэн хэргийн зүйлчлэл тохирсон байх тул шүүгдэгч Б.Пийг бусдын малыг хулгайлах гэмт хэргийг үйлдсэн гэм буруутайд тооцож, хуульд заасан эрүүгийн хариуцлага оногдуулах нь зүйтэй байна.  

 

Гэмт хэргийн улмаас учирсан хохирол, хор уршгийн талаар:

Шүүхээс хохирогч Д.Энхжаргалд шүүх хуралдааны товыг мэдэгдэхэд “би хохирлоо барагдуулсан, нэхэмжлэх зүйлгүй тул шүүх хуралдаанд оролцохгүй” гэсэн байх тул энэ шүүх хуралдаанаар хэлэлцэх хохирлын асуудал байхгүй байна.

Эрүүгийн хариуцлага хүлээлгэх талаар:

-Шүүхийн хэлэлцүүлэгт оролцсон улсын яллагчаас “Шүүгдэгч Б.Пийг Эрүүгийн хуулийн ерөнхий ангийн 1.9, 3.7 дугаар зүйлийг тус тус журамланЭрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар 1 жилийн хугацаагаа хорих ял оногдуулж, оногдуулсан хорих ялыг нээлттэй хорих байгууллагад эдлүүлэх” ялын дүгнэлтийг,

- Шүүхийн хэлэлцүүлэгт оролцсон шүүгдэгчийн өмгөөлөгч Н.Баяр нь “Б.Пийн хувьд ял эдлүүлэхгүй байх олон үндэслэл байгаа гэж үзэж байна. Гэм буруугаа хүлээн зөвшөөрсөн. Харин ял шийтгэл ногдуулахдаа дараах хуульд заасан нөхцөл байдлыг харгалзан үзнэ үү. Нэгдүгээрт шүүгдэгч Б.П нь хохирлыг сайн дураараа мөрдөн байцаалтын шатанд төлсөн. Мөн анх удаагаа хөнгөн гэмт хэрэг үйлдсэн, хэргийн оролцсон байдлаар нь харгалзаж үзээч гэж хүсэж байна. Хувийн байдлын хувьд ам бүл 5, аавтайгаа нийлээд 6. Аав нь асаргаанд байдаг, 3 хүүхдийн хамт 6 уулаа амьдардаг. Аавынх нь биеийн байдлын хувьд тал цус харвалттай хүн байдаг. Б.П нь маш хөдөлмөрч хүн ба гэр бүлээ авч явж, эхнэр хүүхдээ тэжээхийн тулд айлын малыг маллаад 100 гаруй малтай болсон. Түүнийгээ сүүлийн хоёр жил өсгөөд 500-600 малтай болсон. Энэ хүн нь амьдарлынхаа төлөө явдаг гэдэг зүйлийн шүүх дүгнэж үзээсэй гэж хүсэж байна. Иймд Эрүүгийн хуулийн 7.1 дүгээр зүйлд зааснаар хорих ял оногдуулахгүйгээр 1 жилийн хугацаагаар тэнсэж өгнө үү” гэх саналыг тус тус гаргасан байна.

Шүүгдэгч Б.Пийн холбогдсон Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэрэг нь Эрүүгийн хуулийн ерөнхий ангийн 2.6 дугаар зүйлийн 2 дахь хэсэгт зааснаар хөнгөн гэмт хэргийн ангилалд хамаарч байна.

 Шүүх шүүгдэгч Б.Пад эрүүгийн хариуцлага хүлээлгэхдээ мөрдөн байцаалтын шатанд болон шүүхийн шатанд гэм буруугийн талаар маргаагүй, бусдад учруулсан хохирлоо нөхөн төлсөн, нийгмийн аюулын хэр хэмжээ, хор уршиг зэргийг харгалзан  Эрүүгийн хуулийн 1.3 дугаар зүйлийн 1-д “Эрүүгийн хариуцлага нь тухайн хүн, хуулийн этгээдийн үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон байна” гэсэн зарчимд нийцүүлэн шүүгдэгч Б.Пийг Эрүүгийн хуулийн ерөнхий ангийн 1.9, 3.7, мөн зүйлийн 7.1 дүгээр зүйлийн 1 дэх хэсэгт заасныг журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар хорих ял оногдуулахгүйгээр 1 жилийн хугацаагаар тэнсэж, Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч Б.Пад үүрэг болгож шийдвэрлэлээ.  

 

Бусад асуудлаар:

Яллагдагч Л.Найданпэлжээгийн өмнө үйлдсэн эрүүгийн 201719000294 дугаартай хэргийг давж заалдах шатны шүүхийн магадлалаар хүчингүй болгож, эрүүгийн 1934001180230 дугаартай хэрэгт нэгтгэн шалгах үндэслэлээр буцааж шийдвэрлэж, мөрдөн шалгах ажиллагаа явцад эрүүгийн 1934001180230 дугаартай эрүүгийн хэргийн 201719000294 хэрэгт нэгтгэсэн байна.

Төв аймгийн Прокурорын газраас Төв аймгийн Алтанбулаг сумын 4 дүгээр багийн нутаг “Тост” гэх газраас Д.Энхжаргалын эзэмшлийн 3 тооны үхрийг бэлчээрээс хулгайд алдсан хэрэгт яллагдагч Л.Найданпэлжээд холбогдох эрүүгийн 201719000294 дугаартай хэргээс Батбаярын Пүрэвжамцад холбогдох хэргийг 2020 оны 03 дугаар сарын 26-ны өдрийн Прокурорын тогтоолоор тусгаарлаж хэргийг шүүхэд ирүүлсэн байна.

Эрүүгийн 1934001180230 дугаартай хэрэгт шүүгдэгч Б.П, Л.Найданпэлжээ нарын гэмт хэрэг үйлдэхдээ ашигласан 79-35 ТӨА улсын дугаартай Хюндай Портер маркийн тээврийн хэрэгсэл, Даюун маркийн мотоцикль нь яллагдагч Л.Найданпэлжээгийн эзэмшлийнх нь болох нь хэрэгт авагдсан баримтаар нотлогдож байх тул шүүгдэгч Б.Паас гэмт хэрэг үйлдэхдээ ашигласан эд хөрөнгийн хохиролыг гаргуулж улсын орлого болгох үндэслэл тогтоогдохгүй байна.

Харин хэрэгт яллагдагч Л.Найданпэлжээгийн эзэмшлын гэмт хэрэг үйлдэхдээ ашигласан 79-35 ТӨА улсын дугаартай Хюндай Портер маркийн тээврийн хэрэгсэл, Даюун маркийн мотоцикль нь 2019 оны 06 дугаар сарын 07-ны өдрийн №29 дугаартай Прокурорын тогтоолоор битүүмжлэгдсэнг хэвээр үлдээх нь зүйтэй байна.   

 

Энэ хэрэгт эд мөрийн баримтаар хураагдан ирсэн зүйлгүй, иргэний бичиг баримт шүүхэд ирээгүй, шүүгдэгч Б.П нь бусдад төлөх төлбөргүй, цагдан хоригдсон хоноггүй болохыг тус тус дурдах нь зүйтэй байна.  

            Монгол Улсын Шүүхийн тухай хуулийн 31 дүгээр зүйлийн 31.1, 31.3 дугаар зүйлийн 31.3.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг тус тус удирдлага болгон

ТОГТООХ нь:

1. Шүүгдэгч Б.Пыг бусдын малыг хулгайлах гэмт хэргийг үйлдсэн гэм буруутайд тооцсугай.

 

2. Шүүгдэгч Б.Пыг Эрүүгийн хуулийн ерөнхий ангийн 1.9, 3.7, мөн хуулийн 7.1 дүгээр зүйлийн 1 дэх хэсэгт заасныг тус тус журамлан Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар хорих ял оногдуулахгүйгээр 1 /нэг/ жилийн хугацаагаар тэнссүгэй.  

 

3. Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.5-д зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад урьдчилан мэдэгдэхийг шүүгдэгч Б.Пад үүрэг болгосугай.

                                              

4. Шийтгэх тогтоол хүчин төгөлдөр болтол шүүгдэгч Б.Пад урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

5. Эрүүгийн 1934001180230 дугаартай хэрэгт яллагдагч Л.Найданпэлжээгийн эзэмшлийн 79-35 ТӨА улсын дугаартай Хюндай Портер маркийн тээврийн хэрэгсэл, Даюун маркийн мотоциклийг битүүмжилсэн 2019 оны 06 дугаар сарын 07-ны өдрийн №29 дугаартай Прокурорын тогтоолыг хэвээр үлдээсүгэй.

 

6. Хэрэгт эд мөрийн баримтаар хураагдан ирсэн зүйлгүй, иргэний бичиг баримт шүүхэд ирээгүй, шүүгдэгч Б.П нь бусдад төлөх төлбөргүй, цагдан хоригдсон хоноггүй болохыг тус тус дурдсугай.

 

7. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, түүний өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах М.Оюунсүрэнд даалгасугай. 

 

8.  Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурьдсугай.

 

9. Шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

ДАРГАЛАГЧ,  ШҮҮГЧ                            Ю.ЭНХМАА