МОНГОЛ УЛСЫН НЭРИЙН ӨМНӨӨС

 

Хэргийн индекс: 166/2017/0243/Э

 

Дархан-Уул аймаг дахь сум дундын Эрүүгийн хэргийн анхан шатны шүүхийн шүүгч Г.Гэрэлт-Од  даргалж,

Шүүх хуралдааны нарийн бичгийн даргаар Б.Нандинцэцэг,

Улсын яллагч Н.Дуламсүрэн,

Хохирогч Б.М,

Шүүгдэгч Б.Г нарыг оролцуулан тус шүүхийн шүүх хуралдааны танхимд нээлттэй хийсэн шүүх хуралдаанаар Дархан-Уул аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Б овогт Б.Г холбогдох эрүүгийн 1718000520031 дугаартай хэргийг 2017 оны 9 дүгээр сарын 01-ний өдөр хүлээн авч, хянан хэлэлцэв.

 

Шүүгдэгчийн биеийн байцаалт:

Монгол Улсын иргэн, 1993 оны 2 дугаар сарын 24-ний өдөр ... улсын ... хотод төрсөн, 24 настай, эрэгтэй, тусгай дунд боловсролтой, цахилгааны техникч  мэргэжилтэй,  “Д” ХХК-д түгээгч ажилтай, ам бүл 6 аав, эгч, 3 дүүгийн хамт амьдардаг,  ... аймгийн ... сум, ... баг, ... гудамж, ... тоотод оршин суух хаягтай, урьд ял шийтгэлгүй, хэрэг хариуцах чадвартай, Б овогт Б.Г,  регистрийн дугаар РД...

 

Холбогдсон хэргийн талаар:

Шүүгдэгч Б. Г нь 2017 оны 07 дугаар сарын 23-наас 24-нд шилжих шөнө ... аймгийн ... сум, ... дүгээр баг, ... дугаар байрны гадна иргэн Б. М хувийн таарамжгүй харьцааны улмаас маргалдан нүүрэнд нь цохиж эрүүл мэндэд нь хөнгөн хохирол учруулсан гэх гэмт хэрэгт холбогджээ. /Яллах дүгнэлтэд бичигдсэнээр/

,

ТОДОРХОЙЛОХ нь:

1. Гэм буруугийн талаар:

 

Шүүгдэгч Б.Г- нь 2017 оны 07 дугаар сарын 23-наас 24-нд шилжих шөнө ... аймгийн ... сум, ... дүгээр баг, ... дугаар байрны гадна иргэн Б.М хувийн таарамжгүй харьцааны улмаас маргалдан нүүрэнд нь цохиж эрүүл мэндэд нь хөнгөн хохирол учруулсан, Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутай болох нь

 

Шүүгдэгч Б.Г-ын ”...М намайг гараараа цохиод авах гэхээр нь бултаад зөрүүлээд нэг удаа хамар луу нь цохиод авсан. Тэгэхэд М хамарнаас цус гарсан“ гэх мэдүүлэг /хх-ийн 35-р хуудас/ ,

Шүүхийн хэлэлцүүлэгт өгсөн: “...М над руу 2 удаа дайрсан. Би цохих гэхээр нь бултаж байгаад гурав дахь дээр нь зөрүүлээд М цохисон. Би нүүр рүү нь цохисноо санаж байна. М хамарнаас цус гарахад нь би “Одоо боль. Чи надад гай болно” гэж хэлсэн боловч намайг зодох гээд дахин дайрсан. Би тэр үед модны араар орж зугтаасан. Дараа нь М би найзыгаа дуудна гээд хүн рүү залгаад байсан. Тухайн үед 2-3 хүн ирсэн. Би салахгүй болохоор нь зугтаагаад явсан” гэх мэдүүлэг

Гэрч Б.Т “...Ганаа намайг өмөөрч М лүү чи миний найзыг яагаад цохиж байгаа юм гээд юм М нүүр лүү гараараа нэг удаа цохиод зугтаагаад яваад өгсөн“ гэх мэдүүлэг / хх-ийн 20-р хуудас /

        Гэрч Н.Б “...М.Г гараараа цохиод явах гэтэл бултаад зөрүүлээд гараараа хамар луу нь цохиод авсан. Тэгэхэд М хамарнаас цус гараад тогтохгүй байхаар нь би Г аваад яваад өгсөн” гэх мэдүүлэг /хх-ийн 22-р хуудас /

        Хохирогч Б.М “.....Т бид хоёрыг маргалдаад байж байхад Т найз нь түүнийг өмөөрөөд намайг цохиод зугтчихсан. “гэх мэдүүлэг. /хх-ийн 09-р хуудас/,

Гэмт хэргийн талаарх гомдол, мэдээллийг хүлээн авсан тухай тэмдэглэл /хх-ийн 05-р хуудас /,

 

Дархан-Уул аймгийн Шүүхийн шинжилгээний албаны 2017 оны 0 дугаар сарын 25-ны 778 дугаартай “Б.М биед хамар ясны хугарал, хамрын таславчны мурийлт, тархи доргилт, хамрын нуруун дахь шарх, нүүрний цус хуралт  тогтоогдлоо. Дээрх гэмтэл нь хатуу мохоо хүчин зүйлийн үйлчлэлээр үүсгэгдэх боломжтой. Уг гэмтэл нь ГЗТЖ-ын 2.4.1-д зааснаар эрүүл мэндийг түр хугацаагаар сарниулах  хөнгөн зэргийн гэмтэл болно. Б.М учирсан гэмтэл нь цаашдын эрүүл мэнд, хөдөлмөрийн чадварт нөлөөлөхгүй“ гэх дүгнэлт /24-р хуудас/,

 

Амбулаториор эмчлүүлэгсдийн карт /хх-ийн 27,28-р хуудас/ зэрэг хэрэгт авагдсан, шүүхийн хэлэлцүүлэгт шинжлэн судалсан нотлох баримтуудаар тогтоогдож байх ба дээрх нотлох баримтууд хуульд заасан арга хэлбэрээр авагдсан, хэрэгт хамааралтай байна.

 

       Хохирол, иргэний нэхэмжлэлийн талаар:

 

Хохирогч шүүхийн хэлэлцүүлэгт 4,000,000 төгрөг нэхэмжилж байх боловч, хэрэгт эмчилгээтэй холбогдолтой 334,480 төгрөгийн баримт /хавтаст хэргийн 10-19 дүгээр хуудас/ гаргаж өгсөн байх тул уг баримтын хэмжээнд эрүүл мэндэд гэм хор учруулсантай холбоотой зардлыг шүүгдэгчээс гаргуулж, үлдэх нэхэмжлэлийг нотлох баримтаа бүрдүүлэн Иргэний хэрэг шүүхэд хянан шийдвэрлэх тухай хуульд заасан журмаар нэхэмжлэл гарган жич шийдвэрлүүлэх эрхийг нээлттэй үлдээх нь зүйтэй байна.

 

Шүүгдэгчид оногдуулах эрүүгийн хариуцлага бусад байдлын талаар:

 

Шүүгдэгч Б.Г-д эрүүгийн хариуцлага хүлээлгэхэд Эрүүгийн хуулийн ерөнхий ангийн 6.5, 6.6 дугаар зүйлд заасан хөнгөрүүлэх, хүндрүүлэх нөхцөл байдал тогтоогдохгүй байх ба тодорхой ажил хөдөлмөр эрхэлдэг байдлыг харгалзан торгох ял шийтгэж, цалингийн хэмжээ, шүүгдэгчийн ам бүлийн байдал зэргийг харгалзан торгуулийг шийтгэх тогтоол хүчин төгөлдөр болсноос хойш 9 сарын хугацаанд  төлөхөөр тогтоох нь зүйтэй гэж үзэв.

 

Шүүгдэгч энэ хэрэгт цагдан хоригдсон хоноггүй, хэрэг хянан шийдвэрлэх ажиллагааны зардалгүй, эд мөрийн баримтаар хураагдаж ирсэн зүйлгүй, битүүмжилсэн хөрөнгөгүй болохыг дурдах нь зүйтэй байна.

 

Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон ТОГТООХ нь:

 

1. Б овогт Б.Г хүний эрүүл мэндэд хөнгөн хохирол учруулж, 2015 оны Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцсугай.

 

2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Б овогт Б.Г 450 /дөрвөн зуун тавь/ нэгжтэй тэнцэх хэмжээний буюу 450,000 /дөрвөн зуун тавин мянга/ төгрөгөөр торгох ял шийтгэсүгэй.

 

3. Эрүүгийн хуулийн ерөнхий ангийн 5.3 дугаар зүйлийн 4, 5 дахь хэсэгт зааснаар торгох ялыг шийтгэх тогтоол хүчин төгөлдөр болсноос хойш 9 сарын хугацаанд хэсэгчлэн төлөхөөр тогтоож, ялтан торгох ялыг тогтоосон хугацаанд биелүүлээгүй бол биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солих болохыг сануулсугай.

 

4. Иргэний хуулийн 497 дугаар зүйлийн 497.1, мөн хуулийн 505 дугаар зүйлийн 505.1-т зааснаар шүүгдэгч Б.Г-аас 334,480 төгрөг гаргуулан хохирогч, иргэний нэхэмжлэгч Б.М /... аймаг, ... сум, ... дүгээр баг, ... тоотод оршин суух, холбогдох утас: .../-д олгож, хохирогч цаашид гарах эмчилгээний зардлаа иргэний хэрэг шүүхэд хянан шийдвэрлэх ажиллагааны журмаар жич нэхэмжлэх эрхтэй болохыг дурдсугай.

 

5. Шүүгдэгч энэ хэрэгт цагдан хоригдсон хоноггүй, хэрэг хянан шийдвэрлэх ажиллагааны зардалгүй, энэ хэрэгт эд мөрийн баримтаар хураагдаж ирсэн зүйлгүй, битүүмжилсэн  хөрөнгөгүй болохыг  тус тус дурдсугай.

 

6. Эрүүгийн хэрэг хянан шийдвэрлэх тухай хуулийн 36.10-р зүйлийн 5 дах хэсэгт зааснаар шүүхийн шийдвэр уншиж сонгосноор хүчинтэй болох бөгөөд мөн хуулийн 36.8 дугаар зүйлийн 1 дэх хэсгийн 1.5-т зааснаар шийтгэх тогтоол хүчин төгөлдөр болтол шүүгдэгч Б.Г-д авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй.

 

7. Эрүүгийн хэрэг хянан шийдвэрлэх тухай хуулийн 38.2 дугаар зүйлийн 1 дэх хэсэгт зааснаар шүүгдэгч, хохирогч, тэдгээрийн хууль ёсны төлөөлөгч,  өмгөөлөгч тогтоолыг эс зөвшөөрвөл тогтоолыг гардуулсан буюу хүргүүлснээс хойш 14 хоногийн дотор Дархан-Уул аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

 

8. Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2 дахь хэсэгт зааснаар давж заалдах гомдол гаргасан, эсэргүүцэл бичигдсэн тохиолдолд шийтгэх тогтоолын биелэлтийг түдгэлзүүлсүгэй.

 

 

ДАРГАЛАГЧ ШҮҮГЧ                                    Г.ГЭРЭЛТ-ОД