МОНГОЛ УЛСЫН НЭРИЙН ӨМНӨӨС

Сонгинохайрхан дүүргийн Эрүүгийн хэргийн анхан шатны шүүхийн шүүх хуралдааныг шүүгч Г.Ганбаатар даргалж,

нарийн бичгийн дарга Ц.Отгонбаяр,

улсын яллагч А.Ганзориг,

өсвөр насны шүүгдэгч Б.Д, түүний хууль ёсны төлөөлөгч Б.Батцэцэг, тэдгээрийн өмгөөлөгч Л.Батаа,

шүүгдэгч Г.Э, Ц.Ц, тэдгээрийн өмгөөлөгч Ц.Тодгэрэл, Д.Буянзаяа нарыг оролцуулан хаалттай хийсэн шүүх хуралдаанаар,

Сонгинохайрхан дүүргийн прокурорын газраас Эрүүгийн хуулийн ерөнхий ангийн 3.1 дүгээр зүйлийн 3, 3.7 дугаар зүйлийн 1 дэх хэсэгт заасныг журамлан Эрүүгийн хуулийн тусгай ангийн 17.2 дугаар зүйлийн 2 дахь хэсэг,

Эрүүгийн хуулийн ерөнхий ангийн 2.2 дугаар зүйлийн 4 дэх хэсэгт заасныг журамлан мөн хуулийн тусгай ангийн 11.6 дугаар зүйлийн 2 дахь хэсэгт тус тус зааснаар Ша овогт Цо Ца,

Эрүүгийн хуулийн ерөнхий ангийн 2.2 дугаар зүйлийн 4 дэх хэсэгт заасныг журамлан мөн хуулийн тусгай ангийн 11.6 дугаар зүйлийн 2 дахь хэсэгт зааснаар Та овогт Бо Дэ, Та овогт Гэр Эр нарт тус тус холбогдуулан яллах дүгнэлт үйлдэж ирүүлсэн эрүүгийн 1808002870224 дугаартай хэргийг 2018 оны 08 дугаар сарын 23-ны өдөр хүлээн авч хянан хэлэлцэв.

Шүүгдэгч нарын биеийн байцаалт:

Монгол Улсын иргэн, **оны ** дүгээр сарын **-ны өдөр Увс аймгийн Сагил суманд төрсөн, 20 настай, эрэгтэй, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл-7, эцэг, эх, эхнэр, хүүхдийн хамт Сонгино хайрхан дүүргийн * дугаар хороо **тоотод оршин суух, М овогт Ц Ц, РД: ОЛ**,

Монгол Улсын иргэн, **оны ** дугаар сарын **-ны өдөр Говь-Алтай аймгийн Баян-Уул суманд төрсөн, **настай, бүрэн дунд боловсролтой, мэргэжилгүй, эрхэлсэн тодорхой ажилгүй, ам бүл-, эцэг, эх, эгч нарын хамт С дүүргийн * дүгээр хороо Б*****-** тоотод оршин суух, урьд ял шийтгэлгүй, Т овогт Б** Д**, РД: ДБ****,

Монгол Улсын иргэн, **оны **дугаар сарын **-ны өдөр Улаанбаатар хотод төрсөн, **настай, эрэгтэй, боловсролгүй, мэргэжилгүй, эрхэлсэн тодорхой ажилгүй, ам бүл-*,эцэг, эх,

дүүгийн хамт Сонгино хайрхан дүүргийн * дугаар хороо Баянхошууны **тоотод оршин суух, Т. овогт Г. Э, РД: УП***,

Холбогдсон хэргийн талаар:

Шүүгдэгч Ц.Ц, Г.Э, Б.Д нар бүлэглэн, урьдаас үгсэж тохиролцож ** оны ** дүгээр сарын 03-наас 04-нд шилжих шөнө Сонгинохайрхан дүүргийн * дугаар хороо * дүгээр байрны урд иргэн С.Б хүч хэрэглэн гар утсыг нь дээрэмдсэн ингэхдээ зодож эрүүл мэндэд нь хөнгөн хохирол учруулсан гэмт хэрэгт холбогджээ.

ТОДОРХОЙЛОХ нь:

Шүүх хуульд заасан үндэслэл журмын дагуу цугларсан, хуралдаанаар хэлэлцэгдсэн нотлох баримтуудыг шинжлэн судлахад:

Шүүгдэгч Ц.Ц, Г.Э, Б.Д нар бүлэглэн 2018 оны 01 дүгээр сарын 03-наас 04-нд шилжих шөнө Сонгинохайрхан дүүргийн 7 дугаар хороо 4 дүгээр байрны урд иргэн С.Бд хүч хэрэглэн гар утсыг нь дээрэмдсэн, ингэхдээ иргэн С.Бын эрүүл мэндэд хөнгөн хохирол учруулсан гэмт хэрэг үйлдсэн болох нь:

• гэмт хэргийн талаар гомдол, мэдээлэл хүлээн авсан тэмдэглэл /хх-2/,
• хэргийн газрын үзлэг хийсэн тэмдэглэл, гэрэл зургийн үзүүлэлт /хх-3-6/,
• хохирогч С.Бын мөрдөн байцаалтад өгсөн:..тухайн шөнө хүргэн ах Батсүхийн гэрт орж хамтдаа нэг шил архи уусан. Гэртээ харихаар тэдний гэрээс гарч яваад байрных нь үүдэнд 3 залуутай тааралдсан.Тэгтэл нөгөө залуучууд өөрсдийн сууж явсан таксинд суучих гээд татаад байсан. Тэр үед би "суухгүй, яах гэж байгаа юм" гэж асуутал ямар ч шалтгаангүйгээр намайг зодож эхэлсэн. Тэгэхээр нь би зугтаагаад гүйсэн. Миний араас хөөгөөд зодож, миний 5 5 гар утсыг аваад зугтаачихсан....гэх мэдүүлэг /хх-13-14/,
• гэрч С.Бын мөрдөн байцаалтад өгсөн :...автомашинаас 3 залуу бууж ирэхээр айгаад зугтахад тэдгээр залуучууд араас гүйж ирээд 3 уулаа нийлээд намайг унагаад гар хөлөөрөө миний нүүр, толгой нуруу, цээж гээд толгой түрийгүй зодсон. Яг хэн нь хаашаа цохиод байсныг нь бол би хэлж мэдэхгүй байна, ямар ч л байсан 3- уулаа нийлээд зодсон...дээрх залуучуудын нэг нь “Эс-5” байна, наад утсыг нь авчих” гэж хэлээд миний гар утсыг гарнаас мулт татаад авсан...гэх мэдүүлэг /хх-15-16/,
• гэрч Б. Алтанцэцэгийн мөрдөн байцаалтад өгсөн:..Намайг гэртээ байж байхад шөнө 03 цаг 25 минутын үед Батжаргал над руу залгаад "би эгчийнхээс гараад таксинд суух гэж байна" гээд эрэгтэй хүн ярих нь сонсогдсон бөгөөд Батжаргал суухгүй гэж ярих нь сонсогдоод л хүмүүс маргаад зодоон болоод байгаа юм шиг чимээ гараад утас нь тасарсан...буцаагаад залгатал холбогдох боломжгүй болсон...би эгч Янжмаа, түүний нөхөр Батсүх рүү утасдаж болсон явдлын талаар хэлсэн. Тэгээд өөрөө шууд ирэхэд Батжаргалын баруун нүд нь хавдаад хөмсөг нь сэтэрсэн, самсунг эс-5 гар утас нь алга болсон байсан....гэх мэдүүлэг /хх-17-18/,
• гэрч Э.Ц мөрдөн байцаалтад өгсөн :...Би СХД-ийн 7-р хороо, 4-р байрны харуулын ажлаа хийж байхад шөнө 02-04 цагийн үед манай байрны хашааны гадаа чимээ гараад байхаар нь харуул байрныхаа цонхоор хартал "Өнө цаг" буудлын замын зүүн талд 4 залуу зодолдож байсан. Тэр 4 залуугийн 3 нь 1 залууг зодож байсан. Тэгээд удалгүй 3 залуу манай байрны хажуу талд хүрч ирээд зам дээрээс 63-80 гэсэн дугаартай Соната-5 маркийн машиныг зогсоогоод суугаад хөдөлсөн. Тэр үед манай байрны ах эгч 2 гарч ирж байсан. Тэр 3 банди нөгөө 35-40 орчим насны ахыг тал талаас нь өшиглөөд цохиж байсан...гэх мэдүүлэг /хх- 22-23/,
• гэрч В.Ц мөрдөн байцаалтад өгсөн:...Би таксинд явдаг, тэр шөнө СХД-ийн 7 дугаар хороо Хилчин хотхоны засмал замны эсрэг талд байрлах "Өнө" цаг караоке, зочид

буудлын үүдэнд байхад 20-28 орчим насны болов уу гэмээр 3-н залуу такси барихаар болсон...Яг энэ үед миний дэргэд сууж байсан залуугийн хаалгыг 40 гаран насны нэг ах онгойлгоод энд хүн зодоод утсыг нь дээрэмдээд байна гэсэн гэж хэлээд машин доторх хүмүүсийг харчихаад машины хаалга хаасан, миний машины номерыг гар утсан дээрээ дарсан.би дөнгөж хөдлөөд машинд сууж явсан 3-н залууд хандаж та нар бууцгаа явахаа болилоо гэж хэлээд "Өнө цаг" караокеноос 200 метр орчим зайд нөгөө залуучуудыг буулгаад, буцаад явж байтал "Өнө цаг" караокены үүднээс миний машины зургийг дараад байсан ах, 2 эмэгтэй хүнтэй хамт миний машин дээр хүрч ирсэн.чи машиндаа суулгасан байсан 3-н залууг хаана буулгасан бэ, тэр хүмүүс чинь манай дүүг зодсон хүмүүс мөн юм шиг байна гэж хэлэхлээр нь хамт машиндаа суулгаад засмал замаар яваад нөгөө 3-н залууг хайтал ямар ч хүн харагдаагүй, тэгээд цагдаад мэдэгдсэн...гэх мэдүүлэг /хх- 24-25/,

• гэрч Д.Б мөрдөн байцаалтад өгсөн:...тэр шөнө Батжаргал гэртээ харина гээд манайхаас 03 цагийн үед гарч явсан...10 орчим минутын дараа Батжаргалын эхнэр Алтанцэцэг утсаар залгаад: Батжаргал таксины хүмүүст зодуулаад байх шиг байна, та гарч харах хэрэгтэй байна гэсэн. Тэр үед би эхнэрээ дагуулаад гэрээсээ гараад ертөнцийн зүгээр урд зүг рүү алхаж явтал замд 63-80 УБТ улсын дугаартай соната-5 маркын цагаан өнгийн суудлын автомашин дотор жолоочоос гадна 20-25 орчим насны гэмээр 3-н залуу харагдсан, жолоочийн дэргэд 1 залуу, хойд талын суудал дээр маск зүүсэн 2 залуу сууж байсан.автомашины номер болон маркыг нь гар утсан дээр зураг авахад жолооч бууж ирээд "та яагаад машины зураг аваад байгаа юм бэ" гээд уурлах аястай болохоор нь би энэ хавьд зодоон болсон юм, юмыг яаж мэдэх вэ гээд машины чинь зургийг дарж байгаа юм гэж хэлсэн, нөгөө машин хөдөлсөн...Удалгүй 2-3 минутын дараа нөгөө машины жолооч буцаад миний хажууд ирээд зогсоод.нөгөө 3-н залуу чинь буугаад өөр таксинд суугаад явчихлаа, араас нь хөөх үү гэхээр нь би Батжаргалын эхнэр Алтанцэцэгтэй хамт Баянхошууны тойрог хүртэл засмал замаар яваад хайсан боловч ямар ч машин болон явган хүн харагдаагүй.гэх мэдүүлэг /хх-19-20/,
• шүүхийн шинжилгээний үндэсний хүрээлэнгийн 2018 оны 01 дүгээр сарын 08-ны өдрийн 1091 дугаартай шинжээчийн дүгнэлт :..С.Бын биед баруун нүдний дээд, доод зовхи, зүүн чамархайн хуйханд цус хуралт, зөөлөн эдийн няцрал, хамрын нуруунд цус хуралт, зулгаралт, баруун дээд зовхинд шарх, зүүн сарвууны зөөлөн эдийн няцрал гэмтэл тогтоогдлоо. Дээрх гэмтэл нь мохоо зүйлийн үйлчлэлээр тухайн хэрэг болсон гэх цаг хугацаанд үүсгэгдсэн байх боломжтой. Дээрх гэмтэл нь шүүх эмнэлэгийн гэмтлийн зэрэг тогтоох журмын 2.4.1-д зааснаар эрүүл мэндийг түр хугацаагаар сарниулах тул гэмтлийн хөнгөн зэрэгт хамаарна /х-55/,
• шүүгдэгч Б.Дгийн мөрдөн байцаалтад өгсөн :...Ц энэ ах утастай юм байна энийг “гоций” гэсэн ба Ц машиныг зогсоож буугаад намайг буугаад ир гэж буулгасан. Тэгээд би буугаад араас нь алхаад очтол Ц нөгөө залуутай хэрэлдээд заамдалцаад авсан...Ц нөгөө ахын нүүрэн тус газар нэг удаа гараараа цохисон...Э гүйгээд ирж байсныг хараад нөгөө ах зам хөндлөн гараад зугтаасан...Ц араас нь гүйгээд явсан ба Э бид хоёр хойноос нь гүйгээд явсан. Тэгтэл Ц нөгөө ахыг өшиглөсөн үү цохисон уу нөгөө ахыг замын хажуу руу унагасан ба араас нь гүйж ороод нүүр рүү нь эхлээд цохиж байсан. Дараа нь чулуу байсан уу тоосго байсан уу хүзүү нүүр хэсэгт нь цохиж байсан. Э бөгс болон хөл гар руу нь өшиглөж байсан. Би гэдэс рүү нь 2 удаа, нуруу хэсэг рүү 2 удаа өшиглөсөн...Ц намайг зүүн гарыг нь барьж бай гэхээр нь бариад байж байхад Э утсыг нь аваад зугт гэж хэлсэн, гар утсыг аваад зугтаж байхыг харсан.Э гэрт очсон...Ц Э за утсаа гаргаад ир ямар ч байсан цагаан өнгийн з5 байсан шүү гэхэд Э утсаа гүйж байгаад хаячихаж гэсэн. Тэгсэн Ц уурлаад Этай

муудалцаад...Утас халаасандаа хийгээд гүйж байхад хэзээ ч унадаггүй юм гээд уурлаад яваад өгсөн. Би машинаас нь буугаад үлдсэн....гэх мэдүүлэг /хх-76-78/,

Хохирогч С.Бын биед бид гурав гурвуулаа гэмтэл учруулсан. Би С.Бын гэдэс болон баруун хөл рүү нь өшиглөсөн. Ц хохирогчийн дээр гараад суучихсан нүүр рүү нь гараараа цохисон. Тэгээд дараа чулуугаар хүзүү хэсэг рүү нь цохиж байсан. Явган хүний зам дээр тавьдаг жижиг тоосго шиг зүйл харагдсан. Э нуруу хэсэг рүү өшиглөж байх шиг байсан...гэх мэдүүлэг /хх-184-185/,

• шүүгдэгч Г.Эн мөрдөн байцаалтад өгсөн ...Би хохирогч Батжаргалын зүүн бугалга хэсэг рүү, бас бөгс рүү нь өшиглөсөн. Гар утсыг нь би авсан, Ц намайг авчих гэсэн. Дэлгэрдалай, Ц нар хохирогчийн гарыг барьж байсан. Ц хохирогчийн дагз хэсэг рүү жижиг тоосго шиг зүйлээр цохиж байхыг харсан, Дэлгэрдалай хохирогчийг 2-3 удаа өшиглөж байсан.../х-179/,
• шүүгдэгч Ц.Цийн мөрдөн байцаалтад өгсөн:... Би сонсгож байгаа зүйл хэсгийг хүлээн зөвшөөрч байна. Би хийсэн хэргээ хүлээн зөвшөөрнө...гэх мэдүүлэг /хх- 190-191/
• "арвижих-Эстисмэйт" ХХК-ийн гар утасны үнэлгээ хийсэн баримт /хх-60/ зэрэг нотлох баримтуудаар нотлогдож тогтоогдож байна.

Иймд шүүгдэгч Ц.Ц, Г.Э, өсвөр насны шүүгдэгч Б.Д нарыг бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон,

шүүгдэгч Ц.Ц, Г.Э, өсвөр насны шүүгдэгч Б.Д нарыг хүний эрүүл мэндэд хөнгөн хохирол учруулах гэмт хэргийг бүлэглэн үйлдсэн гэм буруутайд тус тус тооцож, тус тус эрүүгийн хариуцлага хүлээлгэх үндэслэлтэй байна.

Шүүгдэгч нарын үйлдсэн гэмт хэргийн шинж, зүйлчлэлд хийсэн хууль зүйн дүгнэлт:

Шүүгдэгч нарт холбогдох гэмт хэргийг нотолж буй нотлох баримтын шууд ба шууд бус эх сурвалжийг харьцуулан шалгаж, үнэлэхэд хуульд заасан үндэслэл, журмын дагуу цугларсан, хэрэгт хамааралтай, ач холбогдолтой, хангалттай байх ба хохирогч, гэрч нар худал мэдүүлсэн, шинжээч худал дүгнэлт гаргасан гэж үзэх үндэслэлгүй байх тул шүүгдэгч нарын үйлдсэн гэмт хэрэг нотлогдсон буюу хэргийн зүйлчлэлийг зөв гэж үзнэ.

Ц.Ц, Г.Э, Б.Д нарыг мөрдөн байцаалтын шатанд гэрчээр мөн яллагдагчаар удаа дараа байцаасан /х-26-27, 93-96, 190-191/ /х-28-29, 85-86, 178-179/,/х- 30-31, 76-78, 184-185/ байх ба шүүгдэгч Г.Э, Б.Д нарын шүүхийн хэлэлцүүлэгт өгсөн мэдүүлэг нь тэдний мөрдөн байцаалтад өгсөн мэдүүлэгтэй агуулга, эх сурвалжаар тохирсон буюу зөрөөтэй байдал үүсээгүй, харин шүүгдэгч Ц.Ц шүүхийн хэлэлцүүлэгт өөрт хуулиар олгогдсон эрхийн хүрээнд мэдүүлсэн байгааг тэмдэглэв.

Шүүх нотлох баримтуудыг үнэлэхдээ мөрдөн байцаалтын шатанд шүүгдэгч нараас өмгөөлөгчгүйгээр авсан мэдүүлгийг бүхэлд нь үнэлээгүй харин шүүгдэгч нарын өмгөөлөгчийн хамт мөрдөн байцаалт болон шүүхийн хэлэлцүүлэгт өгсөн мэдүүлгийг үнэлсэн ба шүүгдэгч нар гэмт хэрэг үйлдсэн нь буюу хэргээ хүлээн мэдүүлсэн нь хөндлөнгийн бусад нотлох баримтаар эргэлзээгүй тогтоогдсон байх тул тус хэрэгт мөрдөн шалгах ажиллагаа дахин хийх үндэслэлгүй гэж үзнэ.

Дээр дурдсан нотлох баримт үндэслэлийн хүрээнд шүүгдэгч нарт холбогдох хэргийн зүйлчлэлийг зөвшөөрөхгүй, хэргийг прокурорт буцаалгах тухай шүүгдэгч нарын өмгөөлөгч нарын дүгнэлтийг хүлээж авах үндэслэл тогтоогдохгүй байна.

Хохирогч С.Бд учирсан хохирол 193.000 төгрөг /хх-46-49, 59-60/ болж байх ба шүүгдэгч нар төлж барагдуулсан байх тул төлөх төлбөргүй гэж үзэв.

Шүүгдэгч нарт эрүүгийн хариуцлага хүлээлгэхэд хийсэн хууль зүйн дүгнэлт:

Шүүгдэгч нар тохиолдлын шинжтэй нөхцөл байдлын улмаас анх удаа гэмт хэрэг үйлдсэн, хохирогчид учруулсан хохирлыг төлсөн нь Эрүүгийн хуулийн ерөнхий ангийн 6.5 дугаар зүйлийн 1.1, 1.2-т зааснаар эрүүгийн хариуцлагыг хөнгөрүүлэх нөхцөл байдалд хамаарна.

Шүүгдэгч Ц.Ц, Б.Даваадорж нарт эрүүгийн хариуцлага хүлээлгэхэд Эрүүгийн хуулийн 6.1 дүгээр зүйлийн 2-т зааснаар шүүгдэгчийн гэмт хэрэг үйлдсэн нөхцөл байдал, учирсан хохирлын шинж чанар, эрүүгийн хариуцлагыг хөнгөрүүлэх нөхцөл байдал зэргийг харгалзан Эрүүгийн хуулийн тусгай ангийн 17.2 дугаар зүйлийн 2-т заасан гэмт хэрэгт хорих ял, харин Эрүүгийн хуулийн тусгай ангийн 11.6 дугаар зүйлийн 1-т зааснаар нийтэд тустай ажил хийлгэх ял оногдуулан хөнгөн ялыг хүндэд нэмж нэгтгэж, хорих ялыг нээлттэй байгууллагад эдлүүлэхээр шийдвэрлэв.

Эрүүгийн хуульд өөрчлөлт оруулах тухай 2018 оны 6 дугаар сарын 27-ны өдрийн хуулиар: Эрүүгийн хуулийн тусгай ангид хорих ялын дээд хэмжээг 8 жил, түүнээс доош хугацаагаар тогтоосон гэмт хэрэг үйлдсэн өсвөр насны хүнд хорих ял оногдуулсан шүүхийн шийтгэх тогтоол биелүүлэхийг хойшлуулахаар заасан тул өсвөр насны шүүгдэгч Б.Дн гэмт хэрэг үйлдсэн нөхцөл байдал, учирсан хохирол, түүний хүний хувийн байдал зэргийг харгалзан Эрүүгийн хуулийн тусгай ангийн 17.2 дугаар зүйлийн 2 дахь хэсэгт заасан гэмт хэрэгт хорих ял оногдуулж, уг оногдуулсан хорих ялыг хойшлуулан Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.3 дахь заалтад зааснаар зан үйлээ засах, хөдөлмөрлөх дадал олгох сургалтад хамрагдах үүрэг хүлээлгэв.

Харин өсвөр насны шүүгдэгч Б.Дд Эрүүгийн хуулийн ерөнхий ангийн 8.3 дугаар зүйлийн 2 дахь хэсгийг журамлан мөн хуулийн тусгай ангийн 11.6 дугаар зүйлийн 2 дахь хэсэгт зааснаар оногдуулсан 360 цаг нийтэд тустай ажил хийлгэх ялыг биечлэн эдлүүлэх нь зүйтэй гэж үзэв.

Бусад асуудал

Уг хэрэгт битүүмжлэгдсэн, хураагдсан эд зүйлгүй, шүүгдэгч Г.Э, өсвөр насны шүүгдэгч Б.Д нар нь бусдад төлөх төлбөргүй, цагдан хоригдсон хоноггүй болохыг тус тус дурдав.

Шүүгдэгч Ц.Ц 2018.07.25-ны өдрөөс /хх-98/ 2018.10.11 -ний өдрийг хүртэл 78 хоног цагдан хоригдсон, шүүгдэгч Г.Э, Б.Д нар нь тус тус 1 хоног цагдан хоригдсон байна.

Эрүүгийн хэрэг хянан шийдвэрлэх тухай хуулийн 36.2, 36.6, 36.7, 36.8, 36.10, 38.1, 38.2 дугаар зүйлүүдэд заасныг тус тус удирдлага болгон

ТОГТООХ нь:

1. Шүүгдэгч Ц.Ц, Г.Э, өсвөр насны шүүгдэгч Б.Д нарыг бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон,

Ц.Ц, Г.Э, өсвөр насны шүүгдэгч Б.Д нарыг хүний эрүүл мэндэд хөнгөн хохирол учруулах гэмт хэргийг бүлэглэн үйлдсэн гэм буруутайд тус тус тооцсугай.

2. Эрүүгийн хуулийн тусгай ангийн 17.2 дугаар зүйлийн 2 дахь хэсэгт зааснаар шүүгдэгч Ц.Цийг 02 жил 02 сар хорих ялаар, шүүгдэгч Г.Эг 02 жил хорих ялаар,

мөн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Ц.Ц, Г.Э нарыг тус бүр 720 цаг нийтэд тустай ажил хийлгэх ялаар,

Эрүүгийн хуулийн тусгай ангийн 17.2 дугаар зүйлийн 2 дахь хэсэгт зааснаар өсвөр насны шүүгдэгч Б.Дд 02 жилийн хугацаагаар хорих ял оногдуулж, Эрүүгийн хуулийн ерөнхий ангийн 8.5 дугаар зүйлийн 1 дэх хэсэгт заасныг журамлан эдлэх 02 жилийн хорих ялыг

2 дахин багасгаж 01 жилийн хугацаагаар хорих ялаар, мөн Эрүүгийн хуулийн ерөнхий ангийн .3 дугаар зүйлийн 2 дахь хэсгийг журамлан мөн хуулийн тусгай ангийн 11.6 дугаар зүйлийн 2 дахь хэсэгт зааснаар өсвөр насны шүүгдэгч Б.Дг 360 цаг нийтэд тустай ажил хийлгэх ялаар тус тус шийтгэсүгэй.

3. Эрүүгийн хуулийн ерөнхий ангийн 6.8 дугаар зүйлийн 1, 2 дахь хэсгийн 2.2-т зааснаар шүүгдэгч Ц.Цт Эрүүгийн хуулийн тусгай ангийн 17.2 дугаар зүйлийн 2 дахь хэсэгт зааснаар оногдуулсан 02 жил 02 сарын хорих ял дээр мөн хуулийн тусгай ангийн 11.6 дугаар зүйлийн 2 дахь хэсэгт зааснаар оногдуулсан 720 цагийн нийтэд тустай ажил хийлгэх ялын 8 цагийг хорих ялын 1 хоногоор тооцон нийт 3 сарын хорих ялыг нэмж нэгтгэн, түүний биечлэн эдлэх ялыг нийт 02 жил 05 сарын хугацаагаар, шүүгдэгч Г.Эд Эрүүгийн хуулийн тусгай ангийн 17.2 дугаар зүйлийн 2 дахь хэсэгт зааснаар оногдуулсан 02 жилийн хорих ял дээр мөн хуулийн тусгай ангийн 11.6 дугаар зүйлийн 2 дахь хэсэгт зааснаар оногдуулсан 720 цагийн нийтэд тустай ажил хийлгэх ялын 8 цагийг хорих ялын 1 хоногоор тооцон нийт 3 сарын хорих ялыг нэмж нэгтгэн, түүний биечлэн эдлэх ялыг нийт 02 жил 03 сарын хугацаагаар хорих ялаар тус тус тогтоосугай.
4. Эрүүгийн хуулийн ерөнхий ангийн 5.6 дугаар зүйлийн 4 дэх хэсэгт зааснаар шүүгдэгч Ц.Цийн эдлэх 2 жил 5 сар хорих ял, Г.Эгийн эдлэх 2 жил 3 сар хорих ялыг тус бүр нээлттэй хорих байгууллагад, Эрүүгийн хуулийн ерөнхий ангийн 8.5 дугаар зүйлийн 2 дахь хэсэгт зааснаар өсвөр насны шүүгдэгч Б.Дгийн эдлэх хорих ялыг сургалт-хүмүүжлийн тусгай байгууллагад тус тус эдлүүлсүгэй.
5. Эрүүгийн хуулийн ерөнхий ангийн 1.9 дүгээр зүйлийн 1, 8.6 дугаар зүйлийн 1 дэх хэсэгт заасныг журамлан өсвөр насны шүүгдэгч Б.Дд Эрүүгийн хуулийн ерөнхий ангийн 8.5 дугаар зүйлийн 1 дэх хэсэгт заасныг журамлан мөн хуулийн тусгай ангийн 17.2 дугаар зүйлийн 2 дахь хэсэгт зааснаар 1 жил хорих ял оногдуулсан шийтгэх тогтоол биелүүлэхийг 02 жилийн хугацаагаар хойшлуулж, Эрүүгийн хуулийн ерөнхий ангийн 7.3 дугаар зүйлийн 2 дахь хэсгийн 2.2-т зааснаар зан үйлээ засах, хөдөлмөрлөх дадал олгох сургалтад хамрагдах үүрэг хүлээлгэсүгэй.
6. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар өсвөр насны шүүгдэгч Б.Дд шүүхээс оногдуулсан 320 цагийн нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын 8 цагийг нэг хоног хорих ялаар тооцож солихыг мэдэгдсүгэй.
7. Эрүүгийн хуулийн ерөнхий ангийн 6.10 дугаар зүйлийн 1, 2 дахь хэсэгт зааснаар шүүгдэгч Ц.Цийн цагдан хоригдсон 78 хоногийг, шүүгдэгч Г.Эн цагдан хоригдсон 1 хоногийг тус бүр тэдгээрийн биечлэн эдлэх хорих ялаас, өсвөр насны шүүгдэгч Б.Дгийн цагдан хоригдсон 1 хоногийг нийтэд тусгай ажил хийлгэх ялын 8 цагтай дүйцүүлэн тооцож, эдлэх нийтэд тустай ажил хийлгэх ялаас тус тус хассугай.
8. Уг хэрэгт эд мөрийн баримтаар хураагдсан, битүүмжлэгдсэн зүйлгүй, шүүгдэгч нар бусдад төлөх нотлох баримт бүхий төлбөргүй болохыг тус тус дурдсугай.
9. Өсвөр насны шүүгдэгч Б.Дд авсан цагдан хорих таслан сэргийлэх арга хэмжээг өөрчилж, хувийн баталгаа гаргах таслан сэргийлэх арга хэмжээ авч, шүүгдэгч Ц.Ц, Г.Э нарт авсан цагдан хорих таслан сэргийлэх арга хэмжээг хэвээр үргэлжлүүлж, тэдний эдлэх ялыг 2018 оны 10 дугаар сарын 11-ний өдрөөс эхлэн тооцсугай.
10. Уг тогтоол танилцуулан сонсгосноор хүчинтэй болохыг мэдэгдсүгэй.
11. Эрх бүхий прокурор, оролцогч шийтгэх тогтоолыг гардан авснаас хойш эсхүл хүргүүлснээс хойш 14 хоногийн дотор Нийслэлийн Эрүүгийн хэргийн давж заалдах шатны шүүхэд давж заалдах гомдол, эсэргүүцэл гаргах эрхтэйг дурдсугай.