2018 оны 02 сарын 22 өдөр

Дугаар 101/ШШ2018/00626

Улаанбаатар хот

 

 

МОНГОЛ УЛСЫН НЭРИЙН ӨМНӨӨС

 

 

Баянзүрх дүүргийн иргэний хэргийн анхан шатны шүүхийн шүүгч Э.Энэбиш даргалж, тус шүүхийн танхимд хийсэн шүүх хуралдаанаар,

Нэхэмжлэгч: *******,*******,*******,******* байранд оршин байрлах Ш Ш СӨХ-ны /132/ нэхэмжлэлтэй,

Хариуцагч: *******,*******,******* тоотод оршин суух, Г.М холбогдох,

СӨХ-ны төлбөрт 274,630 төгрөг гаргуулах тухай нэхэмжлэлтэй иргэний хэргийг хянан хэлэлцэв.

Шүүх хуралдаанд: *******, шүүх хуралдааны нарийн бичгийн дарга М.Оюунтунгалаг нар оролцов.

 

ТОДОРХОЙЛОХ нь:

 

Нэхэмжлэгч Ш Ш СӨХ шүүхэд гаргасан нэхэмжлэлдээ болон шүүх хуралдаанд гаргасан тайлбартаа: Ш Ш СӨХ нь 2011 онд байгуулагдсан бөгөөд Баянзүрх дүүргийн 26 дугаар хорооны Дүнжингарав хорооллын 103, 104, 105, 106, 107, 108 гэсэн нийт 6 байрны 304 айл өрхийг хариуцан ажилладаг. Г.Мнь тус хорооллын ******* тоотын өмчлөгч бөгөөд Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хууль болон Иргэний хуулийн дагуу дундын өмчлөлийн зүйлийн ашиглалт, засвар үйлчилгээтэй холбогдсон зардлыг сууц өмчлөгчдийн холбоонд төлөх үүрэг бүхий этгээд юм. Г.Мнь 1 сард нийт 40,090 төгрөгийн СӨХ-ны төлбөрт төлөх үүрэгтэй бөгөөд тус төлбөрийг 2016 оны 02 дугаар сараас мөн оны 07 дугаар сар хүртэл, мөн 2017 оны 02 болон 07 дугаар саруудын төлбөрийг огт төлөөгүй байна.

Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хуулийн 13 дугаар зүйлийн 13.2-д сууц өмчлөгчийн үүргийг заасан байх бөгөөд хуулийн 13.2.1-д “Иргэний хуулийн 148.2 болон энэ хууль, холбооны дүрмийг сахин биелүүлэх”, 13.2.3-д “дундын өмчлөлийн эд хөрөнгийн ашиглалт, хамгаалалт, засвар, үйлчилгээтэй холбогдсон болон бусад нийтлэг зардлыг санхүүжүүлэхэд Иргэний хуулийн 147 дугаар зүйл болон энэ хуулийн 16 дугаар зүйлд заасны дагуу оролцох” үүрэгтэй гэж заасан. Мөн Иргэний хуулийн 148 дугаар зүйлийн 148.2-д орон сууц өмчлөгчийн үүргийг заасан байх бөгөөд 148.2.3-д “дундын өмчлөлийн зүйлийн ашиглалт, засвар, үйлчилгээтэй холбогдсон болон бусад нийтлэг зардлыг санхүүжүүлэхэд тогтоосон хэмжээгээр оролцох” үүрэгтэй гээд мөн хуулийн 147 дугаар зүйлийн 147.1-д “Сууц өмчлөгч нь өөрийн өмчлөлд байгаа сууц болон сууцны бус зориулалттай хэсгийн халаалт, халуун, цэвэр, бохир ус, ариутгал, хог, цахилгаан, холбоо зэрэг ашиглалтын төлбөрийг эрх бүхий байгууллагад, дундын өмчлөлийн зүйлийн ашиглалт, засвар үйлчилгээтэй холбогдсон зардлыг сууц өмчлөгчдийн холбоонд түс тус төлнө” гэж тус тус заажээ.

Иймд дээр дурдсан үндэслэлээр Г.Мээс 2016 оны 02 дугаар сараас мөн оны 07 дугаар сар хүртэл, мөн 2017 оны 02 болон 07 дугаар сарууд буюу нийт 7 сарын СӨХ-ны төлбөр 274,630 төгрөгийг гаргуулж өгнө үү гэв.

 

Хариуцагч Г.Мшүүхэд ирүүлсэн тайлбартаа: 200,450 төгрөгийг 2018 оны 02 дугаар сарын 15-ны өдрийн дотор Ш Ш СӨХ-д төлж барагдуулахад татгалзах зүйлгүй. Харин үлдэх 74,180 төгрөгийг төлж барагдуулахыг зөвшөөрөхгүй гэжээ.

 

ҮНДЭСЛЭХ нь:

 

Нэхэмжлэгч Ш Ш СӨХ, хариуцагч Г.Мт холбогдуулан СӨХ-ны төлбөрт 274,630 төгрөг гаргуулах тухай нэхэмжлэл гаргажээ.

Хариуцагч нэхэмжлэлээс 200,450 төгрөгийн шаардлагыг зөвшөөрч үлдэх 74,180 төгрөгийн шаардлагаас татгалзжээ.

Нэхэмжлэлийг бүхэлд нь хангаж шийдвэрлэв.

Ш Ш СӨХ нь Баянзүрх дүүргийн 26 дугаар хороо, Дүнжингарав хорооллын 107 дугаар байрыг хариуцан Иргэний хуулийн 143 дугаар зүйлийн 143.1-д заасан үйл ажиллагаа явуулдаг болох нь нэхэмжлэгчийн 132 дугаартай гэрчилгээгээр нотлогдож байна.

Нэхэмжлэгчийн нэхэмжлэлдээ дурдсан хариуцагч нь Баянзүрх дүүргийн 26 дугаар хороо, Дүнжингарав хорооллын ******* тоотод орших орон сууцны өмчлөгч мөн гэснийг хариуцагч маргаагүй, нэхэмжлэлийн шаардлагын зарим хэсгийг зөвшөөрчээ.

Хариуцагч 74,180 төгрөгийн шаардлагаас татгалзаж буй үндэслэлээ Иргэний хэрэг шүүхэд хянан шийдвэрлэх тухай хуулийн 72 дугаар зүйлийн 72.2-т зааснаар тайлбарлаж нотлоогүй, нэхэмжлэгч “тус 74,180 төгрөг татгалзаж байгаа нь үндэслэлгүй, хариуцагч өмнө нь төлсөн гэх боловч тус мөнгө өмнөх СӨХ-ийн төлбөрт тооцогдсон учраас хамаарахгүй” гэж шүүх хуралдаанд тайлбарласныг Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2.1, 42 дугаар зүйлийн 42.1-т зааснаар бодит байдалд нийцсэн, үнэн зөв гэж үзлээ.

Иргэний хуулийн 147 дугаар зүйлийн 147.1, Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хуулийн 13 дугаар зүйлийн 13.2.3-т зааснаар орон сууцны дундын өмчлөлийн ашиглалт, засвар үйлчилгээтэй холбогдсон зардлыг хариуцагч тухайн орон сууцанд холбогдох хэмжээгээр төлөх үүрэгтэй тул хариуцагч Г.Мээс орон сууцны дундын өмчлөлийн эд хөрөнгийн засвар үйлчилгээ, ашиглалт, хамгаалалтын төлбөрт 274,630 төгрөг гаргуулж нэхэмжлэгч Ш Ш СӨХ-нд олгож шийдвэрлэв.

Шүүх хариуцагчид 2018 оны 01 дүгээр сарын 17-ны өдөр нэхэмжлэлийн хувийг гардуулж, мөн 02 дугаар сарын 09-ний өдрийн шүүх хуралдаанд хариуцагчид эрх, үүргийг ниь тайлбарлаж өгч шүүх хуралдааныг хойшлуулж хурлыг товлосон. Хариуцагч шүүх хуралдааны товыг мэдсэн, товд гарын үсэг зурсан боловч шүүхэд хүндэтгэн үзэх шалтгаангүйгээр хүрэлцэн ирээгүй нь Иргэний хэрэг шүүхэд хянан шийдвэрлэх тухай хуулийн 77 дугаар зүйлийн 77.1-д зааснаар товыг мэдэгдсэн, нэхэмжлэгчийн төлөөлөгч хэргийг хариуцагчийн эзгүйд хянан шийдвэрлүүлэх хүсэлт гаргасныг үндэслэн Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3-т зааснаар нэхэмжлэгчээс гаргасан тайлбар болон бусад баримт нотолгоог үндэслэн хэргийг хянан шийдвэрлэв.

 

Иргэний хэрэг шүүхэд хянан шийдвэрлэх тухай хуулийн 115 дугаар зүйлийн 115.1, 115.2.1, 116, 118 дугаар зүйлүүдийг удирдлага болгон

 

ТОГТООХ нь:

 

1. Иргэний хуулийн 147 дугаар зүйлийн 147.1-д зааснаар хариуцагч Г.Мээс 274,630 төгрөг гаргуулж, нэхэмжлэгч Ш Ш СӨХ-нд олгосугай.

2. Улсын тэмдэгтийн хураамжийн тухай хуулийн 7 дугаар зүйлийн 7.1.1, Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 60 дугаар зүйлийн 60.1 дэх хэсэгт зааснаар нэхэмжлэгчээс улсын тэмдэгтийн хураамжид төлсөн 8,889 төгрөгийг улсын орлогод үлдээж, хариуцагч Г.Мээс 8,889 төгрөг нөхөн гаргуулж нэхэмжлэгч Ш Ш СӨХ-д олгосугай.

3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, тэдгээрийн төлөөлөгч, өмгөөлөгч шийдвэрийг зөвшөөрөхгүй бол гардан авснаас хойш 14 хоногийн дотор Нийслэлийн иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

 

 

 

ДАРГАЛАГЧ ШҮҮГЧ                                     Э.ЭНЭБИШ