2018 оны 11 сарын 15 өдөр          2018/ШЦТ/204                                 Хэрлэн сум

 

МОНГОЛ УЛСЫН НЭРИЙН ӨМНӨӨС

 

Хэргийн индекс: 180/2018/0310/Э

 

Хэнтий аймаг дахь сум дундын эрүүгийн хэргийн анхан шатны шүүхийн шүүгч Д.Ганзориг даргалж тус шүүхийн шүүх хуралдааны "А" танхимд нээлттэй хийсэн хуралдаанд

Нарийн бичгийн дарга: М.Сайнболд

Улсын яллагч: Я.С

Шүүгдэгчийн өмгөөлөгч: Х.Б

Шүүгдэгч: Б.Н нарыг оролцуулан

Хэнтий аймгийн прокурорын газрын хяналтын прокурор Я.Сансараас Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн Хар бүргэд овогт Б-н Н-д холбогдох 1839000000228 дугаартай эрүүгийн хэргийг 2018 оны 11 дүгээр сарын 01- ний өдөр хүлээн авч хянан хэлэлцэв.

Шүүгдэгчийн биеийн байцаалт:

 

Шүүгдэгчийн холбогдсон хэргийн талаар: /яллах дүгнэлтэд дурдсанаар/

Шүүгдэгч Б.Н- нь 2018 оны 09 дүгээр сарын 29-ний өдөр Хэнтий аймгийн Хэрлэн сумын 8 дугаар баг “Эргэл” гэх газарт иргэн Д.Б-ийн 5 тооны хонийг өөрийн хониндоо нийлүүлэн хулгайлж 600000 төгрөгийн хохирол учруулсан гэмт хэрэгт холбогджээ.

ТОДОРХОЙЛОХ нь:

Шүүгдэгч Б.Н- нь 2018 оны 09 дүгээр сарын 29-ний өдөр Хэнтий аймгийн Хэрлэн сумын 8 дугаар баг “Эргэл” гэх газарт иргэн Д.Б-ийн 5 тооны хонийг хулгайлж 600000 төгрөгийн хохирол учруулсан болох нь:

Хохирогч С.Б-ийн мөрдөн байцаалтад өгсөн: “...Би 2018 оны 09 дүгээр сарын 29-ний өдөр манай хүү Э- нь хонио бэлчээгээд цайгаа уугаад гэртээ байж байхад бэлчээрт гаргасан хонь нь үргээд гараад ирсэн гэсэн. Тэгээд манай хүү наанаас нь мотоцикльтэй хонь руугаа яваад очиход Г-, Н- хоёр өөдөөс хүрээд ирсэн гэсэн. Тэгээд манай хүүтэй уулзсан гэсэн, манай хүү тэр хоёроос манай хонь танай хоньтой нийлсэн үү гэж асуухад үгүй гэж хэлсэн гэсэн. Тэгээд манай хүү гэртээ ирсэн. Тэгээд бид хоёр маргааш нь буюу 2018 оны 09 дүгээр сарын 30-ны өглөө ^ хонио тоолж үзэхэд 6 тооны хонь дутуу байсан. Хүү Э-ыг Н-гийн хониор очоод үзээд ир гээд явуулсан чинь манай имтэй 3 хонь байсан...” гэх мэдүүлэг /хх 10- 11 тал/

Насанд хүрээгүй гэрч Б.Э-ын мөрдөн байцаалтад өгсөн: “Би 2018 оны 09 дүгээр сарын 29-ний өдөр 10 цагийн орчимд өөрийнхөө хонинд явсан. Манай хонь шар асга гэх газар бэлчээрлэж явсан. Би хониндоо мотоцикльтой явж байсан. Манай хонь байгаа газар гүвээтэй байсан. Намайг хонин дээрээ очиход манай хонь үргээд миний урдаас гараад ирсэн. Манай хонины цаад талд Н- гэдэг ахын хонь ойрхон байсан. Н-, Г- хоёр өөдөөс мотоцикльтой ирсэн. Хонь нийлсэн үү гэсэн чинь нийлээгүй гэж хэлсэн. Би тэгэхээр нь манай хониноос дутаад байна гэхэд танай хонь байхгүй гэж хэлсэн...” гэх мэдүүлэг/хх 19 тал /

3. Гэрч г-ийн мөрдөн байцаалтад өгсөн: “ би Хэрлэн сумын 8 дугаар багийн иргэнээс 2 ширхэг хонины гулууз мах худалдан авсан. Тэр мах нь 1 хонь нь 22 кг, нөгөө мах нь 27 кг болсон. нийт 189 000 төгрөг болсон. Тэр мөнгийг бэлнээр нь өгсөн...” гэх мэдүүлэг/хх 16 хуудас/
4. Малын үнэлгээ /хх 21 хуудас/ зэрэг нотлох баримтуудаар тогтоогдож байгаа бөгөөд шүүгдэгч Б.Н-гийн иргэн Д.Б-ийн малыг хулгайлсан үйлдэл нь Эрүүгийн хуулийн тусгай ангийн 17.12 дугаар зүйлийн 1 дэх хэсэгт заасан гэмт хэрэг байна.

Энэ гэмт хэргийн улмаас хохирогч Д.Б-д 600000 төгрөгийн хохирол учирсан бөгөөд хохирогч нь шүүгдэгч Б.Н-гээс 6 тооны бог мал авсан, гомдол санал, нэхэмжлэх зүйл байхгүй гэсэн тул шүүгдэгчийг бусдад төлөх төлбөргүй гэж үзэв.

Шүүгдэгч нь гэмт хэргийг шууд санаатай үйлдсэн ба түүний учруулсан хохирлоо нөхөн төлсөн байдлыг нь харгалзан ял шийтгэл оногдуулах нь зүйтэй гэж үзлээ.

Эрүүгийн хэрэг хянан шийдвэрлэх тухай хуулийн 36.2 дугаар зүйлийн 1, 2, 36.1 дүгээр зүйлийн 5, 6, 8, 36.6, 36.7, 36.8 дугаар зүйлүүдэд заасныг удирдлага болгон ТОГТООХ НЬ:

1. Шүүгдэгч Х овогт Б-н Н-г бусдын малыг хулгайлсан гэмт хэрэг үйлдсэн гэм буруутайд тооцсугай.
2. Эрүүгийн хуулийн тусгай ангийн 17.12 дугаар зүйлийн 1 дэх хэсэгт зааснаар шүүгдэгч Б.Н-г 320 цагийн нийтэд тустай ажил хийлгэх ялаар шийтгэсүгэй.
3. Эрүүгийн хуулийн ерөнхий ангийн 5.4 дүгээр зүйлийн 1 дэх хэсэгт зааснаар шүүгдэгч Б.Н-д оногдуулсан 320 цагийн нийтэд тустай ажил хийлгэх ялыг Хэнтий аймгийн Засаг даргын тамгын газрын нийтлэг үйлчилгээний газарт өдөрт цагаас 4 дээшгүй хугацаагаар нийтийн ашиг сонирхолд тустай ажлын цалин, хөлс олгохгүйгээр хийлгэж эдлүүлсүгэй.
4. Эрүүгийн хуулийн ерөнхий ангийн 5.4 дүгээр зүйлийн 3 дахь хэсэгт зааснаар шүүгдэгч Б.Н-д оногдуулсан 320 цагийн нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын 8 цагийг 1 хоногоор тооцож, хорих ялаар солихыг анхааруулсугай.
5. Энэ хэрэгт эд мөрийн баримтаар хураагдсан болон битүүмжлэгдсэн эд зүйл үгүй, шүүгдэгч нь цагдан хоригдоогүй, бусдад төлөх төлбөргүй ба түүний биеийн байцаалттай холбоотой баримт бичиг шүүхэд ирээгүй болохыг дурдсугай.
6. Шийтгэх тогтоол нь танилцуулан сонсгомогц хүчинтэй болох бөгөөд шүүгдэгч, хохирогч, тэдгээрийн хууль ёсны төлөөлөгч, өмгөөлөгч нар шийтгэх тогтоолыг эс зөвшөөрвөл гардан авсан өдрөөс хойш эсвэл Эрүүгийн хэрэг хянан шийдвэрлэх тухай хуулийн 11.9 дүгээр зүйлд заасны дагуу хүргүүлсэнээс хойш 14 хоногийн дотор Хэнтий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.
7. Давж заалдах гомдол гаргасан буюу эсэргүүцэл бичигдсэн тохиолдолд тогтоолын биелэлтийг түдгэлзүүлж, тогтоол биелүүлэх хүртэл шүүгдэгчид авсан хувийн баталгаа гаргах тухай таслан сэргийлэх арга хэмжээг хэвээр үргэлжлүүлсүгэй.

 

 

 

 

            ДАРГАЛАГЧ                                                Д.ГАНЗОРИГ