Баян-Өлгий аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Д.Азжаргал даргалж, нарийн бичгийн дарга Ц.Саранцэцэг, улсын яллагч М.Отгонжаргал, шүүгдэгч Д.П нарыг оролцуулан тус шүүхийн шүүх хуралдааны танхимд нээлттэй явуулж, Баян-Өлгий аймгийн прокурорын газраас Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар яллах дүгнэлт үйлдэж ирүүлсэн У овогт Ды Пид холбогдох 1713000000105 дугаартай эрүүгийн хэргийг хянан хэлэлцэв.

Шүүгдэгчийн биеийн байцаалт:

Шүүгдэгч: Монгол Улсын иргэн, У овгийн Ды П, 1991 оны 07 дугаар сарын 17-ны Баян-Өлгий аймгийн Ө суманд төрсөн, 26 настай, эрэгтэй, бүрэн дунд боловсролтой, мэргэжилгүй, эрхэлсэн тодорхой ажилгүй, Баян-Өлгий аймгийн Ө сумын  дүгээр багт оршин суух хаягтай, ам бүл 4, эхнэр 2 хүүхдийн хамт амьдардаг, улсаас авсан гавьяа шагналгүй, ухаан мэдрэл бүрэн, хэрэг хариуцах чадвартай, урьд ял шийтгүүлж байсан, РД:0000.

Шүүгдэгч Д.Пийн холбогдсон хэргийн талаар:

Шүүгдэгч Д.П нь согтууруулах ундааны зүйл хэрэглэсэн үедээ гэр бүлийн хүчирхийлэл үйлдэж 2017 оны 11 дүгээр сарын 14-ний өдөр Баян-Өлгий аймгийн Ө сумын ** дүгээр багт байдаг гэртээ эхнэр Б.Мийг зодож эрүүл мэндэд нь хөнгөн хохирол учруулсан гэмт хэрэгт холбогджээ.

ТОДОРХОЙЛОХ нь:

1. Шүүгдэгчийн гэм буруугийн талаар:

Шүүгдэгч Д.П нь Баян-Өлгий аймгийн Ө сумын 11 дүгээр багийн 1116 тоотод байрлах гэртээ, 2017 оны 11 сарын 14-ний өдөр, согтууруулах ундааны зүйл хэрэглэсэн үедээ хардалтын улмаас эхнэр Б.Мийн нүүрэн тус газар нь санаатайгаар хэд хэдэн удаа цохиж, зодон дээд эрүүний 1 үүдэн шүдийг нь  хугалж эрүүл мэндэд нь хөнгөн хохирол учруулсан болох нь хэрэгт авагдсан нотлох баримтууд болох:

• • Шүүгдэгч Д.Пийн шүүх хуралдааны хэлэлцүүлэг өгсөн: “... Би дахин ийм асуудал гаргахгүй тул надад хуулийн хөнгөлөлт үзүүлж өгөхийг хүсэж байна” гэх мэдүүлэг /шүүх хуралдааны тэмдэглэл/ болон мөрдөн байцаалтад өгсөн мэдүүлэг,
  • Хохирогч Б.Мийн мөрдөн байцаалтын шатанд өгсөн: “... 2013  гэр бүл  болсноос хойш Д.П байнга архи ууж ирэхээрээ унтахгүй үглээд гэр орны эд зүйлээ авч шидээд амгалан тайван байдлыг алдагдуулан зарим тохиолдолд миний биед гар хүрч зоддог байсан. ... уг өдөр гаднаас 20 цагийн үед байх согтуу орж ирээд гэртээ байж байгаад гадагшаа гараад хамтдаа бие засаж байсан. Тэгээд хүүхэд уйлж байхаар нь би гүйж гэртээ ороод санаандгүй гэрийн хаалгаа түгжсэн байсан. Нөхөр ирээд хаалга онгойлгоорой гэхээр нь хаалга онгойлгож өгөхөд “чи яагаад хаалга цоожлоод байгаа юм бэ” гээд шууд миний уруул тус газар гараараа хоёр гурван удаа цохисон юм. Тэр үед миний доод дээд уруул хавдсан мөн зүүн нүүр орчим бүхэлдээ хавдаж дээд эрүүний нэг үүдэн шүд эмтэрсэн байсан” гэх мэдүүлэг /хх-ийн 19-20 дугаар хуудас/,
  • Баян-Өлгий аймгийн Шүүхийн шинжилгээний албаны шинжээчийн 2017 онысарын 17-ны өдрийн №465 дугаартай дүгнэлтэд: “... Иргэн Б.Мийн биед дээд уруул хавантай, дотор салс нь шархтай, дээд эрүүний 1 үүдэн шүд эмаль /цөгц/ нь хугарсан, доод уруул хавантай, дотор салстад шархтай, зүүн нүүрэнд битүү хавантай, цус хуралттай, хамрын нурууны хуучин мурийлттай, битүүрэлттэй зэрэг зөөлөн эдийн бэртэл гэмтэл тогтоогдлоо. Иргэн Б.Мийн биед үүссэн гэмтэл нь эрүүл мэндийг түр сарниулах, гэмтлийн зэрэг тогтоох журмын 2.4 заалтыг агуулах гэмтлийн хөнгөн зэрэгт хамаарах гэмтэл болно” /хх-ийн 28 дугаар хуудас/ зэргээр нотлогдон тогтоогдож байна.

Шүүхийн хэлэлцүүлэгт шинжилсэн дээрх нотлох баримтууд нь энэ хэрэгт хамааралтай, Эрүүгийн хэрэг хянан шийдвэрлэх тухай хуульд заасан журмын дагуу цуглуулж бэхжүүлсэн, уг нотлох баримтуудыг үгүйсгэх нотлох баримт хэрэгт авагдаагүйн дээр шүүгдэгч нь өөрийн гэм бурууг хүлээн зөвшөөрч байгаагаар давхар нотлогдож байх тул энэ хэргийг хянан шийдвэрлэхэд хангалттай гэж шүүх үнэллээ.

Шүүгдэгч Д.Пийн үйлдэл нь Эрүүгийн хуулийн тусгай ангийн 11.6 дугаар зүйлийн 2 дахь хэсэгт заасан гэмт хэргийн шинжийг бүрэн хангаж байх тул түүнийг “Гэр бүлийн хүчирхийлэл үйлдэх хүндрүүлэх нөхцөл байдалтайгаар хүний эрүүл мэндэд хөнгөн хохирол учруулсан” гэмт хэргийг үйлдсэн гэм буруутайд тооцох үндэслэлтэй гэж дүгнэлээ.

 Уг гэмт хэргийн улмаас хохирогч Б.Мийн эрүүл мэндэд хөнгөн гэмтэл учруулсан, мөрдөн байцаалтын шатанд хохирогч нь шүүгдэгчээс нэхэмжлэх зүйлгүй гэсэн байх тул уг тогтоолоор шүүгдэгчийг бусдад төлөх төлбөргүй гэж үзлээ.

2. Шүүгдэгчид эрүүгийн хариуцлага хүлээлгэх тухай:

Шүүх хуралдаанаар шинжлэн судлагдсан баримт болон хэрэгт авагдсан шүүгдэгчийн хувийн байдлыг тодорхойлсон баримтуудыг үндэслэн шүүгдэгч Д.Пид эрүүгийн хариуцлага хүлээлгэхдээ анх удаа гэмт хэрэг үйлдсэн, үйлдсэн гэмт хэрэгтээ гэмшсэн, гэм буруугаа хүлээн зөвшөөрсөн зэрэг Эрүүгийн хуулийн ерөнхий ангийн 6.5 дугаар зүйлийн 1.1, мөн зүйлийн 3 дахь хэсэгт заасны дагуу ял хөнгөрүүлэх нөхцөл байдлыг харгалзан үзэх нь зүйтэй байна.

Иймд шүүгдэгч Д.Пийн үйлдсэн гэмт хэргийн шинж, хохирол, гэмт хэрэг үйлдсэн нөхцөл байдал, эрүүгийн хариуцлага хөнгөрүүлэх нөхцөл байдал, ажил хөдөлмөр эрхлэлт, хөрөнгө орлого зэрэг шүүгдэгчийн хувийн байдлыг харгалзан түүнд Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар нийтэд тусгай ажил хийлгэх ялаар шийтгэж, эрүүгийн хариуцлага хүлээлгэхээр шийдвэрлэв.

Энэ гэмт хэргийн улмаас шүүгдэгч Д.П нь цагдан хоригдсон хоног бусдад төлөх төлбөргүй, түүнээс гаргуулах хэрэг хянан шийдвэрлэх ажиллагааны зардалгүй, эд мөрийн баримтаар хураагдсан зүйлгүйг дурдах нь зүйтэй. Шүүгдэгч нь бусдад төлөх төлбөргүй тул түүний эзэмшлийн “Nokia” маркийн гар утсыг битүүмжилсэн прокурорын тогтоолыг хүчингүй болгох нь зүйтэй байна.

Шүүгдэгч Д.Пид хувийн баталгаа гаргах таслан сэргийлэх арга хэмжээ авагдсан бөгөөд шийтгэх тогтоол хуулийн хүчин төгөлдөр болтол хэвээр үргэлжлүүлж, хэргийн хамт ирүүлсэн шүүгдэгчийн хувийн бичиг баримтыг өөрт нь буцаан олгох нь зүйтэй.

Эрүүгийн хэрэг хянан шийдвэрлэх тухай хуулийн 36.1, 36.2, 36.6, 36.7, 36.8, 36.10 дугаар зүйлүүдийг заасныг тус тус удирдлага болгон

ТОГТООХ нь :

1. Шүүгдэгч У овогт Ды Пийг “Гэр бүлийн хүчирхийлэл үйлдэххүндрүүлэх нөхцөл байдалтайгаар хүний эрүүл мэндэд хөнгөн хохирол учруулсан” гэмт хэрэг үйлдсэн гэм буруутайд тооцсугай.
2. Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар шүүгдэгчД.Пийг 240 /хоёр зуун дөчин/ цагийн нийтэд тусгай ажил хийлгэх ялаар шийтгэсүгэй.
3. Эрүүгийн хуулийн ерөнхий ангийн 5.4 дугаар зүйлийн 2 дахь хэсэгт зааснаар шүүгдэгчД.Пид оногдуулсан нийтэд тусгай ажил хийлгэх ялыг өдөрт 4 цагаар тогтоосугай.
4. Эрүүгийн хуулийн ерөнхий ангийн 5.4 дугаар зүйлийн 4 дэх хэсэгт зааснаар шүүгдэгчД.П нь нийтэд тусгай ажил хийлгэх ялыг биелүүлээгүй тохиолдолд хорих ялаар солихыг анхааруулсугай.
5. Энэ хэрэгт эд мөрийн баримтаар хураагдсан зүйлгүй,  шүүгдэгч нь цагдан хоригдоогүй,бусдад төлөх төлбөргүй, хэрэг хянан шийдвэрлэх ажиллагааны зардалгүй болохыг тус тус дурдсугай.
6. Шийтгэх тогтоол хүчин төгөлдөр болтол шүүгдэгч Д.Пид урьд авсан хувийнбаталгаа гаргах таслан сэргийлэх арга хэмжээг хэвээр үргэлжлүүлсүгэй.
7. Шийтгэх тогтоол хүчин төгөлдөр болмогц шүүгдэгч Д.Пийн эрүүл мэндийндаатгалын гэрчилгээг өөрт нь буцаан олгож, түүний эзэмшлийн “Nokia x-1” маркийн гар утсыг битүүмжилсэн прокурорын тогтоолыг хүчингүй болгосугай.
8. Шийтгэх тогтоол нь уншин сонсгосноор хүчинтэй болох бөгөөд шүүгдэгч, хохирогч,тэдний өмгөөлөгч, хууль ёсны төлөөлөгч нар эс зөвшөөрвөл гардан авснаас хойш 14 хоногийн дотор Баян-Өлгий аймгийн Эрүү, Иргэний хэргийн давж заалдах шатны шүүхэд гомдол гаргах, улсын яллагч, дээд шатны прокурор эсэргүүцэл бичих эрхтэйг дурдсугай.

ДАРГАЛАГЧ ШҮҮГЧ                                   Д.АЗЖАРГАЛ