Сэлэнгэ аймаг дахь Сум дундын иргэний хэргийн анхан шатны шүүхийн шүүгч Д.Мөнхцэцэг би Сэлэнгэ аймаг, Сүхбаатар сумын Засаг даргын тамгын газрын нэхэмжлэлтэй Ж.Сүхээмаад холбогдох “Зээл, зээлийн хүү, алданги, нотариатын зардлын үнэ 3.356.750 төгрөг гаргуулах”-ыг хүссэн нэхэмжлэлийн шаардлагатай иргэний хэргийг хянаад

                                         

                                                   ТОДОРХОЙЛОХ нь:

 

           Нэхэмжлэгч Сэлэнгэ аймаг, Сүхбаатар сумын Засаг даргын тамгын газар шүүхэд гаргасан нэхэмжлэлдээ: Сэлэнгэ аймгийн Сүхбаатар сумын Бор гүвээ 5 дугаар багийн 2 дугаар хэсгийн 067 тоотод оршин суух иргэн Жанчив овогтой Сүхээмаа нь 2014 оны 06 дугаар сарын 06-ны өдөр Сум хөгжүүлэх сангаас “Төмс хүнсний ногоо тариалах” төсөл хэрэгжүүлэхээр 3.800.000 төгрөгийг жилийн 3 хувийн хүүтэй, 36 сарын хугацаатайгаар эргэн төлөх нөхцөлтэйгээр авсан. Иргэн Ж.Сүхээмаагийн зээлийн хугацаа 2017 оны 06 дугаар сарын 06-ны өдөр дууссан бөгөөд одоо болтол зээлээ төлж дуусаагүй байна.

            Иймд иргэн Ж.Сүхээмаагийн үндсэн зээл болон зээлийн хүү болох 3.270.000 төгрөг, алданги 82.250 төгрөг, нотариатын үнэ 4.500 төгрөг нийт 3.356.750 төгрөгийг Ж.Сүхээмаагаас гаргуулан манай сумын төрийн сангийн 100131455401 тоот дансанд төвлөрүүлж өгнө үү! ... гэжээ. 

 

       Хариуцагч Ж.Сүхээмаа 2018 оны 03 дугаар сарын 05-ны өдөр шүүхэд гаргасан тайлбартаа:

          ...Миний бие Сүхбаатар сумын Засаг даргын тамгын газрын нэхэмжилсэн 3.356.750  төгрөгийг төлөхийг хүлээн зөвшөөрч байна. Улсын тэмдэгтийн хураамжийн 50 хувийг төлөхийг ойлгосон... гэжээ.

                                                        

                                                    ҮНДЭСЛЭХ нь:

 

         Нэхэмжлэгч Сэлэнгэ аймаг, Сүхбаатар сумын Засаг даргын тамгын газар хариуцагч Ж.Сүхээмаад холбогдуулан “Зээл, зээлийн хүү, алданги, нотариатын зардлын үнэ 3.356.750 төгрөг гаргуулах”-ыг хүссэн нэхэмжлэлийг шүүхэд гаргажээ.

        Хэрэг хянан шийдвэрлэх ажиллагааны явцад хариуцагч Ж.Сүхээмаа “Зээл, зээлийн хүү, алданги, нотариатын зардлын үнэ 3.356.750 төгрөг гаргуулах” нэхэмжлэлийн шаардлагыг бүрэн хэмжээгээр хүлээн зөвшөөрсөн нь түүний шүүхэд  гаргасан тайлбараар нотлогдож байх тул Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2-т зааснаар хялбаршуулсан журмаар шийдвэрлэх үндэслэл болж байна.

        Хариуцагчийн зөвшөөрөл нь хуульд харшлаагүй, нийцсэн, гуравдагч этгээдийн хуулиар хамгаалагдсан эрх ашиг, сонирхлыг хөндөөгүй байна.

       Улсын тэмдэгтийн хураамжийн тухай хуулийн 41 дүгээр зүйлийн 41.1.4 дэх хэсэгт зааснаар нэхэмжлэгч Сэлэнгэ аймаг, Сүхбаатар сумын Засаг даргын тамгын газрын шүүхэд гаргасан нэхэмжлэл улсын тэмдэгтийн хураамжаас чөлөөлөгдсөн байна.

       Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 74 дүгээр зүйлийн 74.5 дахь хэсэгт зааснаар улсын тэмдэгтийн хураамжийн тал хувь болох 34.329 төгрөгийг хариуцагчаас гаргуулан Сүхбаатар сумын орон нутгийн орлогод оруулах нь зүйтэй байна.  

Иргэний хэрэг шүүхэд хянан шийдвэрлэх тухай хуулийн 75 дугаар зүйлд заасныг удирдлага болгон ЗАХИРАМЖЛАХ нь:

1. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2 дахь хэсэгт зааснаар Сэлэнгэ аймаг, Сүхбаатар сумын Засаг даргын тамгын газрын нэхэмжлэлтэй хариуцагч Ж.Сүхээмаад холбогдуулан “Зээл, зээлийн хүү, алданги, нотариатын зардлын үнэ 3.356.750 төгрөг гаргуулах”-ыг хүссэн иргэний хэрэгт хариуцагч нэхэмжлэлийн шаардлагыг бүрэн хэмжээгээр хүлээн зөвшөөрснийг баталж, хэргийг хэрэгсэхгүй болгосугай.

2. Улсын тэмдэгтийн хураамжийн тухай хуулийн 41 дүгээр зүйлийн 41.1.4 дэх хэсэгт зааснаар нэхэмжлэгч Сэлэнгэ аймаг, Сүхбаатар сумын Засаг даргын тамгын газрын шүүхэд гаргасан нэхэмжлэл улсын тэмдэгтийн хураамжаас чөлөөлөгдсөн болохыг дурдаж, Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 74 дүгээр зүйлийн 74.5 дахь хэсэгт улсын тэмдэгтийн хураамжийн тал хувь болох 34.329 төгрөгийг хариуцагчаас гаргуулж, Сүхбаатар сумын орон нутгийн орлогод оруулсугай.

3. Иргэний хэрэг шүүхэд хянан шийдвэрлэх тухай хуулийн75 дугаар зүйлийн 75.6 дахь хэсэгт зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэж болохыг дурдсугай.

4. Иргэний хэрэг шүүхэд хянан шийдвэрлэх тухай хуулийн 74 дугаар зүйлийн 74.4-т зааснаар зохигчид давж заалдах, хяналтын журмаар хянуулахаар гомдол гаргах, тухайн асуудлаар дахин анхан шатны шүүхэд гомдол гаргах эрхгүй дурдсугай.

 

 

                                ШҮҮГЧ                               Д.МӨНХЦЭЦЭГ