Шүүх | Өвөрхангай аймгийн Хархорин сум дахь сум дундын шүүх |
---|---|
Шүүгч | Цэгмидийн Дагиймаа |
Хэргийн индекс | 146/2016/0048/Э |
Дугаар | ШЦТ0051 |
Огноо | 2016-09-26 |
Зүйл хэсэг | 148.1., |
Улсын яллагч | Д.Алимаа |
Өвөрхангай аймгийн Хархорин сум дахь сум дундын шүүхийн Шийтгэх тогтоол
2016 оны 09 сарын 26 өдөр
Дугаар ШЦТ0051
Өвөрхангай аймгийн Хархорин сум дахь Сум дундын шүүхийн эрүүгийн хэргийн шүүх хуралдааныг шүүгч Ц.Дагиймаа даргалж,
Улсын яллагч: Д.Алимаа
Шүүгдэгч: Б.Д
Иргэний нэхэмжлэгч Б.Хэнмэдхэв
Нарийн бичгийн дарга Д.Цэвэлмаа нарыг оролцуулан тус шүүхийн эрүүгийн шүүх хуралдааны танхимд нээлттэй хийсэн хуралдаанд:
Өвөрхангай аймгийн Хархорин сум дахь Сум дундын Прокурорын газраас Монгол улсын Эрүүгийн тусгай ангийн хуулийн 148 дугаар зүйлийн 148.1-т зааснаар яллагдагчаар татах тогтоол баталж ирүүлсэн А овгийн Б-н Дт холбогдох 201615010119 тоот эрүүгийн хэргийг 2016 оны 09 дүгээр сарын 21-ний өдөр хүлээн авч хянан хэлэлцэв.
Биеийн байцаалт:
Шүүгдэгч: Монгол улсын иргэн, 19.... оны 06 дугаар сарын 08-ны өдөр төрсөн, 24 настай, эмэгтэй, бүрэн дунд боловсролтой, мэргэжилгүй, ам бүл 11, эцэг, эх дүү нарын хамт Өвөрхангай аймгийн ...... сумын ..... баг, ...... 03-03 тоотод оршин суух, улсаас авсан гавъяа шагнал, ял шийтгэлгүй, бие эрүүл, ухаан бүрэн, хэрэг хариуцах чадвартай, А овгийн Б-н Д. /РД:......./
Холбогдсон хэргийн талаар:
Яллагдагч Б.Д нь иргэн Э.Эээс 2016 оны 07 дугаар сарын 27-ны өдөр Хархорин суманд цэцэрлэгийн туслах багшийн сургалтанд суулгаж гэрчилгээ олгоно гэж залилан 200.000 төгрөг авсан гэмт хэрэгт холбогджээ. /яллах дүгнэлтэд дурьдсанаар/
ТОДОРХОЙЛОХ нь:
Шүүхийн хэлэлцүүлэгт дараах нотлох баримтуудыг шинжлэн судлав.
Үүнд:
Шүүгдэгч Б.Д нь иргэн Э.Эээс 2016 оны 07 дугаар сарын 27-ны өдөр Хархорин суманд цэцэрлэгийн туслах багшийн сургалтанд суулгаж гэрчилгээ олгоно гэж залилан 200.000 төгрөг авсан гэмт хэргийг үйлдсэн болох нь шүүх хуралдаанд хэлэлцэгдсэн дараах нотлох баримтуудаар нотлогдон тогтоогдож байна.
Үүнд: Хохирогч Э.Э мөрдөн байцаалтанд: ... Д гэх хүн надруу ойр ойрхон залгаж цэцэрлэгийн туслах багшийн сертифкат гаргаж өгнө гэж хэлээд байсан. 2016 оны 07 дугаар сарын 20-ны өдөр миний иргэний үнэмлэхийг канондож аваад 2 хувь цээж зураг аваад би хот явлаа гэж хэлээд явсан..., ...тэгэхээр нь Анхцэцэг гэх хүний нэр дээр байдаг 5925123073 гэсэн дансруу 2016 оны 07 дугаар сарын 27-ны өдөр 200000 төгрөг шилжүүлсэн. 2016 оны 08 дугаар сарын 01-ний өдрөөс эхлээд сургалт нь эхэлнэ гэж хэлсэн... гэсэн мэдүүлэг,
Гэрч Б.Х мөрдөн байцаалтанд ... Д гэх хүнтэй тааралахад цэцэрлэгийн туслах багшийн сургалт явуулах гэж байгаа та суух уу? гэж надаас асуусан..., ...маргааш нь Д надруу залгаад таныг бүртгүүлчихлээ төлбөрөө бичиг баримттайгаа аваад ир гэж хэлсэн..., би банкан дээр очоод төлбөрийг нь шилжүүлэх гээд дугаар авахад тухайн үед банк маш их хүнтэй байсан тул 115 хүний дараа байсан..., ...тэгээд Д чиний дугаар болоогүй юм чинь би хийчихье цаанаасаа яаруулаад байна гэрчилгээг чинь гаргах гээд байна гэж хэлэхээр нь би мөнгөө өгсөн... гэсэн мэдүүлэг,
Гэрч Р.А-н мөрдөн байцаалтанд ... манай нөхөр эм тарианы мөнгө явуулж байгаа та надад дансны дугаараа виза карттайгаа өгчих гэж хэлээд аваад явсан... гэсэн мэдүүлэг,
Гэрч М.Р-ын мөрдөн байцаалтанд... 2016 оны 07 дугаар сарын сүүлээр Дтай Түмэнбаяр гэх бөө охины гэрт тааралдаад юм ярьж байхад Д би 1-р цэцэрлэгт туслахаас нь авахуулаад ажиллаж байгаад магистрт сураад мэргэжлийн цэцэрлэгийн багш болсон. Одоо хотод 82-р цэцэрлэгт багш хийдэг гэж ярьсан..., энд 4-5 хүн бүрдүүлчих юм бол манай багш ирж хичээл заагаад цэцэрлэгийн туслах багшийн гэрчилгээ олгоно..., ...тэгэхээр нь би охин Энхцэцэгийг суулгачихвал зүгээр юм байна гээд охиныхоо утасны дугаарыг өгсөн юм... гэсэн мэдүүлэг,
Шүүгдэгч Б.Дын хэрэг бүртгэлтийн шатанд өгсөн мэдүүлэгүүд,
Эрүүгийн хэрэг үүсгэх тогтоол, гэмт хэргийн талаар гомдол мэдээлэл хүлээн авсан тэмдэглэл, Хаан банкны орлогын мэдүүлэг, шүүгдэгч Б.Дын хувийн байдлын талаар нотлох баримтууд, ял шийтгэгдсэн эсэхийг шалгах хуудас зэрэг нотлох баримтууд болно.
Иймд шүүгдэгч Б.Дт холбогдох хэргийн зүйлчлэл тохирсон байх тул Б.Дыг Эрүүгийн хуулийн тусгай ангийн 148 дугаар зүйлийн 148.1 дэх хэсэгт заасан гэмт хэрэг үйлдсэн гэм буруутайд тооцож, хуульд заасан ял оногдуулах үндэслэлтэй байна гэж шүүх дүгнэв.
Хохирогч Э.Эт шүүх хуралдааны тов мэдэгдсэн боловч шүүх хурал суух боломжгүй гэсэн тул хохирогчийг байхгүйд хэргийг хянан шийдвэрлэв.
Харин шүүгдэгч Б.Даас 380.000 төгрөгийг гаргуулж, хохирогч Э.Эт 200.000 төгрөг, иргэний нэхэмжлэгч Б.Хэнмэдхэвт 180.000 төгрөгийн хохирол төлбөрийг төлүүлэх нь зүйтэй гэж үзлээ.
Өвөрхангай аймгийн Хархорин сум дахь Сум дундын Прокурорын газраас Эрүүгийн хуулийн тусгай ангийн 148 дугаар зүйлийн 148.1 дэх хэсэгт зааснаар яллагдагчаар татах тогтоол баталж ирүүлсэн А овгийн Б-н Д нь жирэмсэн 39 долоо хоногтой болох нь нотлогддог. Иймд Б.Дт оногдуулах ял шийтгэлийг хорихоос өөр төрлийн ял шийтгэл оногдуулах нь зүйтэй гэж үзлээ.
Хэрэгт битүүмжлэгдсэн болон эд мөрийн баримтаар хураагдсан эд зүйл байхгүйг мөн бичгийн баримт хураагдан ирээгүйг, шүүгдэгч нь цагдан хоригдсон хоноггүй болохыг тус тус дурдах нь зүйтэй байна.
Монгол Улсын Эрүүгийн байцаан шийтгэх хуулийн 282, 283, 286, 290, 294-299 дүгээр зүйлүүдийг удирдлага болгон
ТОГТООХ нь :
1. Шүүгдэгч А овгийн Б-н Дыг Эрүүгийн хуулийн тусгай ангийн 148 дугаар зүйлийн 148.1-т заасан гэмт хэргийг үйлдсэн гэм буруутайд тооцсугай.
2. Эрүүгийн хуулийн тусгай ангийн 148 дугаар зүйлийн 148.1 дэх хэсэгт зааснаар шүүгдэгч А овгийн Б-н Дыг хөдөлмөрийн хөлсний доод хэмжээг 5 дахин /тав/ нэмэгдүүлсэнтэй тэнцэх хэмжээний төгрөгөөр торгох ялаар шийтгэсүгэй.
3. Эрүүгийн хуулийн Ерөнхий ангийн 47 дугаар зүйлийн 47.3 дахь хэсэгт зааснаар шүүгдэгч Б.Д нь торгох ялаас ноцтойгоор зайлсхийвэл шүүх хорих ялаар сольж болохыг дурьдсугай.
4. Иргэний хуулийн 497 дугаар зүйлийн 497.1, 510 дугаар зүйлийн 510.1-д зааснаар ялтан Б.Даас 380.000 төгрөгийг гаргуулж, хохирогч Э.Эт 200.000 төгрөг, иргэний нэхэмжлэгч Б.Х-т 180.000 төгрөгийг тус тус олгосугай.
5. Шүүгдэгч Б.Д нь энэ хэрэгтээ цагдан хоригдоогүй, түүний бичиг баримт шүүхэд ирээгүй, хэрэгт эд мөрийн баримт хураагдан ирээгүй болохыг тус тус дурьдсугай.
6. Шийтгэх тогтоол танилцуулан сонсгосноор хүчинтэй болохыг дурдсугай.
7. Эрїїгийн байцаан шийтгэх хуулийн 303 дугаар зїйлийн 303.1, 304 дїгээр 304.1 дэх хэсэгт зааснаар давж заалдах гомдол гаргах, эсэргүүцэл бичих эрх бүхий этгээд түүнийг гардуулснаас хойш 14 хоногийн дотор Өвөрхангай аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргїїцэл бичих эрхтэйг дурдсугай.
8. Давж заалдах гомдол гаргах буюу эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол биелүүлэх хүртэл шүүгдэгч Б.Дын урьд авсан оршин суугаа газраасаа гадагш явж болохгүй баталгаа авах таслан сэргийлэх арга хэмжээг хэвээр үргэлжлүүлсүгэй.
ДАРГАЛАГЧ, ШҮҮГЧ Ц.ДАГИЙМАА