Хариуцагчийн зөвшөөрлийг баталж,

хэргийг хэрэгсэхгүй болгох тухай

Хөвсгөл аймаг дахь Захиргааны хэргийн анхан шатны шүүхийн шүүгч Б.Энхтайван би Хөвсгөл аймгийн Прокурорын газрын хяналтын прокурор, хууль цаазын дэд зөвлөх *******ийн Санхүү төрийн сангийн хэлтсийн нягтлан бодох бүртгэлийн улсын байцаагч*******д холбогдох “Санхүү төрийн сангийн хэлтсийн нягтлан бодох бүртгэлийн улсын байцаагчийн 2020 оны 02 дугаар сарын 17-ны өдрийн 2209984 дугаартай шийтгэлийн хуудсыг хүчингүй болгуулах” дүгнэлтийг хянаад

ТОДОРХОЙЛОХ нь:

Хөвсгөл аймгийн Прокурорын газрын хяналтын прокурор, хууль цаазын дэд зөвлөх ******* тус шүүхэд ирүүлсэн дүгнэлтдээ: “... Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч******* хялбаршуулсан журмаар зөрчлийн хэрэг бүртгэлтийн ажиллагаа явуулж, 2020 оны 02 дугаар сарын 17-ны өдөр Зөрчлийн тухай хуулийн 11.18 дугаар зүйлийн 1 дэх хэсгийн 1.6-т зааснаар 400 нэгжтэй тэнцэх хэмжээний буюу 400 000 төгрөгөөр торгож шийдвэрлэсэн “Цагаан-Уул тур” ХХК-д холбогдох материалыг хянахад:

“Цагаан-Уул тур” хариуцлагатай хувьцаат компани нь 2019 оны жилийн эцсийн санхүүгийн тайланг цахим хэлбэрээр илгээх үүргээ биелүүлээгүй Зөрчлийн тухай хуулийн 11.18 дугаар зүйлийн 1 дэх хэсгийн 1.6-д заасан “... аж ахуйн нэгж, байгууллага санхүүгийн тайлангаа хуулиар тогтоосон хугацаанд харилцагч санхүүгийн байгууллагад цахим хэлбэрээр хүргүүлэх үүргээ биелүүлээгүй ...” гэх зөрчилд зөрчил шалган шийдвэрлэх ажиллагаа явуулан 2020 оны 02 дугаар сарын 17-ны өдрийн 2209984 дугаартай шийтгэлийн хуудсаар Зөрчлийн тухай хуулийн 11.18 дугаар зүйлийн 1 дэх хэсгийн 1.6-д зааснаар “Цагаан-Уул тур” ХХК-ний захирал*******т 400 нэгжтэй тэнцэх хэмжээний буюу /дөрвөн зуун мянга/ төгрөгөөр торгох шийтгэл оногдуулсан байна.

Гэвч нягтлан бодох бүртгэлийн улсын байцаагч******* нь дээрх зөрчлийн талаарх гомдол, мэдээллийг хуулиар хүлээсэн чиг үүргээ хэрэгжүүлэх явцад зөрчлийн шинжтэй үйлдэл, эс үйлдэхүйг илрүүлсэн байхад зөрчлийн талаар амаар болон холбоо, мэдээллийн хэрэгслээр гаргасан гомдол, мэдээллийг хүлээн авсан тухай тэмдэглэл үйлдсэн, мөн гомдол, мэдээллийг хүлээн авсан талаар прокурорын байгууллагын нэгдсэн бүртгэлд бүртгүүлээгүй нь Зөрчил шалган шийдвэрлэх тухай хуулийн 6.1, Монгол Улсын Ерөнхий прокурорын 2019 оны А/41 дугаартай тушаалаар батлагдсан “Зөрчлийн хэрэг бүртгэлтэд тавих прокурорын хяналтын аргачилсан заавар”-ын 2.1 дүгээр зүйлийн 2.7-д заасныг тус тус зөрчсөн.

Дээрх зөрчил нь Зөрчлийн тухай хуулийн 10.18 дугаар зүйлийн 1 дэх хэсгийн 1.6-д зааснаар “Цагаан-Уул тур” ХХК-д буюу хуулийн этгээдэд холбогдох зөрчил байхад шийтгэл оногдуулж шийдвэрлэхдээ компанийн захирал*******т хувь хүнээр шийтгэл оногдуулж шийдвэрлэсэн нь Зөрчлийн тухай хууль болон Зөрчил шалган шийдвэрлэх тухай хуулиудыг ноцтой зөрчсөн байх тул 2209984 дугаартай шийтгэлийн хуудсыг хүчингүй болгож, зөрчлийн хэрэг бүртгэлтийн ажиллагаа явуулах шаардлагатай байна.

Иймд Монгол Улсын Зөрчил шалган шийдвэрлэх тухай хуулийн 7.2 дугаар зүйлийн 8 дахь хэсгийг удирдлага болгон тус аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч*******гийн 2020 оны 02 дугаар сарын 17-ны өдрийн 2209984 дугаартай шийтгэлийн хуудсыг хүчингүй болгуулахаар прокурорын дүгнэлт бичив” гэжээ.

Хариуцагч Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн бодлого үйл ажиллагааг зохион байгуулах ахлах мэргэжилтэн, Нягтлан бодох бүртгэлийн улсын байцаагч******* шүүхэд гаргасан тайлбартаа: “2020 оны 02 дугаар сарын 17-ны өдөр “Цагаан-Уул тур” ХХК-ийн захирал******* нь 2019 оны жилийн эцсийн санхүүгийн тайланг хугацаанд нь цахимаар илгээгээгүй тухай өөрийн биеэр ирж уулзан зөрчлөө арилгах хүсэлт гаргасныг хүлээн авч Зөрчлийн тухай хуулийн 11.18 Нягтлан бодох бүртгэлийн тухай хуулийг зөрчих гэсний 1.6 аж ахуйн нэгж, байгууллага санхүүгийн тайлангаа хуулиар тогтоосон хугацаанд харилцагч санхүүгийн байгууллагад цахим хэлбэрээр хүргүүлэх үүргээ биелүүлээгүй гэсэн заалтын дагуу хялбаршуулсан журмаар шийдвэрлэж 400 000 төгрөгөөр торгох шийтгэл оногдуулсан.

Энэ материалыг Прокурорын газрын хяналтын прокурор, хууль цаазын дэд зөвлөх *******өд хянуулахад хуулийн этгээдэд холбогдох зөрчил байхад хувь хүнээр шийтгэл оногдуулж шийдвэрлэсэн нь Зөрчлийн тухай болон Зөрчил шалган шийдвэрлэх тухай хуулиудыг зөрчсөн байх тул шийтгэлийн хуудсыг хүчингүй болгуулахаар дүгнэлт гаргаж танайд хүргүүлжээ.

Би зөрчил шалган шийдвэрлэхдээ Нягтлан бодох бүртгэлийн тухай хуулийн 18 дугаар зүйлийн 18.1-д нягтлан бодох бүртгэлийг удирдан зохион байгуулах үүргийг аж ахуйн нэгж, байгууллагын гүйцэтгэх удирдлага хүлээнэ гэсэн заалт байдаг тул захирал*******т шийтгэл ногдуулж байна гэж ойлгож буруу шийдвэрлэсэн байх тул Прокурорын газрын хяналтын прокурор, хууль цаазын дэд зөвлөх *******ийн дүгнэлтийг хүлээн зөвшөөрч байна” гэжээ.

ҮНДЭСЛЭХ нь:

Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч******* нь “Цагаан-Уул тур” ХХК-ийн захирал*******т “Санхүүгийн тайлан илгээгээгүй” гэх зөрчилд Нягтлан бодох бүртгэлийн тухай хуулийн 1.6.2 дугаар зүйлд зааснаар 2020 оны 02 дугаар сарын 17-ны өдрийн 2209984 дугаар шийтгэлийн хуудсаар 400 нэгж буюу 400 000 төгрөгөөр торгох шийтгэл оногдуулжээ.

Хөвсгөл аймгийн  Прокурорын газрын хяналтын прокурор, хууль цаазын дэд зөвлөх ******* тус шүүхэд Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч*******гийн үйлдсэн 2020 оны 02 дугаар сарын 17-ны өдрийн “Хялбаршуулсан журмаар шийдвэрлэх зөрчилд шийтгэл оногдуулах тухай” 2209984 дугаар шийтгэлийн хуудсыг хүчингүй болгуулах тухай дүгнэлт ирүүлсэн байна.

Шүүх хуульд заасан журмын дагуу зөрчлийн хэрэг үүсгэн, хэрэг хянан шийдвэрлэх ажиллагаа явууллахад Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч******* нь 2020 оны 02 дугаар сарын 17-ны өдрийн “Хялбаршуулсан журмаар шийдвэрлэх зөрчилд шийтгэл оногдуулах тухай” 2209984 дугаар шийтгэлийн хуудсаар “Цагаан-Уул тур” ХХК-ийн захирал*******ыг 400 000 /дөрвөн зуун мянга/ төгрөгөөр торгох шийтгэл оногдуулсаныг хүчингүй болгуулах тухай Хөвсгөл аймгийн Прокурорын газрын хяналтын прокурор, хууль цаазын дэд зөвлөх *******ийн дүгнэлтийг бүхэлд нь хүлээн зөвшөөрсөн нь Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д “Хариуцагч нэхэмжлэлийн шаардлагыг бүхэлд нь хүлээн зөвшөөрсөн нь бусад этгээдийн эрх, эрх чөлөө, хууль ёсны ашиг сонирхолыг хөндөхөөргүй, хуульд харшлаагүй байвал шүүх хариуцагчийн зөвшөөрлийн баталж, хэргийг хэрэгсэхгүй болгоно” гэж заасантай нийцэж байна. 

Захиргааны хэрэг шүүхэд хянан шийдвэрлэх тухай хуулийн 111 дугаар зүйлийн 111.1-д заасныг удирдлага болгон  ЗАХИРАМЖЛАХ нь:

1. Захиргааны хэрэг шүүхэд хянан шийдвэрлэх тухай хуулийн 67 дугаар зүйлийн 67.1-д заасныг баримтлан Хөвсгөл аймгийн Прокурорын газрын хяналтын прокурор, хууль цаазын дэд зөвлөх *******ийн “Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагчийн 2020 оны 02 дугаар сарын 17-ны өдрийн 2209984 дугаартай шийтгэлийн хуудсыг хүчингүй болгуулах” дүгнэлтийг хариуцагч Хөвсгөл аймгийн Засаг даргын Тамгын газрын Санхүү төрийн сангийн хэлтсийн нягтлан бодох бүртгэлийн улсын байцаагч******* зөвшөөрснийг баталж, зөрчлийн хэргийг хэрэгсэхгүй болгосугай.  

2. Захиргааны хэрэг шүүхэд хянан шийдвэрлэх тухай хуулийн 48 дугаар зүйлийн 48.2, Улсын тэмдэгтийн хураамжийн тухай хуулийн 41 дүгээр зүйлийн 41.1.14-т зааснаар дүгнэлт гаргагч нь улсын тэмдэгтийн хураамжаас чөлөөлөгдсөн болохыг дурдсугай.

3. Захиргааны хэрэг шүүхэд хянан шийдвэрлэх тухай хуулийн 69 дүгээр зүйлийн 69.2-т зааснаар энэхүү шүүгчийн захирамжид гомдол гаргах эрхгүй бөгөөд шүүхийн шийдвэрийн нэгэн адил биелүүлэхийг тайлбарласугай.

 

 

ШҮҮГЧ                             Б.ЭНХТАЙВАН