МОНГОЛ УЛСЫН НЭРИЙН ӨМНӨӨС

Орхон аймаг дахь Сум дундын эрүүгийн хэргийн анхан шатны шүүхийн шүүх хуралдааныг шүүгч Ц.Алтангадас даргалж

Шүүх хуралдааны нарийн бичгийн дарга Ч.Буяндэлгэр

Улсын яллагч Ц.И

Хохирогч О.Т

Шүүгдэгч Д.Б нарыг оролцуулан Орхон аймгийн Прокурорын газраас Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн Д.Б-д холбогдох эрүүгийн 1725003580207 дугаартай хэргийг тус шүүхийн танхимд нээлттэй хянан хэлэлцэв.

 

1. Шүүгдэгчийн биеийн байцаалт.

 

Д.Б

 

2. Шүүгдэгчийн холбогдсон хэргийн талаар.

 

Шүүгдэгч Д.Б нь 2017 оны 10 сарын 31-ний өдрөөс 2017 оны 11 сарын 01-ний өдөр шилжих шөнө Орхон аймгийн Баян-Өндөр сумын Зэст багийн 1-5 дугаар байрны ард талын автомашины зогсоол дээр О.Т-г зодож эрүүл мэндэд нь хөнгөн хохирол учруулсан гэмт хэрэгт холбогджээ.

 

ТОДОРХОЙЛОХ нь:

 

Шүүх хуралдааны хэлэлцүүлэгт хавтаст хэрэгт авагдсан дараахь нотлох баримтуудыг шинжлэн судлав. Үүнд:

 

1. Хохирогч О.Т-н “2017 оны 10 сарын 31-ний өдөр найз М-н  төрсөн өдөр болсон юм. Тэгээд бид нар найзуудаараа уулзаад төрсөн өдөр дээр М-н  найзууд болох танихгүй залуучууд ирсэн юм. Миний таньдаг найзуудаас Х   , Б , М  3 ирсэн юм. Тэгээд бид нар нэг газар орж сууцгаасан. Тэндээсээ хоёр тийшээ салаад М  нь найзуудаа аваад явсан юм. Х   , Б , М  бид дөрөв манай гэрийн гадаа Х   гийн машинтай ирсэн. Тэгээд би гэр рүүгээ орох гэж яваад хэсэг бүлэг залуучуудтай маргалдсан. Яг юунаас болж маргалдсан гэдгийг сайн санахгүй байна. Нэг мэдэхэд өндөр биетэй бор залуу нь миний нүүрэн тус газар руу хоёроос гурван удаа цохисон. Нүүрээ дараад доошоо тонгойх үед нүүр рүү өшиглөсөн. Тэгээд би найз Х   гийн машинд суугаад зугтаасан юм. Бид нар байр тойроод буцаад ирэхэд Б  1-5 дугаар байрны ард зогсоол дээр байж байсан Тэгээд бид нар Б г аваад байж байтал эргүүлийн цагдаатай тааралдсан” гэсэн мэдүүлэг. /хх-ийн 15-р хуудас/ 2. Орхон аймгийн шүүхийн шинжилгээний албаны шинжээчийн 2017 оны 11 дүгээр сарын 02-ны өдрийн 928 дугаартай дүгнэлтэд: “О.Т-н биед учирсан баруун нэг, зүүн нэг, хоёр дугаар шүднүүдийн хугарал нь гэмтлийн зэргийн зааврын 2.4.1-д зааснаар гэмтлийн хөнгөн зэрэгт хамаарна” гэсэн дүгнэлт. /хх-ийн 19-р хуудас/ 3. Гэрч П.Б гийн “Түмээ тэр залуучуудыг яасан ахын дүү гэсэн чинь ахын дүү гэнэ ээ гээд Түмээг цохиод авахаар нь би салгах гээд очсон. Тэгээд юу болсныг сайн мэдэхгүй байна. Би нүүрэн тус газраа цохиулаад ухаан алдсан байсан” гэсэн мэдүүлэг. /хх-ийн 24-р хуудас/ 4. Гэрч Э.Ариунболдын “Тэгсэн чинь Бариахаан нөгөө залуугийн нүүрэн тус газар руу хоёр удаа цохисон” гэсэн мэдүүлэг. /хх-ийн 30-р хуудас/ 5. Гэрч Ц.П-н “Миний харснаар Барианхаан нь Т-н  нүүрэн тус газар руу хоёр удаа цохисон” гэсэн мэдүүлэг. /хх-ийн 31-р хуудас 6. Шүүгдэгч Д.Б яллагдагчаар өгсөн “Би тэр залууг зөрүүлээд нүүрэн тус газар хоёр удаа цохисон чинь доошоо тонгойгоод улмаар зугтаагаад явсан. Би ганцаараа л Т-г  зодсон” гэсэн мэдүүлэг /хх-ийн 4-р хуудас/ болон ял шийтгэгдсэн эсэхийг шалгах хуудас /хх-н 36-р хуудас/ зэрэг нотлох баримтуудыг шинжлэн судлав.

 

            Шүүх хуралдааны хэлэлцүүлэгт шүүгдэгч Д.Б мэдүүлэхдээ “мэдүүлэг өгөхгүй, гэм буруугаа хүлээн зөвшөөрч байна” гэв.

 

Хохирогч О.Т мэдүүлэхдээ: Миний үүдэн 3 шүд хугарсан. Тархиндаа зөөлөн эдийн гэмтэлтэй гэж гарсан. Уг нь 5 сая гаруй төгрөгийн зардал гарсан. Д.Б-тай тохиролцоод 3 500 000 төгрөг нэхэмжилсэн. 3000 000 төгрөгийг надад өгсөн байгаа. Үлдэгдэл 500 000 төгрөгөө шүүх хуралдаанаас өмнө өгнө гээд өгөөгүй учир шүд хийлгэх мөнгө болох 2 800 000 төгрөгөө нэхэмжилж байна гэв”

 

Шүүх хуралдаанд оролцсон улсын яллагч дүгнэлтдээ “Шүүгдэгчийн гэм буруу хавтаст хэрэгт авагдсан хохирогч, гэрчүүдийн мэдүүлэг, шүүх эмнэлэгийн дүгнэлтээр нотлогдож тогтоогдсон. Өөрөө гэм буруугаа хүлээн зөвшөөрч байгаа. Иймд түнийг гэм буруутайд тооцож Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 600 цагийн нийтэд тустай ажил хийлгэх ял шийтгэх саналтай байна” гэв.

Шүүхийн хэлэлцүүлгийн үед шинжилсэн нотлох баримтууд нь энэ хэрэгт хамааралтай, хуульд заасан журмаар цугларсан, хэрэг хянан шийдвэрлэхэд хангалттай гэж үзэв. Шүүгдэгч Д.Б нь 2017 оны 10 сарын 31-ний өдрөөс 2017 оны 11 сарын 01-ний өдөр шилжих шөнө Орхон аймгийн Баян-Өндөр сумын Зэст багийн 1-5 дугаар байрны ард талын автомашины зогсоол дээр О.Т-г зодож эрүүл мэндэд нь хөнгөн хохирол учруулсан гэмт хэргийг үйлдсэн гэм буруутай болох нь шүүгдэгчийн мэдүүлэг, хохирогч О.Т-н мөрдөн байцаалтын шатанд болон шүүхийн хэлэлцүүлэгт өгсөн мэдүүлэг, шүүх шинжилгээний албаны 928 дугаартай шинжээчийн дүгнэлт, гэрч П.Б , Э.Ариунболд, Ц.Пүрэвсүрэн нарын мэдүүлэг, ял шийтгэлийг шалгах хуудас болон хэрэгт цугларч шүүхийн хэлэлцүүлэгт шинжлэн судлагдсан бичгийн бусад нотлох баримтуудаар хангалттай нотлогдон тогтоогдож байна. Шүүгдэгч Д.Б-ы үйлдэл нь Эрүүгийн хуулийн тусгай ангийн 11.6 дугаар зүйлийн 1- д заасан гэмт хэргийн бүрэлдэхүүний шинжийг бүрэн хангаж байх тул түүнийг хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцож, эрүүгийн хариуцлага хүлээлгэх үндэслэлтэй гэж дүгнэв.

 

Шүүгдэгч нь анх удаа гэмт хэрэг үйлдсэн, учруулсан хохирлоо төлсөн зэргийг хөнгөрүүлэх нөхцөл байдалд тооцож түүнд торгох ялыг сонгон хэрэглэх нь зүйтэй гэж үзлээ. Хохирогч О.Т нь шүүгдэгчээс нийт 5 800 000 төгрөгийг нэхэмжлэлийн шаардлага гаргаж, шүүгдэгчийн төлсөн 3 000 000 төгрөгийг хасч шүд хийлгэх эмчилгээний төлбөр болох 2 800 000 төгрөгийг нэхэмжилсэн байна. Нэхэмжлэлийн шаардлагатай холбоотой нотлох баримт хангалтгүй, шүүх хуралдаанаар шийдвэрлэх боломжгүй байх тул хохирогч нотлох баримтаа бүрдүүлж иргэний журмаар нэхэмжлэх нь зүйтэй.

Энэ хэрэгт эд мөрийн баримтаар хураагдсан зүйлгүй, битүүмжилсэн хөрөнгөгүй, шүүгдэгч нь цагдан хоригдоогүй, түүний иргэний бичиг баримт шүүхэд ирээгүй болно.

 

 Эрүүгийн хэрэг хянан шийдвэрлэх тухай хуулийн 36.2, 36.4, 36.6, 36.7, 36.8, 36.10 дугаар зүйлүүдэд тус тус заасныг удирдлага болгон

 

ТОГТООХ нь:

 

1. Шүүгдэгч Ш овогт Д-ийн Б-ыг хүний эрүүл мэндэд хөнгөн хохирол учруулсан гэмт хэргийг үйлдсэн гэм буруутайд тооцсугай.

 

2.Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Д.Б-ыг 600 нэгжтэй тэнцэх хэмжээний төгрөгөөр буюу 600 000 /зургаан зуун мянга/ төгрөгөөр торгох ялаар шийтгэсүгэй.

3.Эрүүгийн хуулийн ерөнхий ангийн 5.3 дугаар зүйлийн 4, 5-д зааснаар шүүгдэгч Д.Б-д оногдуулсан торгох ялыг 6 сарын хугацаанд хэсэгчлэн төлүүлэхээр тогтоож, торгох ялыг биелүүлэхгүй бол хорих ялаар солихыг анхааруулсугай.

 

4.Шийтгэх тогтоол хүчин төгөлдөр болтол шүүгдэгч Д.Б-д урьд авсан хувийн баталгаа өгөх таслан сэргийлэх арга хэмжээг хэвээр үргэлжлүүлсүгэй.

 

5 Энэ хэрэгт эд мөрийн баримтаар хураагдсан зүйлгүй, битүүмжилсэн хөрөнгөгүй, шүүгдэгч нь цагдан хоригдоогүй, бусдад төлөх төлбөргүй, түүний иргэний бичиг баримт шүүхэд ирээгүй, хохирогч эмчилгээний зардлаа нотлох баримтаа бүрдүүлж иргэний журмаар нэхэмжлэх эрхтэй болохыг тус тус дурьдсугай.

 

6.Шийтгэх тогтоол уншин сонсгосноор хүчинтэй болох бөгөөд шүүгдэгч, хохирогч, тэдний өмгөөлөгч, хууль ёсны төлөөлөгч нар эс зөвшөөрвөл шийтгэх тогтоолыг гардан авснаас хойш 14 хоногийн дотор Орхон аймгийн Эрүүгийн хэргийн давж заалдах шатны шүүхэд давж заалдах гомдол гаргах, улсын яллагч, дээд шатны прокурор эсэргүүцэл бичих эрхтэй.

 

 

 

 

ДАРГАЛАГЧ,ШҮҮГЧ Ц.АЛТАНГАДАС