МОНГОЛ УЛСЫН НЭРИЙН ӨМНӨӨС

 

 

Төв аймаг дахь Сум дундын Эрүүгийн хэргийн анхан шатны шүүх хуралдааныг тус шүүхийн шүүгч Ю.Энхмаа даргалж,

Шүүх хуралдааны нарийн бичгийн дарга Г.Бадам

Улсын яллагчаар Б.Сувд-Эрдэнэ,

Шүүгдэгчийн өмгөөлөгч И.Отгонсүрэн

Шүүгдэгч Ц.Б нарыг оролцуулан нээлттэй хийсэн шүүх хуралдаанаар Төв аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж, хялбаршуулсан журмаар ирүүлсэн Боржигон овогт Ц Бд холбогдох эрүүгийн 1834009540459 дугаартай хэргийг 2018 оны 12 дугаар сарын 11-ний өдөр хүлээн авснаар хянан хэлэлцэв.

 

 

Холбогдсон хэргийн талаар /яллах дүгнэлтэд дурдагдсанаар/

Шүүгдэгч Ц.Б нь 2018 оны 11 дүгээр сарын 24-ны өдөр Төв аймгийн Зуунмод сумын 2 дугаар багийн нутаг дэвсгэрт Л.Бтай хувийн таарамжгүй харьцааны улмаас маргалдаж улмаар түүнийг зодож эрүүл мэндэд нь хөнгөн хохирол учруулсан гэмт хэргийг үйлдсэн гэмт хэрэгт холбогджээ.

 

                                                         ТОДОРХОЙЛОХ нь:

 

                 Шүүгдэгчийн хэргээ хүлээн мэдүүлсэн мэдүүлэг нь хохирогч, гэрч нарын мэдүүлэг болон бусад нотлох баримтуудаар давхар нотлогдон тогтоогдсон тул түүний мэдүүлгийг яллах талын нотлох баримтад тооцсон.

                 Шүүгдэгч Ц.Б нь 2018 оны 11 дүгээр сарын 24-ны өдөр Төв аймгийн Зуунмод сумын 2 дугаар багийн нутаг дэвсгэрт Л.Бтай хувийн таарамжгүй харьцааны улмаас маргалдаж улмаар түүнийг зодож эрүүл мэндэд нь хөнгөн хохирол учруулсан болох нь:

• Хохирогч Л.Бын мөрдөн байцаалтын шатанд мэдүүлсэн: “...2018 оны 11 дүгээр сарын 24-ны өдөр Төв аймгийн Зуунмод сумын Дэнж 2 дугаар баг Цагаан байр гэх газар Хуягийн гэрт эхнэр бид хоёр очсон...намайг утсаар ярьж байх үед гаднаас Б орж ирсэн тэгдэд мэнд мэндчихээд хажууд сууж байсан тухайн үед намайг утсаа яриад сууж байхад гэнэт намайг цохисон, миний үүдэн 4 шүд унасан...” гэх мэдүүлэг /хх-ийн 17 тал/
• Гэрч М.Өнөцацралын мэдүүлэг мөрдөн байцаалтын шатанд мэдүүлсэн: “...2018 оны 11 дүгээр сарын 24-ны орой 22 цаг өнгөрч байхадТөв аймгийн Зуунмод сумын Дэнж 2 дугаар баг цагаан байр гэх газар ээжийн төрсөн дүүгийн охин Мандахцэцэгийн гэрт очсон.... тэгээд 23 цаг өнгөрч байх үед жижиг өрөөнд манай нөхөр Б утсаар яриад сууж сууж байсан гаднаас ах Б орж ирсэн ба түүнтэй мэнд мэдэхэд тайвандаа ах нь хөдөө яваад ирсэн гэж ярьж байсан...би шууд өрөө рүү яваад ороход Б ах зүгээр байхад нь гэнэт цохисон байсан, Батняг нэг удаа гараараа цохиж шүдийг нь гэмтээсэн байсан, өөр гэмтэл бэртэл учраагүй...” гэх мэдүүлэг /хх-ийн 23 тал/,
• Гэрч М.Өнөдэлгэрийн мэдүүлэг мөрдөн байцаалтын шатанд мэдүүлсэн: “...2018 оны 11 дүгээр сарын 24-ны өдөр ихэр Өнөрцацралтай хот яваад орой 20 цагийн үед хотоос ирсэн. Тэгээд гэртээ ирж хувцасаа солиод байж байтал хүргэн Б гэрээс ирж намайг гэрээс аваад тэгээд цуг Хуягаа гэдэг айлд очсон, хүүхдүүд шуугиад байхаар нь айлын арын өрөө рүү утсаар ярих гээд орсон тэгтэл Б араас нь орсон тэгтэл тэр хоёр зодолдоод байна шүү гэхээр нь би араас нь ортол Бын шүднээс цус гарсан байсан тэгээд Базагдэглий, Б хоёрыг салгасан...” гэх мэдүүлэг /хх-ийн 19 тал/,
• Шүүгдэгч Ц.Бн мэдүүлэг мөрдөн байцаалтын шатанд яллагдагчаар мэдүүлсэн: “...2018 оны 11 дүгээр сарын 24-ны орой 18-19 цагийн үед Төв аймгийн Зуунмод сумын 2 дугаар баг Цагаан байр гэх газар Хуягийн гэрт 2 том пиво Хуягтай хамт уусан, маргааш нь манай дүү нар намайг Быг зодож шүдийг нь гэмтээсэн талаар хэлсэн, би хохирол төлбөрийг барагдуулсан 1.300.000 мянган төгрөг өгсөн...” гэх мэдүүлэг /хх-ийн 20 тал/
• 2018 оны 11 дүгээр сарын 29-ний өдрийн шинжээчийн №753 дугаартай “1. Л.Бын биед 11, 22 дугаар шүдний хугарал буйланд шарх гэмтэл тогтоогдлоо. Шүүх эмнэлгийн гэмтлийн зэрэг тогтоох журмын 2.4.1-д зааснаар эрүүлл мэндийг түр хугацаагаар сарниулах тул гэмтлийн хөнгөн зэрэгт хамаарна. Дээрх гэмтэл нь мохоо зүйлийн 1 удаагийн үйлчлэлээр хэрэг учрал болсон гэх цаг хугацаанд үүссэн шинэ гэмтэл байна. Цаашид ерөнхий хөдөлмөрийн чадварт тогтонги нөлөөлөхгүй” гэх дүгнэлт /хх-ийн 25 тал/
• Цагдаагийн Ерөнхий газрын АСАП сангийн лавлагаа /хх-ийн 21-22 тал/
• Хохирогч Л.Б, шүүгдэгч Ц.Б нарын бичгээр гаргасан хэргийг хялбаршуулсан журмаар шийдвэрлүүлэх тухай хүсэлт /хх-ийн 39 тал/-р тогтоогдсон байна.  

 

      Шүүгдэгч Ц.Бн ял шийтгэлийн тэмдэглэл, иргэний үнэмлэхийн лавлагаа болон бусад хувийн байдлыг тогтоосон баримтуудыг шүүхийн хэлэлцүүлэгт судласан болно.

      Мөрдөн шалгах ажиллагааны явцад болон шүүхийн хэлэлцүүлэгт шүүгдэгч Ц.Б нь гэмт хэрэг үйлдсэн гэм буруугаа хүлээн зөвшөөрсөн байна.

 

      Төв аймгийн Прокурорын газраас шүүгдэгч Ц.Б нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татах тогтоол үйлдэж, ял сонсгож, яллах дүгнэлт үйлдэж ирүүлсэн хуулийн зүйл, хэсэг, заалт шүүгдэгчийн гэм буруутай үйлдэлд тохирсон бөгөөд Эрүүгийн хэрэг хянан шийдвэрлэх тухай хуулийн 17.1 дүгээр зүйлийн 1 дэх хэсэгт зааснаар шүүгдэгч Ц.Б нь хэргээ хялбаршуулсан журмаар хянан шийдвэрлүүлэх хүсэлт гаргасныг прокурор хүлээн авч шүүхэд хялбаршуулсан журмаар хянан шийдвэрлүүлэхээр ирүүлсэн нь үндэслэлтэй болно.

      Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсэгт заасан нөхцөл байдлыг хангасан байх тул шүүх шүүгдэгч Ц.Бд холбогдох хэргийг хялбаршуулсан журмаар хянан шийдвэрлэж, Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцож, шүүгдэгч улсын яллагчийн шүүхэд гаргасан саналыг харгалзан торгох ял оногдуулж, торгох ялыг Шүүхийн шийдвэр гүйцэтгэх тухай хуульд заасан хугацаанд торгох ялыг биелүүлээгүй бол шүүх биелэгдээгүй торгох ялын 15 /арван тав/ нэгжтэй тэнцэх хэмжээний төгрөгийг 01 /нэг/ хоногоор тооцож хорих ялаар солихыг шүүгдэгч Ц.Бд сануулав.

 

      Шүүхээс хохирогч Л.Бд шүүх хуралдааны товыг мэдэгдэхэд “гомдол саналгүй, эвлэрсэн тул шүүх хуралдаанд оролцохгүй” гэсэн байх тул энэ шүүх хуралдаанаар хэлэлцэх хохирлын асуудал байхгүй байна.

 

            Тав: Бусад асуудлаар:

            Эрүүгийн 1834009540459 тоот хэрэгт эд мөрийн баримтаар хураагдаж ирсэн зүйлгүй, иргэний бичиг баримт шүүхэд ирээгүй, битүүмжлэгдсэн эд хөрөнгөгүй, шүүгдэгч Ц.Б нь цагдан хоригдсон хоноггүй, бусдад төлөх төлбөргүй болохыг тус тус дурдах нь зүйтэй байна.

 

            Монгол Улсын Шүүхийн тухай хуулийн 31 дүгээр зүйлийн 31.3.1, Эрүүгийн хэрэг хянан шийдвэрлэх тухай хуулийн 17.5, 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт тус тус заасныг удирдлага болгон

                                              

ТОГТООХ нь:

 

1. Шүүгдэгч Боржигон овогт Ц Бг бусдын эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцсугай.

 

2. Шүүгдэгч Боржигон овогт Ц Бг Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар зургаан зуун нэгжтэй тэнцэх хэмжээний буюу 600.000 /зургаан зуун мянга/ төгрөгөөр торгох ялаар шийтгэсүгэй.

 

3. Шүүгдэгч Ц.Бд оногдуулсан торгох ялын биелэлтэнд хяналт тавьж ажиллахыг харъяа нутаг дэвсгэрийн Шүүхийн шийдвэр гүйцэтгэх байгууллагад даалгасугай.

4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт заасныг баримтлан шүүгдэгч Боржигон овогт Ц Бг торгох ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт заасан хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож хорих ялаар солихыг мэдэгдсүгэй.

5. Шийтгэх тогтоол хүчин төгөлдөр болтол шүүгдэгч Ц.Бд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй. 

6. Хэрэгт битүүмжлэгдсэн болон иргэний бичиг баримт шүүхэд ирээгүй, эд мөрийн баримтаар хураагдан ирсэн зүйлгүй, шүүгдэгч Ц.Б нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

 

7. Эрүүгийн хэрэг хянан шийдвэрлэх тухай хуулийн 38.1, 38.2 дугаар
зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг  дурдсугай.

8. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийтгэх тогтоол танилцуулан сонсгосноор хүчинтэй болох бөгөөд мөн хуулийн 37.1 дүгээр зүйлийн 2 дахь хэсэгт зааснаар шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлж шүүгдэгч Ц.Бд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

 

 

 

 

ДАРГАЛАГЧ,  ШҮҮГЧ                                    Ю.ЭНХМАА