Баян-Өлгий аймаг дахь Сум дундын эрүүгийн хэргийн анхан шатны шүүхийн  шүүх хуралдааныг шүүгч П.Доржбал даргалж, 

Нарийн бичгийн дарга Ц.С

Улсын яллагч М.От

Хохирогч Д.Д

Шүүгдэгч Б.Б нарыг оролцуулан тус шүүхийн шүүх хуралдааны танхимд нээлттэй явуулж, Баян-Өлгий аймгийн прокурорын газраас яллах дүгнэлт үйлдэж ирүүлсэн Б.Бд холбогдох 1713000000089 дугаартай эрүүгийн хэргийг хянан хэлэлцэв. 

Шүүгдэгчийн биеийн байцаалт:

Шүүгдэгч: Монгол Улсын иргэн Б овогт Бгийн Б, 1996 оны 10 дугаар сарын 29-ний өдөр төрсөн, 21 настай, эрэгтэй, бүрэн дунд боловсролтой, жолооч мэргэжилтэй, Зэвсэгт хүчний 0 дүгээр ангид жолооч ажилтай,  Баян-Өлгий аймгийн Ө сумын дугаар багт оршин суудаг, урьд ял шийтгэлгүй, хэрэг хариуцах чадвартай, регистрийн дугаар 000

 

  Шүүгдэгч Б.Бгийн холбогдсон хэргийн талаар: 

Шүүгдэгч Бгийн Б нь 2017 оны 11 дүгээр сарын 05-ны өдөр хамтран амьдрагч Д.Дг жирэмсэн болохыг мэдсээр байж, хэрүүл маргааны улмаас зодож эрүүл мэндэд нь хөнгөн хохирол учруулж Эрүүгийн хуулийн тусгай ангийн 11.6 дугаар зүйлийн 2 дахь хэсэгт хамаарах гэмт хэрэгт холбогджээ.

 

ТОДОРХОЙЛОХ НЬ:

  Шүүхийн хэлэлцүүлэгт дараах нотлох баримтуудыг шинжлэн судлав. Үүнд:

1. Шүүгдэгчийн гэм буруугийн талаар:

Шүүгдэгч Бгийн Б нь 2017 оны 11 зүгээр сарын 05-ны өдөр Баян-Өлгий аймгийн Ө сумын 13 дугаар багт байрлах хамтран амьдрагч Д.Дгийн гэрт түүнийг жирэмсэн болохыг мэдсээр байж, хэрүүл маргааны улмаас зодож эрүүл мэндэд нь хөнгөн хохирол учруулсан гэмт хэрэг үйлдсэн болох нь:

 Шүүгдэгч Б.Бгийн мөрдөн байцаалтын шатанд болон шүүх хуралдааны хэлэлцүүлэгт өгсөн: “...Д “Чи яагаад намайг хуураад байгаа юм бэ?” гэж хэрүүл маргаан үүсгэсэн. Би Д.Дг орон дээр сууж байхаар нь түлхчихсэн. Тэгэхэд Д газар унасан. Тэгээд би гараад явах гэж байхад араас хүрч ирээд хэрүүл маргаан хийгээд байхаар нь дахиж түлхчихсэн. Тэр үед мөн адил газар унасан. Би үйлдсэн хэргээ хүлээн зөвшөөрч байна.” гэх мэдүүлэг /шүүх хуралдааны тэмдэглэл/,

• • Хохирогч Д.Дгийн мөрдөн байцаалтын шатанд болон шүүх хуралдааны хэлэлцүүлэгт өгсөн: “...Б намайг хохь чинь гэж хэлээд түлхэж, гараараа гарыг мушгиж, хоолой боож миний эрх чөлөөнд халдсан. ...Би 9 сартай жирэмсэн. ...Би Б.Бтэй 2016 оны 12 дугаар сард танилцаж, 2017 оны 04 дүгээр сард бид хоёр гэр бүл болохоор болж, түүнээс жирэмсэн болсон. Шинжээч эмчийн дүгнэлтэнд дурдсан дээрх гэмтлүүд бүгд Б.Б намайг зодсоноос болж учирсан.” гэх мэдүүлэг /хх-ийн 16-19 дүгээр хуудас болон шүүх хуралдааны тэмдэглэл/,
  • Гэрч Дгийн мөрдөн байцаалтын шатанд өгсөн: “...2017 оны 11 дүгээр сарын 05-ны өдөр гэртэй байж байхад миний дугаар руу Д.Д залгаад “Чи яагаад хоёр хүний дунд ороод байгаа гичии вэ?” би долоон сартай жирэмсэн. Та хоёрыг ална гэхээр нь би “Уучлаарай эгчээ би сайн мэдэхгүй” гэж хэлэхэд Д.Д нь би одоо танайд Б.Бг дагуулаад аав дээр чинь очиж уулзана гэж хэлэхэд нь хэрэггүй, би танайд очиж уулзъя гэж такси барьж Д.Дгийн гэрт очсон. Д.Д намайг хараад чи Б.Бтэй одоо яв гээд орилоод Б.Бгийн баруун хацар руу нэг удаа алгадаад авсан ...” гэх мэдүүлэг /хх-ийн 22-23 дугаар хуудас/,
  • Баян-Өлгий аймгийн Шүүхийн шинжилгээний албаны шинжээчийн 452 дугаартай  “...Иргэн Дгийн биед хоёр хөхний дунд хэсэгт цус хуралттай, хавдартай, баруун бугалганд хөх ягаан цус хуралттай, баруун шууны хэсэгт хөх ягаан туяатай цус хуралттай, зүүн бугалга орчим хөх ягаан туяатай цус хуралттай, зүүн шууны хэсэгт хөх ягаан туяатай цус хуралттай, баруун өвдөг хэсэгт хөх ягаан туяатай цус хуралттай зэрэг зөөлөн эдийн бэртэл гэмтэл тогтоогдлоо. Иргэн Дгийн биед үүссэн гэмтэл нь эрүүл мэндийг түр сарниулах, гэмтлийн зэрэг тогтоох журмын 2.4 заалтыг агуулах гэмтлийн хөнгөн зэрэгт хамаарах гэмтэл болно.” /хх- ийн 25 дугаар хуудас/ гэх шинжээчийн дүгнэлт зэрэг нотлох баримтуудаар тогтоогдож байна. 

 

 Шүүхийн хэлэлцүүлгийн шатанд шинжлэн судлагдсан дээрх нотлох баримтууд нь Эрүүгийн хэрэг хянан шийдвэрлэх тухай хуульд заасан үндэслэл журмын дагуу цугларч, бэхжүүлсэн, хэргийг хянан шийдвэрлэхэд хангалттай, үнэлэх боломжтой гэж үзлээ. 

 Иймд шүүгдэгч Б.Бд холбогдох хэргийн зүйлчлэл зөв, шүүхээс түүнийг 2017 оны 11 дүгээр сарын 05-ны өдөр хамтран амьдрагч Д.Дг жирэмсэн болохыг мэдсээр байж, хэрүүл маргааны улмаас зодож эрүүл мэндэд нь хөнгөн хохирол учруулсан гэмт хэрэг үйлдсэн гэм буруутайд тооцож, хуульд заасан ял шийтгэл оногдуулах үндэслэлтэй гэж дүгнэв.

 Мөн уг гэмт хэрэг нь Эрүүгийн хэрэг хянан шийдвэрлэх тухай хуулийн 17.5 дугаар зүйлд заасан хялбаршуулсан журмаар хянан шийдвэрлэх зарим гэмт хэрэгт хамаарч байх бөгөөд Эрүүгийн хэрэг хянан шийдвэрлэх тухай хуульд заасан хялбаршуулсан журмаар хэрэг хянан шийдвэрлэх тусгай журмыг зөрчөөгүй хэрэг хянан шийдвэрлэх ажиллагаа хуульд заасан журмын дагуу явагдсан байна. 

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдсан баримт болон хэрэгт авагдсан шүүгдэгчийн хувийн байдлыг тодорхойлсон баримтуудыг үндэслэн шүүгдэгч Б.Бд эрүүгийн хариуцлага хүлээлгэхдээ анх удаа гэмт хэрэг үйлдсэн, учруулсан хохирлыг нөхөн төлсөн, үйлдсэн гэмт хэрэгтээ гэмшсэн, гэм буруугаа хүлээн зөвшөөрсөн зэрэг Эрүүгийн хуулийн ерөнхий ангийн 6.5 дугаар зүйлийн 1.1, 1.2, мөн зүйлийн 3 дахь хэсэгт заасны дагуу ял хөнгөрүүлэх нөхцөл байдлыг харгалзан үзэх нь зүйтэй байна. 

 Иймд шүүгдэгч Б.Бгийн үйлдсэн гэмт хэргийн шинж, хохирол, гэмт хэрэг үйлдсэн нөхцөл байдал, эрүүгийн хариуцлага хөнгөрүүлэх нөхцөл байдал, шүүгдэгчийн хувийн байдал зэргийг харгалзан түүнд Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан нийтэд тустай ажил хийлгэх эрүүгийн хариуцлага хүлээлгэхээр шийдвэрлэв. 

 Ял шийтгэгдсэн эсэхийг шалгах хуудсаар шүүгдэгч Б.Б нь урьд ял шийтгүүлж байгаагүй болох нь  тогтоогдож байх тул анх удаа гэмт хэрэг үйлдсэн гэж үзлээ.

 Шүүгдэгч Б.Бд оногдуулсан нийтэд тустай ажил хийлгэх ялыг өдөрт 4 цагаар тогтоож, шүүгдэгч нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг анхааруулах нь зүйтэй.

 Энэ гэмт хэргийн улмаас шүүгдэгч Б.Б нь цагдан хоригдсон хоноггүй, түүнээс гаргуулах хэрэг хянан шийдвэрлэх ажиллагааны зардалгүй болно. 

Шүүгдэгч Б.Бд хувийн баталгаа гаргах таслан сэргийлэх арга хэмжээ авагдсан бөгөөд шийтгэх тогтоол хуулийн хүчин төгөлдөр болтол хэвээр үргэлжлүүлж, мөн хэргийн хамт шүүхэд ирүүлсэн шүүгдэгчийн хувийн бичиг баримтыг өөрт нь буцаан олгох нь зүйтэй байна.  

Уг гэмт хэргийн улмаас хохирогч Д.Дгийн эрүүл мэндэд хөнгөн хохирол учирсан бөгөөд хохирогч нь шүүгдэгчээс нэхэмжлэх зүйлгүй гэх тул шүүгдэгчийг бусдад төлөх төлбөргүй гэж үзлээ.

 Эд мөрийн баримтаар хураагдаж ирүүлсэн зүйлгүй,  хэрэг хянан шийдвэрлэх ажиллагааны зардалгүй тул түүний “Samsung GALAXY S5” маркийн гар утсыг  битүүмжилсэн прокурорын тогтоолыг хүчингүй болгох нь зүйтэй байна.

            Эрүүгийн хэрэг хянан шийдвэрлэх тухай хуулийн 17.5 дугаар зүйлийн 1, 5, 6, 8, 9, 36.1, 36.2 дугаар зүйлийн 1, 2, 3, 4, 36.6, 36.7, 36.8, 36.10 дугаар зүйлүүдийг заасныг тус тус удирдлага болгон  

ТОГТООХ нь:

1. Шүүгдэгч Б овогт Бгийн Бг “Хүний эрүүл мэндэд хөнгөн хохирол учруулах” гэмт хэрэг үйлдсэн гэм буруутайд тооцсугай.  
2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгч Б.Бг 450 /дөрвөн зуун тавь/ цагийн нийтэд тустай ажил хийлгэх ялаар шийтгэсүгэй.
3. Эрүүгийн хуулийн ерөнхий ангийн 5.4 дүгээр зүйлийн 2 дахь хэсэгт зааснаар шүүгдэгч Б.Бд оногдуулсан нийтэд тустай ажил хийлгэх ялыг өдөрт 4 цагаар тогтоосугай.
4. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар шүүгдэгч Б.Б нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын 8 /найм/ цагийн ажлыг нэг хоногоор тооцож хорих ялаар солихыг анхааруулсугай.              
5. Энэ хэрэгт эд мөрийн баримтаар хураагдаж ирүүлсэн зүйлгүй,  “Samsung GALAXY S5” маркийн гар утсыг битүүмжилсэн прокурорын тогтоолыг шийтгэх тогтоол хуулийн хүчин төгөлдөр болмогц хүчингүй болгосугай.  
6. Шийтгэх тогтоол хуулийн хүчин төгөлдөр болтол шүүгдэгч Б.Бд урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлсүгэй. 

 7.Шийтгэх тогтоол хуулийн хүчин төгөлдөр болмогц шүүгдэгч Б.Бгийн  01155035 дугаартай  эрүүл мэндийн даатгалын гэрчилгээг өөрт нь буцаан олгосугай. 

 8. Шийтгэх тогтоол нь уншиж сонсгосноор хүчинтэй болох бөгөөд Эрүүгийн хэрэг хянан шийдвэрлэх тухай хуулийн 38.1 дүгээр зүйлийн 1, 38.2 дугаар зүйлийн 1 дэх хэсэгт зааснаар шүүгдэгч, хохирогч, тэдгээрийн өмгөөлөгч нар шийтгэх тогтоолыг эс зөвшөөрвөл гардан авснаас хойш, эсхүл энэ хуулийн 11.9 дүгээр зүйлд заасны дагуу хүргүүлснээс хойш 14 хоногийн дотор Баян-Өлгий аймгийн Эрүү, Иргэний хэргийн давж заалдах шатны шүүхэд давж заалдах гомдол гаргах, прокурор, дээд шатны прокурор эсэргүүцэл бичих эрхтэйг дурдсугай.

 

 

 

 

ДАРГАЛАГЧ ШҮҮГЧ                                   П.ДОРЖБАЛ