2018 оны 02 сарын 05 өдөр

Дугаар 142/ШШ2018/00130

Орхон аймаг

 

МОНГОЛ УЛСЫН НЭРИЙН ӨМНӨӨС

 

            Орхон аймаг дахь Сум дундын иргэний хэргийн анхан шатны шүүхийн шүүгч Л.Ариунцэцэг даргалан тус шүүхийн танхимд хийсэн шүүх хуралдаанаар,

            Нэхэмжлэгч: Орхон аймаг, Баян-Өндөр сум, Л.Б-гийн нэхэмжлэлтэй,

            Хариуцагч: Орхон аймаг, Баян-Өндөр сум, Б.Ө-д холбогдох

            Гэрлэлт цуцлуулах, хүүхдийн асрамж тогтоолгох тухай нэхэмжлэлийг 2018 оны 01 дүгээр сарын 04-ны өдөр хүлээн авч хянан хэлэлцэв.           

             Шүүх хуралдаанд: нэхэмжлэгчийн итгэмжлэгдсэн төлөөлөгч Т.Н, хариуцагч Б.Ө, шүүх хуралдааны нарийн бичгийн дарга Б.Сэр-Оддамба нар оролцов.

  ТОДОРХОЙЛОХ нь:

         Нэхэмжлэгч шүүхэд гаргасан нэхэмжлэлдээ болон түүний итгэмжлэгдсэн төлөөлөгч шүүх хуралдаанд тайлбарлахдаа: Л.Б би Б.Өтай 2000 оны 10 дугаар сарын 31-ний өдөр гэр бүл болоод 2001 оны 04 дүгээр сарын 11-ний өдөр охинтой болсон. Би 2003 онд Солонгос улсад ирээд одоо болтол амьдарч байна. Энэ хугацаанд миний нөхөр өөр хүнтэй амьдарч нэг хүүхэдтэй болсон. Иймээс би Б.Өаас салах хүсэлтэй бөгөөд гэрлэлтээ цуцлуулж, охин Ө.Х- өөрийн асрамжинд авч хүүхдийн тэтгэлэг авахгүй, эд хөрөнгийн маргаан байхгүй гэжээ.

Хариуцагч Б.Ө шүүхэд ирүүлсэн хариу тайлбартаа болон шүүх хуралдаанд тайлбарлахдаа: Б.Ө миний бие Л.Бгийн нэхэмжлэлтэй танилцлаа. Л.Бгээс гэрлэлтээ цуцлуулахыг зөвшөөрч байна. Охин Ө.Х- ийн асрамжийг ээж Л.Бгийн асрамжинд үлдээхийг зөвшөөрч байна гэв.

Шүүх зохигчдын тайлбар болон хэрэгт цугларсан нотлох баримтыг шинжлэн судлаад

ҮНДЭСЛЭХ нь:

Нэхэмжлэгч Л.Б нь хариуцагч Б.Өт холбогдуулан гэрлэлт цуцлуулах, хүүхдийн асрамж тогтоолгох тухай нэхэмжлэлийн шаардлага гаргасан.

Хариуцагч нэхэмжлэлийн шаардлагыг бүхэлд нь хүлээн зөвшөөрч байх тул шүүх нэхэмжлэлийн шаардлагыг хангаж шийдвэрлэв.

            Зохигчид 2000 онд танилцан хамтран амьдарч, 2001 оны 05 дугаар сарын 28-ны өдөр гэрлэлтээ эрх бүхий байгууллагад бүртгүүлж №95 дугаартай гэрлэлтийн гэрчилгээ авсан болох нь гэрлэлтийн гэрчилгээний нотариатаар гэрчлүүлсэн хуулбараар, гэрлэгсдийн дундаас 2001 оны 04 дүгээр сарын 11-ний өдөр охин Өлзийбаатарын Халиунаа төрсөн, одоо эрүүл өсөж байгаа болох нь талуудын тайлбар, Цагаанчулуут багийн засаг даргын тодорхойлолт, Ерөнхий боловсролын 13 дугаар сургуулийн тодорхойлолт, охин Ө.Х- ийн иргэний үнэмлэхний хуулбараар тус тус нотлогдож байна.

            Нэхэмжлэгч Л.Б 2003 оноос хойш БНСУлсад ажиллаж амьдарч байгаа, хариуцагч Б.Ө бусадтай дотно харилцаатай болж үр хүүхэдтэй болсон цаашид тэдний амьдрал үргэлжлэх боломжгүй болсон шалтгаанаар гэр бүл цуцлуулах тухай нэхэмжлэлийн шаардлага гаргасныг хариуцагч хүлээн зөвшөөрсөн бөгөөд шүүхээс гадуур урьдчилан шийдвэрлэх журмын дагуу тус шүүх дэх эвлэрүүлэн зуучлагчаас хуулийн дагуу зохих ажиллагаа явагдсан боловч амжилтгүй болсон зэргийг харгалзан шүүх эвлэрүүлэх нэмэлт хугацаа олголгүйгээр нэхэмжлэлийн шаардлагыг хангаж гэрлэлтийг цуцлах үндэслэлтэй гэж дүгнэв.

            Зохигчид хүүхдийн асрамжийн асуудлаар маргаагүй бөгөөд хүүхдийн санал цаашдын ирээдүйг харгалзан охин Ө.Х- эх Л.Бгийн асрамжинд үлдээх нь зүйтэй байна.

Хүүхдийн эрхийн тухай хуулийн 5 дугаар зүйлийн 3-д “Хүүхэд эцэг эхтэйгээ амьдрах, тэдний анхаарал халамжид байх, эцэг эхээсээ буюу хэн нэгнээс нь тусдаа амьдрах үед тэдэнтэй байнгын харилцаатай байх эрхтэй. Эцэг, эхийн хэн нэг нь нөгөөдөө хүлээсэн үүргээ хэрэгжүүлэхэд нь саад учруулахгүй байх, үүрэгтэй.

Эд хөрөнгийн талаар зохигчид маргаагүй, нэхэмжлэгч Л.Б нь хариуцагч Б.Өаас хүүхдийн тэтгэлэг гаргуулахгүй гэсэн  болохыг шүүхийн шийдвэрт дурдах нь зүйтэй.

Нэхэмжлэгч Л.Б нь шүүхэд төлөөлөх эрхээ БНСУлсын Сөүл хотод суух консулын газраар буюу нотариатчийн үүрэг гүйцэтгэгчийн гэрчилсэн итгэмжлэлээр Т.Нд олгосон нь хууль зөрчөөгүй, хэлбэрийн шаардлага хангасан төдийгүй Т.Н нь нэхэмжлэгчийг төлөөлөх эрх бүхий этгээд мөн гэж үзнэ.

Улсын тэмдэгтийн хураамжийг хуульд заасны дагуу нэхэмжлэгчээс урьдчилан төлсөн 70 200 төгрөгийг төрийн санд хэвээр үлдээж, хариуцагч Б.Өаас 70 200 төгрөг гаргуулан нэхэмжлэгч Л.Бд олгохоор шийдвэрлэв. 

Монгол Улсын Иргэний хэрэг шүүхэд хянан шийдвэрлэх тухай хуулийн 115 дугаар 115.2.1, 116, 118 дугаар зүйлд заасныг удирдлага болгон                                     ТОГТООХ нь:

1. Гэр бүлийн тухай хуулийн 14 дүгээр зүйлийн 14.1 дэх хэсэгт зааснаар Хаад боржигин овогт Ложоосүрэнгийн Бямбасүрэн, Онгод тайж овогт Бооройн Өлзийбаатар нарын гэрлэлтийг цуцалсугай.
2. Гэр бүлийн тухай хуулийн 14 дүгээр зүйлийн 14.5 дахь хэсэгт зааснаар 2001 оны 04 дүгээр сарын 11-ний өдөр төрсөн охин Ө.Х- эх Л.Бгийн асрамжинд үлдээсүгэй.
3. Гэр бүлийн тухай хуулийн 26 дугаар зүйлийн 26.1, 26.4, 26.6 дахь хэсэгт зааснаар гэрлэлтээ цуцлуулсан ч эцэг, эх хүүхдээ хүмүүжүүлэхэд тэгш эрх эдэлж, адил үүрэг хүлээхийг, энэ үүргээ биелүүлэхэд нь бие биедээ саад учруулахгүй байхыг зохигчдод даалгасугай.
4. Зохигчид эд хөрөнгийн маргаангүй, нэхэмжлэгч Л.Б нь хариуцагч Б.Өаас хүүхдийн тэтгэлэг гаргуулахгүй гэсэн болохыг дурдсугай.
5. Гэр бүлийн тухай хуулийн 14 дүгээр зүйлийн 14.9 дэх хэсэгт зааснаар шийдвэр хүчин төгөлдөр болмогц шийдвэрийн хувийг Орхон аймгийн Улсын бүртгэлийн хэлтэст хүргүүлэхийг шүүгчийн туслах Ө.Энхбаатарт даалгасугай.
6. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2 дахь хэсэгт зааснаар нэхэмжлэгчийн улсын тэмдэгтийн хураамжинд урьдчилан төлсөн 70 200 төгрөгийг төрийн сангийн орлогод хэвээр үлдээж, хариуцагч Б.Өаас 70 200 төгрөг гаргуулан нэхэмжлэгч Л.Бд олгосугай.
7. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.2-т зааснаар энэхүү шийдвэр нь танилцуулан сонсгомогц хуулийн хүчинтэй болохыг дурдсугай.
8. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-д зааснаар зохигч, гуравдагч этгээд, тэдгээрийн төлөөлөгч буюу өмгөөлөгч энэхүү шийдвэрийг гардан авснаас хойш 14 хоногийн дотор Орхон аймаг дахь Иргэний хэргийн давж заалдах шатны шүүхэд гомдол гаргах эрхтэй.
9. Иргэний хэрэг шүүхэд хянан шийдвэрлэх тухай хуулийн 119 дүгээр зүйлийн 119.4, 119.7-д зааснаар шийдвэрийг танилцуулан сонсгож, 7 хоног өнгөрснөөс хойш 14 хоногийн дотор зохигчид шийдвэрийг гардан авах үүргээ биелүүлээгүй нь давж заалдах журмаар гомдол гаргах хугацааг тоолоход саад болохгүйг дурдсугай.

 

 

 

 

ДАРГАЛАГЧ, ШҮҮГЧ                               Л.АРИУНЦЭЦЭГ