МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

-шүүх хуралдааны нарийн бичгийн дарга Н.Өнө-Эрдэнэ

-улсын яллагчаар А.Азжаргал

-шүүгдэгч Х.Л нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 17.5 дугаар зүйлийн 1 дэх хэсэгт зааснаар яллах дүгнэлт үйлдэж, хэргийг  хялбаршуулсан журмаар хянан шийдвэрлүүлэхээр ирүүлсэн Х.Лнд холбогдох 2034000000561 дугаартай эрүүгийн хэргийг 2020 оны 10 дугаар сарын 13-ны өдөр хүлээн авч хянан хэлэлцэв.

 

Холбогдсон хэргийн талаар /яллах дүгнэлтэд дурдагдсанаар/

Яллагдагч Х.Л нь 2020 оны 09 дүгээр сарын 05-ны өдөр Төв аймгийн Зуунмод сумын 5 дугаар багийн нутаг дэвсгэрт үйл ажиллагаагаа явуулдаг “Ар Урт” нэртэй хүнсний дэлгүүрийн орчмоос 25-23 ТӨА улсын дугаартай автомашинаар үйлчлүүлэх үедээ С.Тамирын тухайн тээврийн хэрэгсэлд гээсэн Хуавай-9 загварын гар утсыг авч бусдын гээгдэл эд хөрөнгийг бусдын өмчлөл, эзэмшилд байгааг мэдсээр байж завшиж, С.Тамирхүүд 535.400 төгрөгийн хохирол  учруулсан гэмт хэрэгт холбогджээ.

ТОДОРХОЙЛОХ нь:

Шүүгдэгч Х.Лгийн хэргээ хүлээн мэдүүлсэн мэдүүлэг нь хохирогч, гэрч нарын мэдүүлэг болон бусад нотлох баримтуудаар давхар нотлогдон тогтоогдсон тул түүний мэдүүлгийг яллах талын нотлох баримтад тооцсон.

Шүүхийн хэлэлцүүлэгт яллах болон цагаатгах талуудын хүсэлтээр дараах нотлох баримтуудыг шинжлэн судлав.

Үүнд:

Хохирогч С.Тамирхүүгийн мэдүүлэг \хх-ийн 7-10 тал\, Эй Жэй Жэй Эм ХХК-ийн 2020 оны 09 дүгээр сарын 29-ний өдрийн 07/425 дугаартай үнэлгээний тайлан \хх-ийн 19-25 тал\, шүүгдэгч Х.Лгийн мэдүүлэг /хх-ийн 13-14, 36-37 тал/ зэрэг болно.

Шүүгдэгч Х.Л нь 2020 оны 09 дүгээр сарын 05-ны өдөр Төв аймгийн Зуунмод сумын 5 дугаар багийн нутаг дэвсгэрт үйл ажиллагаагаа явуулдаг “Ар Урт” нэртэй хүнсний дэлгүүрийн орчмоос 25-23 ТӨА улсын дугаартай автомашинаар үйлчлүүлэх үедээ С.Тамирын тухайн тээврийн хэрэгсэлд гээсэн Хуавай-9 загварын гар утсыг авч бусдын гээгдэл эд хөрөнгийг бусдын өмчлөл, эзэмшилд байгааг мэдсээр байж завшиж, С.Тамирхүүд 535.400 төгрөгийн хохирол  учруулсан гэмт хэргийг үйлдсэн болох нь:

• Гэмт хэргийн талаарх гомдол мэдээллийг хүлээн авсан тэмдэглэл /хх-ийн 1 тал/
• Эрүүгийн хэрэг үүсгэж яллагдагчаар татах тухай Прокурорын тогтоол \33-34 тал/
• Хэргийг хялбаршуулсан журмаар хянан шийдвэрлэх тухай Прокурорын тогтоол /хх-ийн 51 тал/
• "Эй Жэй Жэй Эм" ХХК-ны 2020 оны 09 дүгээр сарын 29-ний өдрийн 07/425 дугаартай "...Хуавэй-9 маркийн гар утас 535.400 төгрөг" гэх үнэлгээний тайлан /хх-ийн 19-25 тал/
• Хохирогч С.Тамирхүүгийн мөрдөн байцаалтын шатанд мэдүүлсэн: "...Би Төв аймгийн Зуунмод сумын Төв эмнэлэгт ажилладаг юм. 2020 оны 09 дүгээр сарын 05-ны өдөр ажлаасаа гараад таксинд суусан юм. Тэгээд гэрийн газаа буугаад гэртээ орсон ба 10 минутын дараа утсаа гэнэт санаад халаасандаа үзэхэд байхгүй байхаар нь сая миний суусан таксинд унагаагаад мартаад буусан байна гэж бодоод маргааш буюу 2020 оны 09 дүгээр сарын 06-ны өдөр уг таксины жолоочтой уулзаж асуусан чинь чиний дараа согтуу 2 хүн суусан ах нь сайн мэдэхгүй байна гэж хэлсэн. Ийм учраас цагдаагийн байгууллагад хандаж байна. Би 25-23 ТӨА улсын дугаартай машинд суусан маркийг нь санахгүй байна. Би гар утсаа хэзээ аван талаараа санахгүй байна Хуавэй-9 загварын утсаа 1.200.000 төгрөгөөр авсан...Төв аймгийн Нэгдсэн эмнэлэг дээрээс эмч нарт өгч байсан утас юм" гэх мэдүүлэг /хх-ийн 7-10 тал/,
• Шүүгдэгч Х.Лгийн мөрдөн байцаалтын шатанд мэдүүлсэн: "...Би 2020 оны 09 дүгээр сарын 05-ны өдөр Төв амйгийн Зуунмод сумын 5 дугаар багийн Ар-Урт гэх нэртэй дэлгүүрийн урдаас Төнхбат гээд танил хүнтэй таксинд суусан юм. Тэгээд таксины ар талын суудлаас 1 цэнхэр өнгийн утас олсон...Би таксины ар талын суудал дээрээс олсон цэнхэр өнгийн гар утасаа авч буугаад гэртээ харьсан. Би тэр утсыг хэн нэгэнд өгөөгүй, надад байсан юм. Би тухайн үедээ өөрөө аваагүй хүнд өгчихсөн гээд хэлчихвэл гайгүй байх гээд айсандаа тэгээд хэлчихсэн юм. Яг үнэндээ би тэр утсыг хэн нэгэнд өгөөгүй. Би өөрийн гэм буруугаа хүлээн зөвшөөрч байна..Би эзэнд нь утсыг нь хүлээлгээд өгчихсөн. Би өөрийн үйлдсэн гэм буруугаа хүлээн зөвшөөрч байна" гэх мэдүүлэг /хх-ийн 13-14, 36-37 тал/ зэрэг болон Эрүүгийн хэрэг хянан шийдвэрлэх тухай хуульд заасан үндэслэл журмын дагуу бэхжүүлж авсан бусад бичгийн нотлох баримтуудаар нотлогдон тогтоогдож байна.

 

Шүүгдэгч Х.Лгийн ял шийтгэлийн тэмдэглэл, иргэний үнэмлэхийн лавлагаа болон бусад хувийн байдлыг тогтоосон баримтуудыг шүүхийн хэлэлцүүлэгт судалсан болно.

 

Мөрдөн шалгах ажиллагааны явцад Х.Л нь 2020 оны 9 сарын 30-ны өдөр яллагдагчаар мэдүүлэг өгөхдөө гэмт хэрэг үйлдсэн гэм буруугаа хүлээн зөвшөөрч, хэргээ хялбаршуулсан журмаар хянан шийдвэрлүүлэх тухай хүсэлтээ гаргажээ. /хх-ийн 35, 50 тал/,

 

Төв аймгийн прокурорын газрын хяналтын прокурор А.Азжаргал нь хэргийг хялбаршуулсан журмаар хянан шийдвэрлэх үндэслэлтэй гэж үзэж, хэргийг хялбаршуулсан журмаар хянан шийдвэрлүүлэх тухай яллагдагчийн хүсэлтийг хүлээн авч 2020 оны 10 сарын 13-ны өдөр 157 дугаартай “хэргийг хялбаршуулснаар хянан шийдвэрлэх тухай” прокурорын тогтоол гаргаж, хуульд заасан хугацаанд мөрдөн байцаалт явуулж, Эрүүгийн хэрэг хянан шийдвэрлэх тухай хуулийн 17.5 дугаар зүйлийн 1 дэх хэсэгт заасан хэргийн зүйчлэл, түүнд хүлээлгэх эрүүгийн хариуцлагын төрөл, хэмжээний тухай прокурорын саналыг /хх-56 тал/ 2020 оны 10 сарын 13-ны өдөр яллагдагчид танилцуулж, яллагдагч Х.Л нь хүлээн зөвшөөрч гарын үсэг зурж баталгаажсанаар, мөн өдөр яллах дүгнэлт үйлдэн хэргийг шүүхэд шилжүүлсэн байна.

Х.Лд холбогдох хэргийг хүлээн авч танилцаад хэргийг хянан шийдвэрлэхэд боломжтой гэж шүүх үзэж, шүүх хуралдааныг зарлан явуулахад Эрүүгийн хэрэг шийдвэрлэх тусгай журам зөрчөөгүй, хэргийг хялбаршуулснаар хянан шийдвэрлүүлэхээр ирүүлсэн Прокурорын тогтоол үндэслэлтэй байна.

 

Хэрэгт авагдсан баримтаар шүүгдэгч Х.Л нь гэмт хэрэг үйлдсэн нь нотлогдсон, гэмт хэрэг үйлдсэн гэм буруугаа сайн дураараа хүлээн зөвшөөрсөн, гэмт хэргийн улмаас учруулсан хохирол, хор уршгийг нөхөн төлсөн, гэмт хэрэг үйлдсэн гэм буруугаа хүлээн зөвшөөрсний улмаас үүсэх хууль зүйн үр дагаварыг шүүгдэгч нь ойлгосон байх тул шүүгдэгч Х.Лг гэмт хэрэг үйлдсэн гэм буруутайд тооцож, 

прокурорын саналыг хүлээн авч, саналын хүрээнд шүүгдэгчийн эрх зүйн байдлыг дордуулахгүйгээр эрүүгийн хариуцлага хүлээлгэх нь зүйтэй байна.

 

Бусад асуудлаар:

Хэрэгт эд мөрийн баримтаар хураагдан ирсэн зүйлгүй, битүүмжлэгдсэн болон иргэний бичиг баримт шүүхэд ирээгүй, шүүгдэгч Х.Л нь цагдан хоригдсон хоноггүй, бусдад төлөх төлбөргүй болохыг тус тус дурдах нь зүйтэй байна.

 

Монгол Улсын Шүүхийн тухай хуулийн 31 дүгээр зүйлийн 31.1, 31.3, Эрүүгийн хэрэг хянан шийдвэрлэх тухай хуулийн 17.4, 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт тус тус заасныг удирдлага болгон

 

ТОГТООХ нь:

1. Шүүгдэгч Х.Лнг бусдын гээгдэл эд хөрөнгийг завших гэмт хэргийг үйлдсэн гэм буруутайд тооцсугай.

 

2. Шүүгдэгч Х.Лнг Эрүүгийн хуулийн тусгай ангийн 17.5 дугаар зүйлийн 1 дэх хэсэгт зааснаар дөрвөн зуун тавин нэгжтэй тэнцэх хэмжээний буюу 450.000 \дөрвөн зуун тавин мянга\ төгрөгөөр торгох ялаар шийтгэсүгэй.

 

3. Эрүүгийн хуулийн 5.3 дугаар зүйлийн 5 дахь хэсэгт заасныг баримтлан шүүгдэгч Х.Лг таван дөрвөн зуун тавин нэгжтэй тэнцэх хэмжээний буюу 450.000 \дөрвөн зуун тавин мянга\ төгрөгөөр торгох ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт заасан хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож хорих ялаар солихыг сануулсугай.

 

4. Шийтгэх тогтоол хүчин төгөлдөр болтол шүүгдэгч Х.Лд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

5. Хэрэгт эд мөрийн баримтаар хураагдаж ирсэн зүйлгүй, хэрэгт битүүмжлэгдсэн эд хөрөнгөгүй, иргэний бичиг баримт шүүхэд ирээгүй, шүүгдэгч Х.Л нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

 

6. Эрүүгийн хэрэг хянан шийдвэрлэх тухай хуулийн 38.1, 38.2 дугаар
   зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
   өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

7. Шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлсүгэй.

 

 

 

 

 

ДАРГАЛАГЧ, ШҮҮГЧ                                Ю.ЭНХМАА