МОНГОЛ УЛСЫН НЭРИЙН ӨМНӨӨС

 

 

Төв аймгийн Сум дундын Эрүүгийн хэргийн анхан шүүхийн эрүүгийн шүүх хуралдааныг тус шүүхийн шүүгч Ю.Энхмаа даргалж,

- шүүх хуралдааны нарийн бичгийн дарга Б.Ууганцэцэг

- улсын яллагчаар Д.Нэргүй

- шүүгдэгчийн өмгөөлөгч Ж.Энх-Амгалан

• шүүгдэгч Ч.А нарыг оролцуулан шүүх хуралдааны танхимд нээлттэй хийсэн шүүх хуралдаанаар Төв аймгийн прокурорын газраас Монгол Улсын Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Боржигон овогт Ч Ад холбогдох эрүүгийн 1834008480413 тоот хэргийг 2018 оны 12 дугар сарын 06-ны өдөр хүлээн авснаар хянан хэлэлцэв.

 

Холбогдсон хэргийн талаар /яллах дүгнэлтэд дурдагдсанаар/

Шүүгдэгч Ч.А нь “Төв аймгийн Баянчандмань сумын Чандмань 1 дүгээр багийн нутаг дэвсгэрт 2018 оны 10 дугаар сарын 21-ний орой 20.00 цагийн орчим иргэн О.Мын нүүр, цээжин тус газар нь цохиж эрүүл мэндэд нь хөнгөн хохирол учруулсан гэмт хэрэгт холбогджээ.

ТОДОРХОЙЛОХ нь:

 

Шүүгдэгчийн хэргээ хүлээн мэдүүлсэн мэдүүлэг нь хохирогч, гэрч нарын мэдүүлэг болон бусад нотлох баримтуудаар давхар нотлогдон тогтоогдсон тул түүний мэдүүлгийг яллах талын нотлох баримтад тооцсон.

Шүүгдэгч Ч.А нь “Төв аймгийн Баянчандмань сумын Чандмань 1 дүгээр багийн нутаг дэвсгэрт 2018 оны 10 дугаар сарын 21-ний орой 20.00 цагийн орчим иргэн О.Мын нүүр, цээжин тус газар нь цохиж эрүүл мэндэд нь хөнгөн хохирол учруулсан болох нь:

• Хохирогч О.Мын мөрдөн байцаалтын шатанд мэдүүлсэн: “..би 2018 оны 10 дугаар сарын 21-ний өдөр 20.30 цагт Баянчандмань сумын Мандах дэлгүүрээс хоол хүнсний зүйл аваад гарч явсан. Тэгээд намайг дэлгүүрийн үүдэнд байсан 3 залуу дуудсан. Би дуудахад нь очоогүй ойролцоо байсан 0505 улсын дугаартай портер маркийн машин дээр  очсон. Уг машины жолоочийг би таньдаг. Намайг жолоочоос салаад явж байхад намайг дуудсан 3 залуу араас ирээд утсаа өгөөч би яриадхая гэхэд нь би надад утас байхгүй би гэртээ үлдээчихсэн гэхэд Улаанаа гэдэг залуу намайг заамдан авч чамд яахаараа утас байдаггүй юм бэ гээд миний нүүрлүү мөргөсөн. Дараа нь намайг боож унагаагаад цээжрүү өшиглөсөн. Тэгээд би босч ирээд тэд нараас зугтаагаад шууд захиргааны байрны хажууд цагдаагийн поструу явсан. .миний хамарлуу 1 удаа мөргөсөн. Харин унасан хойно цээжрүү хөлөөрөө 1 удаа, зүүн гуяруу 2 удаа өшиглөсөн. Би Улаанаа гэх хүнийг нэг ч удаа цохиогүй. ..намайг А гэх хүнээс өөр хүн цохиогүй. Тухайн үед Атэй хамт байсан Түвшин гэх хүн намайг цохьсон эсэхийг би мэдэхгүй байна. Би А гэх хүнээс Улаанбаатар хот Төв аймагруу ирж буцсан бензиний мөнгө, биеэ эмнэлэгт үзүүлсэн зардал, мөн хамраа эмчлүүлэх мөнгө гээд нийтдээ 2.000.000 төгрөг нэхэмжилж байна” гэх мэдүүлэг /хх-ийн 04-05 тал/,
• Гэрч Ч.Агийн мөрдөн байцаалтын шатанд мэдүүлсэн “..тэгээд дэлгүүрийн урд зогсож байхад М таарсан тэгэхээр нь мэнд мэдчихээд байж байсан чинь М дэлрүүрлүү орсон. Тэгээд хэсэг хугацааны дараа М дэлгүүрээс гарч ирсэн. Тэгэхээр нь утсыг нь гуйсан чинь надад утас байхгүй гэсэн. Тэгээд тэрнээс болж маргаад заамдаж авсан. Тэгтэл Отгонбаяр бид хоёрыг салгасан тэгсэн манай төрсөн ах Түвшин хажууд байж байсан. Би тухайн үед Мын цээжрүү цохьсон шиг санагдаад байна. Тэгээд М цаашаа гүйгээд явсан бид 3 гэрлүүгээ явсан. ..би М гэх хүнийг 1 удаа гараараа цээжрүү нь цохьсон” гэх мэдүүлэг /хх-ийн 09 тал/,
• Гэрч Ж.Отгонбаярын мөрдөн байцаалтын шатанд мэдүүлсэн: “..тэгээд А, Түвшин бид 3 Завхан гол гэх нэртэй дэлгүүрийн үүдэнд очсон. Уг дэлгүүрээс тамхи аваад гараад ирсэн чинь А, Түвшин 2 М гэх хүнтэй зууралдса зогсож байсан. Тэгэхээр нь би салгах гээд ноцолдсон намайг салгаж байхад А Мыг 1 удаа нүүрэн тус газар нь цохьсон. Миний харснаар А Мыг 1 удаа цохихыг харсан” гэх мэдүүлэг /хх-ийн 10 тал/,
• Шүүхийн шинжилгээний албаны шинжээчийн №704 дугаартай “..О.Мын биед хамар ясны хугарал, цээжний зүүн талд зөөлөн эдийн няцрал гэмтэл тогтоогдлоо. Дээрхи гэмтэл нь мохоо зүйлийн үйлчлэлээр үүсгэгдэх боломжтой. 2018.10.23-ны Натур эмнэлгийн компьютер томографийн хариунд тусгагдсанаар хамар яс нь шиэ болон хуучин хавсарсан хугаралтай байна. Дээрхи гэмтэл нь Шүүх эмнэлгийн гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар алдагдуулах тул гэмтлийн хөнгөн зэрэгт хамаарна” гэх дүгнэлт /хх-ийн 12-13 тал/,
• Шүүгдэгч Ч.Агийн мөрдөн байцаалтын шатанд яллагдагчаар мэдүүлсэн: “..бид 3 төв дээр явж байгаад хохирогч гэх Мтай таарсан юм. Би түүний гар утсыг гуйж ярих гэхэд дэлгүүр яваад орсон. Тэгээд гарч ирэхээр нь гуйхад утас байхгүй гээд байсан. Тэгээд бид 2 барилцаж авсан. Би түүний нүүрлүү нэг удаа, цээжрүү нь 1 удаа цохьсон. Өшиглөж барьсанаа санахгүй байна” гэх мэдүүлэг /хх-ийн 20-21 тал/ зэрэг хэрэгт авагдсан бусад нотлох баримтаар нотлогдон тогтоогдсон байна.  

            Шүүгдэгч Ч.Агийн ял шийтгэлийн тэмдэглэл, иргэний үнэмлэхийн лавлагаа болон бусад хувийн байдлыг тогтоосон баримтуудыг шүүхийн хэлэлцүүлэгт судласан болно.

 

Бусдын эрүүл мэндэд хөнгөн хохирол учруулах гэмт хэргийн нөхцөл байдалд хийсэн хууль зүйн дүгнэлтийн талаар:

Хохирогч О.Мын “хамар ясны хугарал, цээжний зүүн талд зөөлөн эдийн няцрал “ гэмтэл учруулсан Ч.Агийн үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэргийн объектив талын шинжүүдийг хангасан.

Хууль зүй, дотоод хэргийн сайд, Эрүүл мэндийн сайдын хамтарсан 2010 оны 10 дугаар сарын 29-ний өдрийн 189/385 дугаартай тушаалаар баталсан “Гэмтлийн зэрэг тогтоох журам”-ын 2.4.1-д” гэмтэл түүнээс үүссэн эд эрхтний үйл ажиллагааны хямрал нь нь эрүүл мэндийг дөрвөн долоо хоногоос доош хугацаагаар сарниулсан /түр/” мөн журмын 2.4.2-т “хөдөлмөрийн ерөнхий чадвар бага хэмжээгээр /5-15%/ тогтонги байдлаар алдагдсан” бол гэмтлийн хөнгөн зэрэгт хамааруулахаар шалгуур шинжийг тодорхойлсон байх тул хохирогч О.Мын биед учирсан гэмтлийг хөнгөн хохирол учирсан гэж үзнэ.

Уг гэмт хэрэг нь гэм буруугийн санаатай хэлбэрээр үйлдэгдсэн.

Эрүүгийн хуулийн 2.3 дугаар зүйлийн 1 дэх хэсэгт ззааснаар санаатай гэдэгт өөрийн үйлдлийн хууль бус шинжтэй болохыг ухамсарлаж түүнийг хүсч үйлдсэн, хохирол, хор уршигт зориуд хүргэснийг ойлгоно.

Шүүгдэгч Ч.А нь өөрийн үйлдлийг хууль бус шинжтэй болохыг ухамсарласан түүний улмаас үүдэн гарах үр дагаврыг урьдчилан мэдсэн байх хангалттай нөхцөлд байжээ гэж үзэх үндэслэлтэй.

Иймд энэ хэрэгт Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотловол зохих асуудлыг хангалттай шалгаж тогтоосон, Ч.Агийн бусдын эрүүл мэндэд хөнгөн хохирол учруулсан үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт гэмт хэргийн шинжийг бүрэн хангасан, Төв аймгийн Прокурорын газраас ирүүлсэн хэргийн зүйл, хэсэг, заалт тохирсон байна.

Хохирогчийн зүгээс уг гэмт хэргийн улмаас үүдэн гарсан хохирлын 120.000 төгрөгийн баримт гаргаж өгсөн бөгөөд хохирогч Ө.М нь мөрдөн байцаалтын шатанд “би Ч.Агээс эмчилгээний төлбөрт 2.000.000 төгрөгт бодож 2 адуу авсан. Би цаашид Ч.Атэй холбогдох уг хэрэгт ямар нэгэн гомдол санал байхгүй” гэх хүсэлт /хх-ийн 34 тал/, шүүхээс хохирогчид шүүх хуралдааны товыг мэдэгдэхэд “гомдол саналгүй шүүх хуралдаанд оролцохгүй” гэсэн байх тул шүүгдэгч Ч.Аг хохирлоо өөрийн сайн дураар нөхөн төлсөн гэж үзэж Эрүүгийн хуулийн 6.5 дугаар зүйлийн 1 дэх хэсгийн 1.2 дахь хэсэгт зааснаар дээрх нөхцөл байдлыг хөнгөрүүлэх нөхцөл байдалд тооцож, түүнд хүлээлгэх эрүүгийн хариуцлагыг хүндрүүлэх нөхцөл байдал хэрэгт тогтоогдоогүй, хувийн байдлын хувьд анх удаа гэмт хэрэг үйлдэж шийтгүүлж байгаа, гэм буруугаа ойлгон гэмшсэн зэргийг харгалзан 600 нэгжтэй тэнцэх хэмжээний буюу 600.000 төгрөгөөр торгох ял шийтгэл оногдуулж,

Уг ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт “Ялтан торгох ял оногдуулсан шийдвэрт өөрөөр заагаагүй бол тухайн шийдвэрийг хуулийн хүчин төгөлдөр болсноос хойш 90 хоногийн дотор, хэрэв хэсэгчлэн төлөхөөр тогтоосон бол тогтоосон хугацаанд биелүүлэх үүрэгтэй” гэж заасан 90 хоногийн хугацаанд төлж барагдуулахыг сануулж, шүүхээс тогтоосон хугацаанд торгох ялыг биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож, хорих ялаар солихыг сануулав. Эрүүгийн хариуцлага хүлээлгэхдээ улсын яллагч болон шүүгдэгчийн шүүх хуралдаанд гаргасан санал, дүгнэлтийг харгалзан үзлээ.

Хэрэгт эд мөрийн баримтаар хураагдсан зүйлгүй, шүүгдэгчийн иргэний бичиг баримт шүүхэд ирээгүй, хэргийн улмаас цагдан хоригдсон хоноггүй, бусдад төлөх төлбөргүйг тус тус дурдах нь зүйтэй байна.

Монгол Улсын Шүүхийн тухай хуулийн 31 дүгээр зүйлийн 1, 3.1, Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 37.1 дүгээр зүйлийн 2, 38.2 дугаар зүйлийн 1 дэх хэсэгт заасныг удирдлага болгон

 

ТОГТООХ нь:

 

1. Шүүгдэгч Боржигон овогт Ч Аг хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцсугай.

2. Шүүгдэгч Боржигон овогт Ч Аг Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар зургаан зуун нэгжтэй тэнцэх хэмжээний буюу 600.000 /зургаан зуун мянга/ төгрөгөөр торгох ялаар шийтгэсүгэй.

3. Шүүгдэгч Ч.Ад оногдуулсан торгох ялын биелэлтэнд хяналт тавьж ажиллахыг харъяа нутаг дэвсгэрийн Шүүхийн шийдвэр гүйцэтгэх байгууллагад даалгасугай.

 4. Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт заасныг баримтлан шүүгдэгч Ч.Аг торгох ялыг Шүүхийн шийдвэр гүйцэтгэх тухай хуулийн 160 дугаар зүйлийн 160.1 дэх хэсэгт заасан хугацаанд биелүүлээгүй бол шүүх биелэгдээгүй торгох ялын арван таван нэгжтэй тэнцэх хэмжээний буюу 15.000 /арван таван мянга/ төгрөгийг нэг хоногоор тооцож хорих ялаар солихыг мэдэгдсүгэй.

5. Шийтгэх тогтоол хүчин төгөлдөр болтол шүүгдэгч Ч.Ад авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй. 

 

6. Хэрэгт иргэний баримт бичиг нь шүүхэд ирээгүй, хэрэгт битүүмжлэгдсэн эд хөрөнгөгүй, эд мөрийн баримтаар хураагдан ирсэн зүйлгүй,  шүүгдэгч Ч.А нь цагдан хоригдсон хоноггүй, бусдад төлөх төлбөргүй болохыг тус тус дурдсугай.

 

7. Шүүхийн шийдвэр нь уншиж сонсгосноор хүчинтэй болох бөгөөд шүүхийн шийдвэрийг уншиж сонсгосноос хойш 15 хоногийн дотор шийтгэх тогтоолыг бүрэн эхээр, бичгээр үйлдэж улсын яллагч, шүүгдэгч, хохирогч, иргэний нэхэмжлэгч, иргэний хариуцагч, тэдгээрийг төлөөлөгч, өмгөөлөгчид гардуулахыг, дээрх хугацаанд шүүхийн шийдвэрийг гардаж аваагүй бол энэ хуулийн 11.9 дүгээр зүйлд заасны дагуу хүргүүлэхийг шүүгчийн туслах М.Оюунсүрэнд даалгасугай. 

 

8. Эрүүгийн хэрэг хянан шийдвэрлэх тухай хуулийн 38.1, 38.2 дугаар
зүйлийн 1 дэх хэсэгт зааснаар шийтгэх тогтоолд ялтан, хохирогч, тэдгээрийн
өмгөөлөгч нар шийтгэх тогтоолыг гардуулснаас хойш 14 хоногийн дотор Төв аймгийн Эрүү, Иргэний хэргийн Давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

9. Эрүүгийн хэрэг хянан шийдвэрлэх тухай хуулийн 36.10 дугаар зүйлийн 4 дэх хэсэгт зааснаар шийтгэх тогтоол танилцуулан сонсгосноор хүчинтэй болох бөгөөд мөн хуулийн 37.1 дүгээр зүйлийн 2 дахь хэсэгт зааснаар шийтгэх тогтоолд гомдол эсэргүүцэл гаргасан тохиолдолд тогтоолын биелэлтийг түдгэлзүүлж Ч.Ад авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

 

 

 

                   ДАРГАЛАГЧ, ШҮҮГЧ                                Ю.ЭНХМАА