Хариуцагч нэхэмжлэлийн шаардлагыг хүлээн зөвшөөрснийг баталж, хэргийг хэрэгсэхгүй болгох тухай

Дорноговь аймгийн Замын-Үүд сум дахь сум дундын шүүхийн шүүгч Д.Ц би

Нэхэмжлэгч: М ХХК-ийн нэхэмжлэлтэй,

Хариуцагч: Дорноговь аймгийн Замын-Үүд сумын 1 дүгээр багт оршин суух, Б овогт Э.А-д холбогдох,

Дараа төлбөрт үйлчилгээний хэрэглээний төлбөр болон зээлээр худалдан авсан төхөөрөмжийн төлбөрт нийт 561.443 төгрөг гаргуулах тухай нэхэмжлэлийг 2018 оны 02 дугаар сарын 01-ний өдөр  хүлээн авч хянаад

ТОДОРХОЙЛОХ нь:

Нэхэмжлэгч М ХХК нь шүүхэд гаргасан нэхэмжлэлдээ: Хариуцагч нь манай “Үйлчилгээний нөхцөл”-ийг хүлээн зөвшөөрч хэрэглэгч болох хүсэлтээ гарган тоот гэрээ байгуулан дугаартай үүрэн холбооны дараа төлбөрт үйлчилгээг мөн “Гар утас, төхөөрөмж худалдах, худалдан авах нэмэлт гэрээ” байгуулан LGK4 /TITAN/ утсыг зээлээр худалдан авч ашиглаж эхэлсэн. Хариуцагч нь Харилцаа холбооны тухай хуулийн 26 дугаар зүйлийн 26.2.2-т заасан болон гэрээгээр хүлээсэн үүргээ үл биелүүлэн үүрэн холбооны дараа төлбөрт үйлчилгээний хэрэглээний төлбөр болон зээлээр худалдан авсан гар утасны төлбөрийг төлөөгүй учир үйлчилгээг зогсоон, төлбөрийн үлдэгдлээ төлөхийг сануулж “Анхааруулах хуудас” илгээсэн боловч төлбөр төлөгдөөгүй байна.

Иймд хариуцагчаас үүрэн холбооны дараа төлбөрт үйлчилгээний хэрэглээний төлбөр болон зээлээр худалдан авсан төхөөрөмжний төлбөрт нийт 561.443 төгрөгийг гаргуулахаар нэхэмжлэл гаргаж байгааг хүлээн авч шийдвэрлэж өгнө үү гэжээ.

Хариуцагч Э.А шүүхэд гаргасан хариу тайлбартаа: Э.А миний бие М ХХК-ийн нэхэмжлэлийн шаардлагатай танилцлаа. Нэхэмжлэлийн шаардлага болох 561.443 төгрөгийг

• 2018.04.01-нээс 2018.05.01-ний өдрийн дотор 100.000 төгрөг,
• 2018.05.01-нээс 2018.06.01-ний өдрийн дотор 100.000 төгрөг,
• 2018.06.01-нээс 2018.07.01-ний өдрийн дотор 100.000 төгрөг,
• 2018.07.01-нээс 2018.08.01-ний өдрийн дотор 100.000 төгрөг,
• 2018.08.01-нээс 2018.09.01-ний өдрийн дотор 100.000 төгрөг,
• 2018.09.01-нээс 2018.10.01-ний өдрийн дотор 61.443 төгрөгийг хэсэгчлэн төлөх боломжийг минь харгалзан үзэж хэргийг хялбаршуулсан журмаар шийдвэрлэж өгнө үү гэжээ.

Нэхэмжлэгчийн итгэмжлэгдсэн төлөөлөгч Т.Т шүүхэд гаргасан тайлбартаа: Хариуцагч Э.А хариу тайлбартай танилцлаа. Хуваарийн дагуу төлөх хүсэлтийг хүлээн зөвшөөрч байгаа тул хэргийг хялбаршуулсан журмаар шийдвэрлэж өгнө үү гэжээ.

ҮНДЭСЛЭХ нь:

Нэхэмжлэгч М ХХК нь хариуцагч Э.А-д холбогдуулан дараа төлбөрт үйлчилгээний хэрэглээний төлбөр болон зээлээр худалдан авсан төхөөрөмжийн төлбөрт нийт 561.443 төгрөг гаргуулахаар тус шүүхэд нэхэмжлэлийн шаардлага гаргасан ба хэрэг хянан шийдвэрлэх ажиллагааны явцад хариуцагч Э.А нь нэхэмжлэлийн шаардлага болох 561.443 төгрөгийг  

• 2018.04.01-нээс 2018.05.01-ний өдрийн дотор 100.000 төгрөг,
• 2018.05.01-нээс 2018.06.01-ний өдрийн дотор 100.000 төгрөг,
• 2018.06.01-нээс 2018.07.01-ний өдрийн дотор 100.000 төгрөг,
• 2018.07.01-нээс 2018.08.01-ний өдрийн дотор 100.000 төгрөг,
• 2018.08.01-нээс 2018.09.01-ний өдрийн дотор 100.000 төгрөг,
• 2018.09.01-нээс 2018.10.01-ний өдрийн дотор 61.443 төгрөгийг хэсэгчлэн  төлж барагдуулахаа хүлээн зөвшөөрсөн нь хуульд харшлаагүй, гуравдагч этгээдийн эрх, хуулиар хамгаалагдсан ашиг сонирхлыг хөндөөгүй байх тул хариуцагч нэхэмжлэлийн шаардлагыг хүлээн зөвшөөрснийг баталж хэргийг хялбаршуулсан журмаар хянан шийдвэрлэх үндэслэлтэй байна.

Монгол Улсын Иргэний хэрэг шүүхэд хянан шийдвэрлэх тухай хуулийн 74, 75 дугаар зүйлүүдийг удирдлага болгон ЗАХИРАМЖЛАХ нь:

1. Монгол Улсын Иргэний хуулийн 262 дугаар зүйлийн 262.1 дэх хэсэгт зааснаар нэхэмжлэгч М ХХК, хариуцагч Э.А-д холбогдох дараа төлбөрт үйлчилгээний хэрэглээний төлбөр болон зээлээр худалдан авсан төхөөрөмжийн төлбөрт нийт  561.443 төгрөг гаргуулах тухай иргэний хэрэгт хариуцагч Э.А нь нэхэмжлэлийн шаардлага 561.443  төгрөгийг

• 2018.04.01-нээс 2018.05.01-ний өдрийн дотор 100.000 төгрөг,
• 2018.05.01-нээс 2018.06.01-ний өдрийн дотор 100.000 төгрөг,
• 2018.06.01-нээс 2018.07.01-ний өдрийн дотор 100.000 төгрөг,
• 2018.07.01-нээс 2018.08.01-ний өдрийн дотор 100.000 төгрөг,
• 2018.08.01-нээс 2018.09.01-ний өдрийн дотор 100.000 төгрөг,
• 2018.09.01-нээс 2018.10.01-ний өдрийн дотор 61.443 төгрөгийг хэсэгчлэн  төлж барагдуулахаа хүлээн зөвшөөрснийг баталж, хэргийг хэрэгсэхгүй болгосугай.

2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 74 дүгээр зүйлийн 74.5, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгчийн улсын тэмдэгтийн хураамжид урьдчилан төлсөн 17.495 төгрөгийн 50 хувь болох 8.747,5 төгрөгийг улсын орлогод хэвээр үлдээж, Дорноговь аймгийн Замын-Үүд сумын татварын тасгийн 100061400941 тоот данснаас  буюу улсын орлогоос 8.747,5 төгрөгийг, хариуцагч Э.А-с 8.747,5   төгрөгийг тус тус гаргуулж нэхэмжлэгч “М” ХХК-д олгосугай.

3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар хариуцагч Э.А нь захирамжийг сайн дураар эс биелүүлбэл шүүхийн шийдвэрийн нэгэн адил албадан гүйцэтгэхийг мэдэгдсүгэй.

4. Энэ захирамжид зохигчид давж заалдах, гомдол гаргах, хяналтын журмаар хянан шийдвэрлүүлэхээр гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүйг дурдсугай.

ШҮҮГЧ      Д.Ц