Баян-Өлгий аймаг дахь Сум дундын эрүүгийн хэргийн анхан шатны шүүхийн  шүүх хуралдааныг шүүгч П.Доржбал даргалж, 

              Нарийн бичгийн дарга Ц.С,

              Улсын яллагч М.О,

                 Хохирогч Ө.Г,

 Шүүгдэгч О.Х нарыг оролцуулан тус шүүхийн шүүх хуралдааны танхимд нээлттэй явуулж, Баян-Өлгий аймгийн прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн О.Хад холбогдох 1713000000088 дугаартай эрүүгийн хэргийг хянан хэлэлцэв. 

 

  Шүүгдэгчийн биеийн байцаалт:

 Монгол Улсын иргэн, яс үндэс казах, Т овгийн Оы Х, 1989 оны 10 дугаар сарын 30-ны өдөр Баян-Өлгий аймгийн Ө суманд төрсөн, 28 настай, эрэгтэй, дээд боловсролтой, араб, турк хэлний багш мэргэжилтэй, эрхэлсэн тодорхой ажилгүй, Баян-Өлгий аймгийн Ө сумын ***дугаар багт оршин суух хаягтай, хэрэг хариуцах чадвартай, урьд ял шийтгүүлж байсан, РД:00000.

 

  Шүүгдэгчийн холбогдсон хэргийн талаар: 

            Шүүгдэгч О.Х нь 2017 оны 10 дугаар сарын 26-ны өдрийн шөнийн 23 цагийн үед Баян-Өлгий аймгийн Ө сумын  дугаар багт байрлалтай “А” үйлчилгээний төвд Ө.Ггийн эрх чөлөөнд халдан зодож эрүүл мэндэд нь хөнгөн хохирол учруулж Эрүүгийн хуулийн тусгай ангийн 11.6 дугаар зүйлийн 1 дэх хэсэгт хамаарах гэмт хэрэгт холбогджээ. 

 

ТОДОРХОЙЛОХ нь:

  Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

1. Шүүгдэгчийн гэм буруугийн талаар

 Шүүгдэгч О.Х нь 2017 оны 10 дугаар сарын 26-ны өдрийн шөнийн 23 цагийн үед Баян-Өлгий аймгийн Ө сумын **дугаар багт байрлалтай “А” үйлчилгээний төвд Ө.Ггийн эрх чөлөөнд халдан зодож эрүүл мэндэд нь хөнгөн хохирол учруулах гэмт хэргийг үйлдсэн болох нь: 

• Хохирогч Ө.Ггийн мөрдөн байцаалтын шатанд болон шүүхийн хэлэлцүүлгийн үед өгсөн: “... Би 2017 оны 10 дугаар сарын 26-ны өдөр ах О, бэргэн эгч Урансолонго, авга эгч Бямбаа нарын хамт Арвиан ресторанд орсон. Ах тамхи татаад ирье гэхээр нь хамт гарсан бөгөөд шатаар өгсөөд ирж байхад шүүгдэгчийн хажууд байсан Н гэдэг залуу О ахыг мөрөөрөө шүргэсэн. Тэр залуу нэлээн халамцуу байсан. Тэр О ах “Болгоомжтой яваач” гэж хэлсэн. Энэ үед Н Оыг барь аваад түлхэхэд нь би дундуур нь орж “Та нар зүгээр явж байгаа хүнийг яаж байгаа юм бэ?” гэх хэлэхэд түүнтэй хамт шатаар ирж байсан хар куртиктэй, бор царайтай залуу үсэрч ирээд духаараа намайг хамар руу нэг удаа мөргөсөн. Тэр үед миний хамарнаас цус гарсан. Дараа нь уг залуу намайг хоёр мөрнөөс барьж авч нэг давхарын хаалганы үүд рүү чирж мөрнөөс татаж авч нүүр рүү хэд хэдэн удаа өвдөглөсөн. ...Тэр өөрөө гэм буруугаа хүлээж надаас уучлалт гуйсан. Миний хувьд одоо ямар нэгэн гомдол санал байхгүй. Бидний дунд ямар нэгэн хохирлын маргаан байхгүй. Би түүнээс нэхэмжлэх зүйл ч байхгүй.” гэх мэдүүлэг /хх-ийн 20-23 дугаар хуудас/,
• Гэрч С.Аын мөрдөн байцаалтын шатанд өгсөн: “... Би Х Ггийн нүүр рүү нь толгойгоороо мөргөхийг хараагүй. Х Ггийн нүүр рүү нь хэд хэдэн удаа өшиглөж байхыг харсан.” гэх мэдүүлэг. /хх-ийн 32-33 дугаар хуудас/
• Гэрч М.Жийн мөрдөн байцаалтын шатанд өгсөн: “...2017 оны 10 дугаар сарын 26-ны өдөр орой 20 цаг өнгөрөөд бид найзууд болох Х, Н, А нар А үйлчилгээний газрын караокед ирж дуу дуулж сууж байсан. Х, А хоёр тамхи татах гээд гадаа гарсан. Тэдний араас би 00-ын өрөө орох гэж гарсан. .... Хоорондоо хэрүүл болж байх үед Х түүний ам руу мөргөж авсан. Тэгээд нөгөө залуус цагдаа дуудсан байсан ба  цагдаа нар ирж аваад явсан.” гэх мэдүүлэг. /хх-ийн 3536 дугаар хуудас/
• Баян-Өлгий аймгийн Шүүхийн шинжилгээний албаны шинжээч эмч К.Хын 429 дугаартай: “... Иргэн Ө.Ггийн биед хамрын нуруунд хавдартай, хамрын хөндийгөөс цус гарсан, дээд эрүүний 1 үүдэн шүд эмаль нь сэтэрч хугарсан, дээд уруулд хавдартай, дотор талд хэгзэрсэн зэрэг гэмтэл тогтоогдлоо. ... Дээрх гэмтэл нь эрүүл мэндийг түр сарниулах, гэмтлийн зэрэг тогтоох журмын 2.4 заалтыг агуулах гэмтлийн хөнгөн зэрэгт хамаарах гэмтэл болно.” гэх  шинжээчийн дүгнэлт /хх-ийн 38 дугаар хуудас/,
• Шүүгдэгч О.Хийн мөрдөн байцаалтын шатанд болон шүүхийн хэлэлцүүлгийн үед өгсөн: “... Би мэдээж архи уусан халамцуу байсан тул тэр хоёр Ныг зодож байна гэж ойлгож шууд очоод Ө.Гг барьж авч салгаж шатаар гаргаж явуулах гэхэд тэр мэдээж миний энэ үйлдлийг эсэргүүцэж хүч үзүүлсэн ба бид хоёр хоорондоо маргалдаж, хэрэлдэж эхэлсэн. Тэгж байхад би түүнд уурлаж түүний аман тус газар мөргөж авсан. Тэрний хамарнаас нь цус гараад ирсэн ба тэр тонгойж хоёр гараараа нүүрээ дарах үед нь би хоёр удаа өвдгөөрөө нүүр рүү нь чиглүүлж өшиглөсөн. Мэдээж миний буруу болсон тул гэм буруугаа хүлээж дараа нь шууд Ө.Ггаас уучлалт гуйсан.” гэх мэдүүлэг /хх-ийн 50-51 дүгээр хуудас, шүүх хуралдааны тэмдэглэл/ зэрэг нотлох баримтууд болон хэрэгт авагдсан бусад нотлох баримтуудаар нотлогдож байна.

 Шүүхийн хэлэлцүүлгийн шатанд шинжлэн судлагдсан дээрх нотлох баримтууд нь Эрүүгийн хэрэг хянан шийдвэрлэх тухай хуульд заасан үндэслэл журмын дагуу цугларч, бэхжүүлсэн, хэргийг хянан шийдвэрлэхэд хангалттай, үнэлэх боломжтой гэж үзлээ. 

 Иймд шүүгдэгч О.Хад холбогдох хэргийн зүйлчлэл зөв, шүүхээс түүнийг Ө.Ггийн эрх чөлөөнд халдаж, эрүүл мэндэд нь хөнгөн хохирол учруулсан гэмт хэрэг үйлдсэн гэм буруутайд тооцож, хуульд заасан ял шийтгэл оногдуулах үндэслэлтэй гэж дүгнэв.

 Мөн уг гэмт хэрэг нь Эрүүгийн хэрэг хянан шийдвэрлэх тухай хуулийн 17.5 дугаар зүйлд заасан хялбаршуулсан журмаар хянан шийдвэрлэх зарим гэмт хэрэгт хамаарч байх бөгөөд Эрүүгийн хэрэг хянан шийдвэрлэх тухай хуульд заасан хялбаршуулсан журмаар хэрэг хянан шийдвэрлэх тусгай журмыг зөрчөөгүй хэрэг хянан шийдвэрлэх ажиллагаа хуульд заасан журмын дагуу явагдсан байна. 

 

  2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдсан баримт болон хэрэгт авагдсан шүүгдэгчийн хувийн байдлыг тодорхойлсон баримтуудыг үндэслэн шүүгдэгч О.Хад эрүүгийн хариуцлага хүлээлгэхдээ хөнгөн гэмт хэрэг үйлдсэн, учруулсан хохирлыг нөхөн төлсөн, үйлдсэн гэмт хэрэгтээ гэмшсэн, гэм буруугаа хүлээн зөвшөөрсөн зэрэг Эрүүгийн хуулийн ерөнхий ангийн 6.5 дугаар зүйлийн 1.1, 1.2, мөн зүйлийн 3 дахь хэсэгт заасны дагуу ял хөнгөрүүлэх нөхцөл байдлыг харгалзан үзэх нь зүйтэй байна.  

 Иймд шүүгдэгч О.Хийн үйлдсэн гэмт хэргийн шинж, хохирол, гэмт хэрэг үйлдсэн нөхцөл байдал, эрүүгийн хариуцлага хөнгөрүүлэх нөхцөл байдал, шүүгдэгчийн хувийн байдал зэргийг харгалзан түүнд Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан нийтэд тустай ажил хийлгэх эрүүгийн хариуцлага хүлээлгэхээр шийдвэрлэв. 

 Ял шийтгэгдсэн эсэхийг шалгах хуудсаар шүүгдэгч О.Х нь урьд ял шийтгүүлсэн болох нь тогтоогдож байна.

 Шүүгдэгч О.Хад оногдуулсан нийтэд тустай ажил хийлгэх ялыг өдөрт 4 цагаар тогтоож, шүүгдэгч нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг мэдэгдэх нь зүйтэй.

 Энэ гэмт хэргийн улмаас шүүгдэгч О.Х нь цагдан хоригдсон хоноггүй, бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй, эд мөрийн баримтаар хураагдаж ирүүлсэн зүйлгүй болохыг дурьдах нь зүйтэй байна.

 Шүүгдэгч О.Х нь бусдад төлөх төлбөргүй, хэрэг хянан шийдвэрлэх ажиллагааны зардалгүй тул түүний өмчлөлийн *****ГЧ улсын дугаартай КМЗ-828420 маркын саарал өнгийн чиргүүлийг битүүмжилсэн прокурорын тогтоолыг хүчингүй болгох нь зүйтэй байна.

 Шүүгдэгч О.Хад хувийн баталгаа гаргах таслан сэргийлэх арга хэмжээ авагдсан бөгөөд шийтгэх тогтоол хуулийн хүчин төгөлдөр болтол хэвээр үргэлжлүүлж, хэргийн хамт ирүүлсэн шүүгдэгчийн хувийн бичиг баримтыг өөрт нь буцаан олгох нь зүйтэй байна.  

 

 Эрүүгийн хэрэг хянан шийдвэрлэх тухай хуулийн 17.5 дугаар зүйлийн 1, 5, 6, 8, 9, 36.1, 36.2 дугаар зүйлийн 1, 2, 3, 4, 36.6, 36.7, 36.8, 36.10 дугаар зүйлүүдэд заасныг тус тус удирдлага болгон  

ТОГТООХ нь:

1. Шүүгдэгч Товгийн Оы Хийг “Хүний эрүүл мэндэд хөнгөн хохирол учруулах” гэмт хэрэг үйлдсэн гэм буруутайд тооцсугай.  
2. Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч О.Хийг 250 /хоёр зуун тавь/ цаг нийтэд тустай ажил хийлгэх ялаар шийтгэсүгэй.
3. Эрүүгийн хуулийн ерөнхий ангийн 5.4 дүгээр зүйлийн 2 дахь хэсэгт зааснаар шүүгдэгч О.Хэд оногдуулсан нийтэд тустай ажил хийлгэх ялыг өдөрт 4 цагаар тогтоосугай. 
4. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгч О.Х нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын 8 /найм/ цагийн ажлыг нэг хоногоор тооцож хорих ялаар солихыг мэдэгдсүгэй.                                                                                                                                               
5. Хэрэгт эд мөрийн баримтаар хураагдан зүйлгүй, шүүгдэгч нь цагдан хоригдоогүй, бусдад төлөх төлбөргүй, хэрэг хянан шийдвэрлэх ажиллагааны зардалгүй болохыг тус тус дурдсугай. 
6. Шүүгдэгч О.Хийн өмчлөлийн *****ГЧ улсын дугаартай КМЗ-828420 маркын саарал өнгийн чиргүүлийг битүүмжилсэн прокурорын тогтоолыг шийтгэх тогтоол хуулийн хүчин төгөлдөр болмогц хүчингүй болгосугай. 
7. Хэрэгт бичгийн баримтаар хураагдан ирсэн шүүгдэгч О.Хийн ******дугаартай эрүүл мэндийн даатгалын гэрчилгээ, иргэний цахим үнэмлэхийн лавлагаа зэргийг шийтгэх тогтоол хуулийн хүчин төгөлдөр болмогц өөрт нь буцаан олгосугай. 
8. Шийтгэх тогтоол нь уншиж сонсгосноор хүчинтэй болох бөгөөд Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1, 38.2 дугаар зүйлийн 1 дэх хэсэгт зааснаар шүүгдэгч, хохирогч нар шийтгэх тогтоолыг эс зөвшөөрвөл гардан авснаас хойш, эсхүл энэ хуулийн 11.9 дүгээр зүйлд заасны дагуу хүргүүлснээс хойш 14 хоногийн дотор Баян-Өлгий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, прокурор, дээд шатны прокурор эсэргүүцэл бичих эрхтэйг дурдсугай. 

 

 

 

 

ДАРГАЛАГЧ ШҮҮГЧ                                   П.ДОРЖБАЛ