Хариуцагч нэхэмжлэлийн шаардлагыг

хүлээн зөвшөөрснийг баталж,

                                             хэргийг хэрэгсэхгүй болгох тухай

 

Өмнөговь аймаг дахь сум дундын иргэний хэргийн анхан шатны шүүхийн Ерөнхий шүүгч Р.Уранчимэг би

 

         Нэхэмжлэгч: Улаанбаатар хот Сонгинохайрхан дүүрэг 16 дугаар хороо Өнөр хороолол 41а байрны 54 тоотод оршин суух Алтайн өртөөч овогт Адъяагийн Лхагвасүрэн /РД: КГ75052611/

 

           Хариуцагч: Өмнөговь аймаг Гурвантэс сум 2 дугаар баг Шугшаагийн  3-2 тоотод оршин суух Өртөөчин овогт Сүрмаагийн Энхтайван /РД: КГ75120911/

         

 

13600000 төгрөг гаргуулах тухай нэхэмжлэлийг 2017 оны 02 дугаар сарын 20-ны өдөр хүлээн авч, 2017 оны 02 дугаар сарын 24-ний өдөр иргэний хэрэг үүсгэн

 

ТОДОРХОЙЛОХ НЬ:

 

Нэхэмжлэгч А.Лхагвасүрэн шүүхэд гаргасан нэхэмжлэлдээ: Хариуцагч С.Энхтайван нэхэмжлэгч А.Лхагвасүрэнгээс 2015 оны 06 дугаар сарын 15-ны өдөр 10000000 төгрөгийг сарын 6 хувийн хүүтэй, 6 сарын хугацаатай, зээлийг эргүүлэн төлөх хугацаа хэтэрвэл хэтрүүлсэн хоног тутамд 0,5 хувийн алданги төлөх нөхцөлтэйгөөр зээлийн гэрээг бичгээр байгуулж зээл авсан. Гэтэл С.Энхтайван өнөөг хүртэл нэг ч төгрөг төлөөгүй байгаа болно. А.Лхагвасүрэн удаа дараа шаардсан боловч арга саам хийж удахгүй бөөнд нь төлнө гэсээр өнөөг хүрч байгаа болно. Дээрх зээлийн гэрээгээр хариуцагч С.Энхтайван нь хүү 6х600000=3600000 төгрөг, үндсэн зээл 10000000 төгрөг, нийт 13600000 төгрөг төлөх үүрэгтэй. Иймд хариуцагч С.Энхтайванаас зээлийн гэрээний үүрэг 13600000 төгрөгийг гаргуулж нэхэмжлэгч А.Лхагвасүрэнд олгуулахаар шийдвэрлэж өгнө үү гэжээ.

 

Хариуцагч С.Энхтайван шүүхэд ирүүлсэн хариу тайлбартаа: Адъяагийн Лхагвасүрэнгийн нэхэмжлэлтэй иргэний хэргийн хариуцагч С.Энхтайван миний бие нь нэхэмжлэлийн шаардлагыг хүлээн зөвшөөрч байна. Иймд тус хэргийг хялбаршуулсан журмаар шийдэж өгнө үү гэжээ.

 

ҮНДЭСЛЭХ НЬ:

 

Хариуцагч С.Энхтайван нь нэхэмжлэлийн шаардлагыг хүлээн зөвшөөрсөн болох нь түүний шүүхэд ирүүлсэн “Адъяагийн Лхагвасүрэнгийн нэхэмжлэлтэй иргэний хэргийн хариуцагч С.Энхтайван миний бие нь нэхэмжлэлийн шаардлагыг хүлээн зөвшөөрч байна. Иймд тус хэргийг хялбаршуулсан журмаар шийдэж өгнө үү” гэсэн тайлбараар нотлогдож байх тул хариуцагч нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох үндэслэлтэй байна.

 

Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.1, 74.2, 74.4, 75, 123 дугаар зүйлийн 123.1 дэх хэсэгт заасныг  удирдлага болгон ЗАХИРАМЖЛАХ нь:

 

1. Хариуцагч С.Энхтайван нь А.Лхагвасүрэнгийн 13600000 төгрөг гаргуулах тухай нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгосугай.
2. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар С.Энхтайван нь 13600000 төгрөгийг А.Лхагвасүрэнд төлж хохиролгүй болго гэж захирамжилсныг сайн дураар үл биелүүлбэл шүүхийн шийдвэрийн нэгэн адил албадан гүйцэтгэхийг дурдсугай.
3. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэг, Улсын тэмдэгтийн хураамжийн тухай хуулийн 7 дугаар зүйлийн 7.1.1 дэх хэсэгт зааснаар А.Лхагвасүрэнгийн улсын тэмдэгтийн хураамжид төлсөн 225950 төгрөгийг орон нутгийн төсвийн орлогод хэвээр үлдээж, хариуцагч С.Энхтайванаас улсын тэмдэгтийн хураамжид 112975 төгрөг, орон нутгийн төсвийн орлогоос 112975 төгрөгийг тус тус гаргуулж А. Лхагвасүрэнд олгосугай.

Энэ захирамжид зохигчид давж заалдах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай.

 

 

 

 

 

 

ЕРӨНХИЙ ШҮҮГЧ                                   Р.УРАНЧИМЭГ