Өмнөговь аймаг дахь сум дундын эрүүгийн хэргийн анхан шатны шүүхийн эрүүгийн хэргийн шүүх хуралдааныг Ерөнхий шүүгч Т.Дэлгэрмаа даргалж,

Нарийн бичгийн дарга: Р.Оюунсүрэн,

Улсын яллагч:  Н.Ундрах,

Шүүгдэгч: С.Ганбаатар нарыг оролцуулан тус шүүхийн эрүүгийн хэргийн шүүх хуралдааны танхимд нээлттэй хийсэн хуралдаанаар

Өмнөговь аймгийн Прокурорын газраас Эрүүгийн хуулийн тусгай ангийн 99 дүгээр зүйлийн 99.1 дэх хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн Бат-Очир тайж овгийн Сумъяагийн Ганбаатарт холбогдох 201616000201 тоот нэг хавтас эрүүгийн хэргийг 2016 оны 10 дугаар сарын 06-ны өдөр хүлээн авч хянан хэлэлцэв.

Монгол Улсын иргэн,

          Шүүгдэгч С.Ганбаатар нь Өмнөговь аймгийн Гурвантэс сумын төвд 2016 оны 09 дүгээр сарын 05-ны өдөр эхнэр Т.Тунгалагтай маргаж байх үедээ өөрийн эх Ч.Саранхүүгийн бие эрх чөлөөнд халдаж, улмаар биед нь хөнгөн гэмтэл учруулсан гэмт хэрэгт холбогджээ.                                                               

Тодорхойлох нь:

Шүүхийн хэлэлцүүлэгт дараах нотлох баримтуудыг шинжлэн судлав. Үүнд:        

Хохирогч, иргэний нэхэмжлэгч Ч.Саранхүү мөрдөн байцаалтын шатанд өгсөн мэдүүлэгтээ: 2016 оны 09 дүгээр сарын 05-ны өдөр Гурвантэс сумын төвд 23 цаг өнгөрч байхад би гэрээсээ гарч хашаандаа жорлон орсон. Тэгээд эргээд гэр рүү орох гэтэл манай хүү Ганбаатар нь өөрийн эхнэр Тунгалагтай муудалцаад зогсож байсан. Би тэр хоёр дээр явж очоод та хоёр битгий хэрэлдэцгээгээд бай гэж хэлсэн. Тэгсэн чинь гэнэт миний толгой руу цохьчих шиг болсон. Миний толгойноос бага зэргийн цус гарсан. Дараа нь цагдаа нар ирээд Ганбаатарыг аваад явсан. /хх-ийн 12-13-р хуудас/,

Гэрч Т.Тунгалаг мөрдөн байцаалтын шатанд өгсөн мэдүүлэгтээ: 2016 оны 09 дүгээр сарын 05-ны өдөр 23 цагийн орчимд миний нөхөр болох Ганбаатар бага зэргийн архи ууж ирээд гэр бүлдээ агсам согтуу тавьсан. Тэр үед Ганбаатар өөрийн хоёр хүүхэдтэйгээ хамт хадам аав Сумъяагийнд түр амьдарч байсан. Намайг гэрт байж байсан чинь Ганбаатар гаднаас орж ирээд хаагуур яваад ирэв пизда минь гэсэн. Тэгэхээр нь би хаагуур ч явсангүй ажлаасаа ирлээ гэж хэлчихээд гэрээс гарсан. Араас Ганбаатар гарч ирээд үгийн зөрөөгүй миний уруулын дээд хэсэгт гараараа цохиж бага зэргийн цус хуралт үүсгэсэн. Тэгээд байж байсан чинь хадам ээж Саранхүү жорлонгоос гараад бид хоёр руу хүрээд ирсэн. Ээж бид хоёрт хандаж битгий хэрэлдэцгээгээд бай гэж хэлсэн. Тэгээд Ганбаатар надтай муудалцаж байгаад ээж Саранхүүгийн толгой руу модоор цохьчихсон. Ганбаатар нь ээжийнхээ толгойг модоор цохих үед гадаа тас харанхуй байсан. /хх-12-13-р хуудас/,

 Өмнөговь аймгийн Шүүхийн шинжилгээний албаны 2016 оны 09 дүгээр  сарын 12-ны өдрийн 522 дугаар шинжээч эмчийн дүгнэлтэнд: Ч.Саранхүүгийн биед духны язарсан шарх, зөөлөн эдийн няцрал бүхий гэмтэл тогтоогдлоо. Дээрх гэмтэл нь мохоо зүйлийн үйлчлэлээр үүсгэгдэнэ. Цаашид ерөнхий хөдөлмөрийн чадварт нөлөөлөхгүй. Шүүх эмнэлгийн гэмтлийн зэрэг тогтоох журмын  2.4.1-д зааснаар эрүүл мэндийг түр сарниулах тул гэмтлийн хөнгөн зэрэгт хамаарна гэжээ. /хх-ийн 15-р хуудас/,

 Шүүгдэгч С.Ганбаатар мөрдөн байцаалтын шатанд өгсөн мэдүүлэгтээ: ...2016 оны 09 дүгээр  сарын 05-ны  орой 17 цагийн үед би  Гурвантэс сумын төвд Мягаа гээд найзтайгаа нэг шил 0,75 граммын Ерөөл архи уусан. Тэгээд би согтуу машин унаж явж байгаад цагдаад саатуулагдсан. Тэгээд би Мягаагийн машиныг журмын хашаанд хийлгээд гэртээ харьсан. Би өөрийнхөө амьдардаг байранд засвар хийж байгаа болохоор аав, ээж хоёрындоо түр байсан юмаа. Тэгээд аавынх руу очиход миний эхнэр Тунгалаг байхгүй байсан. Тэгэхээр нь би эргэж гараад засмал руу алхаж очоод буцаад гэрт очтол Тунгалаг ирчихсэн байсан. Би гэр рүү ороод Тунгалагыг чи хаагуур явав, юу хийж байгаад ирэв гэж уурласан. Тэгсэн чинь Тунгалаг ажлаасаа ирлээ гэсэн. Тэгээд бид хоёр гэрээс гарч гадаа хашаан дотор хэрэлдсэн. Хэрэлдээд зогсож байгаад би Тунгалагийн нүүр рүү нь нэг удаа цохьсон. Тэгтэл миний ээж Саранхүү ирсэн. Ээж ирээд юу ярьсныг нь би санахгүй байна. Тэгээд би хажууд хэвтэж байсан модыг аваад Тунгалагийг цохих гэж байгаад ээжийгээ цохьчихсон. Удалгүй цагдаа ирээд намайг аваад явсан. Тэр үед би их согтсон байсан. Мөн тухайн үед гадаа харанхуй байсан. Өмнө хэн зогсож байгаа нь харагдахгүй, сарны гэрэл ч байхгүй байсан. Тэгээд би Тунгалагийг цохих гэж байгаад санаандгүй ээж Саранхүүг цохьчихсон байсан. Санаатайгаар би ээжийгээ цохиогүй. Саранхүү нь ямар нэгэн гомдол санал хүсэлт байхгүй гэсэн. Хохирлын талаар ямар нэгэн маргаан байхгүй.  /хх-ийн 22, 24-р хуудас/,

Согтуурал шалгасан магадлагаа /хх-ийн 07-р хуудас/,

Ял шийтгэгдсэн эсэхийг шалгах хуудас /хх-ийн 34-р хуудас/,

Хохирогч Ч.Саранхүүгийн хүсэлт /хх-ийн 35-р хуудас/,

Эд мөрийн баримтаар тооцож, хэрэгт хавсаргах тогтоол /хх-ийн 37-р хуудас /

Иргэд хоорондын эвлэрлийн гэрээ зэрэг болно.

Шүүгдэгч С.Ганбаатар нь Өмнөговь аймгийн Гурвантэс сумын төвд 2016 оны 09 дүгээр сарын 05-ны өдөр эхнэр Т.Тунгалагтай маргаж байх үедээ өөрийн эх Ч.Саранхүүгийн бие эрх чөлөөнд халдаж, улмаар биед нь хөнгөн гэмтэл учруулсан гэмт хэрэг үйлдсэн болох нь шүүхийн хэлэлцүүлэгт шинжлэн судлагдсан дараах нотлох баримтуудаар тогтоогдож байна. Үүнд:

Хохирогч, иргэний нэхэмжлэгч Ч.Саранхүүгийн: 2016 оны 09 дүгээр сарын 05-ны өдөр Гурвантэс сумын төвд 23 цаг өнгөрч байхад би гэрээсээ гарч хашаандаа жорлон орсон. Тэгээд эргээд гэр рүү орох гэтэл миний хүү Ганбаатар нь өөрийн эхнэр Тунгалагтай муудалцаад зогсож байсан. Би тэр хоёр дээр явж очоод та хоёр битгий хэрэлдэцгээгээд бай гэж хэлсэн. Тэгсэн чинь гэнэт миний толгой руу цохьчих шиг болсон. Миний толгойноос бага зэргийн цус гарсан. Дараа нь цагдаа нар ирээд Ганбаатарыг аваад явсан гэсэн мэдүүлэг /хх-ийн 12-13-р хуудас/,

Гэрч Т.Тунгалагийн:...Тэгээд Ганбаатар надтай муудалцаж байгаад ээж Саранхүүгийн толгой руу модоор цохьчихсон. Ганбаатар нь ээжийнхээ толгойг модоор цохих үед гадаа тас харанхуй байсан гэсэн мэдүүлэг /хх-12-13-р хуудас/,

Өмнөговь аймгийн Шүүхийн шинжилгээний албаны 2016 оны 09 дүгээр  сарын 12-ны өдрийн 522 дугаар шинжээч эмчийн: Ч.Саранхүүгийн биед духны язарсан шарх, зөөлөн эдийн няцрал бүхий гэмтэл тогтоогдлоо. Дээрх гэмтэл нь мохоо зүйлийн үйлчлэлээр үүсгэгдэнэ. Цаашид ерөнхий хөдөлмөрийн чадварт нөлөөлөхгүй. Шүүх эмнэлгийн гэмтлийн зэрэг тогтоох журмын  2.4.1-д зааснаар эрүүл мэндийг түр сарниулах тул гэмтлийн хөнгөн зэрэгт хамаарна гэсэн дүгнэлт /хх-ийн 15-р хуудас/,

            Шүүгдэгч С.Ганбаатарын мөрдөн байцаалтын шатанд сэжигтэн, яллагдагчаар өгсөн: ”...2016 оны 09 дүгээр  сарын 05-ны  орой 17 цагийн үед би  Гурвантэс сумын төвд Мягаа гээд найзтайгаа нэг шил 0,75 граммын Ерөөл архи уусан. ...Тэгээд аавынх руу очиход миний эхнэр Тунгалаг байхгүй байсан. Тэгэхээр нь би эргэж гараад засмал руу алхаж очоод буцаад гэрт очтол Тунгалаг ирчихсэн байсан. Би гэр рүү ороод Тунгалагыг чи хаагуур явав, юу хийж байгаад ирэв гэж уурласан. Тэгсэн чинь Тунгалаг ажлаасаа ирлээ гэсэн. Тэгээд бид хоёр гэрээс гарч гадаа хашаан дотор хэрэлдсэн. Хэрэлдээд зогсож байгаад би Тунгалагийн нүүр рүү нь нэг удаа цохьсон. Тэгтэл миний ээж Саранхүү ирсэн. Ээж ирээд юу ярьсныг нь би санахгүй байна. Тэгээд би хажууд хэвтэж байсан модыг аваад Тунгалагийг цохих гэж байгаад ээжийгээ цохьчихсон. Удалгүй цагдаа ирээд намайг аваад явсан. Тэр үед би их согтсон байсан. Мөн тухайн үед гадаа харанхуй байсан. Өмнө хэн зогсож байгаа нь харагдахгүй, сарны гэрэл ч байхгүй байсан. Тэгээд би Тунгалагийг цохих гэж байгаад санаандгүй ээж Саранхүүг цохьчихсон байсан. Санаатайгаар би ээжийгээ цохиогүй гэсэн мэдүүлэг /хх-ийн 22, 24-р хуудас/, согтуурал шалгасан магадлагаа /хх-ийн 07-р хуудас/, эд мөрийн баримтаар тооцож, хэрэгт хавсаргах тогтоол /хх-ийн 37-р хуудас /, иргэд хоорондын эвлэрлийн гэрээ зэргээр тус тус тогтоогдож байх тул шүүгдэгч С.Ганбаатарыг бусдын бие махбодид хөнгөн гэмтэл санаатай учруулсан гэмт хэрэг үйлдсэн гэм буруутайд тооцох нь зүйтэй байна.                                           

           Шүүхийн хэлэлцүүлгийн шатанд шинжлэн судалсан нотлох баримт нь энэ хэрэгт хамааралтай, хуульд заасан арга журмын дагуу авагдсан байх тул шүүх нотлох баримтаар үнэлж хэргийг шийдвэрлэсэн болно.

           Шүүгдэгч С.Ганбаатарын үйлдсэн бусдын бие махбодид хөнгөн гэмтэл санаатай учруулах гэмт хэрэг нь Эрүүгийн хуулийн 17 дугаар зүйлийн 17.2 дахь хэсэгт заасан хөнгөн гэмт хэргийн ангилалд хамаарч байх бөгөөд шүүгдэгч нь анх удаа хөнгөн гэмт хэрэг үйлдсэн болох нь ял шийтгэгдсэн эсэхийг шалгах хуудсаар тогтоогдож байна. /хх-ийн 34-р хуудас/

           Хохирогч Ч.Саранхүү нь шүүгдэгчтэй сайн дураараа эвлэрсэн болох нь тэдний хооронд байгуулсан эвлэрлийн гэрээнд “Хохирогч талаас гомдол санал байхгүй. Өөр хохирол нэхэмжлэхгүй бөгөөд сэжигтэнд оногдуулах хариуцлагыг хөнгөрүүлэхэд гомдолгүй” гэснээр нотлогдож байна. Иймд Эрүүгийн байцаан шийтгэх хуулийн 25 дугаар зүйлийн 25.1 дэх хэсэгт зааснаар хохирогч нь шүүгдэгчтэй сайн дураараа эвлэрсэн гэх үндэслэлээр С.Ганбаатарын үйлдсэн  гэмт хэргийг хэрэгсэхгүй болгон шийдвэрлэх нь зүйтэй байна.

           Шүүгдэгч С.Ганбаатар нь согтууруулах ундааны зүйл хэрэглэсэн үедээ гэмт хэрэг үйлдсэн нь Эрүүгийн хуулийн 56 дугаар зүйлийн 56.1.10 дахь хэсэгт заасан ял хүндрүүлэх нөхцөл байдал болно.

Шүүгдэгч С.Ганбаатар нь бусдад төлөх төлбөр хохиролгүй, биеийн байцаалттай холбоотой бичиг баримт шүүхэд ирээгүй, цагдан хоригдсон хоноггүй болохыг дурдах нь зүйтэй байна.

           Хэрэгт эд мөрийн баримтаар хураагдаж ирсэн 58 см урттай, 6 см өргөнтэй модыг шийтгэх тогтоол хүчин төгөлдөр болмогц устгах нь зүйтэй байна.

Монгол улсын Эрүүгийн байцаан шийтгэх хуулийн 283, 284, 286, 290 дүгээр зүйлийн 290.3, 294, 297, 298 дугаар зүйлүүдэд заасныг удирдлага болгон ТОГТООХ НЬ:

1. Шүүгдэгч Бат-Очир тайж овгийн Сумъяагийн Ганбаатарыг бусдын бие махбодид хөнгөн гэмтэл санаатай учруулах гэмт хэрэг үйлдсэн гэм буруутайд тооцсугай.
2. Эрүүгийн байцаан шийтгэх хуулийн 248 дугаар зүйлийн 248.1.2, 208 дугаар зүйлийн 208.1.3 дахь хэсэг, 25 дугаар зүйлийн 25.1 дэх хэсэгт зааснаар шүүгдэгч С.Ганбаатарын үйлдэлд аймгийн Прокурорын газраас Эрүүгийн хуулийн тусгай ангийн 99 дүгээр зүйлийн 99.1 дэх хэсэгт зааснаар яллагдагчаар татах тогтоол үйлдэж ирүүлсэн эрүүгийн хэргийг хэрэгсэхгүй болгосугай.
3. Шүүгдэгч С.Ганбаатар нь бусдад төлөх төлбөр хохиролгүй, биеийн байцаалттай холбоотой бичиг баримт шүүхэд ирээгүй, цагдан хоригдсон хоноггүй болохыг дурдсугай.
4. Эрүүгийн байцаан шийтгэх хуулийн 88 дугаар зүйлийн 88.1.1 дэх хэсэгт зааснаар энэ хэрэгт эд мөрийн баримтаар хураагдсан 58 см урттай, 6 см өргөнтэй мод 1 ширхэгийг шийтгэх тогтоол хүчин төгөлдөр болмогц устгасугай.
5.  Эрүүгийн байцаан шийтгэх хуулийн 249 дүгээр зүйлийн 249.1 дэх хэсэгт зааснаар С.Ганбаатарт урьд авсан бусдын батлан даалтанд байлгах таслан сэргийлэх арга хэмжээг хүчингүй болгосугай. 

            6. Эрүүгийн байцаан шийтгэх хуулийн 306 дугаар зүйлийн 306.1 дэх хэсэгт зааснаар шийтгэх тогтоолд эрх бүхий этгээд давж заалдах гомдол, эсэргүүцэл бичсэн тохиолдолд тогтоолын биелэлтийг түдгэлзүүлэх болохыг мэдэгдсүгэй.

            7. Эрүүгийн байцаан шийтгэх хуулийн 299 дүгээр зүйлийн 299.3, 304 дүгээр зүйлийн 304.1 дэх хэсэгт зааснаар шийтгэх тогтоол нь танилцуулан сонсгосноор хүчинтэй болох бөгөөд шийтгэх тогтоолыг эс зөвшөөрвөл гардуулснаас хойш 14 хоногийн дотор ялтан, өмгөөлөгч, хохирогч нар  давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй болохыг дурдсугай.

 

 

ДАРГАЛАГЧ, ЕРӨНХИЙ ШҮҮГЧ                                  Т.ДЭЛГЭРМАА